Un irman ki txoma Sara * fla: “Ami é un algen ki ten txeu vergónha, i N ka ten txeu kunfiansa. Pur isu, N ka ta xinti avontádi óras ki N sta djuntu ku algen ki ta kunfia txeu na se kabésa i ki ten un manera di ser fórti. Má, N ta xinti sábi óras ki N ta sta djuntu ku algen brandu i umildi. N ta konsigi fla kel algen modi ki N sta xinti i N ta konta-l nhas prubléma. Nhas midjór amigu é kes tipu di algen la.”

Kes kuza ki Sara fla ta mostra ma si nos é brandu, otus algen ta krê ser nos amigu. Tanbê Jeová ta fika kontenti óras ki nu ta mostra brandura. É pur isu ki se Palavra ta fla-nu: ‘Nhos bisti di brandura’. (Col. 3:12) Má kuzê ki é brandura? Modi ki Jizus mostra brandura? I modi ki kel kualidadi li ta djuda-nu ten un vida más filís?

Brandura é un kualidadi ki ta ben di déntu nos. Nu ta mostra-l si nos é un algen ki gosta di sta na pas. Un algen brandu ta trata otus ku bondadi, i el ta konsigi fika kalmu i kontrola se kabésa sikrê óras ki algen provoka-l.

Brandura é ka sinal di frakéza. Na ténpu antigu, es ta uzaba kel palavra gregu ki traduzidu pa ‘brandura’, pa pâpia di un kabalu ki éra brabu má ki dipôs ben mansadu. Kel kabalu ka ta perdeba se forsa, má el trenadu pa el prende kontrola se forsa. Di mésmu manera, óras ki nu ta mostra brandura, el ta djuda-nu kontrola nos manera di ser i sta na pas ku otus.

Talvês nu pode pensa: ‘Ami é ka un algen brandu.’ Nu sta ta vive na un mundu ki é difísil mostra brandura, pamodi txeu algen ka ten paxénxa i es ta obriga otus pa seta ses opinion. (Rom. 7:19) Pur isu, é ka fásil nu mostra brandura. Má, spritu santu di Jeová pode djuda-nu kontinua ta sforsa pa nu ten kel kualidadi li. (Gál. 5:22, 23) Pamodi ki nu debe sforsa pa nu ser brandu?

Brandura é un kualidadi ki ta poi algen ta gosta di bo. Sima Sara fla, nu gosta di sta djuntu ku algen ki é brandu. Jizus é un di kes midjór izénplu di algen ki mostra brandura i  bondadi. (2 Cor. 10:1) Ti mininus, ki nen ka konxeba el dretu, ta krê fikaba djuntu ku el. — Mar. 10:13-16.

Brandura é bon pa nos i pa kes ki sta djuntu ku nos. Si nos é brandu, nu ka ta xatia faxi. (Pro. 16:32) Asi nu ka ta xinti kulpadu di mágua algen, inda más un algen ki nu ta ama. I dja ki brandura ta djuda-nu kontrola kuzas ki nu ta xinti i kuzas ki nu ta faze, nu ka ta poi otus algen ta sufri.

Jizus éra un algen txeu okupadu i ki tinha txeu responsabilidadi. Má simé, el ta trataba tudu algen ku brandura. Txeu algen na ténpu di Jizus, ta trabadjaba duru i es ta xintiba kansadu dimás. Es mesteba di konsolu. Di sertéza es xinti konsoladu kantu Jizus fla-s: ‘Nhos ben pa mi pamodi mi é mansu i umildi di korason’. — Mat. 11:28, 29.

Kuzê ki ta djuda-nu ser brandu sima Jizus? Nu meste studa Palavra di Deus pa nu prende modi ki Jizus ta trataba otus algen i modi ki el ta lidaba ku situasons difísil. Asi, óras ki nu sta pasa pa situasons ki ta poi nos brandura na próva, nu meste sforsa pa nu aji sima Jizus. (1 Ped. 2:21) Nu ben odja três kuza ki djuda Jizus ser brandu.

Jizus éra umildi di korason. Jizus fla ma el éra ‘mansu i umildi di korason.’ (Mat. 11:29) Bíblia ta pâpia di kes dôs kualidadi li djuntu, pamodi pa nu ser brandu, nu meste ser umildi. (Efé. 4:1-3) Má di ki manera?

Umildadi ka ta dexa-nu mágua faxi. Pur izénplu, alguns algen kritika Jizus sen ninhun motivu, kantu es txoma-l di ‘kumedor’ i ‘bebedor di vinhu’. Modi ki el reaji? Pa se manera di vive, el mostra ma kel-la ka éra verdadi. El faze kel-la pamodi el éra umildi, i ku brandura el fla ma ‘sabedoria ta mostra ma el é justu pa se óbras.’ — Mat. 11:19.

Si un algen fla un kuza kasábi sobri bu rasa, di undi ki bo é, ô pamodi bo é ómi ô mudjer, tenta aji ku brandura. Un ansion, na Áfrika di sul, ki txoma Pedru fla: “Óras ki un algen fla un kuza ki xatia-m, N ta pergunta nha kabésa: ‘Si éra Jizus, kuzê ki el ta fazeba?’” El fla tanbê: “N prende ka liga tudu kes kuza mariadu ki algen ta faze-m.”

Jizus sabeba ma pesoas éra inperfetu. Disiplus di Jizus tinha bons intenson, má alvês es ta fazeba kuzas mariadu pamodi es éra inperfetu. Pur izénplu, na kel noti antis di Jizus móre, Pedru, Tiagu i Juan ka fika sienti djuntu ku Jizus sima el pidi-s. Má, Jizus ntende ma ‘spritu sta prontu, má karni é fraku.’ (Mat. 26:40, 41) Dja ki Jizus ta ntendeba ma es éra inperfetu, el ka fika xatiadu ku se apóstlus.

Un irman ki txoma Mandi sénpri ta kritikaba otus. Má gósi el sta ta sforsa txeu pa el ser brandu sima Jizus. El fla: “N ta tenta seta ma tudu algen é inperfetu i N ta konsentra na ses bon kualidadi, sima Jeová ta faze.” Si sima Jizus bu ntende ma otus ten frakézas, bu ta konsigi trata otus ku brandura.

Jizus ta dexaba asuntus na mô di Deus. Kantu Jizus staba na Téra, el sufri injustisa. Es ka ntende-l dretu, es dispreza-l i es tortura-l. Má simé, el kontinua ta mostra brandura, pamodi el ‘ta ntregaba se kabésa na mô di Kel ki ta julga ku justisa.’ (1 Ped. 2:23) Jizus sabeba ma se Pai na Séu ta kuidaba di el i ma el ta rezolveba kes injustisa na ténpu sértu.

Si nu fika ku raiba pamodi nu sufri un injustisa, nu pode xinti gana di faze justisa ku nos mô. Má si nu faze si, situason ta fika más piór. É pur isu ki Bíblia ta lenbra-nu: ‘Raiba di ómi ka ta traze justisa di Deus.’ (Tia. 1:20) Sikrê nu ten razon pa nu fika xatiadu, inperfeson pode pô-nu ta faze kuzas mariadu.

Un irman na Alimanha ki txoma Kati, ta pensaba: ‘Si N ka difende nha kabésa, kenha ki ta difende-m?’ Má, el muda se manera di pensa kantu el prende kunfia na Jeová. El fla: “N ka meste sta sénpri ta difende nha kabésa. Kuzê ki ta djuda-m aji ku brandura é pamodi  N sabe ma Jeová ta ben konpo tudu kuza mariadu ki sta na mundu.” Si dja bu kustuma fazedu algun injustisa, faze sima Jizus i kunfia na Jeová. Kel-li ta djuda-u kontinua ta ser un algen brandu.

Jizus mostra ma si nu krê ser filís nu meste ser brandu. El fla: ‘Filís é kes ki é mansu.’ (Mat. 5:5) Odja modi ki brandura ta djuda-nu na kes situason li.

Brandura ta djuda-nu ten ménus prubléma na kazamentu. Un irmon na Austrália ki txoma Rubertu fla: “Dja N fla txeu kuza sen pensa ki mágua nha mudjer. Má óras ki bu ta fla kuzas ki ta mágua, ka ta da pa volta pa tras. N ta fikaba tristi óras ki N ta odjaba ma kuzas ki N fla-l, magua-l txeu.”

‘Nos tudu nu ta fadja txeu bês’ na kuzas ki nu ta fla. I kuzas ki nu ta fla sen pensa pode traze prublémas na kazamentu. (Tia. 3:2) Óras ki nu ten prublémas na kazamentu, brandura pode djuda-nu kontinua kalmu i kontrola nos língua. — Pro. 17:27.

Rubertu sforsa txeu pa ser un algen kalmu i pa kontrola se kabésa. Kal ki foi rezultadu? El fla: “Gósi, óras ki mi ku nha mudjer nu ka ta konkorda ku kunpanheru, N ta sforsa pa N obi-l ku atenson, pa N pâpia ku brandura i pa N ka fika xatiadu. Amizadi di mi ku nha mudjer sta mutu más midjór.”

Brandura ta djuda-nu da dretu ku otus. Kenha ki ta xatia faxi ta ten poku amigu. Má brandura ta djuda-nu ‘mante kel ligason ki ta da pas.’ (Efé. 4:2, 3) Kati, ki dja nu papiaba di el antis, fla: “Brandura ta djuda-m da dretu ku otus, sikrê alvês é difísil lida ku alguns algen.”

Brandura ta djuda-nu xinti pas déntu nos. Bíblia ta mostra ma ‘kel sabedoria ki ta ben di riba’, ta djuda-nu ten brandura i pas. (Tia. 3:13, 17) Un algen ki é brandu ten un ‘korason kalmu’. (Pro. 14:30) Martin, ki sforsa txeu pa ser un algen brandu, fla: “Gósi N ka ta sta sénpri ta insisti pa kuzas fazedu sima N krê, i N konsigi xinti más pas i N sta más filís.”

É klaru ki mostra brandura ta iziji sforsu. Un irmon fla: “Pa N ser onéstu, ti oji na alguns situason, N ta xinti sangi ta ferbe-m na korpu.” Má Jeová krê pa nu ser brandu i el ta djuda-nu na es luta. (Isa. 41:10; 1 Tim. 6:11) El pode ‘konpleta nos trenamentu’ i el pode ‘pô-nu fika fórti’. (1 Ped. 5:10) Ku ténpu, nu ta konsigi imita ‘brandura i bondadi di Kristu’ sima apóstlu Polu. — 2 Cor. 10:1.