Meri kädekata Sara * tä niere: “Kä jürätä nemen tibätä yebätä ti ñaka töta nemen ja tuai nitre brukwä rubun aune ngüdrärekä ye ngätäite. Akwa nitre töi jäme ngätäite tita ngwane, jata nemen ruin kwin tie. Tä nemen bäri nuäre ti kräke blitakäre bentre aune ja driekäre ietre. Ja ketamukotre tikwe tä ja ngwen kore”.

Sara tä kukwe niere ye tä mike gare, nitre töi jäme ben nitre töta nemen ja ketai. Aune nitre ye erere tä nemen tuin ütiäte krubäte Jehovai. “Munkwe ja moto mika jäme” ye Jehovata ribere nie kukwe kwe yebätä (Col. 3:12). ¿Ni töi jäme ye tä ja ngwen ño? ¿Jesús töi nämäne jäme ye bämikani ño kwe? ¿Ja töi mikadre jäme ye raba ni dimike ño nüne kä jutobiti?

Ni töi jäme ye ñaka nemen rubun jötrö ngwarbe. Ni töi jäme ye tä ja töi mike kwin ni mada kräke aune tä nemen bäri nuäre kräke ja tuakäre kukweta nemen kisete yebe.

Ni töi jäme ye ñaka nikenkä ngwarbe. Kukwe griegore kwitani “töi jäme” ye ketata mädä känsenta näkwita nämäne yebätä. Mädä ye dite aune tä nemen jäme ngwane täbe dite jankunu, akwa näkwitata ne kwe rabadre nuäre ngwankäre. Ye erere tä nemen bare nibätä. Ja töi mikata jäme ye abokän ja töi gobrainta ja ngwankäre kwin aune kukwe kwin nuainkäre ni mada kräke.

Ni ñan därebare töi jäme ni raba nemen nütüre. Ne madakäre nitre töi käme ye ngätäite nita nüne yebätä ñan rabai nuäre ni kräke ja töi mikakäre jäme (Rom. 7:19). Ja töi mikakäre jäme yekäre ja di ngwandre krubäte, akwa üai deme Jehovakwe ye käkwe ni dimikai ñaka ja di ngwen nekä (Gál. 5:22, 23). ¿Ñobätä nikwe ja di ngwandre ja töi mikakäre jäme?

Ni töi jäme ben nitre töta nemen ja ketai. Sara kädrite kena käkwe nini erere jata nemen ruin kwin nie ni töi jäme ben. Jesús ye töi nämäne bäri jäme aune kwin nitre mada kräke (2 Cor. 10:1). Monsotre kia ie niara ñaka nämäne gare akwa ja nämäne nemen ruin kwin ietre niara ben (Mar. 10:13-16).

Ja töi mikadre jäme ye kwin ni kräke aune nitre tä ni bäre ye kräke arato. Ni töi jäme ngwane rabai bäri nuäre ni kräke ñaka ja töibikaire aune ñaka nemen rubun jötrö ngwarbe (Prov. 16:32). Ye köböire, ni mada tare nikwe yebätä nikwe ñan ja töi mikai kukwe tare mike nemen barebätä aune ja ñaka rabai ruin  ngite nie. Ne madakäre ja töi mikadre jäme yekwe nitre tä ni bäre ye dimikai arato. Ye medenbätä nikwe ja töi mikai käre jäme ni mada kräke ngwane nikwe ñaka mikai ja tare nike aune nikwe ñaka ja tare nikai arato.

Kukwe keta kabre nämäne Jesús kisete aune ñaka nämäne ngwarbe, akwa yebiti ta käre ja töi mikani jäme kwe. Nitre kwati ñaka nämäne nüne kwin aune kukwe tare keta kabre nämäne kisete yebe nämänentre ja tuin. Töi mikadre jäme ye nämänentre ribere jai. Metrere, kukwe ne niebare Jesukwe ngwane ye käkwe töi mikanintre jäme: “Mun ye abko jakwe jökrä tie [...] ñobtä ñan angwane ti abko moto jäme amne tita bike tidrä ni mda mdabtä” (Mat. 11:28, 29).

¿Jesús töi jäme yebätä ni rabadre ja ngwen ño niara erere? Kena, ni rabadre ja tötike Bibliabätä ne kwe Jesús nämäne nitre mike tuin ño jai aune nämäne ja tuin ño kukwe tare ben ye rabadre gare nie. Biti, ni töi jäme nuadrete ngwane nikwe ja ngwandre Jesús erere ja di tätebiti (1 Ped. 2:21). Kukwe ketamä Jesús dimikani ja töi mike jäme yebätä ani ja tötike mada.

Erametre Jesús töi nämäne bobre. Niara ara käkwe niebare: “Ti abko moto jäme amne tita bike tidrä ni mda mdabtä” (Mat. 11:29). Ja töi mikadre jäme aune ja töi mikadre bobre ye kädekateta gwairebe Bibliabätä ñobätä ñan aune kukwe ketebu ye bäsi ja erebe yebätä (Efes. 4:1-3). ¿Ñobätä nita ye niere?

Ja töi mike bobre ye raba ni dimike ñaka ja töi mike ja aibebätä aune ñaka kukwe chi mike mate tare jabätä. Jesús mröre krubäte aune vino ñain krubäte niebarebätä ngwane, ¿ja töi mikani ño kwe? Kukwe nuainbare kwe yebiti nitre nämäne kukwe ngwarbe nierebätä ye mikani kwekebe kwe aune töi jämebiti niebare kwe: “Ni töbätä abokän nüke gare jondron nuainta kwe yebiti” (Mat. 11:19, TNM).

Ni kwata bä ño, ni merire o ni brare, o ni kä medenbu yebätä ni iti kukwe niedre blo nibätä ngwane nikwe ja di ngwandre ja töi mike jäme. Peter ni umbre ji ngwanka kä Sudáfrica tä niere: “Ni iti tä kukwe niere tä mate tare tibätä ngwane, Jesukwe ja ngwandre ño yebätä tita töbike”. Aune tä mike gare: “Kukwe ngwarbe ye ñaka rabadre mate tare tibätä ye rababa gare tie”.

Ni töi ngite ye nämäne nüke gare Jesús ie. Nitre ja tötikaka Jesube töi nämäne kwin akwa ruäre ngwane niaratre töi ngite yebätä ñaka nämäne nemen nuäre kräketre kukwe kwin nuainkäre. Ñodre, deu Jesús murie keta jämi känenkri Pedro, Santiago aune Juan käkwe ñaka niara dimikani nämäne ribere jai ye ererebätä. Jesukwe niebare: “Mun töi abko tä biare jändrän kuin nuene, akwa mun di ñakare” (Mat. 26:40, 41). Niaratre ye töi ngite nämäne gare Jesús ie ye medenbätä ñaka ja töi mikani rubun kwe kräketre.

Meri testiko kädekata Mandy yebätä dre namani bare ye ani mike gare jai. Käne niara nämäne kukwe ribere krubäte nitre madai, akwa kä nengwane tä ja di ngwen ja ngwen töi jäme Jesús erere. Niara tä mike gare: “Ni jökrä töi ngite ye tita ngwen törö jai aune dre kwin tä bätätre ye tita mike ñärärä Jehová tä nuainne erere”. Ni töi ngite ye nämäne nüke gare Jesús ie ye erere Mandy ja töi mikani nuainne. Nikwe ye erere nuaindi ngwane, rabadi bäri nuäre ni kräke ja töi mikakäre jäme nitre mada kräke.

Kukwe jökrä Jesús nämäne mikete Jehová kisete. Nämäne kä tibienbätä ngwane, kukwe blo nuainbarebätä yebe ja tuani kwe. Kukwe jene niebarebätä, mikani tuin ngwarbe jai aune ngwani ja tare nike krubäte. Akwa yebiti ta käre ja töi mikani jäme kwe ñobätä ñan aune “Ngöbö abko kukwe ükatekä metre, ye aibe ie namani ja mike gare jirekäbe” (1 Ped. 2:23). Ngöbökwe niara kriemikai aune nire nire käkwe mikani ja tare nike ye käkwe ja ngie nuadi ye nämäne gare Jesús ie.

Nita ja tuin kukwe ñaka kwin ben ngwane nita nemen rubun ja dokwäre, ye köböite ni raba kukwe tare nuainne aune ja mike kukwe kri te. “Ni moto romon abko käta nüne ñakare kuin metre Ngöbö ngwärekri” ye Biblia tä ngwenta törö nie (Sant. 1:20). Kukwe bökänbätä ni raba nemen rubun ja dokwäre, akwa ni töi ngite ye köböite ni ñaka raba kukwe kwin nuainne.

Meri testiko kädekata Cathy tä nüne Alemania nämäne nütüre, ‘tikwe ñaka kukwe niedre ja dokwäre ngwane ni mada ñaka käkwe nuaindre ti kräke’. Akwa tö ngwandre ño Jehovai namani gare ie ngwane ja töi kwitani kwe. Niara tä niere: “Ti ñan tä rüre ja dokwäre  kukwe ngwarbebätä. Nengwane tä nemen bäri nuäre tikrä ja töi mikakäre jäme. Jehovata kukwe jökrä ükete kwin ye garera tie”. Kukwe ñaka kwin nuaindre nibätä ngwane nikwe tö ngwandre Jehovai Jesús nuainbare ye erere, yekwe ni dimikai käre ja ngwen töi jäme.

Ja töi mikadre jäme ye köböire kä rabai bäri juto nibätä Jesús käkwe mikani gare. Mateo 5:5 (TNM) yete niebare kwe: “Ni töi jäme yebätä kä täi juto”. Ja töi mikadre jäme ye tä ni dimike ño kukwe keta kabre känti ye ani mike gare jai.

Nitre ja mäkäninte ñaka tä nemen rüre krubäte jabe. Ni iti testiko kädekata Robert nünanka Australia tä mike gare: “Ti nämä kukwe tare tare niere ti muko ie ngwane kukwe ñan metre ti nämä niere ie. Akwa nita kukwe niere töi rubune ngwane ja ñan rabai nuaindre nie. Ja ñaka nämä nemen ruin kwin ti muko ie ye ti nämä gain ngwane, ja ñan nämä nemen ruin kwin tie”.

Nita blite ngwane “ni jökrä käta ja mike ngite bätäkä ngwarbe”. Ñan töbikadre kukwe nieta yebätä ngwane kukwe kri raba nemen jabätä nitre gure ie (Sant. 3:2). Kukwe ye erere rabadre bare ngwane, ja töi mikadre jäme ye raba ni dimike nemen kwekebe aune ja tidrä gobraine (Prov. 17:27).

Robert ja di ngwani krubäte ja töi mike jäme aune ja gobraine. ¿Dre kwin namani kwe? Niara tä mike gare: “Kukwe ruärebätä ti ñan töita ja erebe ti mukobe ngwane tita ja di ngwen niara kukwe nuin, blite töi jämebiti ben aune ñaka ja brukwä mike rubun. Aune nengwane tita ja kete bäri kwin ben”.

Tä ni dimike ja kete kwin ni madabe. Nire nirebätä kukwe chi tä mate tare yekwe ja ketamuko ñaka rabai krubäte. Akwa nire abokän töita jäme aibe raba nüne “jäme jabe kwärikwäri” (Efes. 4:2, 3). Cathy kädrite käne tä niere: “Tita ja töi mike jäme ye köböire bäri käta juto tibätä tita ni mada ngätäite ngwane. Nitre ruäre ben ñan nuäre ja ketakäre akwa yebiti ta tita ja kete bentre”.

Tä kä jäme bien nie. Bibliabätä, ja töi mikadre jäme aune nünandre jäme ye kädekateta “kukwe töbtä [...] kite Ngöbökri” ye ngätäite (Sant. 3:13, 17). Ni töi jäme ye abokän “brukwä jäme” (Prov. 14:30). Martin tä ja di ngwen krubäte ja töi mikakäre jäme tä niere: “Nengwane tita ni mada kukwei mike ütiäte jai aune ñan tita nemen rubun jötrö ngwarbe, ye köböire käta juto tibätä aune ti töita jäme”.

Metrere nikwe ja di ngwandre ja töi mikakäre jäme. Ni iti testiko tä mike gare: “Ti därie täbe nemen nokwrekä ye tä nüke gare tie”. Akwa Jehová, ni töi mikaka kä jäme känene yekwe ni dimikai ja töi mike jäme (Is. 41:10; 1 Tim. 6:11). Ngöbökwe ni dimikai nemen juto biarebe aune ni mikai dite kwe nememe mrä (1 Ped. 5:10). Kä näin ta ngwane, Kristo ja töi mikani jäme aune kukwe kwin nuainbare ye erere nikwe ja ngwain Pablo nuainbare erere (2 Cor. 10:1).