Saamaneq – Qanoq iluaqutigaarput?
Sara * ima oqaluttuarpoq: “Ittoortuuvunga imminullu tatigivallaarnanga. Taamaattumik inuit imminut tatigisorujussuit sukangasuullu ilagigaangakkit toqqissisimasanngilanga. Saamasulli maniguuttullu toqqissisimanarisarpakka. Inuit taamaattut misigissutsikka ajornartorsiutikkalu pillugit ammasumik oqaloqatigisinnaavakka. Ikinngutigilluakkakka saamasuullutillu maniguuttuupput.”
Sarap oqaasiinit erserpoq saamasuugutta inoqatitsinnit ikinngutigiumaneqarnerussasugut. Aamma Jehovamik nuannaalersitsisarpoq. Biibilimi ima kajumissaarneqarpugut: ‘Atiniarsiuk qanilaarneq.’ * (Kol 3:12) Saamaneq qanoq paasisariaqarpa? Jiisusi qanoq saamanermik ersersitsiva? Saamasuunerlu inuunitsinni qanoq nuannaarnerulissutigisinnaavarput?
SAAMANEQ QANOQ PAASISARIAQARPA?
Saamasuuneq eqqissisimasuunermit aallaaveqarpoq. Inuup saamasup inoqatini asannittumik inussiarnersumillu pisarpai inuunerminilu uumitsannartunik nalaataqaraangami eqqissisimaannarsinnaasarluni.
Inuit saamasut sanngiitsuunngillat. Hiistimik nujuillisaaneq nassuiarniarlugu Grækerisut oqaaseq “saamasoq”-mik nutserneqartoq atorneqartarpoq. Hiisti nujuillisarneqanngikkallarnermisut suli nukeqartigaaq, sungiusarneqarnerminili nukimminik aqutsinissani ilikkarsimavaa. Taamatuttaaq saamasuunikkut ajortulioqqajaanerput aqussinnaavarput allanillu eqqisseqateqarluta.
Immaqa ima eqqarsarputit: ‘Uanga saamasuunngilanga.’ Inuppassuit sukangasuujullutillu utaqqisinnaassuseqanngillat, taamaattumik saamasuunissaq sapernarsinnaavoq. (Rom 7:19) Tassa saamasuujumalluta ilungersortariaqarpugut, saamasuunissattali sulissutigiuarnissaanut Jehovap anersaani illernartoq iluaqutigalugu ikiussavaatigut. (Gal 5:22, 23) Soorli saamasuunissaq ilungersuutigissavarput?
Inuit saamasut ilakkuminartuupput. Inuit saamasut ilaginissaat toqqissisimanarivarput, soorlu Sara taama isumaqartoq. Jiisusi saamasuullunilu inussiarnersuuvoq. (2 Kor 10:1) Allaat meeqqat ilisarisimarpianngikkaluarlugu ilagerusuttarpaat. – Mark 10:13-16.
Uss 16:32) Allat, ingammik asasavut, kingorna ilerasuutigisatsinnik misigissutsikkut annersittarnavianngilavut. Aamma misigissutsivut pissusilersornerpullu aqussinnaassagatsigit tamanna allanut iluaqutaassaaq.
Saamasuunerput uagutsinnut allanullu iluaqutaasarpoq. Saamasuugutta pakatsipallattarnatalu kamajasuujunavianngilagut. (SAAMASUUNERMIK MALIGASSIUILLUARNERPAAQ
Jiisusi annertuumik akisussaaffeqaraluarluni ulapittaraluarlunilu kikkut tamaasa saamasumik pisarpai. Jiisusip nalaani inuusut ilungersuuteqarlutillu artorsaateqaramik nukissaqaqqilernissartik pisariaqartippaat, taamaattumik Jiisusip oqaasii uku tuppallersaatigisimassavaat: “Ornissinga ... qanilaarama uummatikkullu makitajuikkama.” – Matt 11:28, 29.
Jiisusip saamasuunera qanoq ilaarsinnaavarput? Biibili atuaqqissaaraangatsigu paasisarparput Jiisusip inoqatini qanoq pisarai ilungersunartorsiornerminilu qanoq iliortartoq. Taava uagut saamasuunissamut misilinneqaataasinnaasunik nalaataqaraangatta Jiisusi ilaarniartarparput. (1 Petr 2:21) Jiisusip saamasuunissaminut iluaqutigisai pingasut sammeriartigit.
Jiisusi maniguuttuuvoq. Jiisusi oqarpoq ‘qanilaartuullunilu uummatikkut makitajuitsuulluni’. (Matt 11:29) Pissuserisassat taakku marluk Biibilimi ataatsikkut eqqaaneqarput saamasuuneq maniguunnerlu ataqatigiimmata. (Ef 4:1-3, NW) Sooq taamaappa?
Maniguukkutta ajuallajasuujunavianngilagut. Jiisusi nerrersunerarneqarlunilu imerajuttuunerarneqarami qanoq qisuariarpa? Tamatuma ilumuunnginnera inooriaatsimigut ersersippaa saamasumillu oqarluni ‘ilisimassuseq eqqortuutitaasoq suliamigut.’ – Matt 11:19.
Sumiuussutsit, tunuliaquttat allallu pillugit arlaat eqqarsaqqaarnani oqaaseqarpat soormi saamasumik akigukku? Peter, Sydafrikami utoqqaanertatut kiffartortoq, ima oqarpoq: “Arlaata oqaasii uumitsaatigigaangakkit imminut ima aperisarpunga: ‘Jiisusi qanoq qisuariassagaluarpa?’ Ajuallajannginnissara ilikkarnikuuara.”
Jiisusip nalunngilaa inuit naammalluinnanngitsuusut. Jiisusip ajoqersugai ajunngitsuliorusukkaluarlutik naammalluinnanngissusertik pissutigalugu ilaannikkut kukkusarput. Assersuutigalugu Jiisusip toqunissaa aqaguttoq Petrusi, Jaaku Johannesilu eqqumaqquneqaramik eqqumanngillat. Jiisusip taakkuninnga paasinninnini ersersippaa ima oqarami: “Anersaaq kajumikkaluarpoq, uinilli qajannarpoq.” (Matt 26:40, 41) Jiisusip ajoqersukkami naammalluinnanngitsuunerat nalunnginnamiuk uumitsaatinngilai.
Qatanngut arnaq Mandymik atilik siornatigut isornartorsiueqqajaasarsimavoq. Maannali saamasuunermut tunngatillugu Jiisusi sapinngisaminik ilaarniarsaraa. Ima oqarpoq: “Eqqaamaniarsarisarpara tamatta naammalluinnanngitsuusugut. Aamma allat pissusii nuannersut isiginiarnerusarpakka, soorlu Jehova taamaaliortartoq.” Jiisusip inunnik misiginneqataasarnera ilaarlugu illit allat saamasumik pisarsinnaavigit?
Jiisusip Guuti tatigaa. Jiisusi nunarsuarmiinnermini naapertuilluanngitsumik pineqartarpoq. Paatsoorneqartarpoq, nikagineqartarpoq naalliutsinneqarlunilu. Taamaakkaluartoq suli saamajuarsinnaavoq ‘pineqarnini naapertuilluartumik eqqartuussisumut isumagisassanngortikkamiuk’. (1 Petr 2:23) Jiisusip nalunngilaa Ataatami qilammiusup pinertusaartikkumaaraani ajortumillu iliortut piffissaq eqqorlugu eqqartuukkumaarai.
Naapertuilluanngitsuliorfigineqarnitsinni kamalluta qisuariarutta pissutsit ajorneruliinnarsinnaapput. Taamaattumik Biibilimi ima paasitinneqarpugut: “[Inuup] kamannera Guutip iluarisaanik sumilluunniit kinguneqarneq ajorpoq.” (Jaak 1:20) Kamannissamut pissutissaqaraluaruttaluunniit naammalluinnanngissuserput pissutigalugu kukkusumik qisuariarsinnaavugut.
Qatanngut arnaq Tysklandimi najugalik, Cathy, ima eqqarsartarsimavoq: ‘Imminut illersunngikkuit kiap allap illersussagamitit?’ Jehovali pillugu sallusuissut paasigamiuk allatut isiginnittaaseqalerpoq. Ima oqarpoq: “Imminut illersornissara maanna piareersimaffigiuartariaqanngilara. Nalunnginnakku Jehovap suut tamaasa isumagiumaarai saamasuunissara
ajornartinnginneruara.” Illit naapertuilluanngitsuliorfigineqarninni Jiisusip Guutimik tatiginninnera ilaarukku saamajuarsinnaassaatit.PILLUARPUT SAAMASUT
Jiisusip erseqqissarpaa pilluarumalluta saamasuusariaqartugut. Ima oqarpoq: “Pilluarput qanilaartut.” (Matt 5:5) Saamasuuneq sutigut iluaqutaasarpa?
Aappariinnerliornermi iluaqutaasarpoq. Robert, qatanngut Australiameersoq, ima nassuerpoq: “Nuliara annernartunik oqarfigisoortarnikooqaara. Eqqarsaqqaarnanili oqaatigisat utertinneqarsinnaanngillat. Qanoq aliasutsitsigalugu takugaangakku ajuusaartarnikooqaanga.”
Tamatta oqaatsitsigut “amerlasuunik kukkussuteqartarpugut” taamaattumillu aappariinnerliulersinnaalluta. (Jaak 3:2) Taamaattoqartillugu saamasuuneq eqqissisimaannarnissamut aamma oqaatsitta mianersuunnissaanut iluaqutigissavarput. – Uss 17:27.
Robertip eqqissisimasuunissani imminullu aqussinnaanissani ilungersuutigisimavaa. Qanoq kinguneqarpa? Ima oqarpoq: “Maanna nuliaralu isumaqatigiinngissuteqaraangatta tusarnaaqqissaartarpara, saamasumik akisarpara kamannaveersaartarlungalu. Aatsaat taama aappariilluartigaagut.”
Allanut attaveqarluarnerulersitsisarpoq. Ajuallajasut ikinnguteqarpiarneq ajorput. Saamasuunerli ‘eqqissinerup ataqatigiissitsisup aalajangiusimanissaanut’ iluaqutigisarparput. (Ef 4:2, 3) Cathy, eqqaaneqareersoq, ima oqarpoq: “Saamasuugaangama allanik, allaat peqatigiuminaatsissinnaasannik, ilagisaqarneq nuannarinerusarpara.”
Qamuuna eqqissisitsisarpoq. ‘Ilisimassuseq pavannga pisoq’ Biibilimi saamanermut eqqissinermullu atassuserneqarpoq. (Jaak 3:13, 17) Inuk saamasoq ‘uummatimigut eqqissisimasarpoq’. (Uss 14:30, The Holy Bible - New International Version) Martin, saamasuunissaminik ilungersuuteqarsimasoq, ima oqarpoq: “Uanga piumasakka kisiisa malinneqaqqullugit uteriisertarunnaarnikuuvunga. Maanna qamuuna eqqissisimanerullungalu pilluarneruvunga.”
Imaassinnaasoq saamasunngornissaq ilungersuutigeqqaartariaqaripput. Qatanngut angut ima nassuerpoq: “Unneqqarillunga oqassaguma allaat maannamut qamuuna kamangaartarpunga.” Jehovalli saamasuunissaq noqqaassutigeqquaa, ilungersornitsinnilu ikiorumaarpaatigut. (Es 41:10; 1 Tim 6:11) ‘Piginnaanngorsarsinnaavaatigut nakussatsillutalu.’ (1 Petr 5:10) Taava piffissap ingerlanerani Kristusip saamasuunera inussiarnersuuneralu ilaarsinnaalissavarput, soorlu Paulusi taamaaliorsimasoq. – 2 Kor 10:1.