Mi sa on sè, non a-y sé Sara *, ka èspliké : « An sé on moun ki timid é an pa gè ni konfyans adan mwen. Kifè, an pa’a santi-mwen tèlman alèz lè an èvè moun ki ni onlo konfyans adan yo é ki on jan ka vougaré moun. Pawkont, lè an èvè on moun ki dous é ki ni imilité, an ka santi-mwen byen. An pé wouvè tchè an mwen ba-y, di-y sa an ka rèsanti é palé èvè-y dè pwoblèm an mwen. Sé konsa méyè zanmi an mwen yé. »

Sa Sara sòti di la ka montré kè lè on moun dous, toutmoun ka anvi ay owa-y. Kalité-lasa sé on kalité ki ka fè Jéova plézi. Adan Pawòl a-y nou ka touvé ankourajman-lasa : « abiyé-zòt [...] èvè dousè » (Kol. 3:12). Dousè, ka sa yé ? Kijan Jézi aji èvè dousè ? É kijan kalité-lasa pé rann vi an nou pi bèl ?

On moun ki dous sé on moun ki pa enmé ni pwoblèm èvè moun. I ka fè atansyon a jan i ka aji èvè lézòt, i janti èvè yo é i ka rété kalm lèwvwè yo ka fè oben lè yo ka di on biten ki ka énèwvé-y.

Adan Labib, mo grèk la yo tradui é ki bay dousè, sé on mo yo té ka itilizé pou palé dè on chouval sovaj yo drésé. Menmsi yo drésé chouval-la, i pa’a pèd fòs a-y. I toujou ni menm fòs-la i té ni la. Menmjan-la, on moun ki ni dousè a pa on moun ki fèb. Okontrè, sé on moun ki fò. Poukwa nou pé di sa ? Pas magré i enpawfè, i ka rivé métrizé-y é i ka fè tousa i pé pou i antann-li byen èvè lézòt.

Pétèt nou ka di an tchè an nou : « Mwenmenm an mwen, an pa on moun ki dous. » Konm alantou an nou ni onpakèt moun ki enmé vougaré moun é ki pa ni pasyans, nou pé rivé a ni dimal a aji èvè dousè (Wom. 7:19). Sé pousa, fò nou fè bon éfò pou nou ni plis dousè. Men, lèspri sen a Jéova ké édé-nou a kontinyé fè éfò pou nou aji èvè dousè (Gal. 5:22, 23). Poukwa fò-nou fè éfò pou nou ni plis dousè ?

Lè on moun dous, lézòt enmé vin owa-y. Kon Sara té ka di talè la, nou ka santi-nou pi alèz lèwvwè nou èvè on moun ki dous é ki janti. Adan domenn-lasa, Jézi ka ban-nou on bèl ègzanp toubònman ! (2 Kor. 10:1). Menm lè sé timoun-la pa té konnèt-li byen, yo té byen enmé rété èvè-y (Mawk 10:13-16).

Dousè sé on kalité ki ka pwotéjé ki nou, ki moun ki alantou an nou. Si nou sé on moun ki dous, nou pé’é fè kòlè fasil é nou pé’é vougaré  ponmoun nonplis (Pwov. 16:32). Sa ké anpéché-nou fè lézòt ditò, nou pé’é fè ponmoun nou enmé soufè é konsa nou pé’é ni a règrété sa apré. Anplisdisa, si nou sé on moun ki dous, nou ka pwotéjé moun ki alantou an nou pas si nou ka métrizé-nou, nou pé’é fè ayen ki ké fè-yo mal.

Jézi té ni onlo gwo rèsponsabilité é i té ni plen biten a fè, men magrésa, i té dous èvè toutmoun. A épòk a-y, ni onlo moun ki té ka toufé anba pwoblèm é yo té ka pòté on chaj ki lou ; sé pousa yo té bizwen on moun pou rékonfòwté-yo. A pa ti kontan yo dwèt té kontan lè Jézi di-yo : « Vin owa mwen, [...] pas an dous é an ni imilité » ! (Mat. 11:28, 29).

Jézi sé té on moun ki té dous, ka nou pé fè pou vin kon-y ? Pousa, fò-nou étidyé Labib pou nou vwè kijan i té ka aji èvè lézòt é kijan i té ka fè lè i té adan on sitiyasyon ki rèd. Apré, lè nou douvan on sitiyasyon ki ka mèt dousè an nou a léprèv, fò-nou fè éfò pou aji kon Jézi (1 Pyè 2:21). An-nou palé dè 3 biten ki édé Jézi aji èvè dousè.

Imilité a Jézi té ka sòti an fon a tchè a-y. Jézi limenm a-y di kè ‘i té dous é kè i té ni imilité an fon a tchè a-y’ (Mat. 11:29, nòt). Labib ka mèt sé 2 kalité-lasa ansanm pas yonn pa k’ay san lòt (Éféz. 4:1-3). Poukwa sa ?

On moun ki ni imilité pa’a mèt an tèt a-y kè i ni plis valè ki lézòt é i pa sisèptib nonplis. Sé moun-la té ka di kè Jézi sé té ‘on agoulou-granfal é on bwasonè’. Kijan Jézi té ka réyaji lè i té ka tann sa ? I lésé konpòwtèman a-y palé an plas a-y pou montré kè sé manti sé moun-la té ka manti é èvè onlo dousè mi sa i di : « sé sèlon sa on moun ka fè ou ka vwè si i ni sajès » (Mat. 11:19).

Si on moun hay madanm oben hay misyé é kè i ka di-w bétiz akòz dè sa, fè éfò pou réponn-li èvè dousè. Fè menm biten si i ka malpalé ras a-w oben koté-la ou sòti la. Mi sa Peter, on ansyen ki ka viv an Afrik di Sid ka èspliké : « Lè on moun ka di on biten ki pa’a fan’an plézi, an ka pozé-mwen kèsyon-lasa : “kijan Jézi té’é réyaji ?” » Mi sa i ka ajouté : « Konnyéla an sav kè fò pa an ban-mwen twòp grad. »

Jézi té sav kè lézòm enpawfè. Disip a-y té vé fè sa ki byen, men konm yo té enpawfè, dépawfwa yo pa té ka rivé fè sa. Pa ègzanp, avan jou-la i mò la, lavèy oswa, Jézi té mandé Pyè, Jak é Jan pa dòmi, pou yo té pé ba-y soutyen-la i té bizwen la. Malérèzman, yo pa rivé tchenbé. Men Jézi té ka konprann kè ‘menmsi lèspri-la byen anvi, chè-la fèb’ (Mat. 26:40, 41). Konm i té sav yo enpawfè, i pa fè kòlè èvè apòt a-y.

Mandy sé on sè ki té ka kritiké lézòt onlo avan. Men aprézan, i ka fè onlo éfò pou aji èvè dousè kon Jézi té ka fè. Mi sa i ka di : « An ka fè éfò mwen sonjé kè noutout enpawfè é an ka éséyé konsantré-mwen asi bèl kalité a lézòt kon Jéova ka fè-y. » Jézi toujou té ka sonjé kè lézòm enpawfè, kifè, i té ka aji èvè onlo konpasyon épi yo. Lè ou ka sonjé ègzanp a Jézi, ès sa pa’a édé-w aji èvè lézòt épi dousè osi ?

Jézi té ka lésé toutbiten an men a Jéova. Lè Jézi té asi latè, menm lè yo té ka mal aji èvè-y, i té ka sipòté sa. Yo té ka mal jijé-y, yo té ka méprizé-y é yo té ka fè-y bon atrosité. Magrésa, i toujou rété dous pas « i té ka mèt toutbiten an men a sila ki ka jijé èvè jistis » (1 Pyè 2:23). Jézi té sav kè Pap’a-y té’é toujou édé-y andiré é kè i té’é pini séla ki té ka fè-y méchansté la.

Si yo ka aji èvè nou on mannyè ki pa jis é kè nou ka fè gwo kòlè akòz dè sa, sitiyasyon-la pé vin pi grav ankò. Sé pousa mi sa Labib ka fè-nou sonjé : « Lè on nonm kòlè, i pa ka aji annakò èvè jistis a Bondyé » (Jak 1:20). Menmsi nou an rézon an nou lè nou kòlè, konm nou enpawfè, nou pé rivé a mal réyaji.

Cathy sé on sè ki ka viv an Almagn. Mi sa i té ka di avan : « Si ou pa défann-vou voumenm a-w, a pa ponmoun ki ké fè-y ba-w. » Men lè i aprann mèt konfyans a-y an Jéova, i pa té ka aji konsa ankò. Mi sa i ka èspliké : « Avan, an té toujou paré a réponn chou pou chou, men konnyéla, an pa’a fè sa ankò. An ka réyaji èvè dousè pas an sav kè Jéova ké réparé tout pwoblèm ki ni an mond-lasa. » Si yo fè-w  on kras, fè kon Jézi : fè Bondyé konfyans. Sa ké édé-w aji èvè dousè.

Jézi anségné kè pou tchè a on moun kontan, fò moun-lasa dous. Mi sa i di : « Tchè-kontan pou moun karaktè a yo dous » (Mat. 5:5). Gadé kijan dousè ka édé-w adan sé sitiyasyon-la nou kay vwè konnyéla la.

Lè ni pwoblèm adan on mennaj, dousè ka ranjé sitiyasyon-la. Mi sa Robert, on frè ki ka viv an Òstrali ka rèkonnèt : « An di madanm an mwen onpakèt vyé pawòl ki fè-y mal toubònman. A pa sa an té ka pansé vréman, men dépi koud lang-la pati pa ni mwayen fè dèyè ! A pa ti lapenn sa fè-y lapenn ! É lè an vwè sa, sa raché tchè an mwen ! »

‘Pli souvan ki rarman, noutout ka fè érè’ lè nou ka palé. É lè nou ka palé san réfléchi, sa pé mèt pwoblèm adan mennaj an nou (Jak 3:2). Lè sa ka rivé, si nou ni labitid aji èvè dousè, nou ké rété kalm é nou ké fè atansyon a sa nou ka di (Pwov. 17:27).

Robert fè onlo éfò pou i té aprann métrizé-y é rété kalm. Ki rézilta sa bay ? Mi sa i ka di : « Konnyéla, dépi ni on ti bab antrè mwen é madanm an mwen, an ka fè éfò pou an pran tan kouté-y, pou an palé jantiman ba-y é pou an pa énèwvé-mwen. Konnyéla, nou ka viv lontan pibyen ! »

Dousè ka édé-nou antann-nou pibyen èvè lézòt. Moun ki sisèptib pa gè ni zanmi. Pawkont, lè on moun ni dousè, sa ka édé-y rété anpé èvè lézòt (Éféz. 4:2, 3). Talè-la nou palé dè Cathy. Mi sa i ka di : « An ka rann-mwen kont kè lè an èvè ondòt moun, sa toujou ka pasé byen si an ka aji èvè dousè, menmsi moun-lasa ni on vyé karaktè. »

Dousè ka édé-nou trankilizé lèspri an nou. Adan Labib, dousè é lapé lyanné èvè « sajès-la ki ka sòti anhola » (Jak 3:13, 17). On moun ki dous ni on « tchè ki kalm » (Pwov. 14:30). Martin fè onlo éfò pou i té vin dous é mi sa i ka di : « Konnyéla, an pa karé kon avan, é an pa’a vougaré moun ankò. Lèspri an mwen trankil é tchè an mwen pi kontan ankò. »

Sé vré, pétèt nou ké oblijé fè onlo éfò pou vin on moun ki dous. Mi sa on frè ka di : « An pa’a manti ba zòt, dépawfwa, tèlman an égri, an kon lèt si difé. » Men Jéova ka ankourajé-nou a fè éfò pou vin pi dous é i ka édé-nou menné konba-lasa (Iz. 41:10 ; 1 Tim. 6:11). I pé ‘fin fòwmé-nou’ é i ké ‘rann-nou fò’ (1 Pyè 5:10). Si nou fè tousa nou vwè la, nou ké fè kon lapòt Pòl, nou ké imité « dousè a Kris é bonté a-y » (2 Kor. 10:1).