“Olo menamenatsy zay aho”, hoasani-Sara, * “sady tsy mba matoky tena. Farany, tsy azoko ty aiko lafa miaraky amin’olo tsy midary ty hevitsini-hafa na olo matoky tena marè. Fa lafa miaraky amin’olo malemy fanahy noho miambany aho, le azoazoko soa ty aiko. Tsy misalasala amy zay aho miresaky amin-drozy, sady mampiboaky ty fihetseham-poko noho ty raha mahazo ahy. Namako biby ty olo manahaky ani-zay.”

Hita baka amy raha nivolanini-Sara io fa lafa malemy fanahy tsika, le ho tean’olo ty hinama amintsika. Mahafalifaly ani-Jehovah koa ty olo malemy fanahy. Mampirisiky antsika ty Safàny hoe: “Misikìna ... fahalemeam-panahy.” (Kol. 3:12) Manao akory malemy fanahy zao? Akory ty nampisehoani-Jesosy hoe malemy fanahy ie? Le manino toetsy io ro mahavy antsika ho sambatsy?

Toetsy anatin’olo raiky tea filongoa ty fahalemeam-panahy. Soa fanahy noho tsy masiaky ty olo malemy fanahy lafa mifandramby amy ty hafa. Mahavita mifehy ty vatany koa ie mba ho kalma avao ndre misy raha mampeloky aza.

Fomba nivolana ani-soavaly voafolaky rey koa ty safà grika nadika hoe malemy fanahy. Mbo matanjaky avao soavaly iny, fe nampianary azy tsikelikely ty fomba hifehezany ty tanjakiny. Manahaky ani-zay koa ty olo malemy fanahy. Matanjaky avao ie anatiny ao, fe miezaky hifehy ty tsy fahalavorariany noho hilongo soa amin’olo avao.

Mety hanao ho zao tsika hoe: ‘Zaho tsy karazan’olo malemy fanahy rey.’ Mety ho sarotsy amintsika aloha ty halemy fanahy. Tsy mahaliny raha ty ankamaroan’olo sady manery ty hafa hitovy hevitsy aminy. (Rom. 7:19) Tena mila ezaky raha zay. Fe hanampy antsika ty fanahy masini-Jehovah, ka vomaiky tsika ho tapa-kevitsy halemy fanahy. (Gal. 5:22, 23) Manino tsika ro tokony hiezaky halemy fanahy?

Tean’olo ty olo malemy fanahy. Fa nivolanini-Sara taloha teny iny hoe soa ty miaraky amin’olo malemy fanahy. Modely tena soa Jesosy amy resaky fahalemeam-panahy noho hasoa fanahy. (2 Kor. 10:1) Ndre ty ajà tsy nahay azy aza, le ta ho namonjy azy.—Mar. 10:13-16.

Mahasoa antsika noho ty manodidy antsika ty fahalemeam-panahy. Laha malemy fanahy tsika, le tsy halaky kivy na ho meloky. (Ohab. 16:32) Hitandrina tsika mba tsy hanao raha mety  hanenenantsika, ohatsy hoe hampalahelo ty olo teantsika. Tsy hijaly koa ty manodidy antsika satria haintsika ty mifehy ty vatantsika noho ty fihetseham-pontsika.

Nalemy fanahy amy ty olo iaby Jesosy, ndre nibe andraikitsy noho maro raha atao aza. Nila famelombeloma ty olo maro tamy androny satria nisahira sady nanday enta mavesatsy. Hoy Jesosy tamin-drozy: “Mamonjea ahy ... fa malemy fanahy noho miambany aho.” (Mat. 11:28, 29) Azo antoky hoe tena nampahery an-drozy ty naharè ani-zay!

Akory ty hahavy antsika halemy fanahy manahaky ani-Jesosy? Mila mianatsy ty Safà-Ndranahary tsika soa hahay hoe akory ty fomba nifandrambesani-Jesosy tamin’olo, le ino ty nataony lafa niatriky raha sarotsy. Ka lafa misy raha mety hahavy antsika tsy halemy fanahy, le miezaky tsika hanahaky ani-Jesosy. (1 Pet. 2:21) Retoa misy raha telo nanampy ani-Jesosy halemy fanahy.

Niambany Jesosy. Nivola Jesosy fa ‘nalemy fanahy noho niambany’ ie. (Mat. 11:29) Tononini-Baiboly miaraky avao toetsy roe reo satria mifandramby marìny amy fiambanea ty fahalemeam-panahy. (Efes. 4:1-3) Ino ty mahavy ani-zay?

Tsy ho mora meloky na hanao am-po marè tsika lafa miambany. Ino ty nataoni-Jesosy lafa nisy olo nanaraty azy hoe “mahaky” noho “mpiboboky divay”? Ty modeliny ro nengàny hampitsỳ ty fandratiratian-drozy, sady nalemy fanahy ie lafa nivola hoe “ty fahendrean’olo hamarinini-ze ataony.”—Mat. 11:19.

Manao akory zao laha misy manao safà tsy voadiniky mikasiky ty karazanao na ty tany niavianao? Na misy manambanimbany anao satria hoe ampela iha, na lahilahy? Manino laha miezaky halemy fanahy lafa mamaly azy? Hoy Peter, anti-panahy raiky an’Afriky Antimo any: “Lafa misy olo mivola raha mampeloky ahy, le mieritseritsy aho hoe: ‘Ino ty ho nataoni-Jesosy?’ ” Nivola ndraiky ie hoe: “Hitako amy zay fa tsy tokony ho hentitsy marè aho.”

Haini-Jesosy hoe tsy lavorary ty olombelo. Nana faniria soa mpianatsini-Jesosy reo, fe tsy lavorary rozy ka tsy nivitan-drozy ty nanatanteraky ani-fanirian-drozy rezay. Nalahelo marè, ohatsy, Jesosy tamy haly talohani-nahafatesany iny. Niangavy ani-Petera noho Jakoba voho Jaona ie mba hanoha azy, fe tsy nivitan-drozy ty nanao ani-zay. Takatsini-Jesosy hoe “mazoto avao ty say, fa ty nofotsy ro malemy.” (Mat. 26:40, 41) Vokatsini-zay, le tsy neloky tamy apostoliny reo Jesosy.

Nitea nikinokino olo ranabavy Mandy taloha. Fe fa miezaky marè ie henanizao mba halemy fanahy manahaky ani-Jesosy. Hoy ty asany: “Miezaky aho mba haneky hoe tsy lavorary iaby lafa kila olo, fa ty toetsy soan-drozy ro mila ifantohako, manahaky ty ataoni-Jehovah.” Afaky halemy fanahy manahaky ani-Jesosy va iha, ka hiezaky hahatakatsy ani-ze mampalemy ty hafa?

Napetrani-Jesosy an-tana-Ndranahary ty raha iaby. Niaritsy tsy rariny Jesosy tamin’ie tan-tany etoy. Fa nihainy mialoha hoe ino ty raha sarotsy noho ty fijalea hahazo azy. Fe ndre zay, le nalemy fanahy avao ie satria “fa napetrany tamy mpitsara tea raha mahity iny avao ty fiainany.” (1 Pet. 2:23) Natoky Jesosy fa hanampy azy avao Babany an-danitsy any iny sady handamy ty tsy rariny mahazo azy amy fotoa mety.

Laha meloky tsika ka ta hamaly ty tsy rariny nataon’olo amintsika, le mety hanao raha tafahoatsy ka vomaiky ho raty ty vokany. Zay ro mahavy ty Soratsy Masy hampahatiaro antsika hoe: “Ty helokin’olo tsy ahavità ze mahity amaso-Ndranahary eo.” (Jak. 1:20) Mety ho marina ty ahintsika, fe tsy lavorary tsika ka mety hanao hadisoa lafa meloky.

Nieritseritsy ho zao ranabavy an’Alemaigny any, mana anara Cathy zay taloha: ‘Laha tsy parè hiaro ty hevitsinao iha, le ka mitamà olo hiaro anao.’ Fe niova hevitsy ie lafa nianatsy nitoky tamy Jehovah. “Fa tsy tea manamarin-tena marè sasy aho”, hoy ty asany. “Tsy misalasala hampiseho fahalemeam-panahy aho, satria haiko fa mbo halamini-Jehovah avao ze raha tsy metimety iaby.” Laha fa nitratsini-tsy rariny koa iha, le tahafo Jesosy ka matokisa a  Ndranahary. Hanampy anao halemy fanahy avao raha zay.

Nihamafisini-Jesosy fa tena ilà ty malemy fanahy mba hahavy antsika ho sambatsy. Hoy ty asany: “Sambatsy ze malemy fanahy.” (Mat. 5:5) Henteo amy raha manaraky retoa fa manampy antsika ty fahalemeam-panahy.

Manampy ty fahalemeam-panahy lafa mana problemo ty mpivaly. Nieky ho zao Robert, rahalahy baka an’Ôstralỳ any: “Nivola raha maro nampalahelo ani-valiko aho. Nanenenako raha rey. Fe tsy hay ampoly sasy ty safà aboakin-tena lafa meloky tena. Nalahelo biby aho lafa nahita hoe namparary ty fony raha rey.”

“Manao hadisoa matetiky tsika iaby” amy ty raha volanintsika, ka mety hanimba ty filongoani-mpivaly ty safà tsy voadiniky. (Jak. 3:2) Amy fotoa manahaky ani-zay, le hanampy antsika ho kalma noho hifehy ty raha volanintsika ty fahalemeam-panahy.—Ohab. 17:27.

Niezaky mafy Robert mba ho kalma noho hahay hifehy ty vatany. Ino ty vokany? Hoy ty asany: “Miezaky hijanjy soa aho henanizao laha vo misy raha tsy mampifanaraky anay morovaly. Miezaky halemy fanahy koa aho lafa mivola, fa tsy ho meloky. Tena nampilamy anay morovaly raha zay.”

Manampy antsika hifandramby soa amin’olo ty fahalemeam-panahy. Tsy mana nama maro matetiky ty olo mora meloky. Fa ty fahalemeam-panahy, manampy antsika “hitanjaky ... ty fehy mampiharo raiky.” (Efes. 4:2, 3) Hoy Cathy, azy nivoaresaky taloha teo iny: “Ty fahalemeam-panahy le nanampy ahy hiezaky hifandramby soa amin’olo, ndre azy sarotsy ifandrambesa rey aza.”

Mahavy antsika hilamin-tsay ty fahalemeam-panahy. Ampifandrambesini-Baiboly amy fahalemeam-panahy noho fiadana “ty fahendrea baka anabo any.” (Jak. 3:13, 17) Mana “fo milamy” ty olo malemy fanahy. (Ohab. 14:30) Niezaky mafy Martin mba hana fahalemeam-panahy. Hoy ty asany: “Mba mora mandefitsy aho henanizao fa tsy mizizo amy ty hevitsiko avao. Milamin-tsay amy zay aho sady falifaly.”

Mety ho sarotsy aloha ty miezaky halemy fanahy. “Ndre henanizao aza aho”, hoasani-rahalahy raiky zay, “le mbo romotsy avao ty anaiko any kindraiky.” Fe mampirisiky antsika halemy fanahy Jehovah, ka ie ro hanampy antsika handresy ani-raha sarotsy zay. (Isa. 41:10; 1 Tim. 6:11) “Hamita ty fampiofana” antsika ie, sady “hampatanjaky” antsika. (1 Pet. 5:10) Lafa mandeha ty fotoa, le hanahaky ani-apostoly Paoly tsika ka hanahaky ty “fahalemeam-panahy noho hasoa fanahini-Kristy.”—2 Kor. 10:1.