Nambaz Sara * urumburil anch: “Niding kwamu muntu wakad kulondolang, ni nikwetingap kamu nakash kashinsh ka amwinam. Chawiy nikat kwiyovang nayimp anch nidi nau antu akweta kashinsh nakash ka ayinau ni akatining anch antu akwau itiy ching yom yitonginau ni yilondinau awiy. Pakwez nikat kwiyovang nawamp nakash anch nidi pamwing ni muntu witudishina ni wikepishina. Muntu wa mutapu winou nikutwish kumulej yovil yam ni milong yam. Antu a mutapu winou awiy niding nau mu urund wa piswimp.”

Mazu ma Sara mamekeshin anch kwitudish kukat kusal anch antu akwau atusejin piswimp. Kwitudish kumusangareshining kand Yehova. Dizu diend ditukasikeshin anch: “Djalany . . . kwitudish.” (Kol. 3:12, TMK) Kwitudish chom ik? Mutapu ik wamekeshay Yesu mwikadil wa kwitudish? Ni mutapu ik ukutwisha mwikadil winou kutuletin musangar mu mwom?

Kwitudish udi mwikadil udiokiling ku kwikal mwin chisambu. Muntu witudishina ukat kuyisadinang antu akwau nich kudimuk ni kuwap ni ukat kushimpishang muchim anch yom yiletishina ujim yamushiken.

Kwitudish chidiap chijingidij cha kuburen usu. Mu dizu dia Grek, dizu diasadinangau mulong wa kwisambin kwitudish, adisadinang mulong wa kwisambin piur pa kabar wa mwisuku wading upitinau pol. Kumupit kabar kwasalangap anch ashadish usu wend, pakwez amufumbang kabar chakwel ayikel usu wend. Chilik chimwing, anch twamekesh mwikadil wa kwitudish, tukat kuyikel yovil yetu ya kuburen kuwanyin ni kwikal mu chisambu pamwing nau antu akwau.

Muntu ukutwish kutong anch ‘nidingap muntu witudishina.’ Tushich mu mangand mudia antu avud akad kwitudish ni akad kushimpish muchim, chawiy chikutwish kutukasiken kumekesh mwikadil wa kwitudish. (Rom 7:19) Chakin kamu, chitin kusal usu mulong wa kukudish mwikadil wa kwitudish, pakwez spiritu utumbila wa Yehova ukutukwash kusal usu wa kukudish mwikadil winou. (Gal. 5:22, 23) Mulong wak tufanyidin kusal usu wa kukudish mwikadil wa kwitudish?

Kwitudish udi mwikadil ukata kuyipwitin antu akwau kudi etu. Mudi nambaz Sara twajimbula kal kwiur oku, tukatining kwikal pamwing ni antu itudishina. Yesu udi chilakej chiwamp nakash cha muntu udimukina ni witudishina. (2 Kor. 10:1) Ap anch an kadingap kamwija, pakwez akata kumusejin piswimp.—Mar. 10:13-16.

 Kwitudish kukat kutuking ayinetu ni kukat kuyiking kand antu tushicha nau. Anch tudi itudishina, tukuswapalap kusul ku muchim ap kujiman bwat. (Jnsw. 16:32) Mwamu tukwipuk yovil ya kwifish nich yidiokila ku kuyirumbukin antu akwau—pakampwil antu tukatina. Ni kwitudish kukat kuyiking antu tushicha nau mulong kukat kusal anch tuyikel yovil yetu ni yisal yetu, ni mwamu tukutwishap kuyinenganesh.

Chikalap nchik yisend yikash ni midimu yivud yadingay nich, Yesu wading witudishin kudi antu awonsu. Antu avud mu chirung chend ading arishin ni milong ni ading akwet kuswir kwa kuyikasikesh. Afanyina chakin kamu kwiyov kwikal akasikeshinau chisu chayilejau kudi Yesu anch: “Ezany kudi am, . . . mulong am nishimpishin muchim ni kwitudish”!—Mat. 11:28, 29.

Mutapu ik tukutwisha kwilej kwikal itudishina mudi Yesu? Tufanyidin kwilej Dizu dia Nzamb mulong wa kwijik mutapu wayisadinangay Yesu antu akwau ni mutapu wapwishangay milong yikash. Kupwa, anch kwashiken milong yikutwisha kupak kwitudish kwetu, tufanyidin kwikasikesh kumwimburij Yesu. (1 Pita 2:21) Shinshikin yom yisatu yamukwasha Yesu kwikal muntu witudishina.

Yesu wading muntu wikepishina. Yesu walonda anch wading “[u]shimpishin muchim ni kwitudish.” (Mat. 11:29) Bibil wisambidin mikadil yiney yaad yawonsu pamwing mulong kwitudish kwendining pamwing ni kwikepish. (Efes 4:1-3) Mulong wak?

Kwikepish kutukwashining kwipuk kwikwat nich usey nakash ap kujiman swa. Mutapu ik wasalay Yesu piur pa antu amulonda nayimp anch “upumbil kudia ni kuna”? Wamekesha kusutil chilakej chend anch yom yalondau yadingap yakin ni walonda nich kwitudish anch “manangu [. . .] makat kumekan anch madi makin ku yisalijok yau.”—Mat. 11:19.

Anch muntu walond yom yiyimp piur pa ulombu wa chikit chey, ndond wadiokala, ap anch walond yom yiyimp piur pa antu amakundj ap amband, chadi niyey udi umwing wa antu inay alondinay, ov, ukusal usu wa kumwakul nich kwitudish? Mukadivar Peter udia mukurump wa chikumangen mu Afrik wa Kurul ulondin anch: “Anch muntu walond yom yikutwisha kwinjimesh, nikat kwiyipulang anch: ‘Anch wading Yesu, mutapu ik wafanyinangay kusal?’” Ulondin kand anch: “Nilejin mutapu wa kwipuk kwikwat nich usey nakash ni kujiman swa.”

Yesu wading wij anch antu adi akad kuwanyin. In kwilej a Yesu ading akatin kusal yom yiwamp, pakwez yisu yivud katwishangap kusal mwamu mulong wa kuburen kuwanyin. Chilakej, uchuku kurutu kwa Yesu kufa, Pita, Jakobu, ni Yohan akanganya kuchish pamwing ni Yesu. Yesu wamekesha anch watesha mulong wak akanganya kuchish chisu chalonday anch “muchim wa muntu usotil kusal nawamp, pakwez ndiy kakwetap usu.” (Mat. 26:40, 41) Mulong watesha nawamp anch in kwilejend ading antu akad kuwanyin, Yesu kayijimenap atwimbuy end chisu chakanganyangau kusal yom yiwamp.

Mandy udi nambaz umwing wading ni chaku cha kuyilondol akwau nayimp mulong wa kuburen kuwanyin kwau, pakwez katat usadin usu wa kwimburij chilakej cha Yesu cha kwitudish. Ulondin anch: “Nikat kusalang usu wa kuvurik anch antu awonsu adi akad kuwanyin ni kwikasikesh kushinshikin pa mikadil yau yiwamp, mudi musadiningay Yehova.” Ov, mutapu wa Yesu wa kuman kuburen kuwanyin kwa antu nich ranaken ukutwish kukukwash niyey kuyisadin antu akwau nich kwitudish?

Yesu watekang milong mu makas ma Nzamb. Chisu chadingay pa divu, Yesu wajijamena yom yiyimp yamusalau. Antu ateshang nayimp yom yalondangay, amudiulang, ni amumesha mar. Ap mwamu wadandamena kwikal witudishina mulong ndiy “wamuchingej[ina] Nzamb Nkalansambu utentamina.” (1 Pita 2:23) Yesu wading wij anch Tatukwend wa mwiur ukumukwash ni ukupwish kuburen kutentam pa chisu chiwanyidina.

Anch atusadin yom yakad kutentam chad nich ujim twapakish kupwish mulong winou, tukutwish chad kuyipish yom nakash. Chawiy Mifund yituvurishin anch: “Anch muntu wajiman kakutwishap kuwanyish yom yitentamina kurutu kwa Nzamb.” (Jak. 1:20) Ap anch tukwet mayingishin ma kujiman, pakwez kuburen kuwanyin kukutwish kutushikij ku kusal yom mu mutapu uyimp.

Nambaz Cathy wa mu Alemany watongang yisu yivud anch ‘ang wirishidinap kwey amwiney, kwikil muntu ukukurishina.’ Pakwez kudiosh pilejay kumuchingejin Yehova, mwikadil wend waswimpin kal. Ulondin anch: “Katat nikwetap kand kuswir kwa kwirishin  amwinam. Nikat kutwish kusal yom nich kwitudish mulong nij anch Yehova ukuwapish yom yawonsu yiyimp yidia mu mangand.” Anch akusadidinap kal yom yakad kutentam, imburij chilakej cha Yesu kusutil kumuchingejin Nzamb anch ukukukwash kulam mwikadil wa kwitudish.

Yesu walejana anch chidi cha usey kwikal itudishina mulong wa kwikal nich musangar. Walonda anch: “Ayuk kwau antu itudishina.” (Mat. 5:5) Shinshikin mutapu kwitudish kukata kutukwash mu yom yilondwilaku ey.

Kwitudish kukat kukepish yakamish mu uruw. Mukadivar Robert wa mu Ostrali witiyidin anch: “Namulonda mukajam mazu mavud makutapan ku muchim minading nakad kukat kulond. Pakwez anch walond mazu mayimp mulong wa ujim, ukutwishap kuchirik kwinyim mulong wa kurijek yom walondang. Niyova nayimp nakash pinajingunina anch yom nalonda yamutapa mukajam ku muchim.”

“Etu awonsu tukat kurumbok mu mitapu yivud” mu mazu metu, pakwez kulond yom pakad kutong kukutwish kulet milong mu uruw wetu. (Jak. 3:2) Mu yisu mudi yiney, kwitudish kukat kutukwash kwikuchik zoong ni kushinshikin yom tulondina.—Jnsw. 17:27.

Mukadivar Robert wasala usu nakash mulong wa kukudish chaku cha kwikuchik ni kwilam. Yibudikin ik yikalaku? Ulondin anch: “Katat anch novijadinap ni mukajam, nikat kusal usu wa kumutesh nawamp, kulond nich matul, ni nikat kwipuk kujiman. Katat nidi mu urund uwamp nakash ni mukajam.”

Kwitudish kutukwashining kushakam nawamp nau antu akwau. Antu akata kujimanang swa swa kakwetingap arund avud. Pakwez, kwitudish kukat kutukwash ‘kulam . . . chisambu chitukasina etu awonsu pamwing.’ (Efes 4:2, 3) Nambaz Cathy twisambina kal kwiur oku ulondin anch: “Kwitudish kukat kwinkwashang kwambamb nawamp ni muntu mwawonsu, ap anch chiswapelingap kwambamb ni antu amwing.”

Kwitudish kukat kulet chisambu cha mu manangu. Bibil umekeshin anch kudi kukwatijan pakach pa “manangu madiokila mwiur” ni kwitudish ni chisambu. (Jak. 3:13, 17) Muntu witudishina ukweting ‘muchim udia zoong.’ (Jnsw. 14:30) Mukadivar Martin wasala usu nakash mulong wa kukudish mwikadil wa kwitudish ulondin anch: “Katat nikatap kukimb anch ching yom yisadik mu mutapu nikatina am, ni chinech chinletidin chisambu cha mu manangu ni musangar.”

Chakin kamu, chitin kusal usu nakash mulong wa kukudish mwikadil wa kwitudish. Mukadivar umwing ulondin anch: “Mu kulond patok, djat ni nlel unou nikat kujimanang nakash yisu yimwing.” Pakwez Yehova utukasikeshina kukudish mwikadil wa kwitudish ukutukwash chakwel tukudish mwikadil winou. (Isay 41:10; 1 Tim. 6:11) Yehova ukutwish ‘kuwanyish kufumb kwetu’; ukutwish ‘kutukasikesh.’ (1 Pita 5:10) Mu kusut kwa machuku, mudi kambuy Paul, tukutwish kwimburij ‘kwitudish ni kudimuk kwa Kristu.’—2 Kor. 10:1.