Mbáa ndxájulú bi̱ mbiʼyuu Sara * naʼthí: “Ikhúún nati̱yu̱ʼ wéñuʼ ga̱jma̱a̱ naʼniuʼ mingíjyúuʼ maku̱mu̱ʼ kayamínaʼ. Ikha jngó tsénigu̱ʼ maxtáá gajmínʼ bi̱ gujkhuʼ a̱jkiu̱ún ga̱jma̱a̱ bi̱ nakiʼníin wéñuʼ. Mú naniguʼ maxtáá gajmínʼ xa̱bu̱ guabiinʼ ga̱jma̱a̱ bi̱ tsekíʼníin. Bi̱ ni̱ndxu̱ún xúʼko̱, tséʼniuʼ mingíjyúuʼ mathu̱u̱n xú káʼnii xtáá, xóo ku̱mu̱ʼ ga̱jma̱a̱ xkujndu dí gúʼdóʼ ma̱ngaa xúgíinʼ bi̱ nambáxuʼ gajmínʼ ni̱ndxu̱ún xúʼko̱”.

Ga̱jma̱a̱ rí xóo naʼthí Sara, nasngájma rí manindxu̱lúʼ mbáa xa̱bu̱ bi̱ tsékiʼnáa nacha̱ gíʼdoo wéñuʼ numuu. Jeobá ma̱ngaa nanigu̱u̱ʼ kaʼñún xa̱bu̱ bi̱ tsékiʼníi. Náa Ajngá rawunʼ ikhaa naʼthúlúʼ ‹gani̱ndxa̱la bi̱ tsékiʼnáa› (Col. 3:12). Xú káʼnii nindxu̱u̱ cualidad rígi̱ rá. Xú kaʼnii nisngájma Jesús cualidad rígi̱ rá. Ga̱jma̱a̱ xú kaʼnii gambáyulú rígi̱ mú makuwáanʼ tsímáá rá.

Mbáa xa̱bu̱ bi̱ nadxuu a̱jkiu̱u̱n tsékiʼnáa. Xa̱bu̱ bi̱ ni̱ndxu̱ún xúgi̱ kaʼnii o xa̱bu̱ mansi̱i̱n nandún kuñún eʼwíinʼ ga̱jma̱a̱ nuniu̱u̱n rí májánʼ ma̱ngaa nduyáá xóo muni índo̱ nuraʼníí mbá xkujndu gakhi̱i̱.

Mbáa xa̱bu̱ bi̱ tsékiʼnáa naʼngo̱o̱ wéñuʼ a̱jkiu̱u̱n. Náa ajngáa griego índo̱ najmún ajngáa “tsékiʼnáa” najmún mu muthi ga̱jma̱a̱ numuu mbáa wáyú xáná bi̱ niguma mansi̱i̱. Mbáa wáyú xáná gíʼdoo má xúʼko̱ tsiakii mú índo̱ niguma mansi̱i̱ nijmañuu majmuu awáán tsiakii ndrígóo. Xúʼko̱ má kayuuʼ narígá índo̱ tsékíʼnáaʼlú. Nuʼnimíjna̱ maʼngo̱o̱ a̱jkiu̱lú ga̱jma̱a̱ xákiʼnáanʼlú kuʼñúún eʼwíinʼ.

Mbáa mundxaʼwámijna rí kuanúuʼ má nakiʼnáaʼlú. Numuu rí kuwáanʼ gajmiúlú xa̱bu̱ bi̱ tséʼngo̱o̱ a̱jkiu̱ún ga̱jma̱a̱ najmangu̱u̱nʼ naʼni mingíjyúuʼ rí xákiʼnáaʼlú (Rom. 7:19). Gajkhun má rí ndayóoʼ muʼnimi̱jna̱ wéñuʼ mu manindxu̱lúʼ mbáa xa̱bu̱ bi̱ tsékiʼnáa, mú, xi̱ʼ kaʼwu ndrígóo Jeobá mambáyulú rí muʼnimi̱jna̱ má xúʼko̱ (Gál. 5:22, 23). Ndíjkha rí ndayóoʼ muʼnimi̱jna̱ rí xákináaʼlú rá.

Rí xákiʼnááʼ maʼni rí eʼwíinʼ maʼndún mambaxáʼ gajmiáanʼ. Xó má niʼthí Sara bi̱ niʼthá ga̱jma̱a̱ numuu náa nigi̱ʼdu̱u̱. Nanigulúʼ makuwáanʼ gajmiúlú xa̱bu̱ bi̱ tsékiʼníi. Jesús ninindxu̱u̱ mbáa xa̱bu̱ bi̱ tákiʼnáa ga̱jma̱a̱ bi̱ niʼni rí májánʼ (2 Cor. 10:1). Asndu e̱ji̱n bi̱ tséniʼnii nindúún makuwá gajmiún (Mar. 10:13-16).

 Rí xákiʼnááʼ nambáyulúʼ ikháanʼ ga̱jma̱a̱ bi̱ kuwáanʼ gajmiúlú. Á mu naʼngo̱o̱ a̱jkiu̱lú, xúʼni dí rakáʼyoo ga̱jma̱a̱ xákiʼnáaʼlú (Prov. 16:32). Ma̱ngaa mambáyulú mu xúʼni gawúúnʼ eʼwíinʼ, itháan bi̱ nandulú kuñún ga̱jma̱a̱ maʼni rí nimbáa má xamínu̱ʼ.

Maski ajndu Jesús nigiʼdoo wéñuʼ ñajunʼ, mú ikhaa nimbá miʼtsú takiʼnáa. Mbaʼin xa̱bu̱ nikúwá gíná ga̱jma̱a̱ guaʼdáá wéñuʼ xkujndu, ikha jngó ndiyóoʼ rí maʼni̱i̱ a̱jkiu̱ún. Mbáa niʼni̱i̱ a̱jkiu̱ún ga̱jma̱a̱ ajngáa rí niʼthí Jesús: “Aguwaʼ náa ikhúúnʼ, [...] numuu rí ni̱ndxu̱ʼ mbáa xa̱bu̱ bi̱ tsékiʼnáa ga̱jma̱a̱ gua̱ba̱ʼ a̱jkiu̱u̱n” (Mat. 11:28, 29).

Xú kaʼnii gándoo guʼyaridáá Jesús rí ikhaa takiʼnáa rá. Timbá, ndayóoʼ muʼnigajmaa Ajngá rawunʼ Dios mu majmañulúʼ xú kaʼnii niʼni ikhaa gajmíi̱n xa̱bu̱ ma̱ngaa xú kaʼnii niʼni índo̱ niraʼnuu xkujndu mingíjyúuʼ. Nda̱wa̱á guʼnimi̱jna̱ muʼni xó má niʼni ikhaa índo̱ ikháanʼ guraʼníí mbá rí maʼni makiʼnááʼ (1 Ped. 2:21). Guʼyáá ajtsú enii rí Jesús nimbáyúu mu xákiʼnáa.

Jesús ninindxu̱u̱ mbáa xa̱bu̱ guabaaʼ. Ikhaa mínaʼ má niʼthí rí nindxu̱u̱ mbáa “xa̱bu̱ bi̱ tsékiʼnáa ga̱jma̱a̱ gua̱ba̱ʼ a̱jkiu̱u̱n” (Mat. 11:29). Náa Biblia na̱ʼkha̱ mbá jnduʼ ajngáa xakiʼnán ga̱jma̱a̱ xa̱bu̱ guabaaʼ, a̱jma̱ cualidad rígi̱ kuajtuminaʼ (Efes. 4:1-3). Náá numuu nuʼthá rí kuajtuminaʼ rá.

Rí ma̱nindxa̱a̱ʼ mbáa xa̱bu̱ guabaaʼ rúʼko̱ nayambáá mu xátani mbamínáʼ ni má rí magawáanʼ dí gúthi ga̱jma̱a̱ rí gúni eʼwíinʼ. Xú kaʼnii niriʼña̱a̱ Jesús índo̱ nitanumáá rí ikhaa nindxu̱u̱ mbáa bi̱ “nakuiʼtsu egoo ga̱jma̱a̱ naʼga̱a̱n vino” rá. Ga̱jma̱a̱ xkri̱da ndrígóo nisngájma dí ragájkhun nindxu̱u̱ rígi̱ ga̱jma̱a̱ ajngáa gua̱ba̱ʼ niʼthí rí ‹nasngájma ku̱ma̱ ndrígóo ga̱jma̱a̱ rí naʼni› (Mat. 11:19).

Á mu mbáa naʼthí dí raʼkhí ga̱jma̱a̱ numulú, guʼnimi̱jna̱ rí xákiʼnáánʼ ga̱jma̱a̱ guriʼña̱a̱ májánʼ. Peter, nindxu̱u̱ mbáa bi̱ kayá edxu̱u̱ náa guʼwá nagimbáanʼ náa Sudáfrica, ikhaa naʼthí: “Índo̱ mbáa naʼthí mbá rí naʼni makiʼnún, ikhú nandxa̱ʼwa̱mínáʼ xú kaʼnii gáriʼña̱a̱ Jesús á mu ikhaa xtáa ragíʼnuu rígi̱”. Ikhaa naʼthí xóó: “Nijmañuʼ rí xáyoo rí ikhúúnʼ gúʼdoo itháan numuʼ”.

Jesús nikro̱ʼo̱o̱ kaʼñún xa̱bu̱ numbaaʼ. Xa̱bi̱i̱ Jesús ni̱ndxu̱ún míjíinʼ xa̱bu̱, mú ga̱jma̱a̱ numuu rí ni̱ndxu̱ún xa̱bu̱ aʼkhá mbaʼa rí tséʼngu̱u̱n gúni. Mbá xkri̱da, nákha mbruʼun rí inu makhañúu Jesús, ikhaa ni̱ndo̱ʼo̱o̱ mbá rí maʼni Pedro, Santiago ga̱jma̱a̱ Juan mú ikhiin túni. Ikhú Jesús niʼthí: “Xi̱ʼ rígá mijngii, mú xuwiʼ gua̱ba̱ʼ nindxu̱u̱” (Mat. 26:40, 41). Numuu rí ikhaa ndiʼyoo rí xa̱bi̱i̱ ni̱ndxu̱ún xa̱bu̱ aʼkhá, ikha jngó takiʼnáa kaʼñún.

Guʼyáá ga̱jma̱a̱ numuu mbáa ndxájulú bi̱ mbiʼyuu Mandy: Ikhaa nákha ginii ninindxu̱u̱ mbáa xa̱bu̱ bi̱ tséjyúu kiʼnáa, mú rí xúgi̱ naʼni xó má eʼngo̱o̱ mu mbaʼyárido̱o̱ Jesús. Ikhaa naʼthí: “Naniminaʼ marmáʼáan a̱jkiu̱nʼ rí xúgiáanʼ ni̱ndxu̱lú xa̱bu̱ aʼkhá ga̱jma̱a̱ dí mba̱yo̱o̱ rí májánʼ dí naʼni mámbáa xa̱bu̱ xó má eʼni Jeobá”. Mandy niʼniminaʼ mbaʼyárido̱o̱ Jesús rí makro̱ʼo̱o̱ kaʼñún eʼwíínʼ. Á mu mangáanʼ nuʼni xúʼko̱ kaʼnii, rúʼko̱ gáʼni rí maʼngo̱o̱ a̱jkiu̱lú kuʼñúún eʼwíínʼ.

Jesús niniñuuʼ xkujndu náa ñawúunʼ Dios. Índo̱ ikhaa nixtáa náa tsu̱du̱u̱ Ku̱ba̱ʼ, ndiyóoʼ maʼngo̱o̱ wéñuʼ a̱jkiu̱u̱n. Nithi dí raʼkhí ga̱jma̱a̱ numuu, taʼndun gúyáá ga̱jma̱a̱ nini gínáa. Maski má ikhaa nigíʼnuu xúgíʼ rígi̱, mu nditháan takiʼnáa numuu rí niniñuuʼ náa ‹ñawúunʼ bi̱ naʼni rí jmbu› (1 Ped. 2:23). Jesús ndiʼyoo májánʼ rí Anu̱u̱ bi̱ xtáa mekhuíí má gáñewu̱u̱n ga̱jma̱a̱ ikhaa má gáxnún castigo mbiʼi rí kaʼyoo bi̱ nini gínáa.

Á mu mangáanʼ nakiʼnán índo̱ nagumáánʼ mbá dí ra̱májánʼ, rúʼko̱ gáʼni dí maguaʼdáá itháan xkujndu. Náa Biblia naʼthí kaʼwu rí índo̱ ‹xa̱bu̱ nakiʼnáa tséʼni marigá rí májánʼ dí nandoo Dios› (Sant. 1:20). Maski ajndu rígá mbá numuu makiʼnááʼ, ga̱jma̱a̱ numuu rí ni̱ndxu̱lú xa̱bu̱ aʼkhá ma̱ndoo makasngáñulú wéñuʼ ga̱jma̱a̱ ma̱ndoo muʼni mbá dí raʼkhí.

Mbáa ndxájulú bi̱ xtáa náa Alemania bi̱ mbiʼyuu Cathy, nákha ginii nindxa̱ʼwáminaʼ rí á mu tséʼtambáyiminaʼ nda̱wa̱a̱ imba̱a̱ tsáa gáʼni. Mú niriʼkhu̱u̱ xóo nindxa̱ʼwáminaʼ índo̱ nijmañuu maku̱mu̱u̱ kaʼyoo Jeobá. Ikhaa naʼthí: “Nánguá má eyóoʼ mani xóo nákha ginii. Rí xúgi̱ naniminaʼ rí xákiʼnún numuu rí nda̱yo̱o̱ rí Jeobá má gaʼnimbánuu  xkujndu mbiʼi rí kaʼyoo”. Á mu mbóʼ mbiʼi nagumááʼ mbá dí raʼkhí, gakumulú kuʼyáá Jeobá xó má niʼni Jesús, rúʼko̱ gambáyulú rí xákiʼnáaʼ.

Jesús niʼthí rí mu ma̱ndoo makuwáanʼ gagi ndayóoʼ rí xákiʼnááʼ. Ikhaa niʼthí: ‹Gagi kúwá xa̱bu̱ bi̱ tsékiʼníi› (Mateo 5:5). Guʼyáá mixtiʼkhu enii náa ma̱ndoo mambáyulúʼ cualidad rígi̱.

Naʼni dí xági̱ʼdu̱u̱n xa̱bu̱ gajmii. Mbáa ndxájulú bi̱ mbiʼyuu Robert bi̱ xtáa náa Australia niʼthí: “Ni̱thu̱u̱n a̱ʼgiu̱ʼ ajngáa dí niʼni gawúunʼ rí asndu táyóo xóo nitha. Mú nánguá xóo mani gúdíi ajngáa mijkoo dí nitha má. Ra̱ʼkhá tháán nagawúnʼ índo̱ najkhánu nda̱yo̱o̱ dí ajngáa dí nitha niʼni gawúunʼ”.

Índo̱ nuʼthá, “xúgiáanʼ nakiéʼkulu mbaʼa nuthu”. Ga̱jma̱a̱ ajngáa mijkoo ma̱ndoo maʼni dí marigá xkujndu náa xa̱bu̱ gajmii (Sant. 3:2). Mú, á mu ikháanʼ ni̱ndxu̱lú mbáa xa̱bu̱ bi̱ tsékiʼnáa, mambáyulúʼ mu muñewa̱a̱n rí muʼthá (Prov. 17:27).

Robert niʼniminaʼ wéñuʼ mu mani̱ndxu̱u̱ mbáa xa̱bu̱ bi̱ tsékiʼnáa ga̱jma̱a̱ mañewu̱u̱n rí maʼni. Ga̱jma̱a̱ rígi̱ nimbáyúu wéñuʼ, ikhaa naʼthí: “Rí xúgi̱ índo̱ a̱ʼgiu̱ʼ naʼni mbá rí tsénigu̱ʼ, nanimina̱ʼ rí xákiʼnún ga̱jma̱a̱ nadxaun májánʼ rí gáʼthi, nda̱wa̱á na̱thu̱u̱n ga̱jma̱a̱ ajngáa gua̱ba̱ʼ. Rígi̱ nambáyuʼ mu maxtáá tsímáá gajmuʼ ikhaa”.

Nambáyulúʼ mu mambaxúlú májánʼ gajmiúlú eʼwíinʼ. Xa̱bu̱ bi̱ tséjyúu kiʼníin naʼni mingíjyúuʼ muxkamiin bi̱ mambaxúún gajmiún. Mú xa̱bu̱ bi̱ tsékiʼníi nuni ‹marigá rí tsímáá› (Efes. 4:2, 3). Cathy, bi̱ niʼthá ga̱jma̱a̱ numuu náa nigíʼdu̱u̱ artículo, ikhaa naʼthí: “Rí xákiʼnún nimbáyuʼ mu manigu̱ʼ maxtáá itháan gajmíi̱nʼ eʼwíinʼ, maski má tikhun tséjyúu kiʼníin”.

Naʼni rí makuwáanʼ tsímáá. Náa Biblia naʼthí rí “ku̱ma̱ dí na̱ʼkha̱ rijma̱a̱” kuajtuminaʼ ga̱jma̱a̱ rí tsímáá ma̱ngaa rí xákiʼnán (Sant. 3:13, 17). Mbáa xa̱bu̱ bi̱ tsékiʼnáa gíʼdoo mbá ‹a̱jkiu̱u̱n guabaʼ› (Prov. 14:30). Martin, bi̱ niʼni mbá tsiakii mba̱a̱ wéñuʼ mu mani̱ndxu̱u̱ mbáa xa̱bu̱ bi̱ tsékiʼnáa, ikhaa naʼthí: “Rí xúgi̱ nánguá kiʼnún xóo nákha ginii ga̱jma̱a̱ rígi̱ nambáyuʼ mu maxtáá tsímáá ga̱jma̱a̱ rí maʼdxuu a̱jkiu̱nʼ”.

Mu manindxu̱lúʼ mbáa xa̱bu̱ bi̱ tsékiʼnáa ndayóoʼ muʼnimi̱jna̱ má xúʼko̱. Mbáa ndxájulú naʼthí: “Asndu mbiʼi xúgi̱ rígá mbiʼi rí nakasngáñuʼ”. Mú Jeobá mambáyulú, numuu rí ikhaa nandoo rí manindxu̱lúʼ mbáa xa̱bu̱ bi̱ tsékiʼnáa (Is. 41:10; 1 Tim. 6:11). Ikhaa maʼniratáánʼ má xúʼko̱ ga̱jma̱a̱ maʼni rí maguajún gujkhuʼ (1 Ped. 5:10). Mu xúʼko̱ ma̱ndoo muʼni xó má niʼthí Pablo rí musngajma rí ‹xákiʼnááʼ ga̱jma̱a̱ muʼni rí májánʼ xó má Cristo› (2 Cor. 10:1).