Se tokniuj akin monotsa Sara * kijtoua: “Ipa amo semi nitajtoua uan niknemilia ke amo ueli nikchiua seki taman. Yejua ika amo nikuelita niyetos iniuan akin kinemiliaj ke nochi kimatij uan kinekij maj mochiua teisa kemej yejuan kinekij. Sayoj ke, keman niyetok iniuan akin yolnejmachmej uan yolyemankej, kuali nimomachilia. Iniuan amo ouij nechkisa nikijtos tein nikmachilia uan nikintapouis nokuejmoluan. Tein melauj, akin kuali iniuan nimouika yolnejmachmej uan yolyemankej”.

Tein kijtoua Sara kinextia ke komo tiyolnejmachmej, oksekin kinekiskej touan mouikaskej. Uan no, Jiova kiyolpaktiaj akin yolnejmachmej. Itech iTajtol, yejuatsin techiluia: “Xikpixtiyakan ne yolyemanilis [oso yolnejmachkayot]” (Col. 3:12). ¿Toni yolnejmachkayot? ¿Keniuj kinextij Jesús ke katka yolnejmach? ¿Uan keniuj komo tiyolnejmachmej okachi tiyolpakiskej?

Yolnejmachkayot se kualneskayot tein kipiaj akin nochipa kitemouaj kuali yetoskej iniuan oksekin. Akin yolnejmachmej kualtakamej, uan keman kipanouaj seki taman tein amo kuali yolseujtokej uan amo niman kualanij.

Sekin kinemiliaj ke akin yolnejmachmej amo yolchikaujkej, sayoj ke nejon amo melauak. Tajtol griego tein mokepa kemej “yolnejmachkayot” kikuiaj keman ika tajtouayaj se caballo tein tateuiaya oso tateliksaya, tein kimaxojtilijkaj oso kimachtijkaj maj tatakamati. Nejon caballo kipiayaok chikaualis, sayoj ke yolik kimachtijtiyajkej maj amo tateuiok. No ijkon panoua keman tiyolnejmachmej, kemej yeskia timomachtiaj amo titateuiskejok uan tiktemouaj kuali timouikaskej iniuan oksekin.

Xa tiknemiliskej ke ipa amo tiyolnejmachmej. Uan no, kemej itech nejin tonalmej miakej niman kualanij uan tateuiaj, miakpa ouij techkisa tiyeskij tiyolnejmachmej (Rom. 7:19). Tein melauj, moneki timochikauaskej tiknextiskej nejin kualneskayot, sayoj ke iespíritu Jiova techpaleuis maj amo timosenkauakan (Gál. 5:22, 23). ¿Keyej moneki timochikauaskej tiyeskij tiyolnejmachmej?

Komo tiyolnejmachmej, oksekin kinekiskej touan mouikaskej. Kemej kijtoj Sara, akin yekinika ika titajtojkej, kuali timomachiliaj keman tiyetokej iniuan akin yolnejmachmej. Jesús katka yolnejmach uan kualtakat (2 Cor. 10:1). Hasta konemej kinekiaj iuan yetoskej maski amo semi kiixmatiaj (Mar. 10:13-16).

 Komo tiyolnejmachmej techpaleuis tejuan uan oksekin. Techpaleuis maj amo tikualanikan komo amo mochiua tein tiknekiaj (Prov. 16:32). Keman tikinyolkokouaj oksekin, okachiok komo se akin tiktasojtaj, satepan amo kuali timomachiliaj, sayoj ke komo tiyolnejmachmej amo techpanos nejon. Uan no, nejin kinpaleuis oksekin, porin komo amo niman tikualanij, amo tikinyolkokoskej.

Maski Jesús kipiaya miak tekit, nochipa kinextij ke katka yolnejmach. Miakej kipanouayaj miak ouijkayomej uan kipiayaj miak kuejmolmej, yejua ika monekia maj kinyolseuianij. Jesús xa semi kinyolseuij keman kiniluij: “Xiualakan nouan, [...] porin Nejuatsin niyolyemankatagat; uan niyolkualtagat” (Mat. 11:28, 29).

¿Keniuj uelis tiyeskij tiyolnejmachmej kemej Jesús? Yekinika, maj timomachtikan itech iTajtol Dios keniuj kinitaya taltikpakneminij uan toni kichiuaya keman panouaya teisa tein ueliskia kikualantis. Ompa, maj timochikauakan tiyeskij tiyolnejmachmej kemej yejua keman tikpanoskej seki taman tein uelis kichiuas maj niman tikualanikan (1 Ped. 2:21). Maj tikitakan eyi taman tein kipaleuij Jesús maj yolnejmach.

Jesús katka yolyemanik. Hasta yejua kijtoj ke katka yolnejmach uan yolyemanik (Mat. 11:29). Keman Biblia ika tajtoua yolnejmachkayot no ika tajtoua yolyemanilis, porin komo tiyolyemankej no tiyeskij tiyolnejmachmej (Efes. 4:1-3).

Komo tiyolyemankej amo niman tikualaniskej nion timoyolkokoskej. ¿Toni kichiuak Jesús keman kijtouilijkej ke ‘teltakuaya uan tayitinemia vino’? Yejua tanankilij ika yolnejmachkayot uan ika tein kichiuak kinextij ke tein kijtouiliayaj amo melauak katka (Mat. 11:19).

Komo se taltikpaknenkej kijtoua teisa tein amo kuali porin titakamej oso tisiuamej oso porin tikayomej itech okse altepet, maj timochikauakan tiknankiliskej ika yolnejmachkayot. Peter, se tokniuj tayekankej ompa Sudáfrica, kijtoua: “Keman kijtouaj teisa tein amo nikuelita, niknemilia toni kichiuaskia Jesús”. Uan no kijtoua: “Nikajsikamatini ke amo moneki niman nikualanis”.

Jesús kinajsikamatia taltikpakneminij porin kimatia ke tajtakolejkej. Imomachtijkauan Jesús kinekiaj kichiuaskej tein kuali, sayoj ke kemej katkaj tajtakolejkej kemansa amo kichiuayaj tein monekia. Kemej neskayot, youak achto ke Jesús kimiktiskiaj, Pedro, Santiago uan Juan kochkej maski Jesús kiniluijka maj ijsatonij iuan. Jesús kiniluij: “Namoyolojuan kipiaj tanejnekilis de kuali, pero kuetautok namochikaualis [...]. Ika ya nojon amo ueli nankichiuaj ten kuali” (Mat. 26:40, 41). Kemej kiajsikamatia ke itatitaniluan katkaj tajtakolejkej, amo kinajuak.

Maj tikitakan ineskayo se tokniuj siuat akin monotsa Mandy. Achto kualania keman oksekin amo kiyekchiuayaj teisa, sayoj ke axkan mochikaua yeski yolnejmach kemej Jesús. Yejua kijtoua: “Nimochikaua nikelnamikis ke tinochin titajtakolejkej uan niktemoua nikitas tein kuali tein kichiuaj oksekin, kemej Jiova kichiua”. Mandy kichiuak kemej Jesús uan kiajsikamatik ke taltikpakneminij amo nochi ueli kichiuaj. Komo no tikchiuaj kemej Jesús, amo ouij techkisas tiyeskij tiyolnejmachmej iniuan oksekin.

Jesús takuaujtamatik iuan Dios. Keman Jesús yetoya nikan taltikpak, kichiuilijkej tein amo kuali. Amo kiajsikamatkej kemej monekia tein kijtouaya, kiixtopeujkej uan kitajyouiltijkej. Maski ijkon, amo keman kualanik “porin kimatik ke Totajtsin Dios teixkomakas sayo ika yolchipaualis” (1 Ped. 2:23). Jesús kimatia ke iTajtsin kipaleuiskia maj taxiko uan kintatsakuiltiskia akin kichiuiliayaj tein amo kuali keman monekiskia.

Komo techchiuiliaj tein amo kuali uan tikualanij, uelis tikpeualtiskej se kuejmol. Yejua ika Biblia kijtoua: “Tagat ten kualantinemi, yejua ne amo ueli kichiuas ne chipauak tachiualisme ten kipaktia Dios” (Sant. 1:20). Maski yekmelauj onkaskia keyej tikualaniskej, kemej titajtakolejkej, uelis tikchiuaskej teisa tein amo kuali komo tikualanij.

Se tokniuj siuat kayot Alemania akin monotsa Cathy kinemiliaya ke komo amo yejua kitemouaya mopaleuis, amo akin kipaleuiskia. Sayoj ke keman peuak takuaujtamati iuan Jiova, amo kinemilijok nejon. Cathy kijtoua: “Amo monekiok nochipa niktemojtos keniuj nimopaleuis. Axkan okachi amo ouij nechkisa niyeski niyolnejmach, porin nikmati ke Jiova  kiyektalis nochi tein amo kuali tein mochiua”. Komo kemansa techchiuiliaj tein amo kuali, maj titakuaujtamatikan iuan Dios kemej kichiuaya Jesús, porin nejon techpaleuis maj tiksentokakan tiknextikan yolnejmachkayot.

Jesús kijtoj ke komo tiknekij tiyolpakiskej, moneki tiyeskij tiyolnejmachmej. Yejua kijtoj: “Yolpakij akin yolnejmachmej” (Mat. 5:5, TNM). Maj tikitakan keniuj yolnejmachkayot techpaleuia itech nejin taman.

Akin kipiaj ininnamik kinpaleuia maj ueli kiyektalikan kuejmolmej. Robert, se tokniuj akin kayot Australia, kijtoua: “Miakpa nikiluiani nonamik tajtolmej tein semi kiyolkokouanij tein yekmelauj amo niknekia nikijtos. Sayoj ke satepan ke se kijtoua nochi nejon tajtolmej porin semi se kualantok, amo teyi ueli se kichiuaok. Semi amo kuali nimomachiliaya keman nikitaya ke semi nikyolkokojka”.

Keman titajtouaj, “tinochin timotajtakolmakaj ika miak tataman”. Uan komo amo tiknemiliaj tein tikiluiaj tonamik, uelis kichiuas maj timokualantikan (Sant. 3:2). Keman panos nejon, yolnejmachkayot techpaleuis maj tiyolseujtokan uan maj amo tikyolkokokan tonamik ika totajtoluan (Prov. 17:27).

Robert mochikauak amo niman kualanis uan yolseujtos. ¿Keniuj kipaleuij nejon? Yejua kijtoua: “Axkan, keman nonamik uan nejua tataman titanemiliaj, nimochikaua kuali nikakis, nitajtos ika yolnejmachkayot uan amo niman nikualanis. Axkan okachi kuali timouikaj”.

Techpaleuia maj okachi kuali timouikakan iniuan oksekin. Akin niman kualanij amo miakej iniuan mouikaj. Sayoj ke akin yolnejmachmej ‘nachipa kipixtinemij yolseuilis’ (Efes. 4:2, 3). Cathy, akin achto ika titajtojkej, kijtoua: “Kemej niyolnejmach, niyolpaki keman niyetok iniuan oksekin, maski sekin tepitsin ouij iniuan se mouika”.

Techpaleuia maj tiyolseujtokan. Itech Biblia, “tamachilis ten ualeutok de Dios” mouika ika yolnejmachkayot uan yolseuilis (Sant. 3:13, 17). Akin yolnejmach nochipa “yolseujtok” (Prov. 14:30). Martin, akin semi mochikauani yeski yolnejmach, kijtoua: “Axkan amo niktemoua maj mochiua teisa kemej nejua nikijtoua, okachi niyolseujtok uan okachi niyolpaki”.

Xa monekis timochikauaskej tiyeskij tiyolnejmachmej. Se tokniuj takat kijtoua: “Tein melauj, hasta axkan kemansa semi nikualani”. Sayoj ke Jiova, akin techiluia maj timochikauakan tiyeskij tiyolnejmachmej, techpaleuis (Is. 41:10; 1 Tim. 6:11). Yejuatsin techpaleuis maj timochiuakan tiyolnejmachmej uan techmakas chikaualis (1 Ped. 5:10). Uan ijkon kemej tatitanil Pablo, satepan uelis tiyeskij tiyolnejmachmej uan tikualtakamej kemej Cristo (2 Cor. 10:1).