Peteĩ ermána hérava Sara * heʼi: “Che ningo cheotĩeterei ha ndahaʼéi la ajeroviapáva chejehe. Upévare che nañeñanduporãi jepi umi persóna ojeroviaitereívandi ijehe ha ikarákter mbaretévandi. Péro añeñandu porã umi persóna iñakãguapy ha iñumíldevandi. Umichagua persónape ikatu amombeʼu mbaʼéichapa añeñandu, ha añemongeta hendivekuéra umi che provlémare. Umi che amigokuéra ningo iñakãguapy ha iñumílde”.

Sara heʼi vaʼekue ohechauka ñande ñaneakãguapýramo, ñande rapichakuéra oikosetaha ñane amígoramo. Avei Jehová oguerohory umi iñakãguapývape. La Biblia heʼi ñandéve: “Pehechaukákena [...] peikoha pyʼaguapýpe”, térã peneakãguapyha (Col. 3:12). ¿Ha mbaʼépa heʼise akãguapy? ¿Mbaʼéichapa Jesús ohechauka vaʼekue iñakãguapyha? ¿Ha mbaʼéichapa upéva ikatu ñanepytyvõ javyʼave hag̃ua?

Peteĩ persóna iñakãguapýva ningo oiko pyʼaguapýpe enterovéndi. Peichagua persóna otrata porã hapichápe, imbaʼeporã, ndaipochyreíri oiko jave hese álgo, ha ojejokokuaa.

La Bíbliape, pe palávra griega ojetradusíva “akãguapy”, ojepurúmi vaʼekue oñeñeʼẽ hag̃ua peteĩ kavaju hesaitéva oñedoma pyrévare. Pe kavaju oñamansámaramo jepe, ndeʼiséi hína ikangyha, síno osegi gueteri imbarete. Upéicha avei peteĩ persóna iñakãguapýramo ndeʼiséi hína ikangyha, síno imbareteha. ¿Mbaʼérepa jaʼe upéva? Pórke haʼe ojejokokuaa ani hag̃ua ojapo umi mbaʼe vai ojaposéva iñimperfékto rupi, ha osegi oiko pyʼaguapýpe umi ótrondi.

Ñande ningo ikatu ñapensa: “Chéve ijetuʼu cheakãguapy hag̃ua”. Koʼág̃arupi hetaiterei hénte ikarákter mbarete ha ndojejokokuaái. Upévare ikatu ijetuʼueterei ñandéve ñaneakãguapy hag̃ua (Rom. 7:19). Upéicharõ ñañehaʼãmante vaʼerã ñaneakãguapy hag̃ua, péro Jehová espíritu sánto ñanepytyvõta jasegi hag̃ua ñañehaʼã jahechauka upe kualida (Gál. 5:22, 23). ¿Mbaʼérepa ñañehaʼãmante vaʼerã ñaneakãguapy hag̃ua?

Ñaneakãguapýramo la hénte oñemoag̃uiséta ñanderehe. Ermána Sara heʼi haguéicha, ñandéve avei igústo ñaime umi persóna iñakãguapývandi. Jesús ningo iñakãguapy ha imbaʼeporã vaʼekue, ha péicha oheja ñandéve peteĩ ehémplo iporãitereíva (2 Cor. 10:1). Umi mitã jepe, ndoikuaaporãiramo jepe chupe, naiprovlémai vaʼekue oñemoag̃ui hag̃ua hese (Mar. 10:13-16).

Ñaneakãguapýramo ou porã ñandéve ha umi oĩvape ñande jerére avei. Ñaneakãguapýramo,  ensegída nañarreaksionavaimoʼãi ha nañandepochyreimoʼãi (Prov. 16:32). Upéva ñanepytyvõta ani hag̃ua ñañeñandu kulpávle, pórke nañamoñeñanduvaimoʼãi ótrope, umíva apytépe umi jahayhúvape. Avei umi ótro oñevenefisiáta pórke ñande jajejokokuaáta, ha upéicha rupi nañambosufrimoʼãi ni nañalastimamoʼãi chupekuéra.

Jesús hembiapo heta ha orekóramo jepe tuicha rresponsavilida, haʼe siémpre ohechauka vaʼekue iñakãguapyha ha ndaipochyreiriha otrata jave ótrope. Upe tiémpope, heta oĩ vaʼekue ohasa asýva ha ikárga pohýiva, ha oikotevẽ hikuái ombopiroʼymi vaʼerã chupekuéra. Mbaʼeichaitépa oiméne okonsola raʼe chupekuéra Jesús heʼírõ guare: “Peju che rendápe [...]. Che ningo ndachepochyreíri ha cheumílde che pyʼaite guive” (Mat. 11:28, 29).

¿Mbaʼéichapa ikatu ñaneakãguapy ha nañandepochyreíri Jesús ojapo haguéicha? Ñande jastudia Ñandejára Ñeʼẽ jaikuaa hag̃ua mbaʼéichapa Jesús otrata vaʼekue ótrope, ha mbaʼépa haʼe ojapo vaʼekue umi situasión ijetuʼuetévape. Upéi ñande ñambohovái vove umi situasión ijetuʼuhápe ñandéve ñaneakãguapy hag̃ua, ñañehaʼãta jasegi Jesús ehémplo (1 Ped. 2:21). Jahechami koʼág̃a mbohapy mbaʼe oipytyvõ vaʼekue Jesúspe iñakãguapy ha ndaipochyreíri hag̃ua.

Jesús iñumílde vaʼekue ipyʼaite guive. Jesús ningo heʼi vaʼekue haʼe ‘ndaipochyreíri ha iñumildeha ipyʼaite guive’ (Mat. 11:29). La Bíbliape oñemensiona koʼã mokõi kualida oñondive. Mokõivéva odepende ojuehe. Pórke ñaneumílderamo nañandepochyreimoʼãi ha ikatúta jahechauka ñaneakãguapyha (Efes. 4:1-3). ¿Mbaʼérepa ikatu jaʼe upéva?

Ñaneumílderamo nañapensamoʼãi ñandejehe ñaneimportantetereiha, ni nañandepirepererĩmoʼãi. ¿Mbaʼéichapa Jesús okontesta umi heʼi reívape hese haʼe ‘ikaʼuha ha okaruhárente voi oikoha’? Haʼe ohechauka upéva japuha umi mbaʼe ojapóva rupive. Ha iñumílde rupi, haʼe heʼi: “Umi mbaʼe porã ojapóva peteĩ persóna la ohechaukáva iñaranduha” (Mat. 11:19).

Peteĩ persóna opensa porãʼỹre oñeʼẽ vaíramo nde pire kolór rehe, nde haʼe haguére kuña térã kuimbaʼe, térã mbaʼéichapa rekakuaa vaʼekue, upéicha oikóramo iporãta rekontesta chupe akãguapýpe porãnte. Pedro, peteĩ ansiáno oĩva Sudáfricape, heʼi: “Chemorrenega jave peteĩ mbaʼe ojeʼéva chéve, añeporandu: ‘¿Mbaʼépa Jesús ojapo vaʼerãmoʼã?’”. Upéi haʼe heʼive: “Aaprende ani hag̃ua chepirepererĩeterei”.

Jesús oikuaa vaʼekue yvyporakuéra iñimperfektoha. Jesús disipulokuéra ningo ojapose vaʼekue iporãva, péro iñimperfékto rupi ndaikatúi vaʼekue siémpre ojapo upéva. Por ehémplo, pe pyhare Jesús omano mboyve, Pedro, Santiago ha Juan ndopytái vaʼekue opayhápe Jesús ndive, haʼe ojerurérõ guare chupekuéra upéva. Jesús ohechauka vaʼekue ontendeha mbaʼérepa haʼekuéra opyta oke heʼírõ guare: “Añetehápe, la hénte ojapose iporãva, péro hete ikangy” (Mat. 26:40, 41). Jesús ningo ontende vaʼekue ijapostolkuéra iñimperfektoha, upévare ndaipochýi vaʼekue hendivekuéra.

Peteĩ ermána hérava Mandy iñexihenteterei vaʼekue ótrondi, péro koʼág̃a oñehaʼãmbaite iñakãguapy osegívo Jesús ehémplo. Haʼe heʼi: “Añehaʼã chemanduʼa enterove yvypóra iñimperfektoha, ha Jehová ojapoháicha ajesareko umi kualida porã orekóvare hikuái”. Upévare, Jesús ojapo haguéicha ñande jahechakuaáramo yvyporakuéra iñimperfektoha ha ikangyha, upéva ñanepytyvõta jahechauka hag̃ua ñaneakãguapyha jatratávo chupekuéra.

Jesús oheja opa mbaʼe Ñandejára pópe. Jesús oĩrõ guare ko yvy ape ári, oaguanta vaʼekue heta inhustísia. Ojejagarra vai chugui umi mbaʼe heʼi ha ojapóva, ojedespresia ha ojetortura chupe. Upéicharõ jepe, haʼe ndaipochyreíri ha osegi iñakãguapy, pórke “ohejánte oñangareko hese pe Hués oporohusgáva hustísiape” (1 Ped. 2:23). Jesús oikuaa vaʼekue Itúa yvagapegua oñangarekotaha hese, ha itiempoitépe okastigataha umi otrata vai vaʼekuépe chupe.

Jahasáramo inhustísia ha ñandepochy rupi ñarreaksiona vai, ñambyaivétantema la situasión. Upévare la Biblia ñanemomanduʼa: “Peteĩ kuimbaʼe ipochýva ndojapói iporãva Ñandejára renondépe” (Sant. 1:20). Ha ndareíriramo jepe la ñandepochy, ñaneimperfékto rupi ikatu hína jajapo vyrorei.

Peteĩ ermána hérava Cathy oĩva Alemániape opensámi vaʼekue: “Avave nanedefendemoʼãi nde voi nderejapóiramo upéva”. Péro upéi haʼe oñepyrũ ojerovia Jehováre ha okambia opensa lája. Haʼe heʼi: “Koʼág̃a arreaksionáma akãguapýpe, pórke aikuaa  Jehová osolusionataha entéro mbaʼe oĩ vaíva ko múndope”. Oiméramo ñande jahasa raʼe peteĩ inhustísia, ikatu jasegi Jesús ehémplo ha ñakonfia Ñandejára ñanepytyvõtaha jasegi hag̃ua ñaneakãguapy.

Jesús heʼi vaʼekue jaikoséramo vyʼápe ñaneakãguapýmante vaʼerãha. Haʼe heʼi: “Ovyʼa umi ndaipochyreíriva” (Mat. 5:5). Jahechamína mbaʼéichapa ñaneakãguapýramo ikatu ñanepytyvõ koʼã situasiónpe.

Pe akãguapy ikatu oipytyvõ umi omendávape ohasa jave peteĩ situasión ijetuʼúva. Peteĩ ermáno hérava Robert, oĩva Alemániape, heʼi: “Apensaʼỹre haʼe vaʼekue heta mbaʼe olastimáva che rembirekópe”. Upéi heʼive: “Umi mbaʼe ere vaʼekue rreniégo reheve, upéi ndaikatuvéima rekambia. Añeñandu vaieterei ningo ahechávo mbaʼeichaitépa alastima chupe”.

“Enterovéva ningo jajavy heta vése” umi mbaʼe jaʼévape, ha umi mbaʼe jaʼéva ñapensaʼỹre ikatu ñanemoprovléma ñane matrimóniope (Sant. 3:2). Umícha jave ñaneakãguapýramo, ikatúta jasegi ñaime trankílo ha jajokóta ñande juru (Prov. 17:27).

Robert heta oñehaʼã kuri itrankílo ha ojejokokuaa hag̃ua. ¿Ha mbaʼépa ohupyty raʼe ojapo haguére upéva? Haʼe heʼi: “Koʼág̃arupi che rembirekóndi rojoavýramo, añehaʼãmbaite ahendu porã chupe, añeʼẽ akãguapýpe porãnte ha añehaʼã ani chepochy”. Upéi haʼe heʼive: “Koʼág̃a rojogueraha porãvéma che rembirekóndi ymave guarégui”.

Ñaneakãguapýramo jajogueraha porãvéta ótrondi. Umi hénte ipochypa reíva ningo saʼi iñamígo. Péro ñaneakãguapýramo ñanepytyvõta ñaime hag̃ua “siémpre peteĩ ñeʼẽme” (Efes. 4:2, 3). Cathy, pe ermána ñañeʼẽma hague, heʼi: “Pe akãguapy chepytyvõ avyʼa hag̃ua che rapichakuérandi, sapyʼánte ijetuʼúramo jepe jajogueraha porã hag̃ua algúnondi”.

Pe akãguapy ñanepytyvõ jaiko hag̃ua pyʼaguapýpe. La Biblia heʼi “pe arandu oúva yvágagui” omeʼẽha ñandéve akãguapy ha pyʼaguapy (Sant. 3:13, 17). Pe persóna iñakãguapýva oreko “peteĩ korasõ ipyʼaguapýva” (Prov. 14:30). Martin ningo heta oñehaʼã vaʼekue iñakãguapy hag̃ua. Haʼe heʼi: “Koʼág̃a nañemohatãvéima ojejapo hag̃ua entéro mbaʼe che aipotaháicha, ha upévare chepyʼaguapy ha avyʼave”.

Añetehápe ñande ñañehaʼãmante vaʼerã ikatu hag̃uáicha ñaneakãguapy. Peteĩ ermáno heʼi: “Koʼág̃a peve ningo sapyʼánte arrenegaiterei jepi akapu hag̃uáicha”. Péro Jehová ñanemokyreʼỹ ñaneakãguapy hag̃ua, ha haʼe ñanepytyvõta ijetuʼúramo jepe ñandéve upéva (Is. 41:10; 1 Tim. 6:11). Haʼe ‘omohuʼãta ñane entrenamiénto ha ñanemombaretéta’ (1 Ped. 5:10). Tiémpo rire, apóstol Pábloicha avei, ñande ikatútama jasegi Cristo ehémplo, pórke “haʼe iñumílde ha imbaʼeporã” (2 Cor. 10:1).