Sara * e taki: „Mi na wan sma di e syensyen èn a no makelek gi mi fu taki fa mi e denki. Dati meki a muilek gi mi fu de nanga sma di no e frede fu taki fa den e denki èn fa den e firi. Ma mi e firi bun te mi de nanga safri-ati sma di abi sakafasi. Mi man taki makelek nanga den sortu sma disi, mi kan fruteri den fa mi e firi èn sortu problema mi abi. Den moro bun mati fu mi na sma di abi safri-ati nanga sakafasi.”

A sani di Sara taki e sori taki efu wi abi safri-ati, sma o wani de wi mati. Yehovah lobi safri-ati sma tu. En Wortu e taki: ’Un musu abi safri-ati’ (Kol. 3:12). San na safri-ati? Fa Yesus sori safri-ati? Èn fa a fasi disi kan meki wi de koloku?

Wan safri-ati sma no e atibron esi. Wan safri-ati sma e taki na wan switi fasi nanga trawan èn a no e lasi ensrefi te sma e du sani di a no lobi.

Furu sma feni taki wan safri-ati sma swaki, ma dati no tru. Sma ben e gebroiki a Griki wortu di vertaal nanga „safri-ati” te den ben e taki fu wan asi di den tem. Aladi na asi e du san en basi wani, toku a tranga ete. A no swaki. Na so a de tu taki wan safri-ati sma no swaki, ma a e basi a sondu skin fu en èn a e libi na ini freide nanga tra sma.

Wan sma kan denki: ’A no makelek gi mi fu de wan safri-ati sma.’ Wi e libi na ini wan grontapu pe furu sma e atibron esi èn pe den no abi pasensi. Dati meki a kan muilek fu abi safri-ati (Rom. 7:19). Sobun, wi musu meki muiti fu kon abi a fasi disi. Ma Yehovah en santa yeye o yepi wi fu tan meki muiti fu tron safri-ati sma (Gal. 5:22, 23). Fu san ede wi musu meki a muiti dati?

Te wi na safri-ati sma, dan sma o wani de wi mati. Neleki Sara, wi lobi de nanga safri-ati sma. Yesus na wan moi eksempre gi wi fu di a ben de wan safri-ati sma èn a ben abi switifasi (2 Kor. 10:1). Srefi pikin-nengre di no ben sabi en bun ete, no ben frede fu go na en.​—Mark. 10:13-16.

Te wi na safri-ati sma, dan dati bun gi wi èn gi tra sma. Efu wi na safri-ati sma, dan wi no o atibron esi (Odo 16:32). A sani disi bun gi tra sma fu di wi no o du noso taki sani di o  hati den, spesrutu sma di wi lobi. Èn a bun gi wi tu fu di wi no o abi konsensi fonfon.

Yesus ben abi bigi frantwortu èn a ben abi furu fu du, ma toku a ben sori switifasi gi ala sma. Furu sma na ini a ten fu en ben musu wroko tranga èn den ben abi deki-ati fanowdu. A no de fu taki dati den ben firi bun di Yesus taigi den: „Un kon na mi . . . , bika mi abi safri-ati nanga sakafasi.”​—Mat. 11:28, 29.

Fa wi kan tron safri-ati sma neleki Yesus? Wi musu studeri Gado Wortu fu si fa Yesus ben libi nanga tra sma èn san a ben e du na ini muilek situwâsi. Dan te wi de na ini den srefi sortu situwâsi, wi musu pruberi fu du san Yesus ben o du (1 Petr. 2:21). Meki wi poti prakseri na dri sani di yepi Yesus fu abi safri-ati.

Yesus ben abi sakafasi. Yesus ben taki dati a ben abi „safri-ati nanga sakafasi” (Mat. 11:29). Bijbel e taki fu den tu fasi disi makandra fu di safri-ati abi furu fu du nanga sakafasi (Ef. 4:1-3). Fu san ede wi kan taki dati?

Te wi abi sakafasi, dan wi no o denki taki wi prenspari moro trawan èn wi no o atibron esi te sma e taki sani fu wi di wi no lobi. San Yesus ben du di sma ben taki dati en na „wan gridi man” èn wan man di „lobi dringi furu win”? A meki a fasi fa a ben libi sori taki den no ben abi leti. A ben taki: „Na den bun sani di wan sma e du, e sori taki a koni.”​—Mat. 11:19.

San yu o du te wan sma e taki wan sani di hati yu? Kande a e taki wan sani fu a ras fu yu noso fu a kondre pe yu komoto. Meki muiti fu no taigi a sma wan hati sani baka. Peter, wan owruman na ini Zuid-Afrika, e taki: „Te mi e mandi fu wan sani di wan sma taki, dan mi e aksi misrefi: ’San Yesus ben o du?’” A e taki moro fara: „Mi leri fu no firi wan fasi te wan sma taki wan sani fu mi.”

Yesus ben frustan taki libisma abi swakifasi. Den disipel fu Yesus ben wani du san bun. Ma fu di den ben de sondusma, meki den no ben man du bun ala ten. Fu eksempre, a neti fosi Yesus dede, Petrus, Yakobus nanga Yohanes ben e sribi, aladi Yesus ben aksi den fu tan na ai nanga en. Yesus ben sabi taki „na ati wani, ma a skin swaki” (Mat. 26:40, 41). Fu di Yesus ben frustan taki den apostel ben de sondusma, meki a no ben atibron na den tapu.

Mandy na wan sisa di ben lobi krutu tra sma, ma now a e du tranga muiti fu de wan safri-ati sma neleki Yesus. A e taki: „Mi e pruberi fu no frigiti taki wi alamala na sondusma èn mi e pruberi fu si den bun fasi fu sma, neleki Yehovah.” Te wi e pruberi fu denki neleki Yesus, dan dati o yepi wi fu abi pasensi nanga trawan.

Yesus ben e frutrow tapu Gado. Di Yesus ben de na grontapu, sma no ben libi bun nanga en. Den ben e krutu en, den ben wisiwasi en èn den ben fon en. Toku a ben man hori ensrefi fu di a ben „tan saka ensrefi na ondro a sma di e krutu sani na wan reti fasi” (1 Petr. 2:23). Yesus ben sabi taki en hemel Papa ben o yepi en fu horidoro èn taki a ben o strafu den sma di du ogri nanga en.

Efu wi e rigeri te wan sma du wan hati sani nanga wi, dan a situwâsi kan kon moro ogri. Bijbel e taki: „Na atibron fu libisma, e meki den du sani di Gado no feni bun” (Yak. 1:20). Son leisi wi abi leti fu atibron. Ma efu wi no luku bun, wi kan du wan don sani fu di wi na sondusma.

Cathy, wan sisa na ini Doisrikondre, ben e denki fosi: ’Yu musu opo taki gi yusrefi. Tra sma no o du dati gi yu.’ Ma di a leri fu frutrow tapu Yehovah, a denki fu en kenki. A e taki: „Now mi no abi fu opo taki gi misrefi ala leisi. Mi no e rigeri nanga sma fu di mi sabi taki mi kan libi ala sani gi Yehovah.” Efu sma du ogri nanga yu wan leisi kaba, dan teki na eksempre  fu Yesus. Frutrow taki Gado o yepi yu fu tan abi safri-ati.

Yesus ben taki dati te wi wani de koloku, dan wi musu abi safri-ati. A ben taki: „Koloku fu den safri-ati sma” (Mat. 5:5). Luku fa safri-ati kan yepi wi na ini den situwâsi di e kon now.

Te broko-ede de na ini a trowlibi, dan sani kan go moro bun te wi abi safri-ati. Robert, wan brada fu Australia, ben taki: „Mi taigi mi frow wan lo hati sani, ma bakaten a hati mi taki mi du dati. Ma te yu taki wan sani kaba, yu no man teki en baka. Mi ben sari taki mi hati en so.”

Bijbel e taki: „Wi alamala e sondu furu tron” (Yak. 3:2). Dati meki son leisi wi kan taki sani di kan tyari problema kon na ini a trowlibi. Te so wan sani pasa, dan safri-ati kan yepi wi fu no rigeri èn fu luku bun san wi e taki.​—Odo 17:27.

Robert meki tranga muiti fu leri fu dwengi ensrefi. San ben de a bakapisi? A e taki: „Now te mi nanga mi frow no e agri nanga makandra, mi e pruberi fu arki en, fu taki na wan switi fasi èn fu no mandi. Now sani e go moro bun nanga mi nanga mi frow.”

Te wi abi safri-ati, dan wi o man feni en nanga tra sma. Nofo tron sma di e atibron esi, no abi furu mati. Ma te wi abi safri-ati, dan wi o libi bun nanga tra sma èn wi o abi wánfasi (Ef. 4:2, 3). Cathy, di wi kari kaba, e taki: „Te mi abi safri-ati, dan mi kan feni en nanga tra sma, awinsi sonwan fu den abi fruferi maniri.”

Te wi na safri-ati sma, dan wi o abi wan korostu firi. Bijbel e sori taki sma di abi „a koni fu hemel” lobi freide èn den abi safri-ati (Yak. 3:13, 17). Wan safri-ati sma abi „wan ati di no e bruya esi” (Odo 14:30). Martin, wan brada di meki tranga muiti fu abi safri-ati, e taki: „Now mi no de nomonomo fu du sani na mi fasi èn mi no e mandi esi moro. Mi de moro koloku èn mi abi wan korostu firi.”

A tru taki wi musu du tranga muiti fu tron safri-ati sma. Wan brada e taki: „Fu de eerlijk, te nanga now mi e nyan mi niri te sma e du son sani.” Ma Yehovah, a sma di e gi wi deki-ati fu tron safri-ati sma, o yepi wi (Yes. 41:10; 1 Tim. 6:11). A o ’gi wi leri dorodoro’ èn a o ’meki wi kon tranga’ (1 Petr. 5:10). Te fu kaba, neleki na apostel Paulus, wi kan sori ’safri-ati nanga switifasi neleki Krestes’.​—2 Kor. 10:1.