Wan sisa de kai Sara * bi taki taa: „Mi da wan sëmbë di ta sen gaanfa. Söseei mi ta si kuma ma sa du so soni. Fëën mbei ma ta fii bunu te mi dë ku sëmbë di ta fii deseei nasö di hati u de ta boonu hesihesi. Ma mi ta fii bunu te mi dë ku sëmbë di abi saapifasi, söseei di abi sakafasi. Mi sa ta konda da dee lö sëmbë aki unfa mi ta fii, söseei mi sa ta konda dee fuka u mi da de. Dee gaan mati u mi abi saapifasi ku sakafasi.”

Dee soni di Sara taki ta lei taa ee u abi saapifasi, nöö woto sëmbë o kë ko dë mati fuu. Jehovah lobi tu te sëmbë abi saapifasi. Di Wöutu fëën ta piki u taa: „Un musu a’ . . . sapifasi” (Kol. 3:12). Andi da saapifasi? Unfa Jesosi bi lei taa a abi di fasi aki? Unfa di lei di u ta lei taa u abi di fasi aki, sa mbei taa u ko ta dë möön waiwai?

Wan sëmbë ta abi saapifasi te a dë wan sëmbë di lo’ u libi fiifii ku wotowan. Wan sëmbë di abi saapifasi ta libi bunu ku wotowan, nöö an ta ligei te soni ta pasa di bi o sa mbei hati fëën boonu.

So sëmbë ta mëni taa te wan sëmbë ta lei taa a abi saapifasi, nöö hën da a suwaki. Ma na sö a dë tuutuu. De bi ta wooko ku di Giiki wöutu di de puu ko „saapifasi”, te de bi ta taki u wan hasi di bi hogi seei u di an bi guwenti ku sëmbë. Ma di hasi aki ko dë piii bakaten, u di a ko guwenti ku sëmbë. Di hasi an ta lasi di kaakiti fëën, ma de ta lei ën unfa a musu wooko ku di kaakiti di a abi. Sö nöö a dë da u tu. Te u ta lei taa u abi saapifasi, nöö wa ta da dee zöndu fii fuu pasi u de basi u, ma u ta mbei möiti u libi fiifii ku wotowan.

Kandë u sa taki taa ’ma abi saapifasi e’. Wë u ta libi a wan goonliba ka sëmbë hati lo’ u bunu hesihesi, söseei ka sëmbë an abi pasensi ku wotowan. Fëën mbei a sa ta taanga da u fuu lei taa u abi saapifasi (Lom. 7:19). U musu mbei taanga möiti seei fuu ko abi saapifasi. Ma di santa jeje u Jehovah sa heepi u fuu ko abi di fasi aki (Gal. 5:22, 23). Faandi mbei u musu mbei taanga möiti fuu ko abi di fasi aki?

Te u abi saapifasi, nöö sëmbë ta kë ko dë mati fuu. U dë kuma Sara. Useei ta kë dë ku sëmbë di abi saapifasi. Jesosi da di möön bunu sëmbë di u sa djeesi a di saapifasi di a bi abi, söseei a di libi di a bi ta libi bunu ku wotowan (2 Kol. 10:1). Piki mii seei di an bi sabi Jesosi wan bëtë, bi ta kë dë zuntu ku ën.​—Maik. 10:13-16.

Te u abi saapifasi, nöö a ta tja wini ko da u ku wotowan tuu. Ee u abi saapifasi, hati fuu an o boonu  hesihesi (Nöng. 16:32). Wa o du soni di sa hati wotowan, möönmöön dee sëmbë dee u lobi. A sö wan fasi, háti fuu an o fon u. Söseei wotowan o feni wini tu u di wa o lasi useei, nöö u go du soni di sa hati de.

Hii fa Jesosi bi abi sömëni faantiwöutu ku hia soni u du, tökuseei a bi ta libi a wan saapi fasi ku hii sëmbë. Sömëni sëmbë a di ten dë bi ta dë fukafuka, weiwei, nöö de bi kë feni böö. A musu u dë sö taa de bi fii bunu di Jesosi bi piki de taa: „Ko a mi . . . Biga fa mi dë aki, mi abi saapifasi, mi a’ sakafasi”!​—Mat. 11:28, 29, NW.

Unfa u sa ko abi saapifasi kumafa Jesosi bi abi ën? Te u ta lesi di Wöutu u Gadu ta öndösuku soni nëën, u ta ko sabi unfa Jesosi bi ta libi ku sëmbë, söseei andi ku andi a bi ta du te soni bi ta taanga dëën. Nöö te soni ta miti u ka u musu lei taa u abi saapifasi, nöö u ta mbei möiti u du soni kumafa Jesosi bi o du ën (1 Pet. 2:21). Boo taki u dii soni di bi heepi Jesosi faa ko abi saapifasi.

Jesosi bi abi sakafasi tuutuu. Jesosi bi taki taa: „Mi abi saapifasi, mi a’ sakafasi” (Mat. 11:29, NW). Di Bëibel ta kai dee tu fasi aki makandi, u di de nama ku deseei (Ef. 4:1-3). Faandi mbei u taki sö?

Ee u abi sakafasi, nöö an o ta pasa hesihesi taa u fii wan fasi u di wan sëmbë du wan soni ku u. Andi Jesosi bi du di sëmbë bi taki taa a a’ langabëë tumisi, söseei taa a dë bebesonima? Wë ku di fasi fa Jesosi bi ta libi, a bi lei taa dee soni di dee sëmbë bi ta taki an bi dë sö tuutuu. Nöö u di a bi abi sakafasi, mbei a bi taki taa: „A o ko a döö nöömö u sëmbë musu ko fusutan taa Gadu hën manda mi.”​—Mat. 11:19.

Ee wan sëmbë taki wan soni u di nasiön sëmbë di i dë, nasö u di fasi fa i kiija, i musu mbei möiti fii piki di sëmbë a wan saapifasi. Wan gaanwomi u Zuid-Afiikan, de kai Peter, bi taki taa: „Te hati u mi kë boonu u di wan sëmbë taki wan soni, nöö mi ta hakisi miseei ’Andi Jesosi bi o du?’” A bi taki tu taa: „Mi bi ko si taa ma musu ta booko mi hedi ku hii soni.”

Jesosi bi sabi taa libisëmbë abi zöndu. Dee bakama u Jesosi bi ta kë du bunu soni, ma u di de bi dë zöndu libisëmbë, mbei na hii juu de bi ta du bunu soni. Di ndeti ufö de kii Jesosi, hën Petuisi, Jakobosi ku Johanisi an bi dë ku wojo, hii fa Jesosi bi piki de taa de bi musu ta dë ku wojo. Ma tökuseei Jesosi bi lei taa a bi fusutan faandi mbei de bi duumi. A bi taki taa: „Mi sabi taa hati fuunu kë du kumafa a fiti, ma wan taanga sö” (Mat. 26:40, 41). U di Jesosi bi sabi taa dee apösutu fëën da zöndu libisëmbë, mbei hati fëën an bi ta boonu ku de.

Wan sisa de kai Mandy, bi lo’ u suku fini a sëmbë. Ma nöunöu a ta mbei möiti faa djeesi Jesosi a di saapifasi di a bi abi. Di sisa aki bi taki taa: „Mi ta mbei möiti u hoi a pakisei taa hii libisëmbë abi zöndu. Ma mi ta mbei möiti tu u mi möön buta pakisei a dee bunu fasi di wotowan abi, leti kumafa Jehovah ta du ën.” Di hoi di Jesosi bi ta hoi a pakisei taa libisëmbë abi zöndu, bi ta heepi ën faa libi a wan saapi fasi ku de. I si kuma joo sa djeesi Jesosi a di lö fasi aki ö?

Jesosi bi ta disa hii soni da Gadu. Na hii juu sëmbë bi ta libi bunu ku Jesosi di a bi dë a goonliba aki. So juu sëmbë bi ta fusutëën a wan föutu fasi, de bi ta buuse ën, söseei bakaten de bi pekëën a wan posu kii. Hii fa dee soni aki bi miti ën, tökuseei a bi lei taa a abi saapifasi, u di „a [bi] disa de da di Sëmbë di ta kuutu a wan leti fasi” (1 Pet. 2:23). Jesosi bi sabi taa di Tata fëën di dë a liba ala, bi o heepi ën faa hoi dou, söseei taa a bi o sitaafu dee sëmbë dee an bi libi bunu ku ën, te di juu fëën dou.

Ee hati fuu ta boonu u di sëmbë an ta libi a wan leti fasi ku u, nöö u sa mbei soni ko möön hogi. Fëën mbei di tëkisi aki ta toona mëni u taa: „Di hatiboonu u wan libisëmbë an ta heepi i fii libi di leti libi di Gadu kë” (Jak. 1:20). Aluwasi ee u abi leti u hati fuu boonu, tökuseei u musu ta köni fu wa du soni di an bunu, u di u da zöndu libisëmbë.

Wan sisa de kai Cathy, di ta libi na Alumanköndë bi ta pakisei taa: ’Iseei musu hopo taki da iseei, sëmbë an o ko du ën da i.’ Ma di di sisa aki bigi ta buta futoou a Jehovah, hën a bi ko ta si soni woto fasi. A bi taki taa: „Nöunöu mi ko si taa na hii juu a dë fanöudu u mi hopo taki da miseei. Mi sa lei taa mi abi saapifasi u di mi sabi taa Jehovah o seeka hii soni a goonliba aki, ko bunu baka.” Ee sëmbë an bi libi bunu ku i, nöö djeesi Jesosi a di futoou di a bi ta futoou  Gadu. Te i du sö, nöö joo sa ta lei hii juu taa i abi saapifasi.

Jesosi bi taki taa ee u kë ta dë waiwai hii juu, nöö u musu abi saapifasi. A bi taki taa: „Un dë bunu e, dee sëmbë, ee un abi saapifasi” (Mat. 5:5, NW). Boo luku un wini u ta feni te u abi saapifasi.

Soni sa waka bunu a di tööu libi, te u ta lei taa u abi saapifasi. Wan baaa de kai Robert, di ta libi a Ösutualia bi taki taa: „Mi bi piki mi mujëë sömëni hatihati soni, u di hati u mi bi boonu. Ma baka te i taki wan soni u di hati fii boonu, nöö ja sa ta du kuma ja bi du na wan soni. A bi hati mi seei di mi bi si unfa dee soni dee mi bi piki ën bi hati ën tjika.”

„Hii u tuu ta mbei föutu” te u ta fan, nöö dee soni dee u ta taki sa tja toobi ko a di tööu libi (Jak. 3:2). A dee lö ten aki, ee u ta lei taa u abi saapifasi, nöö woo sa dë piii, söseei woo sa köni ku dee soni dee woo taki.​—Nöng. 17:27.

Baaa Robert bi mbei taanga möiti seei faa duwengi hënseei, söseei fu an ligei te wan toobi dë. Unfa soni bi waka dëën? Wë Robert bi taki taa: „Nöunöu te mi ku mi mujëë abi wan piki toobi, mi ta mbei taanga möiti u haikëën bunu. Mi ta mbei möiti tu u fan a wan saapi fasi, söseei u hati u mi an boonu. Nöunöu soni nango möön bunu a di tööu libi fuu.”

U sa ta libi möön bunu ku wotowan te u ta lei taa u abi saapifasi. Sëmbë di hati u de ta boonu hesi, an ta abi hia mati. Ma te u abi saapifasi, nöö a o heepi u fuu sa ta ’libi fiifii ku useei’ (Ef. 4:2, 3). Di sisa de kai Cathy, di u bi taki soni fëën kaa, bi taki tu taa: „Hii fa a ta taanga u libi bunu ku so sëmbë, tökuseei te mi ta lei taa mi abi saapifasi, nöö an ta taanga da mi sö möön.”

U ta dë bööböö te u ta lei taa u abi saapifasi. Di Bëibel ta taki taa di köni di Gadu ta da sëmbë, ta mbei wan sëmbë ko abi saapifasi, söseei a ta mbei a libi fiifii ku sëmbë (Jak. 3:13, 17). Wan sëmbë di abi saapifasi an „ta buuja hesihesi” (Nöng. 14:30). Wan baaa de kai Martin, di bi mbei taanga möiti seei faa ko abi saapifasi, bi taki taa: „Nöunöu ma ta kë nömönömö taa soni musu pasa kumafa mi kë, nöö hati u mi an ta boonu sö möön. Mi ko ta möön dë bööböö, söseei mi ko ta möön dë waiwai.”

A dë sö tuu taa u musu mbei taanga möiti fuu sa ko abi saapifasi. Wan baaa bi taki taa: „U mi taki ën kumafa a dë, so juu hati u mi ta boonu gaanfa seei.” Ma Jehovah, di Sëmbë di ta da u taanga fuu ko abi saapifasi, o heepi u fuu ko abi di fasi aki (Jes. 41:10; 1 Tim. 6:11). A o „lei u soni nöömö. A o mbei u ko taanga gingin a di biibi” (1 Pet. 5:10, NW). Te u kaba fëën, woo ko dë kuma apösutu Paulosu di bi „tei di saapihati fasi u Keesitu”.​—2 Kol. 10:1.