“E vaine akama ua au,” i na Sara ei, * “e kare au e tukatau ana. E emiemi ana au i te aronga tukatau e te taumāro. E reka ana au i te aronga maru e te akaaka. Ka akakite ua au i toku manako e te uriuri i toku manamanata ki te reira tangata. Aite toku au oa mei teia te tu.”

Akakite maira a Sara me e tu maru to tatou ka inangaro te tangata ia tatou ei oa no ratou. Ka akamareka te tu maru ia Iehova. Akamaroiroi tana Tuatua ia tatou: “Ka akangakau . . . maru” ia kotou. (Kolo. 3:12) Eaa te tu maru? Akapeea a Iesu te akaari anga i te tu maru? E akapeea tatou e mataora ai?

Te maru e tu ‘au te reira. Ka akono te tangata maru i tetai ma te tu maru, takinga meitaki e ka akakoromaki i te au manamanata te ka akariri iaia.

E tu matutu te tu maru. Te tuatua Ereni no te tu “maru,” kua akatutu te reira i tetai oroenua rerevao tei akararataia. Ka vai rai te maroiroi o te oroenua, inara kua tereniia aia kia akatere i tona ririnui. Me akaari tatou i te tu maru, ka akaau tatou i tetai ke.

Penei ka manako tatou, ‘kare au i te tangata maru.’ Te noo nei tatou ki roto i te ao taumaro e te akakoromaki kore, no reira ka ngata ia tatou te akaari i te tu maru. (Roma 7:19) Taka meitaki, kia maroiroi tatou i te akaari i te tu maru, e ka tauturu te vaerua tapu o Iehova ia tatou. (Gala. 5:22, 23) Eaa tatou ka maroiroi ei i te akaari i te tu maru?

E reka ana te tangata i te tu maru. Mei ta Sara i taiku, e reka ana tatou i te aronga tu maru. Ko Iesu te akaraanga meitaki no te tu maru e te takinga meitaki. (2 Kori. 10:1) Reka katoa te tamariki tei kore i kite iaia kia piri vaitata kiaia.—Mare. 10:13-16.

Paruru te tu maru ia tatou e tetai ke. Me maru tatou kare tatou e riri vave. (Mase. 16:32) Kare i reira tatou e manako kino me tamamae tatou i tetai ke—te aronga tikai ta tatou e akaperepere ra. Ka  paruru te tu maru i tetai ke kia kore ratou e mamae.

Noatu tana au apainga teiaa e tana angaanga maata, kua maru a Iesu ki te katoatoa. Te ngata ra i te maata anga i tona tuatau te rave i ta ratou apainga, e kua anoano ratou i te akaangaroi. Pumaana ratou te karanga anga a Iesu: “E aere mai kotou kiaku nei, . . . te maru nei au, e ngakau akaaka toku”!—Mata. 11:28, 29.

Akapeea tatou me akaari i te tu maru mei ta Iesu i akaari? Apii tatou i te Tuatua a te Atua kia kite akapeea a Iesu te akono anga i te tangata e tana i rave. Me timataia to tatou tu maru, ka aru tatou i to Iesu akaraanga. (1 Pete. 2:21) Ka akara ana tatou e toru apinga tei tauturu ia Iesu kia maru.

E ngakau akaaka to Iesu. Karanga a Iesu “te maru nei au, e ngakau akaaka toku.” (Mata. 11:29) Taiku te Pipiria i teia nga tu no te mea e pirianga to te tu maru ki te tu akaaka. (Ephe. 4:1-3) No teaa ra?

Ka tauturu te tu akaaka ia tatou kia kore e riri vave e kia kore e manako kino. Akapeea a Iesu te ariu anga ki te aronga tei aviri iaia ei “tangata kakai” e te “inu wina”? Na tona akaraanga i akakore i ta ratou tuatua aviri, e kua tuatua maru atu “e akatikaia ra te pakari e tana ra au tamariki.”—Mata. 11:19.

Me tuatua tarevake mai tetai no toou katiri, toou sex, e te ngai no reira mai koe, e tauta i te tuatua maru kiaia? Karanga a Peter, e tangata pakari Kerititiano i Aperika Tonga: “Me riri au i te tuatua a tetai ke, ka ui au kiaku uaorai, ‘Akapeea a Iesu me ariu atu?’” Karanga katoa aia: “Kua apii au eiaa e manako kino i tetai ke.”

Mārama ua a Iesu i te tu paruparu o te tangata. Kua inangaro te pipi a Iesu i te rave i te tika, no to ratou tu paruparu kua rave ratou i te tarevake. Ei akaraanga, te po i mua ake ka mate ei a Iesu, kare a Petero, Iakobo e Ioane i ara ana mei ta Iesu i pati ia ratou. Kua kite a Iesu e “kua tika oki i te vaerua, te parukaua nei ra te kopapa.” (Mata. 26:40, 41) No teia tumu, kare a Iesu i riri vave ana i tana apotetoro.

Ko Mandy tetai tuaine tei akakino i tetai ke, i teianei te tauta ra aia i te aru i te akaraanga o Iesu no te tu maru. Karanga aia, “kua tauta au i te āriki e tu paruparu to te tangata e kia akara i te meitaki o tetai ke, ta Iehova e kite maira.” Ka tauturu ainei to Iesu tu akaaroa i te tu paruparu o te tangata kia akaari katoa i te tu maru ki tetai ke?

Irinaki a Iesu i te Atua. Akakoromaki ua a Iesu i te takinokino anga tau kore i te enua nei. Kua mārama kore te tangata iaia, kua akavaavaa e kua takinokino iaia. Noatu rai, kua akaari aia i te tu maru “kua tuku ra iaia uaorai kiaia nona te manako tika ra.” (1 Pete. 2:23) Kite a Iesu e ka tauturu tona Metua i te rangi iaia e ka akautungaia te aronga tei takinokino iaia.

Me riri tatou e ka tauta i te akatikatika i to tatou manamanata, penei ka kino atu to tatou turanga. No reira te Irava i akamaara mai ei ia tatou: “Kare oki te riri o te tangata e akatupu i te tuatua-tika a te Atua.” (Iako. 1:20) Noatu kua tau rai to tatou riri, ka apa rai tatou e ka rave i te tarevake.

Manako ana tetai tuaine ko Cathy i Tiamani, ‘Me kare koe e paruru ia koe, kare tetai e rave i te reira.’ Iaia e apii ra i te irinaki ia Iehova, kua taui tona tu. “Kare au e viviki ana i te paruru iaku,” karanga ai aia. “Ka akaari ua rai au i te tu maru, te kiteanga e ka tauturu mai a Iehova iaku.” Me kua tupu ana te kino kia koe, na te aru anga i te  akaraanga o Iesu kia irinaki i te Atua, ka tauturu ia koe kia noo maru.

Akakite a Iesu e kia akaari ua tatou i te tu maru, e mataora ai. “E ao to tei maru,” karanga ai aia. (Mata. 5:5) Akara akapeea te tu maru me tauturu ia tatou i roto i teia au turanga.

Akakore te tu maru i te taitaia i roto i te akaipoipo. “Kua akakino au i taku vaine, kare i te mea akakoro,” i akakite ei a Robert, e taeake no Autireria. “Me akakinoia tetai ma te riri, tureti kua topa mai ki vao. Kua tangi au i taku vaine kua mamae aia.”

E ‘apa ana tatou i te au mea katoa’ ta tatou ka tuatua, e ka takino te au manako tau kore i te oraanga akaipoipo. (Iako. 3:2) Ka tauturu te tu maru ia tatou kia noo marie e kia akatere i to tatou arero.—Mase. 17:27.

Kua tauta pakari a Robert i te akaari i te tu maru e te akatere iaia uaorai. Eaa tei tupu mai? “Teianei me tupu te manamanata, ka aruaru au i te akarongo meitaki, ka tuatua maru, e kare e riri vave,” karanga ai aia. “Meitaki to maua pirianga ko taku vaine i teianei.”

Tauturu te tu maru ia tatou kia oaoa ki tetai ke. Te aronga viviki i te riri kare o ratou oa. Inara, ka tauturu te tu maru ia tatou “kia vai rai te taokotaianga . . . i te ruru o te au.” (Ephe. 4:2, 3) Karanga a Cathy e, “Me maru au ka mataora au i te piri atu ki te au tangata ravarai noatu to ratou tu.”

Akatupu te tu maru i te ‘au. Akakite te Pipiria e piri anga to “te pakari no runga maira” ki te tu maru e te ‘au. (Iako. 3:13, 17) “Tei te maki kore o te ngakau” te tangata maru. (Mase. 14:30) Akakite a Martin, tei angaanga pakari i te akatupu i te tu maru, “te maru nei au i teianei e te rekareka nei i te tu ‘au e te mataora.”

E tika, ka ngata ia tatou i te akatupu i te tu maru. “E tika,” karanga tetai taeake, “te tupu nei rai te riri i tetai au taime.” Ka akamaroiroi a Iehova ia tatou kia akatupu i te tu maru e ka tauturu ia tatou. (Isa. 41:10; 1 Timo. 6:11) Ka ‘akameitaki rava aia ia tatou’ e ka ‘akatinamou ia tatou.’ (1 Pete. 5:10) Mei ia Paulo rai, ka aru tatou i “te maru e te aroa o te Mesia.”—2 Kori. 10:1.