Mogageru wa mosadi ye ba reng ke Sara * o re: “Ke nna motho wa go ba le dihlong ka hlago, fote ga go tlala a ke titshepe mo ke maka dilo. Ka taba la tsotsone, a ke nape ke dudisega mo ke na le batho ba gore ba titshepa ka matla le ba gore ba kwana le go maka dilo ka tšhinghi. Mara ke fo kwa ke kgibiye mo ke na le motho wa gore wa temeka fote o tinyanafatsiye. Ke ro lokologa mo ke na le motho wa mošaga wonone, fote nka mo hlatollela le gore ke tikwa byang ka boya ka mmotsa le dilo tso di nhlupang. Banghana baka ba mannete ba ka mokgonone.”

Tso Sara a di bolabodiyeng di fo re šupetsa gore batho ba kwana ka matla le motho wa gore wa temeka. Le Jehova o jabodisa ke motho wa go temeka. Lentsu lage mo le bolabola le rune le re: “Yaparaneng mokgwa wa . . . go temeka.” (Makol. 3:12) Mo ba re motho wa temeka, ba ra mo a maka ying? Jeso o šupetsiye ka mokgo mang gore wa temeka? Go temeka go ka re gelepa ka ying gore re jabole mo re kene re phela?

Go temeka ke mo o le motho wa gore o dula o kgibiye. Motho wa go temeka o tshwara batho ba bangwana gabutši, aa makane lešidi fote wa di kgona go fo dula a bebiye le go titshwara le mo tsa lephelo di gakga.

Motho wa go temeka o šupetsa gore a yi yene leghwala. Lentsu la Segerika la “go temeka” ke mo ba le berekisa mo ba bolabola ka pera ya hlaga ya gore ba yi pomme mokgwa wa hlageng gore yi bebe. Pera yowa yi sa na yi na le matšhika, mara mo ba kene ba yi tšhutisa ba lefisiye pelo, yi segela le mo yi tšibang gore yi ka kgera kaye mo yi berekisa matšhika. Le rune mo re temeka, re beya mokgero ga dilo tsa gore gabutšibutši re ka di segelela ke mokane ra tshwara batho ba bangwana gabutši re bebiye.

O ka kraya ba bangwana re re, ‘Nna ka hlago a yi nna motho wa go temeka.’ Lefase lo re phelang ga lona le tlele ka batho ba go maka dilo ka tšhinghi le ba go ba le sepelwapelwana, byalo go gongwana re ka kwa di roba gore re dule re temeka. (Mrm. 7:19) Di fo ba lekgwaying gore di nyaka re karakara gore re thogo temeka, mara moya wa Jehova wo nyoko re gelepa gore re thogo segelela tso re tiputsiyeng gore re nyaka go di segelela. (Magal. 5:22, 23) Ke ntaba di nyaka re karakare gore re tšhute go temeka?

Batho ba kwana le motho wa go temeka. Ka mokgonola go hlayyeng Sara ye re bolabodiyeng ka yene ku mathomisong, re kwa re fo ba gabutši nje mo re na le motho wa go temeka. Jeso ke mong yene wa go temeka go phala batho ka mokana ga bona fote o tshwara ba bangwana gabutši. (2 Makor. 10:1) Le mong dibananyana tsa gore ke mo di sa ro thoma go mmona ke mo di kwa di nabela go ba thina gage.—Mar. 10:13-16.

Go temeka go pasopa rune le batho bo re nang nabo ho thina. Mo nkare re ya temeka, a re yakgoswe re fufulela kela go kwata. (Diy. 16:32) Tsotsone di maka gore o sa  kraye o šele o šekela ka taba la gore o yye wa kwisa motho ye mongwana go baba—ka matlamatla motho wa gore o mo nyaka ka matla. Fote go temeka go maka gore re sa kgwasolanye batho bo re nang nabo ho thina ba šala ba kwa go baba.

Jeso ke mo a tlalele ke mmereko wa go roba fote a fo dula a ya ka ho le ka ho, mara ke mo a temeka mo a kene a phidisana le batho. Batho ba go tlala nakwela a sa le ho lefaseng ke mo ba goga go baba fote ba na le tso di ba robang, ke mo ba nyaka go kwa go hlwayela moya. Di šupa nkare ba yye ba kwa ba kgomoletsegiye ka matla mo Jeso a re ga bona: “Tlanneng ho gaka, . . . ka taba la gore ke nna motho wa go temeka le wa gore o tinyanafatsiye pelong”!—Mat. 11:28, 29.

Rune re ka maka ka mokgo mang gore re temeke, go šupetsa gore re tseyele ga Jeso? Di nyaka re bale Lentsu la Modimo gore re thogo tšhuta ka mokgo Jeso ne a tshwara batho ka gona le tso ne a di maka mo go baba. Ke mokane mo re gahlana le seyemo so se ka makang gore re khwanyogele ke mokgwa wowa wa go temeka, re ro ganya dikobo gore re tshwane le Jeso. (1 Pet. 2:21) Lebelela dilo ka ditharo ke tsowa tso di makiyeng gore Jeso a thogo temeka.

Jeso ke mo go le motho wa go tinyanafatsa tsa mannete, a sa timakisi. Jeso o yitseri ke yene “motho wa go temeka le wa gore o tinyanafatsiye pelong.” (Mat. 11:29) Baebele yi bolabola ka dilo tsowa di le ka dipedi ka taba la gore go temeka go yelana ka matla le go tinyanafatsa. (Maef. 4:1-3) Ke ntaba go le ka mokgonone?

Go tinyanafatsa go gelepa motho gore a sa fo dula a tlemme mokgakga kela go fo silikisega le mo a tikisiye ke lehlokwa. Jeso o yye a re king mo batho ba fo mo lebela ba re “o na le dipawo” fote “o kwana ka matla le mokgete”? O makiye gore maphelelo yage ma šupetse gore tso ba di bolabolang a yi nnete, ke mokane a bolabola a kene a temeka a re “gore motho o hlalefiye, re bona ka tso a di makang.”—Mat. 11:19.

Mo motho ye mongwana a fo bolabola dilo tsa go tikela ku ka gore ke wene motho wa mohlobo mang, ke wene monna kela mosadi wa mohlobo mang kela gore ke wene motho wa gore o golele kaye, ke ntaba o sa leketse gore o temeke mo o mo fetola? Mokreste ye mongwana wa gore ke mogolo wa go dula Afrikha Borwa ye ba reng ke Peter o re: “Mo ke kwa motho a nsilikisa ka tso a di hlayang, ke tiputsisa gore, ‘Jeso nke a makiye byang?’” O tokegela tse dingwana gana hone, o re: “Ke titšhutisiye gore ke sa fo dula ke tlemme mokgakga.”

Jeso ke mo a di tšiba tsa gore batho ba fela ba kekemisa. Bo ba latelelang Jeso ke mo ba nyaka go maka dilo tsa gabutši, mara ka taba la gore a baa yenela gabutši ho mmeleng, ke mo ba fela ba maka dilo tsa go kekema tso bona beng ba sa di nyakeng. Mo re beyisa, nakwela go le bošego bya gore Jeso ke mo a nyoko kgwa ka motshwana wa gona, o kgopele Petro, Jakobo le Johane gore ba fo yetisa naye gore ba thogo mo tiyisa, mara ba šitegiye. Jeso o yye a di bona tsa gore di maka king, a šinya a re “gabutšibutši, moya wa karakara, mara nama ya lepelela.” (Mat. 26:40, 41) Jeso ke mo a di bona gore mapostola yage maa gayela ga tse dingwana, tsotsone di makiye gore a sa kwe ma mo tshwatisa.

Mogageru wa mosadi ye ba reng ke Mandy ke mo go le motho wa go kwana le go sola-sola batho ba bangwana, mara gana byalo o leketsa go yekisela Jeso ga taba ya go temeka. O re, “Ke leketsa go yamogela gore batho ba ko šupetsa ka mekgwa ya mehlobohlobo gore a baa yenela gabutši ho mmeleng fote ke leketsa go lebelela dilo tsa gabutši ga batho ba bangwana, go tshwana le Jehova.” Ayitsano taba yowa ya gore Jeso o šupetsa batho gore o ba kwela go baba ka taba la gore ba šitega ga tse dingwana a yi go tšhofe gore o temeke mo o kene o phela nabo?

Jeso ke mo a lisetsa ditaba le Modimo. Jeso o yye a tshwariwa lešidi nakwela a le ho lefaseng. Batho ke mo ba mo kwela thoko, ba mo nyenya fote ba mo hlorisa. Mara o yye a fo dula a temeka ka taba la gore “ke mo a tshepa Yewa wa gore mo a yahlula go šala go wolologiye.” (1 Pet. 2:23) Jeso ke mo a di tšiba tsa gore Papage wa ku legedimong o nyoko mo pasopa fote mo nako yage yi segela, o nyoko ba lukisa ba gore ba yye ba mo maka lešidi.

Mo re kwata ke mokane re leketsa go lwa le bo re bonang nkare ba re makiye lešidi, o ka kraya re napa re sinya ka matla gwa napa go dungheganya. Ke tsotsone di makang gore Mangwalo ma re gopotse gore: “Go kwata ga motho a go leyi go loka ga Modimo.” (Jak. 1:20) Le mo di ka fo ba di kwagala gore re kwatisa king, re ka tšhoga re makiye dilo tsa gore a yi tsona ka taba la gore ho mmeleng a re ya yenela gabutši.

Mogageru wa mosadi wa ku Jeremane ye ba reng ke Cathy ke mo a tseya gore, ‘Mo o sa tikemelele, a go na motho wa gore o nyoko go yemelela.’ Mara mo a thomisa go tšhuta go tshepa Jehova, o yye a tšhentšha ka mokgo a naganang. O re: “A ke sa maka tsela tsa go kraya ke fo  dula ke nyaka go tikemelela. Ke kwa ke jabola mo ke maka dilo ka go temeka, nkene ke gopola gore Jehova wa di bona tso di makegang.” Mo nkare go na le bo ba yyeng ba go tshwara lešidi, tseyela ga Jeso go šupetsa gore wa mo tshepa ga Modimo, tsotsone di nyoko go gelepa gore o dule o temeka.

Jeso o hlayye gore go temeka ke gona go makang gore re jabole. O yitseri: “Go jabola ba gore baa temeka.” (Mat. 5:5) Bona gore go temeka go gelepa ka mokgwa mang ga mayemo ya ma leng ka ho tlase.

Go temeka go maka gore monna le mosadi wage ba sa fo dula ba tobelanne. Mogageru ye mongwana wa go tšwa Australia ye ba reng ke Robert o re: “Ke ga go tlala ke yyeng ka fo tikraya ke hlayye dilo tsa go kwisa mosadi waka go baba. Fote mo o ka fo tabogela go bolabola ka taba la gore o kwatiye, o bolabodiye o bolabodiye. Ke mo di nkwisa go baba mo ke bona gore ke mo kwaletsiye.”

“Ka mokana ga rune re phiriketsega ga go tlala” ka tso re di bolabolang, fote mo re ka bolabola dilo tsa go sa hlamatsega, go ka maka gore ka ho mutšing go dhunghege. (Jak. 3:2) Ga dilo tsa mohlobo wonone, go temeka gwa re gelepa gore re dule re kgibiye fote re lawole maleme ya rune.—Diy. 17:27.

Robert o yye a karakara gore a dule a kgibiye fote a titshware. Tsotsone di mo gelepiye ka ying? O re: “Matšatši yawa, mo go ba le dilo tso re sa kwaneng ka tsona, ke leketsa ka matla gore ke theetsele gabutši, ke temeke mo ke bolabola fote ke maka gore ke sa kraye ke kwatiye. Nna le mosadi waka re tshwaranne gabutši ka matla gana byalo.”

Go temeka go maka gore re phele kawone le batho ba bangwana. Batho ba gore ba yakgoswa ba kwata ba feleletsa ba se na banghana ba go tlala. Mara go temeka go maka gore re “dule re na le . . . sa go swinelela mokgwa wa rune wa go beba.” (Maef. 4:2, 3) Cathy, yela re bolabodiyeng ka yene ka ho kgakala, o re, “Go temeka go makiye gore ke leketse gore nako ye nngwana le ye nngwana mo ke gahlana le motho, ke make gore go jabodise, le mo batho ba bangwana di se lula go phela nabo.”

Go temeka go maka gore o fo kwa o yitseri tswee! Baebele yi re “go hlalefa ga gore go tšwa gedimo” go yelana le go temeka le go beba. (Jak. 3:13, 17) Motho wa gore wa temeka o na le “pelo ya go kgiba.” (Diy. 14:30) Martin, wa gore o yye a karakara gore a tšhute go temeka, o re, “Gana byalo ke ya di kgona go ghobaghobega fote a ke sa maka dilo ka tšhinghi, ke tikwa ke fo ba gabutši fote ke jabodiye ka matla.”

Nnete ke gore di ka nyaka re ro ganya dikobo gore re thogo temeka. Mogageru ye mongwana o re: “Nnete ke gore go segela le lekgono lowa, di sa na di fela di makega tsa gore ke kwe ke pompegiye ka taba la go kwata.” Mara Jehova, wa gore ke yene a re tšhutisang gore re temeke, o nyoko re gelepa ga tso di re ghulang. (Jes. 41:10; 1 Thim. 6:11) O nyoko ‘fetsa tso a re tšhutisang tsona’ a boya a ‘re tiyisa.’ (1 Pet. 5:10) Mo nako yi kene yi ya, re ka tshwana le Pawulo wa lepostola, re ka šupetsa gore ‘re ya temeka fote re tshwarana gabutši go tshwana le Kreste.’—2 Makor. 10:1.