Iin ñá hermana ñá naní Sara * káchiñá: “Yi̱ʼi̱ nda̱a̱ tá loʼovíi̱ kúkaʼanní nu̱úi̱ ta xíka-inii̱ ña̱ keʼíi̱ sava ña̱ʼa. Xa̱ʼa̱ ña̱yóʼo, va̱ása kútói̱ kutáʼi̱n xíʼin na̱ yiví na̱ kue̱ʼe̱ní. Soo, va̱ʼaní kúni̱i̱ tá íyoi̱ xíʼin na̱ yiví na̱ vitá-ini. Ta va̱ása íxayo̱ʼvi̱ña xíʼi̱n ña̱ ka̱ʼi̱n xíʼin na̱ yiví na̱ íyo saá xa̱ʼa̱ ña̱ ndóʼi̱. Ta ndiʼi na̱ migoi̱ saá íyona”.

Ña̱ káʼa̱n ñá Sara náʼa̱ña ña̱ tá vitá íyo iniyó na̱ yiví kútóona kutáʼanna xíʼinyó. Ta saátu, Jehová kúsi̱í-inira xíʼin na̱ yiví na̱ vitá-ini. Nu̱ú tu̱ʼunra káʼa̱nra xíʼinyó: “Vitá koo inindó” (Col. 3:12). ¿Ndáaña kúú ña̱ vitá-ini? ¿Ndáa ki̱ʼva ni̱na̱ʼa̱ ta̱ Jesús ña̱ vitá ni̱xi̱yo inira? Ta, ¿ndáa ki̱ʼva kivi chindeétáʼanña xíʼinyó ña̱ si̱í kooyó?

Ña̱ vitá-ini kúú ña̱ kúúmií na̱ yiví na̱ táxi̱n íyo ini. Na̱ vitá íyo ini vií kéʼéna xíʼin inkana, ta táxi̱n íyo inina tá yáʼana nu̱ú tu̱ndóʼo.

Na̱ yiví na̱ vitá íyo ini ndakú íyo inina. Na̱ griego xi̱xiniñúʼuna ña̱ tu̱ʼun vitá-ini ña̱ ka̱ʼa̱nna xa̱ʼa̱ iin kuáyi̱ yukú tí i̱xaa másona. Iin kuáyi̱ tí i̱xaa másona kúúmiívarí ndiʼi ndee̱rí, soo viíní sa̱náʼa̱narí ña̱ va̱ása kue̱ʼe̱ka koorí. Ki̱ʼva saá ndóʼoyó tá vitá íyo iniyó, íxaa másoyó ña̱ kue̱ʼe̱ íyoyó, ta va̱ʼa kítáʼanyó xíʼin inkana.

Sana ndákanixi̱níyó ña̱ nda̱a̱ tá ka̱kuvíyó va̱ása vitá íyo iniyó. Ta saátu íyoyó xíʼin na̱ yiví na̱ va̱ása kúee íyo ini ta kue̱ʼe̱nína, xa̱ʼa̱ ña̱yóʼo íxayo̱ʼvi̱ña xíʼinyó ña̱ vitá koo iniyó (Rom. 7:19). Ta ña̱ va̱ʼa vitá koo iniyó xíniñúʼu chika̱a̱níyó ndee̱ ña̱ keʼéyó ña̱yóʼo, soo espíritu santo Jehová kúú ña̱ kivi chindeétáʼan xíʼinyó (Gál. 5:22, 23). ¿Nda̱chun xíniñúʼu chika̱a̱níyó ndee̱ ña̱ vitá koo iniyó?

Tá vitá íyo iniyó na̱ yiví kuni̱na kutáʼanna xíʼinyó. Nda̱a̱ táki̱ʼva ni̱ka̱ʼa̱n ñá Sara ñá xa̱a̱ ni̱ka̱ʼa̱nyó xa̱ʼa̱, va̱ʼaní kúniyó tá kítáʼanyó xíʼin na̱ yiví na̱ vitá íyo ini. Ta̱ Jesús vitá ta va̱ʼa ni̱xi̱yo inira (2 Cor. 10:1). Ta nda̱a̱ na̱ va̱lí na̱ va̱ása níxixini̱ va̱ʼa ta̱ Jesús xi̱kuni̱na koo yatinna xíʼinra (Mar. 10:13-16).

Ña̱ vitá-ini chíndeétáʼanña xíʼin miíyó ta saátu xíʼin na̱ kítáʼan xíʼinyó. Tá vitá íyo iniyó, va̱ása ndakava-iniyó tá va̱ása kúchiñuyó keʼéyó iin ña̱ʼa ta  ni va̱ása sa̱a̱ kamayó (Prov. 16:32). Ña̱yóʼo chindeétáʼanña xíʼinyó ña̱ va̱ása keʼéyó iin ña̱ʼa ña̱ kivi saxóʼvi̱ inkana, tá kúú na̱ kúʼvi̱ní-iniyó xíniyó. Ta saátu ña̱ vitá íyo iniyó chíndeétáʼanña xíʼin inkana. Tá va̱ása sáa̱ kamayó nda̱a̱ ni iinna va̱ása xo̱ʼvi̱.

Ni ni̱xi̱yoní chiñu nu̱ú ta̱ Jesús, ndiʼi tiempo vitá ni̱xi̱yo inira. Ku̱a̱ʼání na̱ yiví yo̱ʼvi̱ní ni̱xi̱yo ña̱ xi̱takuna, ta ni̱xi̱yoní tu̱ndóʼo nu̱úna. Ña̱kán xi̱niñúʼu sandíkona-inina. Tu̱ʼun ña̱ ni̱ka̱ʼa̱n ta̱ Jesús xíʼinna chi̱ka̱a̱níña ndee̱ xíʼinna, ka̱chira: “Kixindó nu̱úi̱, [...] saáchi ta̱ vitá-ini kúi̱, ta va̱ʼa inii̱” (Mat. 11:28, 29).

¿Ndáa ki̱ʼva kivi kundiku̱nyó yichi̱ ta̱ Jesús? Siʼna xíniñúʼu kaʼviyó tu̱ʼun Ndióxi̱ ña̱ va̱ʼa kunda̱a̱-iniyó ndáa ki̱ʼva xi̱keʼé ta̱ Jesús xíʼin na̱ yiví, ta saátu ndáa ki̱ʼva xi̱yaʼara nu̱ú tu̱ndóʼo ña̱ yo̱ʼvi̱. Tándi̱ʼi, ná chika̱a̱yó ndee̱ ña̱ keʼéyó nda̱a̱ táki̱ʼva ke̱ʼéra, tá ná ya̱ʼayó nu̱ú iin tu̱ndóʼo ña̱ kivi ixayo̱ʼvi̱ xíʼinyó ña̱ vitá koo iniyó (1 Ped. 2:21). Ná ka̱ʼa̱nyó xa̱ʼa̱ u̱ni̱ ña̱ chi̱ndeétáʼan xíʼin ta̱ Jesús ña̱ vitá ni̱xi̱yo inira.

Vitání ni̱xi̱yo ini ta̱ Jesús. Miíra ni̱ka̱ʼa̱n ña̱ kúúra ta̱ vitá-ini ta va̱ʼaní inira (Mat. 11:29). Ña̱ Biblia chítáʼanña ña̱ tu̱ʼun vitá koo iniyó xíʼin ña̱ va̱ása ni̱nu kuniyó, saáchi u̱vi̱ saá ña̱yóʼo inkáchi kítáʼanña. (Efes. 4:1-3). ¿Nda̱chun káʼa̱nyó ña̱yóʼo?

Tá va̱ása ni̱nu kúniyó va̱ása ndakanixi̱níyó ña̱ ndáyáʼviníkayó nu̱ú inkana ta ni va̱ása kama sa̱a̱yó. ¿Ndáaña ke̱ʼé ta̱ Jesús tá ni̱ka̱ʼa̱nna ña̱ xíxiníra ta xíʼira vino? Xíʼin ña̱ ke̱ʼéra ni̱na̱ʼa̱ra ña̱ su̱ví ña̱ ndixa kúú ña̱ xi̱ka̱ʼa̱nna xa̱ʼa̱ra, ta viíní ni̱ka̱ʼa̱nra “ña̱ ndíchi ña̱ kéʼé iin na̱ yiví kúú ña̱ káʼa̱n va̱ʼa xa̱ʼa̱na” (Mat. 11:19).

Tá káʼa̱nna ña̱ va̱ása va̱ʼa xa̱ʼa̱ razayó, xa̱ʼa̱ ña̱ kúúyó ta̱a á ñaʼá ta saátu xa̱ʼa̱ ñuu nu̱ú ke̱eyó, ná chika̱a̱yó ndee̱ ña̱ vií ndakuiinyó yuʼúna. Iin ta̱ anciano ta̱ naní Peter ta̱ íyo chí Sudáfrica, káchira: “Tá iinna káʼa̱nna xa̱ʼa̱ iin ña̱ʼa ña̱ sása̱a̱ yi̱ʼi̱, ndákanixi̱níi̱ ndáaña keʼé ta̱ Jesús”. Ta káʼa̱nkara: “Sa̱kuaʼi̱ ña̱ va̱ása xíniñúʼu ndakanixi̱níi̱ ña̱ ndáyáʼvikai̱”.

Ta̱ Jesús xi̱kunda̱a̱-inira ndáaña íxayo̱ʼvi̱ xíʼin na̱ yiví keʼéna. Na̱ discípulo ta̱ Jesús xi̱kuni̱na keʼéna ña̱ va̱ʼa, soo xa̱ʼa̱ ña̱ xi̱kuuna na̱ yiví ku̱a̱chi xi̱ ixayo̱ʼvi̱ña xíʼinna. Tá kúú, ñuú tá kúma̱níka kuvi ta̱ Jesús, ta̱ Pedro, ta̱ Santiago xíʼin ta̱ Juan va̱ása níchindeétáʼanna xíʼinra nda̱a̱ táki̱ʼva ni̱ka̱ʼa̱nra xíʼinna. Ta̱ Jesús ni̱ka̱ʼa̱nra xíʼinna: “Ña̱ espíritu íyo tu̱ʼvaña ña̱ chindeétáʼanña xíʼinndó, soo miíndó vitávandó” (Mat. 26:40, 41). Xa̱ʼa̱ ña̱ xi̱kunda̱a̱-inira ña̱ kúúna na̱ yiví ku̱a̱chi va̱ása nísa̱a̱ra xíʼinna.

Ná kotoyó ña̱ ndo̱ʼo iin ñá hermana ñá naní Mandy. Tá ya̱chi̱ kue̱ʼe̱ní ni̱xi̱yoñá, soo vitin chíka̱a̱ñá ndee̱ ña̱ kundiku̱nñá yichi̱ ta̱ Jesús ña̱ vitá koo iniñá. Ñáyóʼo káchiñá: “Chíka̱i̱ ndee̱ ña̱ ndakaʼíi̱n ña̱ ndiʼiyó kúúyó na̱ yiví ku̱a̱chi, ta xítoi̱ ña̱ va̱ʼa ña̱ kúúmiína nda̱a̱ táki̱ʼva kéʼé mií Jehová”. Ñá Mandy xi̱ndiku̱nñá yichi̱ ta̱ Jesús, chi ta̱yóʼo xi̱xitora ña̱ íyo sava ña̱ íxayo̱ʼvi̱ xíʼin na̱ yiví keʼéna. Tá saá ná keʼé miíyó, va̱ása ixayo̱ʼvi̱ña xíʼinyó ña̱ vitá koo iniyó xíʼin inkana.

Ta̱ Jesús xi̱sandákoora ña̱ xi̱ndoʼora ndaʼa̱ Ndióxi̱. Tá ni̱xi̱yora nu̱ú ñuʼú yóʼo xi̱niñúʼu kundeé-inira xa̱ʼa̱ ña̱ ke̱ʼéna ña̱ va̱ása va̱ʼa xíʼinra. Chi síín xi̱kunda̱a̱-inina xíʼin ña̱ xi̱keʼéra á xi̱ka̱ʼa̱nra, ta ku̱ndasína xi̱ninara ta i̱xandi̱va̱ʼana xíʼinra. Ndiʼi tiempo vitá ni̱xi̱yo inira, chi sa̱ndákoora ndiʼi ña̱ xi̱ndoʼora ndaʼa̱ Ndióxi̱ ta̱ nda̱kúní tíin ku̱a̱chi (1 Ped. 2:23). Ta̱ Jesús xi̱kunda̱a̱-inira ña̱ kundaa yivára ta̱ íyo chí ndiví miíra, ta taxira castigo ndaʼa̱ na̱ ke̱ʼé ña̱ va̱ása va̱ʼa xíʼinra mií tiempo ña̱ xíni̱ miíra.

Tá kéʼéna iin ña̱ va̱ása va̱ʼa xíʼinyó ta sáa̱yó, kivi keʼéyó iin ña̱ va̱ása va̱ʼa ta ndundeéka ku̱a̱chi. Ña̱kán, sándakaʼán tu̱ʼun Ndióxi̱ miíyó: “Tá sáa̱ na̱ yiví va̱ása kéʼéna ña̱ nda̱kú ña̱ kúni̱ Ndióxi̱” (Sant. 1:20). Tá íyo iin xa̱ʼa̱ kúú ña̱ sáa̱yó kivi keʼéyó iin ña̱ va̱ása va̱ʼa xa̱ʼa̱ ña̱ kúúyó na̱ yiví ku̱a̱chi.

Iin ñá hermana ñá ñuu Alemania ñá naní Cathy xi̱ndakanixi̱níñá, ña̱ tá va̱ása káʼa̱nñá xa̱ʼa̱ derecho ña̱ kúúmiíñá kǒo inka na̱ keʼé ña̱yóʼo. Soo na̱samañá ki̱ʼva ña̱ ndákanixi̱níñá tá ki̱xáʼañá kándíxañá Jehová. Ñáyóʼo káchiñá: “Va̱ása xíniñúʼu koo tu̱ʼvai̱ ña̱ va̱ʼa na̱ʼi̱ ndáaña kúú derecho ña̱ kúúmiíi̱.  Vitin vitáka íyo inii̱, chi kúnda̱a̱-inii̱ ña̱ mií Jehová ndasavií ndiʼi ña̱ va̱ása va̱ʼa ña̱ íyo nu̱ú ñuyǐví yóʼo”. Tá ná keʼéna iin ña̱ va̱ása va̱ʼa xíʼinyó, ña̱ kandíxayó Jehová nda̱a̱ táki̱ʼva xi̱keʼé ta̱ Jesús kúú ña̱ chindeétáʼan xíʼinyó ña̱ vitá koo iniyó.

Ta̱ Jesús ni̱ka̱ʼa̱nra ña̱ tá vitá íyo iniyó si̱í kooyó. Ta̱yóʼo ka̱chira: “Si̱íní íyo na̱ vitá-ini” (Mat. 5:5). Ná kotoyó ndáaña va̱ʼa kivi ndakiʼinyó xa̱ʼa̱ ña̱yóʼo.

Chíndeétáʼanña xíʼin na̱ ti̱ndaʼa̱ ña̱ va̱ása kooní ku̱a̱chi nu̱úna. Iin ta̱ hermano ta̱ íyo chí Australia ta̱ naní Robert káchira: “Ku̱a̱ʼání tu̱ʼun ña̱ va̱ása va̱ʼa xi̱ka̱ʼi̱n xíʼin ñá síʼíi̱, soo ña̱ tu̱ʼun yóʼo su̱ví ña̱ nda̱a̱ níxikuuña. Soo tá kíxáʼún káʼún tu̱ʼun yo̱ʼvi̱ xa̱ʼa̱ ña̱ sáa̱ún, kǒoka ña̱ kivi keʼún tándi̱ʼi. Va̱ása va̱ʼa níxikuni̱i̱ tá xi̱kiʼi̱n kuenta ña̱ sa̱xóʼvi̱ ña̱ tu̱ʼun yóʼo ini ñá síʼíi̱”.

Sava yichi̱ ku̱a̱ʼání ña̱ va̱ása va̱ʼa káʼa̱nyó. Tá va̱ása ndákani vií xi̱níyó xíʼin tu̱ʼun ña̱ káʼa̱nyó, kivi koo ku̱a̱ʼání tu̱ndóʼo nu̱úyó xíʼin na̱ ti̱ndaʼa̱ xíʼinyó (Sant. 3:2). Tá saá ná ndoʼoyó, ña̱ vitá-ini kúú ña̱ chindeétáʼan xíʼinyó ña̱ táxi̱n koo iniyó ta kiʼinyó kuenta xíʼin ña̱ káʼa̱nyó (Prov. 17:27).

Ta̱ Robert chi̱ka̱a̱níra ndee̱ ña̱ va̱ʼa táxi̱n koo inira ta ka̱ʼnu̱-inira. ¿Ndáaña va̱ʼa nda̱kiʼinra? Ta̱yóʼo káchira: “Vitin tá va̱ása inkáchi ndákanixi̱níi̱ xíʼin ñá síʼíi̱, chíka̱i̱ ndee̱ ña̱ kuniso̱ʼo viíi̱ ña̱ káʼa̱nñá, ta xíʼin ña̱ vitá-inii̱ káʼi̱n ta va̱ása sáa̱i̱. Ta vitin va̱ʼaníka kítáʼi̱n xíʼinñá”.

Chíndeétáʼanña xíʼinyó ña̱ vií kutáʼanyó xíʼin inkana. Na̱ kamaní sáa̱ kǒo ku̱a̱ʼá migona íyo. Soo na̱ vitá íyo ini chíka̱a̱na ndee̱ ña̱ vií kutáʼanna xíʼin ndiʼina (Efes. 4:2, 3). Ñá Cathy ñá xa̱a̱ ni̱ka̱ʼa̱nyó xa̱ʼa̱ káchiñá: “Tíxa̱ʼvi ña̱ vitá íyo inii̱, kúsi̱íka-inii̱ tá íyoi̱ xíʼin inka na̱ yiví, ni íxayo̱ʼvi̱ña xíʼi̱n ña̱ kutáʼi̱n xíʼin savana”.

Chíndeétáʼanña xíʼinyó ña̱ táxi̱n koo iniyó. Ña̱ Biblia chítáʼanña “ña̱ ndíchi ña̱ íyo chí ndiví” xíʼin ña̱ vitá-ini ta saátu ña̱ táxi̱n koo iniyó (Sant. 3:13, 17). Iin na̱ yiví na̱ vitá íyo ini táxi̱n íyo inina (Prov. 14:30). Ta̱ Martin, ta̱ chi̱ka̱a̱ní ndee̱ ña̱ vitá koo inira, káchira: “Vitin vitáka íyo inii̱ ta va̱ása kue̱ʼe̱kai̱, ta táxi̱nka íyo inii̱ ta saátu kúsi̱í-inii̱”.

Ña̱ nda̱a̱va kúúña, sana xíniñúʼu chika̱a̱yó ndee̱ ña̱ va̱ʼa vitá koo iniyó. Iin ta̱ hermano káchira: “Mií ña̱ nda̱a̱, sava ki̱vi̱ ndeéní sáa̱i̱”. Soo Jehová kivi chindeétáʼanra xíʼinyó ña̱ táxi̱n koo iniyó (Is. 41:10; 1 Tim. 6:11). Miíra kúú ta̱ kuchiñu sanáʼa̱ miíyó ta taxira ndee̱ ndaʼa̱yó (1 Ped. 5:10). Tasaá kúú ña̱ kivi na̱ʼa̱yó ña̱ vitá-ini xíʼin ña̱ va̱ʼa-ini ña̱ kúúmií ta̱ Cristo, nda̱a̱ táki̱ʼva ke̱ʼé ta̱ apóstol Pablo (2 Cor. 10:1).