“Miyo giri muthu a manyazo kaginiiroromela. Mwaha wa yeyo, gamwaddamela muthu owopiha, obe muthu akopolo, ginakala oothuwathuwene. Mbwenye, gakala naathu ehinanyanyuwa bure-bure ni owiyeviha, ginakala ootapuwene. Ginowanda owoga, makathamiho aga ni dhatedhene dhiri mmurimani mwaga. Akwaaga avati vamurima biyayo. — Sara. *

Madhu a Sara enooniha wi, nakala athu oohaguva onyanyuwa, amodha enerege mafuna wandana ni iyo. Ohiya eyo, ohaguva onyanyuwa winomuhagalasa Yehova. Mwaha wa yeyo, mBibliyani ehikalamo madhu enasoriha yegi: ‘Muware thagaraga enddimuwa.’ (Col. 3:12) Ohaguva onyanyuwa enatapulela ddi? Yesu aatonyihedhe avi okala oohaguva onyanyuwa? Ki vano, ekalelo ela yohaguva onyanyuwa, enanikavihera addi?

Ohaguva onyanyuwa, ekalelo enadha muwari mwa muthu; enadha mwaha wookala muthu a murenddele. Muthu ahinanyayuwa bure-bure, akala naathu amodha dowaddameleya, dapama, dowivanya ni onowanda okurumuwa aligiwa.

Ohaguva onyanyuwa, kahiyo ekalelo yolodhowa, mbwenye ekalelo yakopolo. Ni egeregu, madhu owi ohaguva onyanyuwa, yolabihedhiwa wihina emwithanena kavalo amukokolani ofiyedha ohiddiwa wi afuwiwege. Kahiyo wera kavalo oyo oohiya okala a kopolo mwaha woxagihiwa, mbwenye, oliye oohudhera makalelo oolabiha kopolo dhaye. Ni mukalelo mmodhave, ohaguva onyanyuwa winonikavihera “osaddula” ekalelo yehu ni okanna murenddele ni athu amodha.

Podi wera onowubuwela wegi: ‘Miyo kagiri muthu oohaguva onyanyuwa.’ Mwilaboni muna nnakalihu, ehidhalamo athu oowali ni oohuvilela. Bumwahaya okala muthu oohaguva onyanyuwa podi okala ethu yorusa. (Rom. 7:19) Mwebaribarene, wonihedha ohaguva onyanyuwa, enohoweleya wilibihera, mbwenye muzimu wotxena wa Yehova onere onikavihera wihina nnaaselele wilibihera ofiyedha kanna ekalelo ela yohaguva onyanyuwa. (Gál. 5:22, 23) Wilibihera wihina nikale athu oohaguva onyanyuwa, mwahaya bwaddi edhe ekalege ethu yathima?

Ohaguva onyanyuwa, ekalelo enaaddiginya athu murima. Enakala ninga Sara awogiwe omambelelo, oliye ohusoriha egi  — iyo nakala naathu ehinanyanyuwa bure-bure nnakala ootapuwene. Yesu tajhiha enlubale wodhela ohaguva onyanyuwa ni okala apama. (2 Cor. 10:1) Anamwani amudhidhi yole, nuumala omunona Yesu, yofuna vanlubale omwaddamela. — Mar. 10:13-16.

 Ohaguva onyanyuwa winonibarela ni winowabarela ale nnakalihuna malabo matene. Nakala oohaguva onyanyuwa, kannaaguvele otakaleliwa, newene kannerena ethu-sithu wula nigari oonyanyuweene. (Pro. 16:32) Nerana ndo, kannasibiwe obure womukula muthu — thabwathabwa ole nnamudhivelihu. Woona wi ohaguva onyanyuwa winonikavihera osugwera dhammurimani mwehu ni dhowera dhehu, iyo kanidha naatotela goyi athu amodha.

Yesu aali muthu anna mabasa owinjhiva ni ahikanna mutholo munlubale. Podi dhigarive ndo, owaweddiha atene nuuhaguva onyanyuwa. Owinjhiva malabo a Yesu, yalabesa sovuma ni yakalesa onyemeliweene. Aliwa yohowela olibihiwa. Podi wera yahitodoleya vavale Yesu aasoriheye egi: ‘Mudhe wa miyo, mwaha wi miyo kaginanyanyuwa bure-bure, teto, murima waaga bowiyeviha.’ — Mat. 11:28, 29.

Ethu baani enaanikavihere ofiyedha okala oohaguva onyanyuwa ninga Yesu? Ethu yobajha, enohoweleya ohudhera madhu a Mulugu wihina nnone makalelo Yesu aweddihiye athu, ni makalelo eddihiye muselu dhorusa. Vasogolova, nafwanyiwa dhithu dhineha ekalelo yehu yohaguva onyanyuwa, enohoweleya wilibihedha wi nimutajhihe Yesu. (1 Ped. 2:21) Kasugwa dhithu tharu dhamukavihera Yesu okala oohaguva onyanyuwa.

Yesu ari owiyeviha mmurimani. Yesu kawogile wi aari ‘oohaguva onyanyuwa’ baahi, mbwenye ohuwoga egi ‘murima waaga bowiyeviha.’ (Mat. 11:29) Bibliya onowiwananiha dhikalelo ndha bili, mwaha wi ohaguva onyanyuwa ni wiyeviha winedda vamodha. (Efé. 4:1-3) Ni makalelo bani?

Wiyeviha winonikavihera ohipwatha naaruwaniwaga, newene ohunyanyuwa bure-bure. Athu amodha nuumwinkedha Yesu wi maliba ‘ojha bure ni ong’wa ‘, oliye awakunle avi? Oliye ahilabihedha emuthu yaye wihina avahe yowakula. Vasogolova, ni makalelo oohaguva onyanyuwa, oliye wera: ‘Thotho enooniwa wi sapama ni dhowera dhewa.’ — Mat. 11:19.

Muthu awoga dhohikala pama wodhela makalelo awo a thebe, akala ori mulobwana obe muhiyana, obe anyemula mburo obaliwiwe, ononamo avi oxixa omwakula ni makalelo oohaguva onyanyuwa? Namaholela ammulogoni anithaniwa Pedro anakala elabo yo África do Sul, ohusoriha egi: “Muthu awoga ethu enagitakalela, miyo ginowikoha: ‘Ahakale ninga aari Yesu, eerihedhe ethu baani?’”. Oliye ohusorihave egi: “Gihisuza makalelo oohupwatha, muthu awoga ethu enagitakalela.”

Yesu ahinona wi athu kahiyo oologomana. Anamahara a Yesu yahikanna efunelo yapama, mbwenye, mwaha wohilogomana, kiyawedha werana opama malabo matene. Motajhiha, emahiyu Yesu ahinathi okwa, Peduru, Tiyagu ni Juwawu kiyawendhe omutodola Yesu ninga vaalobiliye. Mbwenye Yesu ahinona wi ‘mwebaribarene, muzimu onofuna, mbwenye mwiili kunawedha.’ (Mat. 26:40, 41) Mwaha wonona ekalelo yohilogomana ya muthu, Yesu kaanyanyuwela arumiwi aye.

Murogola anithaniwa Mandy, afunesa wi athu yeregena dhithu ninga mwafuneliye. Mbwenye, peeno oliye anowilibihera wi akale oohaguva onyanyuwa ninga Yesu. Oliye ohusoriha egi: “Miyo ginowilibihera wihina girumedhe wi athu atene boohilogomana, ginosugwa pamadhene dhikalelo dhapama dhaathu, ninga Yehova aneriye.” Ninga Yesu, wubuwelaga wi athu bohilogomana, onere wanda waweddiha ni makalelo oohaguva onyanyuwa.

Muselu dhatedhene Yesu ahela mmadani mwa Mulugu. Agaari elabo yavati, Yesu ohutorihiwa ni makalelo abure. Oliye oosukumihiwa, athu yomwinkedha ni ootabusiwa. Naari dhigarive ndo, oliye oodhowave oonihaga ohaguva onyanyuwa, mwaha wi oliye dhatedhene ‘apeleka wa ole anatoriha mowogowa.’ (1 Ped. 2:23) Yesu ahinona wi babe oodhulu, eere omusamalela oliye, teto, mudhidhi wafiya eere oomariha obure waatene.

Akala onowoona goyi mwaha wowinkedhiwa obe wowereliwa obure, okala oonyanyuweene, podi wera winere wuthukulela otoriha mowogowa ni mada awo. Mbwenye werana eyo, winenjhedhedha muladdu baahi. Bibliya anonubusedha egi: ‘Onyanyuwa wa muthu kunadhana wogowa wa Mulugu.’ (Tia. 1:20) Podi akala nihikanna marazawu; nakala oonyanyuweene, ohilogomana winere onithukulela werena ethu yabure.

Murogola anithaniwa Cathy anakala elabo yo Alemanha, owubuwela ayi: ‘Miyo gaahiwakihedha, kaavo anaagakihedhe.’ Mbwenye nuumala osuza makalelo oomuroromela Yehova, oliye osaddula mubuwelo waaye. Oliye ohusoriha egi: “Vano miyo kaginahowela wiwakihedha. Ethu enagivaha kopolo yowerana ethu wula gihinyanyuwe, fuunona wi Yehova onosugwera dhatedhene ni makalelo owogowa.” Akala we onowinkedhiwaga,  omutajhihe Yesu ni omuroromele Yehova. Eyo enere wokavihera okala oohaguva onyanyuwa.

Yesu ohuwoga wi ohaguva onyanyuwa winovaha ohagalala. Oliye ohusoriha egi: ‘Oohagalala baale ehinanyanyuwa bure-bure.’ (Mat. 5:5) Osugwe makalelo enakavihera ohaguva onyanyuwa:

Ohaguva onyanyuwa winovugula makathamiho vamuralani. Ddibila Robert anakala elabo yo Australia, Anorumedha egi: “Miyo gihiwoga dhithu dhowinjhiva sowubuwela dhimutakalele mwaraga. Wakala oonyanyuweene, vano onowoga ethu, kunawelela mundduli. Miyo gakalesa owuukuwene vanlubale goona wi madhu aaga ehinvereya murima mwaraga.”

‘Iyo aatene nnokwakwathuwa dila dhowinjhiva.’ Mbwenye dhithu nnawogihu, ni ndhe nnawogihu sowubuwela podi ononga murenddele ori vamuralani. (Tia. 3:2) Vamuralani vakala mukangano, ohaguva onyanyuwa winonikavihera ovilela, omaala ni osugwera nlumi. — Pro. 17:27.

Robert ahilibihera vanlubale wi anone wivanya ni omaleya. Ki oliye ohawakela mareeliho? Oliye ohuwoga egi: “Vano vaade vakumelela magudhulano, miyo ginowilibihera ni enonelo wi ginvuruwane mwaraga pamadhene, ofiyedha owoga nuupama wula gihinyanyuwe. Vano, wandana waaga ni mwaraga, hiii kamwiweni, fwapama vanlubale.”

Ohaguva onyanyuwa winonikavihera weedda pama naathu amodha. Muthu aanyanyuwaga bure-bure, kanandana naathu owinjhiva. Ohiya eyo, ohaguva onyanyuwa winonikavihera okanna ‘ekalelo ya muzimu’ enanikavihera weedda ‘mwimodhani ni murenddele.’ (Efé. 4:2, 3) Cathy awogiwe, ohusorihave egi: “Mudhidhi wowaredha, ohaguva onyanyuwa winogikavihera wirugunusedha gagumana naathu. Naari muthu aruse-viruseleye, ginowedha okala nuuliye.”

Ohaguva onyanyuwa winonikavihera okanna murenddele. Bibliya onoliganiha ‘thotho dhinadhela odhulu’ ni ohaguva onyanyuwa vamodha ni murenddele. (Tia. 3:13, 17) Ole ahinanyanyuwa bure-bure, ohukanna ‘murima wopwaseya.’ (Pro. 14:30) Martin, iilihibihere wi akale muthu ohaguva onyanyuwa, ohusoriha egi: “Vano giri muthu owaguva wirugunusedha, vano owali wogituluwa, teto, gihikanna murenddele ni ohagalala winlubale.”

Mwebaribarene, okala oohaguva onyanyuwa, enohoweleya wilibihera. Ddibila modha ohuwoga egi: “Ofiyedha peeno, ginofwanyiwa mudhidhi, vano gibajhe woona nikame naaga nthamagaga.” Mbwenye Yehova anafuna wi nikale athu oohaguva onyanyuwa. Mohanganyedha oliye onere onikavihera wi naande ogonjhiha koddo ela. (Isa. 41:10; 1 Tim. 6:11) Oliye ‘onere wakwaneliha oxagihiwa wehu’ ni ‘onere onivaha kopolo.’ (1 Ped. 5:10) Osogolove, nnere okala ninga murumiwi Pawulo, wandile otajhiha ‘ohaguva onyanyuwa ni opama wa Kiristu.’ — 2 Cor. 10:1.