Kgaetšedi yo a bitšwago Sara * o re: “Ke na le dihlong ka tlhago, e bile ga ke itshepe. Ga ke lokologe go dula gare ga batho bao ba nyakago go kwewa ka bona feela. Eupša ge ke na le batho ba boleta le bao ba ikokobeditšego ke a lokologa. Nka kgona go botša batho ba bjalo kamoo ke ikwago ka gona le mathata ao ke nago le ona. Bagwera ba ka ba bagolo ke batho ba mohuta woo.”

Mantšu a Sara a bontšha gore ge e ba re le boleta, batho ba bangwe ba ka nyaka go ba bagwera ba rena. Le gona Jehofa o rata batho ba boleta. Beibele e re: ‘Aparang boleta.’ (Bakol. 3:12) Boleta ke’ng? Jesu o ile a bontšha bjang boleta? Gona seka se se ka re thuša bjang gore re dule re thabile?

Boleta ke seka seo motho a bago le sona ge a na le khutšo. Motho yo boleta o dirišana le ba bangwe gabotse, e bile o dula a theošitše maswafo ge go direga dilo tšeo a sa di ratego.

Ga se gore motho ge a le boleta go ra gore o a fokola. Lentšu la Segerika leo le dirišitšwego ka Beibeleng go hlalosa boleta le be le dirišwa go šupa go pere ya nageng yeo e tlwaeditšwego go phela le batho. Pere yeo e sa dutše e na le matla eupša e tlwaeditšwe gore e šomiše matla a yona gabotse. Ka gona ge e ba re le boleta, re kgona go laola maikwelo a rena le go phedišana le ba bangwe ka khutšo.

Re ka ipotša gore ka tlhago ga re na seka se sa boleta. Batho ba bantši bao re phelago le bona ba rata go kwewa bona fela e bile ba felafela pelo. Ka gona se se ka dira gore re thatafalelwe ke go bontšha seka se sa boleta. (Baroma 7:19) Re a bona gore go nyakega maiteko gore re bontšhe seka se sa boleta. Eupša Jehofa a ka re thuša ka moya wa gagwe o mokgethwa gore re dule re bontšha seka se. (Bagal. 5:22, 23) Ke ka baka la’ng re swanetše go dira maiteko a go bontšha seka sa boleta?

Batho ba bantši ba rata batho ba boleta. Go swana le Sara, re rata go ba le batho ba boleta. Jesu o re beetše mohlala o mobotse ka gore o be a le boleta e bile a le botho. (2 Bakor. 10:10) Re a tseba gore ka tlhago bana ga ba rate go ba kgauswi le motho yo ba sa mo tsebego. Eupša ba be ba rata go ba kgauswi le Jesu gaešita le ge ba be ba sa mo tsebe.—Mar. 10:13-16.

Go ba boleta go hola rena le batho bao re phelago le bona. Ge e ba re le boleta re ka se kitimele go kgopišega goba go galefa. (Die. 16:32) Ka gona re ka  se ipone molato ka baka la ge re kwešitše batho ba bangwe bohloko go akaretša le bao re ba ratago. Le gona ba bangwe ba tlo holega ka gore re tlo kgona go laola maikwelo a rena gomme ra se ba kweše bohloko.

Le ge Jesu a be a na le mešomo e mentši e bile a dula a swaregile, o be a dirišana le batho ba bangwe ka boleta. Batho ba bantši mehleng ya gagwe ba be ba nyamile e bile ba imetšwe ke mathata gomme ba nyaka go homotšwa. Ruri ba swanetše go ba ba ile ba kgothatšega ge Jesu a be a re go bona: “Tlang go nna, . . . gobane ke wa moya o boleta e bile ke wa pelo e ikokobeditšego.”—Mat. 11:28, 29.

Re ka dira’ng gore re be boleta go swana le Jesu? Re ka ithuta Lentšu la Modimo gore re kwe kamoo Jesu a ilego a dirišana le batho le seo a ilego a se dira ge a le maemong a thata. Ke moka le rena re ka bontšha boleta go swana le Jesu ge re le maemong ao a ka dirago gore re se ke ra ba boleta. (1 Pet. 2:21) A re kweng ka dilo tše tharo tšeo di ilego tša thuša Jesu gore a dule a le boleta.

Jesu o be a ikokobeditše. Jesu o itše: “Ke wa moya o boleta e bile ke wa pelo e ikokobeditšego.” (Mat. 11:29) Beibele e bolela ka dika tše tše pedi ka gobane boleta le boikokobetšo ke monwana le lenala. (Baef. 4:1-3) Ke ka baka la’ng re re’alo?

Boikokobetšo bo re thuša gore re se ke ra kitimela go kgopišega. Jesu o ile a araba bjang batho bao ba bego ba mmolela gampe ba re ke “sejagobe” e bile o “lemaletše beine”? Tsela yeo a bego a phela ka yona e ile ya bontšha gore batho bao ba be ba bolela maaka. Ge nkabe Jesu a be a sa ikokobetša o be a tla leka go itwela le go ikemelela. O ile a no ba araba ka gore: “Bohlale bo hlatselwa ka mediro ya bjona gore bo lokile.”—Mat. 11:19.

Ge e ba motho yo mongwe a ka bolela gampe ka morafo wa gago, bong goba moo o goletšego gona, leka ka matla gore o mo arabe ka boleta. Mogolo yo mongwe wa Afrika Borwa yo a bitšwago Peter o re: “Ge motho yo mongwe a ka bolela goba a dira selo seo se ntenago, ke ipotšiša gore, ‘Jesu o be a tla dira’ng?’” Peter o ile a ba a re: “Ke ithutile gore ke se ke ka kitimela go kgopišega.”

Jesu o be a kwešiša mafokodi a batho ka moka. Barutiwa ba Jesu ba be ba nyaka go dira dilo tše dibotse eupša ka ge ba be ba na le sebe, ba be ba sa kgone go dula ba dira dilo tše dibotse. Ka mohlala, bošegong bja pele ga ge Jesu a ka hwa, o ile a kgopela Petro, Jakobo le Johane gore ba dule ba phakgame eupša ba ile ba palelwa ke go dira seo a bego a ba kgopetše sona. Jesu o ile a bontšha gore o be a kwešiša gore ke ka baka la eng ba be ba robetše ge a be a re: “Go ba gona, moya o mafolofolo eupša nama e a fokola.” (Mat. 26:40, 41) Ka ge Jesu a be a kwešiša gore ba na le mafokodi, ga se a ka a ba galefa.

Kgaetšedi yo a bitšwago Mandy yo a bego a tlwaetše go dula a solasola batho ba bangwe, o ile a ithuta go ekiša mohlala wa Jesu wa go ba boleta. O re: “Ke leka go dula ke ikgopotša gore ka moka ga rena re belegwe re na le sebe, gomme ke leka go ekiša Jehofa ka go lebelela dika tše dibotse go batho.” Na tsela yeo Jesu a bego a lebelela mafokodi a batho ba bangwe e go thuša gore le wena o dirišane le batho ba bangwe ka boleta?

Jesu o ile a ithekga ka Modimo. Nakong ya ge a be a le mo lefaseng o ile a kgotlelela go swarwa gampe. Batho ba bangwe ba be ba sa mo kwešiše, ba mo nyatša e bile ba mo tlaiša. Eupša o ile a no dula a theošitše maswafo ka gobane “o ile a ikgafela yo a ahlolago ka go loka.” (1 Pet. 2:23) Jesu o be a tseba gore Tatagwe wa legodimong o be a tla mo thuša go kgotlelela, le gore ka nako ya maleba o be a tla otla bao ba bego ba sa mo sware gabotse.

Ge re ka leka go itwela ge re sa swarwe gabotse, seo se ka swana le go tšhela parafene mollong. Ke ka baka leo Beibele e re gopotšago gore: “Kgalefo ya motho ga e tšweletše toko ya Modimo.” (Jak. 1:20) Le ge re ka ba re na le lebaka le le kwagalago la gore re galefe, re ka feleletša re dira dilo ka tsela e fošagetšego ka gobane re na le sebe.

Kgaetšedi yo a bitšwago Cathy wa kua Jeremane o be a nagana gore: ‘Ge e ba o sa itwele, ga go na motho yo a tla go lwelago.’ Eupša ka morago ga gore a ithute go ithekga ka Jehofa, o ile a fetoša monagano. O re: “Ga bjale ga ke sa dula ke emetše go itwela. Ke  kgona go dira dilo ka boleta ka gobane ke a tseba gore Jehofa o tlo lokiša dilo ka moka mo lefaseng.” Ge e ba o kile wa swarwa ka go hloka toka, ge o ka ekiša mohlala wa Jesu wa go ithekga ka Jehofa, o tlo kgona go dira dilo ka moya o boleta.

Jesu o ile a re ge e ba re nyaka go dula re thabile, re swanetše go ba boleta. O itše: “Go thaba ba moya o boleta.” (Mat. 5:5) Ekwa kamoo boleta bo ka re thušago ka gona maemong a latelago.

Go ba boleta go ka thuša banyalani bao ba nago le mathata. Ngwanabo rena yo a tšwago Australia yo a bitšwago Robert o re: “Ke ile ka bolela le go dira dilo tše dintši tšeo di ilego tša kgopiša mosadi wa ka, eupša ke be ke sa ikemišetša go mo kgopiša. Ge o ka bolela selo o galefile, o ka se kgone go se gomiša. Ke ile ka kwa bohloko ge ke bona kamoo ke mo kwešitšego bohloko ka gona.”

Beibele e re “ka moka ga rena re kgopša gantši” ge re bolela, le gona ge e ba motho a bolela selo seo a sego a se nagana gabotse, seo se ka baka mathata lenyalong. (Jak. 3:2) Maemong a bjalo go ba boleta go ka re thuša gore re dule re theošitše maswafo le go laola maleme a rena.—Die. 17:27.

Robert o ile a šoma ka thata gore a dule a theošitše maswafo le go laola maikwelo a gagwe. O ile a holega bjang? O re: “Ga bjale ge nna le mosadi wa ka re sa dumelelane ka selo se itšego, ke leka go mo theetša ka kelohloko, go bolela ka boleta le go se mo galefele. Ga bjale nna le mosadi wa ka re phela ka khutšo.”

Go ba boleta go re thuša gore re kgone go phedišana le batho ba bangwe. Batho ba bantši bao ba kgopišegago ka pela, ba feleletša ba se sa na bagwera. Eupša go ba boleta go re thuša go dula re na le “khutšo.” (Baef. 4:2, 3) Cathy yoo re boletšego ka yena pejana o re: “Go ba boleta go nthušitše gore ke thabele go phedišana le batho ba bangwe gabotse, gaešita le bao go lego thata go phedišana le bona.”

Go ba boleta go dira gore re be le khutšo ya monagano. Beibele e tswalanya “bohlale bjo bo tšwago godimo” le boleta le khutšo. (Jak. 3:13, 17) Beibele e re motho yo boleta o na le “pelo e thabilego.” (Die. 14:30) Martin yoo a ilego a šoma ka thata gore a be le seka sa boleta o re: “Ga bjale ga ke sa gapeletša gore dilo di dirwe ka tsela yeo nna ke nyakago ka yona, ke thabile e bile ke na le khutšo ya monagano.”

Ke therešo gore re ka swanelwa ke go šoma ka thata gore re be boleta. Ngwanabo rena yo mongwe o re: “Go bolela nnete, ke fela ke ikwa ke galefile kudu.” Eupša Jehofa yoo a re kgothaletšago gore re be boleta o tla re thuša ntweng ye. (Jes. 41:10; 1 Tim. 6:11) O tla ‘fetša go re tlwaetša,’ e bile o tla re “matlafatša.” (1 Pet. 5:10) Go swana le moapostola Paulo, le rena ge nako e dutše e eya re tla ekiša “boleta le botho bja Kriste.”—2 Bakor. 10:1.