Ku Sara * madah: “Aku orang ke pemalu, lalu enda tentu andal enggau diri empu. Nya alai, aku tusah begulai enggau orang ke kering enggau penemu diri empu. Tang aku berasai nyamai lebuh enggau orang ke nelap sereta enda sumbung. Aku ulih madahka asai ati sereta berandau pasal penanggul diri enggau orang ke baka nya. Semua kaban rapat aku ngembuan ulah ke baka nya.”

Baka ke dipadah Sara, enti kitai nelap, orang rindu deka nyadi kaban kitai. Ulah ti nelap mega ngerinduka ati Jehovah. Bup Kudus meransang kitai: “Rasukka . . . penelap.” (Kol. 3:12) Nama reti penelap? Baka ni Jesus ngayanka penelap? Baka ni ulah ti nelap ulih ngelantangka agi pengidup kitai?

Orang ke rinduka pemaik ngembuan penelap. Iya enda kasar, enda jampat lengkar, sereta ulih nagang diri lebuh bisi utai ke ngasuh iya pedis ati.

Ba Bup Kudus, leka jaku “penelap” dalam jaku Gerika dikena ngambarka kuda siga ti udah jinak. Taja pan kuda nya udah jinak, tang iya agi kering. Pia mega, orang ke nelap ukai reti iya lemi. Ke amat nya, iya kering laban ulih nagang diri lalu deka bebaik enggau orang.

Kitai engka ngumbai diri ukai orang ke nelap. Ketegal kitai dikelinggi orang ke kering enggau penemu diri sereta enda sabar, tu ngasuh kitai tusah deka nelap. (Rom. 7:19) Nya alai, kitai enggau naka ulih ngayanka penelap. Roh kudus Petara deka nulung kitai nyadi orang ke nelap. (Gal. 5:22, 23) Nama kebuah kitai bebendar deka nelap agi?

Ulah ti nelap narit ati orang. Baka Sara ke disebut tadi, kitai rindu begulai enggau orang ke nelap. Jesus nya teladan ti manah ke kitai. Iya nelap sereta siru. (2 Kor. 10:1) Indah bala anak mit ke enda tentu ngelala iya, deka begulai enggau iya.—Mrk. 10:13-16.

Ulah ti nelap nyaga kaul kitai enggau orang bukai. Enti kitai nelap, kitai enda jampat pedis ati. (J-lam. 16:32) Kitai enda ngemediska ati orang,  nyengkaum orang ke dikesayauka kitai. Enggau nya, ati kitai enda besalah kitai. Lalu orang mega bulih penguntung laban kitai nagang asai ati sereta ulah kitai ngambika enda ngemediska ati sida.

Taja pan Jesus kisuk sereta ngembuan tanggung pengawa ti besai, tang iya nelap enggau semua orang. Mayuh orang maya jeman iya begunaka pengelantang laban sida napi penanggul sereta berasai lelak. Sida tentu berasai lantang lebuh Jesus madah ngagai sida: ‘Datai ngagai aku . . . laban aku nelap sereta baruh ati’!—Mat. 11:28, 29.

Baka ni kitai ulih nelap baka Jesus? Ari Bup Kudus, kitai ulih belajar pasal chara Jesus begulai enggau orang sereta utai ke digaga iya kena mutarka penanggul. Udah nya, lebuh kitai napi penanggul ke nguji penelap kitai, kitai enggau naka ulih neladan Jesus. (1 Pet. 2:21) Peratika tiga iti pekara ke nulung Jesus nyadi orang ke nelap.

Jesus baruh ati. Jesus madahka iya “nelap sereta baruh ati.” (Mat. 11:29) Bup Kudus nyebut dua iti kualiti tu begulai laban penelap bekaul enggau baruh ati. (Eps. 4:1-3) Nama kebuah kitai ngumbai baka nya?

Pemaruh ati nulung kitai nyeliah ari kelalu jampat ngambi ati tauka pedis ati enggau jaku orang. Nama digaga Jesus lebuh orang ngumbai iya “bam” sereta “pemabuk”? Iya nyakal jaku tuduh nya ari chara pengidup iya. Enggau nelap, Jesus madahka ‘penemu-dalam Petara dikamatka ulih utai ti dikereja penemu-dalam nya empu.’—Mat. 11:19.

Enti orang nyebut utai ke enda patut pasal bansa, penempa, tauka chara pengidup nuan, kati nuan ulih nyaut sida enggau nelap? Peter, seiku tuai gempuru ba Afrika Selatan madahka: “Lebuh pedis ati enggau utai ke disebut orang, aku nanya diri empu, ‘Nama deka digaga Jesus?’ Tu nulung aku enda jampat ngambi ati.”

Jesus nemu mensia enda sempurna. Bala murid Jesus deka ngereja utai ti ngena. Tang ketegal enda sempurna, sida enda ulih seruran ngereja nya. Ambika chunto, ba malam sebedau iya mati, Jesus ngasuh Peter, James enggau John mengkang bejaga enggau iya. Tang sida enda ngereja nya. Jesus nunjukka diri nemu kebuah sida tinduk lebuh iya madahka “ati amat deka, tang tubuh lemi.” (Mat. 26:40, 41) Ketegal nemu sida enda sempurna, Jesus enda pedis ati ngagai sida.

Suba menyadi Kristian indu ke benama Mandy udu beratika pengurang ba orang. Tang diatu, iya enggau naka ulih deka nelap baka Jesus. Ku iya madah: “Aku nguji nerima pengurang orang laban aku nemu sida enda sempurna. Baka Jehovah, aku deka beratika kualiti manah ke bisi ba sida.” Enti kitai ngembuan runding baka Jesus, tu deka nulung kitai nelap agi enggau orang.

Jesus bepanggai ba Jehovah. Lebuh ba dunya, Jesus tan natka utai ti enda lurus ke nyadi ba iya. Orang saru penemu pasal iya, ngemaruhka iya sereta merinsaka iya. Taja pia, iya mengkang nelap laban iya ‘nyerahka diri ngagai Petara ke ngakim ngena pengelurus.’ (1 Pet. 2:23) Jesus nemu Apai iya ibuhka iya lalu deka ngukum orang ke jai enggau iya ba maya ti ngena.

Enti kitai ringat sereta kasar enggau orang ke jai ngagai kitai, nya engka ngasuh penanggul balat agi nyadi. Nya alai, Bup Kudus ngingatka kitai: ‘Pengeringat kitai enda ulih mansutka pengelurus ti dikedekaka Petara.’ (Jas. 1:20) Taja pan amat bisi utai ke ngasuh kitai ringat, tang kitai engka ngereja utai ti salah ketegal enda sempurna.

Cathy, seiku menyadi indu ari Jerman kala ngumbai, enti orang enda lurus enggau iya, iya patut ngelaban. Tang pengudah iya belajar bepanggai ba Jehovah, runding iya berubah. Ku iya madah: “Diatu aku enda ibuh agi ngelaban. Aku ulih ngayanka penelap laban nemu Jehovah deka ngaduka semua utai ke salah ba dunya tu.” Enti nuan kala napi utai ti enda lurus, teladan meh Jesus. Ulah iya ke bepanggai ba Petara deka nulung nuan mengkang nelap.

Jesus madahka, kitai patut nelap enti deka lantang. Iya madahka: “Lantang meh sida ti baruh ati [tauka nelap].” (Mat. 5:5, Bup Kudus Berita Manah Ka Rebak Diatu) Peratika baka ni penelap mutarka penanggul.

Penelap mutarka penanggul ba tikah. Robert, seiku menyadi Kristian ari Australia madahka: “Aku udah nyebut mayuh utai ti ngemediska ati bini aku. Tang semua jaku nya enda ulih diambi baru. Lebuh aku meda bini aku tusah ati, aku berasai besalah.”

“Semua kitai bela ngereja mayuh macham penyalah” ba jaku. Lalu jaku ke dipansut enggau enda berunding mai penanggul ba tikah. (Jas. 3:2) Lebuh nya nyadi, penelap nulung kitai enda jampat pedis ati sereta ulih nagang diri ari nyebut utai ti salah.—J-lam. 17:27.

Robert bebendar nagang diri sereta enda jampat pedis ati. Nama asil iya? Ku iya madah: “Diatu, enti kami duai bini bisi beserekang penemu, aku nguji ningaka iya enggau manah, bejaku enggau nelap lalu enda nejuka diri ringat. Enggau nya, kaul kami duai majak manah.”

Penelap nulung kitai begulai manah enggau orang. Orang ke jampat pedis ati tusah deka bulih mayuh bakih. Tang penelap nulung kitai ‘nyaga penyerakup . . . ngena pemaik ti nanggam kitai semua.’ (Eps. 4:2, 3) Cathy, ke disebut tadi, madahka, “Penelap nulung aku begulai manah enggau orang, taja pan tusah deka begulai enggau sekeda orang.”

Penelap mai pengelantang ba ati enggau runding. Bup Kudus ngaitka “penemu-dalam ti datai ari atas” nya enggau pemaik sereta penelap. (Jas. 3:13, 17) Orang ti nelap ngembuan “ati ti lantang.” (J-lam. 14:30) Martin, seiku menyadi lelaki ke udah bebendar deka nelap madahka: “Diatu aku ulih nerima penemu orang bukai, lalu nyau kurang agi pedis ati. Ati enggau runding aku nyau lantang agi.”

Kitai engka bebendar enti deka nelap. Ku seiku menyadi lelaki madah: “Nyentuk ke diatu, bisi maya nya aku balat pedis ati.” Tang Jehovah, ke meransang kitai nyadi orang ke nelap, deka nulung kitai. (Isa. 41:10; 1 Tim. 6:11) Iya ulih ‘ngaga kitai nyadi baru [tauka deka nembuka latih kitai].’ Iya ulih ngeringka kitai. (1 Pet. 5:10) Baka rasul Paul, nyau kelama kitai ulih ngayanka “pemaruh ati enggau penelap Kristus.”—2 Kor. 10:1.