E kabwarabwaraa ni kangai Sara: * “I mamaamaa ao I aki onimakina au konabwai. Ngaia are I mwengabuaka i rarikia aomata aika imanono ao a unun. Ma I mwengaraoi i rarikin te aomata ae nimamannei ao e nanorinano. I kona ni kaotii au namakin nakoina ao n taekin au kangaanga. A nimamannei ao n nanorinano raoraou ni kaan.”

E kaotaki n ana taeka Sara bwa ti tatangiraki irouia aomata ngkana ti nimamannei. E kukurei naba Iehova iai. E kaungaira ana Taeka ni kangai: “Karina i aomi . . . te nimamannei.” (IKoro. 3:12) Tera te nimamannei? E kangaa Iesu ni kaotiota te nimamannei? Ao ti na kangaa ni kukurei riki ni bwainan te aroaro aei?

Te nimamannei e rereke iroun te aomata ae rau. Te aomata ae nimamannei e aamarau ao e akoi nakoia aomata, ao e kona n taotaona nanona ao n aki un ngkana a riki baika kaun.

Tiaki nanona bwa e mamaara te aomata ae nimamannei. E kamanenaaki te taeka ni Kuriiti ibukin “nimamannei” ni kabwarabwaraaki iai te aoti ae moaanti ae e a tia ni kamananaaki. E boni korakora te aoti anne, ma e kataneiaaki bwa e na taua aroni korakorana. N aron anne, ngkana ti nimamannei ti taua aron ara namakin ni kan unun, ao ti kateimatoa te rau i marenara ma aomata.

Ti kona ni kangai: ‘Tiaki anuau te nimamannei.’ Ti a maeka n te aonnaba ae e taabangaki iai te unun ao te aki taotaonakinnano, ngaia are e kona ni kangaanga kaotiotan te nimamannei. (IRom 7:19) E teretere bwa e kainnanoaki te kakorakora ibukini karikirakean te nimamannei, ma e na buokira taamnein Iehova ni kamatoai nanora bwa ti na roko n tiara anne. (IKar. 5:​22, 23) E aera bwa ti riai ni kakorakoraira ni karikirakea te nimamannei?

Te nimamannei bon te aroaro ae tatangiraki irouia aomata. N aron Sara are taekinaki mai eta, ti kani memena i rarikin te aomata ae nimamannei. Iesu bon te katoto ae rianako ibukin te nimamannei ao te akoi. (2Kor. 10:1) A kani memena naba i rarikina ataei, e ngae ngke a aki kinaa raoi.​—Mareko 10:​13-16.

Ti kamanoaki n te nimamannei n ikotaki ma aomata ake i rarikira. Ngkana ti nimamannei, e  na aki waekoa ni maraki nanora ke n roko unra. (TaeRab. 16:32) Ti na bon aki ngkanne kammaraka temanna, moarara riki te aomata ae ti tangiria, ao n uringaaba imwina. Ao a kamanoaki naba aomata ake i rarikira ibukina bwa ti na aki kammarakiia ngkai ti taotaona unra.

E ngae ngke e rangi ni bati taben Iesu, ma e bon nimamannei nakoia aomata nako. A bati aomata ake n ana bong aika korakai ao n rawawata, ao a kainnanoa motikan rawaia. Ai kabebeteakira ngaiia ngke e kangai Iesu nakoia: “Nakomai nakoiu . . . bwa I nimamannei ao I nanorinano”!​—Mat. 11:​28, 29.

Ti na kangaa ni karikirakea te nimamannei are e kaotiotia Iesu? Ti ukeuke n reirei n Ana Taeka te Atua bwa ti aonga n ataa aron Iesu n reitaki ma aomata ao arona nakoni kangaanga. Ao ngkana ti kaaitara ma kangaanga aika e kataaki iai nimamanneira, ti kakorakoraira ni katotonga Iesu. (1Bet. 2:21) Iangoi baika tenua ake e buokaki iai Iesu ni bwaina te nimamannei.

E nanorinano Iesu. E taekinna Iesu bwa e “nimamannei ao [e] nanorinano.” (Mat. 11:29) E kaai n taekin aroaro aikai ni kauoua te Baibara ibukina bwa a rangi n irekereke. (IEbe. 4:​1-3) Bukin tera?

E buokira te nanorinano bwa ti na aki kakaiun ke ni maraki nanora ni baike a taekin ibukira aomata. Tera aron Iesu nakoia naake a kabuakakaa n taku bwa e “buabeka” ao “te tia ninim wain”? E kaota kairuan te bukibuki anne n aroaroni maiuna, ao e nimamannei n taekinna bwa “e kakoauaaki wanawanan te aomata man ana mwakuri aika raraoi ake e karaoi.”​—Mat. 11:19.

Ngkana iai ae e taetae n aki akaka ibukin am reeti, arom, ke am katei, e aera bwa ko aki kakorakorako ni kaeka ma te nimamannei? E taku Peter ae te unimwaane n te ekaretia i Aberika Maiaki: “Ngkana e maraki nanou n ana taeka temanna, I titirakinai ni kangai, ‘E na tera aron Iesu iai?’” E reitia n taku: “I a rabakau arou n aki kakaiun.”

E ataia Iesu bwa a aki kororaoi aomata. A raoiroi nanoia taan rimwin Iesu, ma n tabetai a aikoa kakaraoi baika raraoi ibukin aki kororaoia. N te katoto, n te tairiki are imwaini maten Iesu, a aki teimatoa n tantani Betero, Iakobo, ao Ioane, n aron are e butiia Iesu. Ma e ataia Iesu ae “e bon ingainga te nano, ma e mamaara te rabwata.” (Mat. 26:​40, 41) E aki un Iesu irouia ana abotoro ibukina bwa e ataia ae a aki kororaoi.

Mandy bon te tari te aine ae titiribure ngkoa, ma e a kakorakoraa ngkai ni kakairi n ana katoto Iesu ae te nimamannei. E taku, “I kataia ni butimwaea aki kororaoia aomata n itera nako, ao n tatarai raoiroia, ae te bwai ae e bon noria raoi Iehova.” E kona aron Iesu ae nanoangaiia aomata ibukin aki kororaoia ni buokiko naba bwa ko na nimamannei nakoia tabemwaang?

E katikui bwaai ni kabane Iesu i nanoni bain te Atua. E nanomwaaka Iesu i aan te ribuaka ni menana i aon te aba. E kabuakakaaki, e riribaaki, ao e kammarakaki. Ma e ngae n anne, e teimatoa n nimamannei ibukina bwa e “anga ngaia nakon Teuare motikitaeka n te eti.” (1Bet. 2:23) E ataia Iesu ae e na bon tabeakinna Tamana are i karawa ao ni katuuaaeia taan ribuaka n te tai ae riai.

Ngkana ti un ao ti kataia ni kaitaraa te ribuaka, ti kona ni kabuburaa riki te kangaanga. Anne bukina ae e kauringira te Baibara ni kangai: “E aki kona unin te aomata ni karekea uaana ae ana raoiroi te Atua.” (Iak. 1:20) E ngae ngke e eti unra, ma e kona aki kororaoira ni kairira bwa ti na karaoa te bwai ae bure.

E iaiangoa aei ngkoa te tari te aine i Tiaman ae Cathy, ‘Ngkana ko aki tei ibukim, bon akea ae e na karaoia ibukim.’ Ma ngke e a onimakina Iehova, e a bitaki ana iango. E taku: “I a aki kainnanoa ae N na tatauraoi n tei ibukiu. I a kona ni bwaina te nimamannei ibukina bwa I ataia ae e na boni kaetii baika bure n te aonnaba Iehova.” Ngkana e a tia ni karaoaki te ribuaka  nakoim, arom ni kakairi n ana katoto Iesu n onimakina te Atua e na boni buokiko naba ni kateimatoa bwainan te nimamannei.

E taekinna Iesu bwa ngkana ti kani kukurei, ti riai ni bwaina te nimamannei. E taku: “A a kukurei akana nimamannei.” (Mat. 5:5) Nora aroni buokara n te nimamannei n itera aikai:

E kauarerekea te un n te tekateka n taanga te nimamannei. E taku te tari te mwaane mai Aotiteria ae Robert: “A bati baika kammaraki aika I a tia n taekin nakoni buu, ma I bon aki nanonna. Ma ko aki kona ni kaoka am taeka are ko taekinna ngke ko un. I nanokawaki n noran ae e rangi ni maraki iai.”

“Ti bane n titibanako n taai aika bati” n ara taetaenikawai, ao a kona n urua te rau n ara mare taeka aika aki iangoaki raoi. (Iak. 3:2) N taai akanne, e kona te nimamannei ni buokira bwa ti na taotaon nanora ao n taubaang n ara taetae.​—TaeRab. 17:27.

E kakorakoraa Robert ni karikirakea te nimamannei ao te taubaang. Tera mwina? E taku: “N taai aikai ngkana ti a aki boraoi n iango, I kakorakoraai ni kakauongo raoi, n taetae ma te nimamannei, ao n taotaona nanou bwa N na aki un. E a nakoraoi riki ngkai reitakiu ma buu.”

E kanakoraoa reitakira ma aomata te nimamannei. Naake a kakaiun, e boni karako mwaitiia raoraoia. Ma e buokira te nimamannei bwa ti na “maiuakina . . . te bwai ni kabaebae are te raoi.” (IEbe. 4:​2, 3) E taku Cathy are taekinaki mai mwaina: “Ngkana I nimamannei, e a kona ni kakukurei riki reitakiu ma aomata, e ngae naba ngke e kangaanga te reitaki ma aomata tabeman.”

E karekea te raunnano te nimamannei. N te Baibara, e kairekerekeaki “te wanawana are mai karawa” ma te nimamannei ao te rau. (Iak. 3:​13, 17) Te aomata ae nimamannei iai irouna “te nano ae rau.” (TaeRab. 14:30) E taku Martin ae kakorakoraa ni karikirakea te nimamannei: “I a aki imanono riki ngkai ao n unun, ao I a kukurei riki ao n rau nanou.”

Ti bon riai ni kakorakoraira ni karikirakea te nimamannei. E taku te tari te mwaane temanna: “Ni koauana, n tabetai ao e boni kororake naba te un i nanou.” Ma bon Iehova ae kaungaira bwa ti na bwaina te nimamannei, ngaia are e na boni buokira n ara kakorakora aei. (Ita. 41:10; 1Tim. 6:11) E kona ni ‘katiaa kataneiaakira’ ao e kona ni ‘kakorakoraira.’ (1Bet. 5:10) Imwina riki, n aron te abotoro Bauro, ti a kona ni katotonga “te nimamannei ma te akoi are e kaotiotaki iroun te Kristo.”​—2Kor. 10:1.