Sara-i * chuan, “Mi zakzum tak ka ni a, mahni inrintâwkna ka nei lo. Chuvângin, mi inringtâwk leh invaivungte zînga awm hi nuam ka ti lo. Mahse, mi thuhnuairawlhte leh mi inngaitlâwmte bula awm chu nuam ka ti a. Chutiang mite hnênah chuan ka rilru vei zâwngte leh ka harsatnate chu ka sawi chhuak ngam a. Ka ṭhian ṭha berte chu chutiang mi chu an ni,” tiin a sawi.

Sara-i thusawi chuan thuhnuairawlhnain mi dangte tân mi duhawm tak min nihtîr tih a târ lang a. Thuhnuairawlhna lantîrna chuan Jehova pawh a tilâwm a ni. Pathian Thu chuan: “Thuhnuairawlhna te . . . chuan inthuam rawh u,” tiin min fuih a ni. (Kol. 3:12) Thuhnuairawlhna chu eng nge ni? Engtin nge Isua’n thuhnuairawlhna a lantîr? Engtin nge he mizia hian nun hlimawm zâwk nei tûra min ṭanpui theih?

Thuhnuairawlhna chu zaidam tak min nihtîrtu mizia a ni a. Mi thuhnuairawlh chuan mi dangte chu zaidam tak leh ngilnei takin a cheibâwl a, nuna thil a kal tluan loh hunah pawh rilru dam tak leh chîai lovin a hmachhawn ṭhîn a ni.

Thuhnuairawlhna chu rilru lama puitlinzia chhinchhiahna a ni a. Thuhnuairawlh tih ṭawngkam atâna hman Grik thu mal chu ram sakawr khawi ngam tawh sawi nâna hman a ni. Sakawr chakna chu amahah a la awm reng a; mahse, chu a chakna chu thunun theih tûra zirtîr a ni a. Chutiang bawkin, thuhnuairawlhna kan lantîr hian thunun har tak kan miziate chu kan thunun theiin, mi dangte nên inrem takin kan awm thei a ni.

‘Mi thuhnuairawlh tak ka ni lo,’ tiin kan insawi mai thei. Mi dangte aia chungnun zâwk duhna leh dawhtheih lohna hluarna khawvêla kan awm avângin, thuhnuairawlhna lantîr chu harsa kan ti mai thei a. (Rom 7:19) Thuhnuairawlhna mizia nei tûr chuan theih tâwp chhuah a ngai ngei mai; mahse, Jehova thlarau thianghlimin thuhnuairawlhna lantîr thei tûrin min tichak thei a ni. (Gal. 5:22, 23) Engvângin nge thuhnuairawlhna mizia nei tûra theih tâwp kan chhuah ang?

Thuhnuairawlhna chu mite hîptu mizia a ni. Kan târ lan tâk Sara-i sawi angin, mi thuhnuairawlhte bula awm chu nuam kan ti ṭheuh va. Isua chu thuhnuairawlhna leh ngilneihna kawnga entawn tûr ṭha ber a ni a. (2 Kor. 10:1) Amah hre ngai lo naupangte pawhin a bula awm chu nuam an ti a ni.—Mk. 10:13-16.

Thuhnuairawlhna chuan keimahni leh kan bula mite chu a vênghim. Mi thuhnuairawlh tak kan nih  chuan kan lungni lo nghâl mai lo vang a, thinrim takin kan chhâng lêt nghâl hek lo vang. (Thuf. 16:32) Chutiang a nih chuan, kan hmangaih takte rilru kan tihnat avânga a hnua inchhîrna neih chu kan pumpelh thei ang. Chu bâkah, kan rilru vei zâwngte leh nungchangte thununna chuan kan bul hnaia mite tina lo tûrin min vênghim a ni.

Isua chu mawhphurhna rit tak chelhin buai hle ṭhîn mah se, mi zawng zawng chunga thuhnuairawlh tak a ni a. A hun laia mi tam tak chuan harsatnate an tawh avângin an rilru a hah hlein, thlamuanna an mamawh a ni. Isua’n: “Ka hnênah lo kal ula, . . . thuhnuairawlh leh rilrua inngaitlâwm tak ka nih hi,” tia a sawi an hriat chuan an rilru a va hahdam dâwn tak êm!—Mt. 11:28, 29.

Isua lantîr thuhnuairawlhna chu engtin nge kan neih theih ang? Isua’n mite a cheibâwl dân leh an harsatnate a chinfelsak dân hre tûra Pathian Thu kan zirna hmangin a ni. Tichuan, kan thuhnuairawlhna fiahtu dinhmunte kan hmachhawn hunah Isua anga thiltih kan tum tlat bawk. (1 Pet. 2:21) Mi thuhnuairawlh tak ni tûra Isua ṭanpuitu thil pathumte hi han ngaihtuah teh.

Isua chu mi inngaitlâwm tak a ni. Isua chuan: “Thuhnuairawlh leh rilrua inngaitlâwm tak” a nih thu a sawi a. (Mt. 11:29) Thuhnuairawlhna chuan inngaihtlâwmna nên inzawmna hnai tak a neih avângin, Bible chuan he mize pahnih hi a sawi kawp fo a ni. (Eph. 4:1-3) Engvângin nge chutiang a nih?

Inngaihtlâwmna chuan mahni inngai pawimawh lutuk lo tûr leh thinrim nghâl mai lo tûrin min ṭanpui a. “Chaw heh mi, uain heh mi” tia dik lo taka amah sawichhetute chu Isua’n engtin nge a chhân lêt? An puhna dik lohzia chu a thiltihin a lantîr a, “finna chu a thiltih aṭangin a dikzia a lang,” tiin thuhnuairawlh takin a sawi a ni.—Mt. 11:19.

Mi tuemawin i hnam leh ṭobul chungchângah ngaihtuah hmasa lova a sawichhia che a nih chuan, engvângin nge dam taka chhân lêt i tum loh vang? South Africa rama kohhran upa Peter-a chuan: “Tuemaw thusawi avânga ka thin a rim hian, ‘Isua chu ni se, engtin nge a chhân lêt ang?’ tiin ka inzâwt ṭhîn a. A lutuka mahni inngaihhlutna nei lo tûrin ka zir a ni,” tiin a sawi.

Isua chuan mihringte chak lohna chu a hre thiam. Isua zirtîrte chuan thil ṭha tih duh reng mah se, ṭha famkim lo an nih avângin chutiang chuan an ti reng thei bîk lo va. Entîr nân, Isua’n a thih hma zânah Petera te, Jakoba te, leh Johana te chu harhvâng reng tûrin a hrilh a; mahse, chutiang chuan an awm lo. Ani chuan hriatthiamna nei takin “thlarau zawngin a peih a, tisa erawh chu a chak lo a ni,” tiin a sawi. (Mt. 26:40, 41) A tirhkohte chungah thinrim lo va, hriatthiamna a lantîr chu lâwmawm tak a ni.

Unaunu Mandy-i chu mite sawisêl hmang tak a ni a; mahse, tûnah chuan thuhnuairawlhna chungchânga Isua entawn tûr siam chu theih tâwp chhuaha zui a tum a. Ani chuan, “Mi zawng zawng hi ṭha famkim lo vek kan ni tih ka inhriatnawntîr fo va; chu bâkah, Jehova’n mite ṭhatna lai a hmuh anga hmuh ve ka tum tlat a ni,” tiin a sawi. Isua’n khawngaihna nei taka mihringte chak lohna a thlîr dân chuan thuhnuairawlh taka mi dangte cheibâwl tûrin a ṭanpui thei che em?

Isua’n Pathian a rinchhan. Leia a awm lai khân, Isua chuan dik lo taka cheibâwl a tâwk a. Mite hriatthiam lohna te, hmuhsitna te, leh nghaisaknate pawh a tâwk a ni. Chuti chung pawhin, ani chu ‘fel taka ngaihtuah ṭhîntu hnêna a inpêk’ avângin, thuhnuairawlh takin a awm reng a. (1 Pet. 2:23) Isua chuan a Pain a ngaihsak ang tih leh dik lo taka amah cheibâwltute chu a hun takah a hrem ang tih a hria a ni.

Mi mal intihthiam lohna avânga thinrim a, thungrulh kan tum a nih chuan, a lutuka kan chhân lêt theih avângin dinhmunte chu a chhe zual zâwk mah thei a. Chuvângin, Bible chuan: “Mihring thinurnain Pathian felna chu a siam si lo,” tiin min hrilh a ni. (Jak. 1:20) Thinrim âwm rêng kan nih pawhin, ṭhat famkim lohna chuan a dik lo zâwnga chhâng lêt tûrin min chêttîr thei a ni.

German rama unaunu Cathy-i chuan, ‘Mahni i invên loh chuan tu mân an vêng lo vang che,’ tiin a inngaihtuah ṭhîn a. Mahse, Jehova rinchhan dân a zir hnu chuan a rilru put hmang chu a thlâk ta a ni. Ani chuan: “Tûnah chuan mahni ka invên reng a ngai tawh lo. Jehova’n thil engkim a thunun tlat tih ka hriat avângin thuhnuairawlh taka thil ka tih a ngai a ni,” tiin a sawi. Dik lo taka cheibâwl i nih chuan Pathian rinchhanna kawnga Isua entawn tûr siam zuina chuan thuhnuairawlhna nei reng tûrin a ṭanpui ang che.

Isua chuan thuhnuairawlhna chu hlimna kan neih nâna thil pawimawh tak a ni tih a târ lang a. “Thuhnuairawlhte chu an eng a thâwl e,” tiin a sawi a ni. (Mt. 5:5) Thuhnuairawlhnain a hnuaia târ lan dinhmunte i hmachhawn huna a ṭanpui theih dân che chu lo chhinchhiah rawh.

Thuhnuairawlhna chuan nupa inkâr boruak a tinuam. Australia rama unau Robert-a chuan: “Tum loh takin ka nupui rilru tinatu thil tam tak ka sawi a. Thinrim laia ṭawngkam na tak kan sawi chhuahte chu sût lêt theih a ni tawh lo. Ka nupui rilru ka tina tih ka hriat chuan hrehawm ka ti hle a ni,” tiin a sawi.

Kan thusawiin ‘thil tam tak kan tisual fo ṭhîn a,’ ngaihtuah hmasa lova kan thusawite chuan nupa inkârah buaina a thlen thei a ni. (Jak. 3:2) Chutiang hunah chuan thuhnuairawlhnain rilru dam taka awm tûr leh kan lei vêng ṭha tûrin min ṭanpui ang.—Thuf. 17:27.

Robert-a chuan zaidamna leh insûmtheihna nei tûrin theih tâwp a chhuah a. Eng nge a rah chhuah? Ani chuan: “Tûnah chuan kan nupa inkâra inhmuh thiam lohna a awm apiangin, ngun taka ngaihthlâk a, zaidam taka sawi a, thinrim nghâl mai loh chu ka tum tlat a. Kan nupa inlaichînna chu a ṭha tawh hle a ni,” tiin a sawi.

Thuhuairawlhna chuan mi dangte nên inngeih lehzual tûrin min ṭanpui. Awlsam taka lung ni lo nghâl mai ṭhînte chuan ṭhian an nei tlêm hle a. Mahse, thuhnuairawlhna chuan ‘remna phuarnaah chuan inpumkhatna vawng tûrin’ min ṭanpui a ni. (Eph. 4:1-3) A chunga kan sawi tâk unaunu Cathy-i chuan: “Mi ṭhenkhat chu nêlawm lo tak ni mah se, thuhnuairawlhna chuan mite nêna inngeih lehzual tûrin min ṭanpui a ni,” tiin a sawi.

Thuhnuairawlhna chuan chhûngrila thlamuanna min neihtîr. Bible chuan “chung lam aṭanga finna lo chhuak” chu thuhnuairawlhna leh remna nên a thlunzawm a. (Jak. 3:13, 17) Mi thuhnuairawlh chuan “rilru dam” a nei a ni. (Thuf. 14:30) Theih tâwp chhuaha mi thuhnuairawlh tak nih tumtu unau Martin-a chuan: “Tûnah chuan mi insiamrem thei tak ka ni tawh a, lungni lo nghâl mai mi ka ni tawh lo, chhûngrilah thlamuanna leh hlimna ka nei lehzual tawh a ni,” tiin a sawi.

Ni e, thuhnuairawlhna nei tûr chuan, theih tâwp kan chhuah a ngai mai thei a ni. Unaupa pakhat chuan: “Dik taka sawi chuan, nasa taka thinrim châng ka la nei a ni,” tiin a sawi. Mahse, thuhnuairawlhna nei zêl tûra min fuihtu Pathian Jehova chuan theih tâwp kan chhuahnaah min ṭanpui ang. (Is. 41:10; 1 Tim. 6:11) Ani chuan min “siam ṭha” theiin min “tichak” thei a ni. (1 Pet. 5:10) A tâwpah, tirhkoh Paula angin ‘Krista zaidamna leh nunnêmna’ chu kan lantîr ve thei ang.—2 Kor. 10:1.