Mpangi Sara * wavova vo: “Omono i nkwa nsoni-nsoni, kikuyibundanga vuvu ko. Muna kuma kiaki, kizolanga kala vamosi ye akwa lulendo ko ngatu akwa mambu mangolo-ngolo. Kansi, izolanga kala vamosi ye alembami ye asakaladi. Ndenda ziula o ntim’ame yo zayisa ntokani zame kwa wantu a mpila yayi. Akundi ame, fu yayi besonganga.”

E mvovo mia mpangi Sara misonganga vo avo tusongele e fu kia lulembamu, akaka bekala akundi eto. Yave alembami kezolanga. E Diambu diandi dikutukasakesanga vo: “Nuvuata . . . lulembamu.” (Kol. 3:12) Nki i lulembamu? Aweyi Yesu kasongela o lulembamu? Aweyi lulembamu lulenda kutusadisila mu kala ye zingu kiakiese?

O lulembamu i fu kitukanga muna ntima, kisadisanga muntu mu kala nkwa luvuvamu. O nlembami okadilanga ye akaka kuna ngemba, nkwa ntim’avuvama yo songa e volo vava akaka bekumfungisanga makasi.

O songa lulembamu ke sinsu kia lutovoko ko, kansi kia nkuma. O mvovo wa Kingerekia wasekolwa vo “lulembamu” wasadilwanga muna yika mvalu a mfuta ona walemvolwa. O mvalu katovokanga ko mu kuma kia mpila kalongelwanga, kansi walongokanga una kalenda sadila o nkum’andi. Diau dimosi mpe, vava tusonganga lulembamu, ediadi dikutusadisanga mu lembeka e kiwuntu kieto yo kadila ye akaka kuna luvuvamu.

Nanga olenda yindula vo: ‘Omono ki nlembami ko.’ Diampasi mu songa lulembamu kadi e nza tuzingilanga, yazala yo wantu akwa nsoki yo kondwa luzindalalu. (Roma 7:19) Dialudi vo, ngolo divavanga muna songa lulembamu, kansi o mwand’avelela a Yave ukutusadisa mu kwamanana kala alembami. (Ngal. 5:22, 23) Nkia nluta tuvua avo tukwamanene kala alembami?

Lulembamu i fu kituntanga o wantu mu vanga yeto e kikundi. Nze una kavova mpangi Sara ona tuyikidi kuna lubantiku, yeto awonso tuzolanga vanga e kikundi ye alembami. Yesu i muntu wasonga lulembamu yo wete yovo walakazi mu mpila isundidi. (2 Kor. 10:1) Kana nkutu yingiana-ngiana ana ke batoma kunzaya ko, bazolanga kala vana ndambu a Yesu.—Maku 10:13-16.

Lulembamu lukututaninanga yo tanina mpe awana batuzungidi. Avo tusongele lulembamu, ke  tufunga makasi mu nzaki ko. (Nga. 16:32) Muna mpila yayi, tuvenga kendeleka akaka musungula ana tutoma zolanga. O lulembamu lukutusadisanga mu zaya dina tuvova ye una tuvovela dio muna lembi lweka akaka.

Kana una vo salu yayingi kakala yau, Yesu wakadilanga ye wantu awonso kuna lulembamu. Muna lumbu yandi, wantu ayingi bafuntukanga mu kuma kia salu yo bimuka ye mazitu. Muna kuma kiaki, lufiaulwisu bavuang’o mfunu. Ekwe kiese bamona vava Yesu kavovesa vo: “Nuiza kwa mono, . . . kadi i nlembami yo ntim’anleka”!​—Mat. 11:28, 29.

Nki kilenda kutusadisa mu kala alembami nze Yesu? Tufwete longokanga e Diambu dia Nzambi muna zaya una Yesu kakadilanga yo wantu ye dina kavanganga muna ntangw’a mpasi. Ozevo, vava tuwanananga ye mambu malenda tonta lulembamu lweto, tufwete vanga e ngolo za tanginina Yesu. (1 Pet. 2:21) Tala mambu matatu masadisa Yesu mu kala nlembami.

Yesu nlembami kakala muna ntima. Yesu wavova vo oyandi “nlembami” ye nkwa “ntim’anleka.” (Mat. 11:29) Bibila kiyikanga e fu yole yayi kumosi kadi o nsakaladi nkwa lulembamu mpe kekalanga.—Efe. 4:1-3.

O lulembamu lukutusadisanga mu lembi funga makasi mu nzaki. Vava wantu bayikila Yesu vo “nkwa loko ye nduvu a vinyu,” adieyi kavanga? Wayambula vo e mbandu andi ambote yavana e mvutu. Kuna lulembamu lwawonso wasonga vo “e ngangu zilungisilwanga muna mavangu mandi.”—Mat. 11:19.

Avo muntu utuvovele mbi mu kuma kia se kieto kia nitu, wau vo tu yakala yovo nkento yovo mu kuma kia mpila twasansukila, nga tusonga lulembamu? Mpangi Peter una vo nkuluntu kuna África do Sul wavova vo: “Avo muntu umfungisi o makasi, ikukiyuvulanga: ‘Adieyi Yesu kadi vanga?’” Wakudikila vo: “Yalongoka vo kifwete funganga makasi mu nzaki ko.”

Yesu wabakulanga vo tu wantu alembi lunga. Alongoki a Yesu makani mambote bakalanga mau, kansi mu kuma kia lembi lunga kwau ke ntangwa zawonso ko bavanganga mambu mambote. Kasikil’owu, muna fuku wavitila lufwa lwa Yesu, Petelo Yakobo yo Yoane ke bayingila ko nze una Yesu kabalomba. Kansi Yesu wasonga vo wabakula e kuma balekela vava kavova vo “o mwanda uzolele, kansi e nitu yatovoka.” (Mat. 26:40, 41) Muna kuma kiaki, Yesu kafungila ntumwa zandi makasi ko.

Mpangi Mandy wakala ye fu kia vovela akaka e mbi, kansi owau osianga e ngolo za tanginina lulembamu lwa Yesu. Wavova vo: “Nze una Yave kevanganga, ivavanga sungamena vo yeto awonso tu wantu alembi lunga yo sia e sungididi muna fu yambote besonganga o wantu.” Nze Yesu, avo obakwidi vo yeto awonso tu wantu alembi lunga, ediadi dikusadisa mu kadila ye akaka kuna lulembamu.

Yesu wayambulanga e mambu vana moko ma Nzambi. Vava kakala ova ntoto, Yesu wabangikwa kondwa kuma. Yesu wavezwa yo mweswa e mpasi. Kana una vo i wau, wakwamanana kala nlembami kadi “wabunda e vuvu kiandi kwa Ndiona ofundisilanga muna unsongi.” (1 Pet. 2:23) Yesu wazaya wo vo o Se diandi dia zulu wadi kunlunga-lunga yo singika e mambu muna ntangw’andi.

Avo wantu batubangikidi kondwa kuma, tulenda vukumunua mu vanga diambu muna kuyitanina, ediadi dilenda wokesa e mpasi zeto. Kiaki i kuma Diambu dia Nzambi dikutusungamesanga vo: “O makasi ma muntu ke metwasanga unsongi wa Nzambi ko.” (Yak. 1:20) Kana nkutu vo tuvuidi kuma kiasikila muna funga makasi, o lembi lunga kweto kulenda kutufila mu vanga vilwa.

Mpangi Cathy ona ozingilanga kuna Alemanha, edi kayindulanga: ‘Avo kivangidi diambu ko muna kuyitanina, ke vena muntu ko ovanga wo.’ Kansi vava kayantika bunda Yave e vuvu, e ngindu zazi zasoba. Wavova vo: “Kikuyitaninanga diaka ko. Ndenda songa lulembamu kadi nzeye wo vo Yave osingika mambu mawonso mambi omu nza.” Avo wavangwa kala e diambu dialembi songa, tanginina e mbandu a Yesu yo bunda Nzambi e vuvu, ediadi dikusadisa mu kwamanana kala nlembami.

Yesu wasonga vo avo tuzolele kala ye kiese, tufwete kala alembami. Wavova vo: “Kiese kwa alembami.” (Mat. 5:5) Tala una lulembamu lulenda kutusadisila muna mambu malende.

Lulembamu lusadisanga mu singika e ntantani muna longo. Mpangi Robert, ozingilanga kuna Austrália wavova vo: “Nkumbu miayingi yasadilanga e mvovo mialwekanga o nkaz’ame. Kansi, avo ovovele diambu ekolo una ku makasi, dikala nze muntu otiamwini o maza, kulendi mo vutukila ko. Yakendalalanga kikilu vava yamonanga una e mvovo miame mialwekelanga o nkaz’ame.”

Bibila kivovanga vo “yeto awonso nkumbu miayingi tutanga e sakuba” muna mvovo. Mana tuvovanga malenda twasa ntantani muna longo. (Yak. 3:2) Avo vabwidi e ntantani, o lulembamu lukutusadisa mu kala twavuvama yo lunga-lunga e mvovo mieto.—Nga. 17:27.

Mpangi Robert wavanga e ngolo mu kala yo ntim’avuvama yo songa e volo. Nkia nluta diantwasila? Wavova vo: “Owau, vava vebwanga e ntantani muna longo lweto, ivanganga e ngolo za toma winikina o nkaz’ame, vovela kuna malembe yo lembi funga o makasi. Owau, ngwizani ambote ngina yau yo nkaz’ame.”

Lulembamu lukutusadisanga mu kala ye ngwizani ambote ye akaka. Awana bazola funga makasi mu nzaki, ke bekalanga ye akundi ayingi ko. Kansi, o lulembamu lukutusadisanga mu ‘tatidila . . . e kangwa kia ungudi.” (Efe. 4:2, 3) Mpangi Cathy, ona tuyikidi kala wavova vo: “O lulembamu lukunsadisanga mu songa e fu yambote vava ikalanga vamosi ye wantu akaka kana nkutu ana befunganga makasi mu nzaki yo kitula e ntangwa yayi se ntangw’a kiese.”

Lulembamu lukutusadisanga mu kala yo ntim’avuvama. E Bibila kiyikanga e “ngangu za ntandu” kumosi ye fu kia lulembamu yo luvuvamu. (Yak. 3:13, 17) O nlembami okalanga yo “ntim’a vuvama.” (Nga. 14:30) Mpangi Martin ona wavanga ngolo mu kala nkwa lulembamu wavova vo: “Owau, kikomekenanga diaka akaka ko vo bavangila o mambu muna mpil’ame. Muna kuma kiaki, ikalanga ye luvuvamu lwa ntima ye kiese.”

Kieleka, ngolo divavanga muna songa lulembamu. Mpangi mosi wavova vo: “Muna vova e ludi, yamu wau, vena ye lumbu ifunganga kikilu o makasi.” Kansi, wau vo Yave ozolele vo twakala alembami, okutusadisa muna sunda e vita yayi. (Yes. 41:10; 1 Tim. 6:11) Oyandi olenda ‘kutukubika yo kutukumika.’ (1 Pet. 5:10) Kuna kulanda, nze Paulu wa ntumwa, tutanginina “lulembamu yo wete wa Kristu.”—2 Kor. 10:1.