Sara wari khuye: “Nyi muthu nyo degule khu mavelego nigu kha nyi kodzi gu dzi tumba ngudzu. Khu kotani nya isoso, nyi ngu khala dzitshoni nya gu ba nyiri vbakari nya vathu nyo dzi tumbe va golago gu bangeleya avba nya esi va si pimisago. Ganiolu nya gu dzipwa na nyi tshulegide nya gu ba nyi bhula ni muthu nya gu rule ni gu dzi nogisa. Vathu nya nga vovo si ngu nyi vbevbugeya gu va bhuleya esi si gomogo monyoni gwangu ni sigaradzo sangu. Vathu nya gurule ni gu dzinogisa khavo va gu dzipari dzangu nya dzikhongolo.”

Malito ya Sara mo yeyedza gu khayo ha gu ba hiri vathu nya gurule si na gira vambe va vbweta gu khala dzipari dzathu. Gudzirudzisa gu ngu tsakisa Jehovha gambe. Lito laye li ngu hi kutsa esi: “Gu vbwetega muri ni monyo nya . . . gurule.” (Kol. 3:12) Ginani gudzirudzisa? Jesu yeyedzide kharini gurula? Nigu likhalelo leli li nga gira kharini gu womi wathu wu tsakisa?

Muthu nyo dzi rudzise go thudwa wule a dzi emisedego gu gira gurula. Muthu nya gurule a gu phara vambe khu ndziya nya yadi, nya ndruda a bwe a simama na rude ni gudziphara tepo gu dugeleyago silo si gu mba mu tsakisa.

Muthu o dzi rudzisa kha si thuli gu khiso kha tiya. Lito nya giGreki li vbindrugedzedwego pwani gudzirudzisa omu nya Bhibhiliya lo thula kavhalu yi hevbudzidwego gwadi. Iyo yi ngo simama ni tshivba yayo ganiolu yi hevbudzidwe gu woneleya gwadi tshivba yayo. Khu ndziya nyo fane, anethu tepo hi dzi rudzisago, ha gu woneleya guwegeleya gwathu nya mba vbeleya hi bwe hi gira gurula ni vambe.

Adzina hi nga pimisa esi: ‘Eni kha nyiri muthu nyo gurule.’ Kha nga olu hi vbanyago tigoni omu vathu nya vangi va gu mba laphisa monyo, va golago mayunga, si nga hi garadzeya gu khala vathu nyo rule. (Rom. 7:19) Gu vbwetega gu dzi garadza gasi gu haguleya gurula, ganiolu, liphuvbo nya guage la Jehovha li nga hi phasa gu simama gu haguleya gurula. (Gal. 5:22, 23) Khu ginani hi yedego gu dzi garadzeya gu haguleya gurula?

Gudzirudzisa gu ngu tsakisa vathu. Kha nga Sara hi mu khumbugidego gupheyani, hi ngu dzipwa na hi tshulegide ho ba hiri vbakari nya vathu nya gurule. Jesu giyeyedzo nya gyadi nya muthu nya gurule ni wuwadi. (2 Kor. 10:1) Ambari sanana si nga ba si si muti si vbwetide gu khala vbafuvbi naye. — Marko 10:13-16.

Ha gu ba hiri vathu nya gurule hi na phasega ethu gumogo ni vambe vathu. Gurula gu na hi phasa gu mba vbiredzeya gu goroga. (Mav. 16:32) Gu na hi phasa gambe gu potsa gu dzipwa nandru khu gu ba hi goroside muthu nyo khaguri ngudzungudzu ava hi va  haladzago. Nigu vambe va na phasega navo kholu hi na woneleya mavbanyelo yathu gasi hi si va gorosi.

Ambari olu a nga ba ari ni silo nya singi gasi gu si khathaleya ni gu pharega ngudzu, Jesu a di gu phara vatshavbo khu gurula. Vathu nya vangi matshiguni yaye va di gu garadzega ni gu vbeya tshivba khu kharato va di gu vbweta gu tiyiswa. Nga dundrugeya edzi va tiyisidwego khidzo khu malito yaya ya Jesu: “Deluni gwangu . . . eni nyi gu ni monyo nya gurule nuwo nya gu dzi sodzise.” — Mat. 11:28, 29.

Hi nga haguleya kharini gurula gu yeyedzidwego khu Jesu? Khu gu hevbula Lito la Nungungulu hi wona edzi Jesu a pharidego khidzo vathu ni esi a giridego tepo va nga ba va emisana ni siemo nyo garadze. Khavbovbo, tepo hi emisanago ni siemo si lingago gurula gwathu hongoleni hi dzi garadzeyani gu gira esi Jesu a giridego. (1 Ped. 2:21) Nga wona silo siraru si phasidego Jesu gu khala muthu nyo rule.

Gudzinogisa ga Jesu gu di gu khugeya monyoni. Jesu a di khuye uye muthu nya “monyo nya gurule nuwo nya gu dzi sodzise.” (Mat. 11:29) Bhibhiliya yo khumbuga gumogo makhalelo yoyo kholu gudzirudzisa ni gudzinogisa so gimbiya gumogo. (Efes. 4:1-3) Khu ndziya muni?

Gudzinogisa gu ngu hi phasa gu mba vbiredzeya gu goroswa khesi si girwago mwendro gu ganedwa khu vambe. Jesu va pharide kharini vale va nga ba va mu singedza gu khavo na ni “Iimidzo” nigu “bewudzi mwendro maleveni”? Uye digide mavbanyelo yaye ma yeyedza gu khayo vathu vale va di gu lipha. Kha nga olu a nga ba a dzi nogisa si vegide guagani gu khuye “guti gwa gu dzi yeyedza khu mithumo yaye.” — Mat. 11:19.

O tshuka muthu nyo khaguri a ganeya malito nya mba pheya khu gu pimisa maningano ni tshonge yago, omu u tago khumo mwendro khu gu ba uri mwama mwendro nyamayi, gwadi ngudzu gu dzi garadzeya gu mu hlamula khu ndziya nyo rule. Peter, lidhota limwedo la Dzoni, wari khuye: “Nyo goroswa khu silo nyo khaguri si ganedwego khu muthu, nya gu dzi wudzisa esi: ‘Nari khatshi khu Jesu a di hadzi rini?’” Wari khuye gambe: “Nyo dzi garadzeya gu mba vega gupima avba nya edzi nyi dzipwago khidzo.”

Jesu a di gu dziti gu khuye hi vathu nya mba vbeleya. Vapizane va Jesu va di gu dzina gu gira silo nya sadi ganiolu kha va nga ba va si kodza gu gira isoso tepo yatshavbo khu kotani nya gu mba vbeleya. Khu giyeyedzo, ga wutshigu nyo hegise Jesu na si gufi, Pedro, Jakobe ni Johane kha va si kodza gu khala na va khendzugide kha nga edzi Jesu a nga ba a va embede khidzo. Jesu si tugude gu khuye “hefemulo tade khu tshivba, aholu givili gi mwalo tshivba.” (Mat. 26:40, 41) Khu kotani nya olu a nga ba a pwisisa gu mba vbeleya gwawe, Jesu kha gorogeya vapizane vaye.

Mandy a di gu tala ngudzu gu solasola vambe ganiolu olu uye a gu zama gu pimedzeya giyeyedzo gya Jesu nya gurule. Wari khuye: “Nya gu zama gu dundruga gu kheni vathu vatshavbo kha va vbeleya nyi bwe nyi dzi garadzeya gu vega gupima avba nya makhalelo nya yadi ya vambe kha nga Jehovha.” Edzi Jesu a nga ba a pwisisa khidzo khu pweya wusiwana gu mba vbeleya nya vathu gu nga gu phasa nuwe gu phara gwadi vambe.

Jesu a di gu si digeya mandzani ga Jehovha. Tepo Jesu a nga ba ari mafuni uye timisede gu pharwa khu ndziya nya mba lulama. Singedzidwe, a tshepetwa a bwe a tshaniswa. Ambari ulolo, simamide na rude kholu “a di vega gutumba gwaye gwatshavbo ga Mulamuli wule nya lisine.” (1 Ped. 2:23) Jesu a di gu dziti gu khuye Papayi waye wa ndzadzini a na mu phasa gu timiseya a bwe a tsayisa ava va mu pharidego khu ndziya nyo vivbe.

Ha gu goroga khu gu ba hi pharidwe khu ndziya nyo vivbe, hi na engedzeya gu lemedzisa giemo gyathu. Khu gighelo gegi, Milowo yi ngu hi dundrugisa esi: “Likhulo nya muthu kha li giri gululama gu godwago khu Nungungulu.” (Jak. 1:20) Ambari ha gu ba hiri ni gighelo nyo goroge, gu mba vbeleya gwathu gu nga hi gira hi dzi phara khu ndziya nyo vivbe.

Ndriyathu moyo nya nyamayi wa Alemanha nyo pwani khu Cathy, a di gu tala gu pimisa esi: ‘Wa gu mba dzi emeya wabune khu na nga emedwa khu muthu.’ Ganiolu tepo a nga hevbula gu tumba Jehovha mavbanyelo yaye ma di vbindrugedza. Wari khuye: “Olu nyi mwalo gighelo nyo khale na nyi dongide gu dzi emeya. Nyi ngu dzi rudzisa kholu nyi ngu dziti gu kheni Jehovha a ngu si wona satshavbo si dugeleyago.” Wa gu ba u pharidwe khu ndziya nyo vivbe, gu landreya giyeyedzo  gya Jesu nyo tumbe Nungungulu gi na gu phasa gu simama na wu rude.

Jesu yeyedzide gu khuye ha gu ba hi vbweta gutsaka gu vbwetega hi khala vathu nya gurule. A di khuye: “Va kategide va nya gurula.” (Mat. 5:5) Nga wona edzi gurula gu nga hi phasago khidzo ga siemo si landreyago.

Gudzirudzisa gu ngu tshimeya mayunga pangoni. Robert ndriyathu moyo wa Austrália, wari khuye: “Nyi ngu tshuka nyi embeya malito nyo paye mwangadzi wangu nya mba pheya khu gu pimisa. Ganiolu hwane nyo ba u ganede malito nyo paye wa gu vbedza u dzi laya ngudzu. Nyo vbedza nyi dzipwa ngudzu nandru tepo nyi wonago edzi esi nyi ganedego si khuhidego khidzo mwangadzi wangu.”

“Ethu hatshavbo hi ngu hosisa” khu malito. Nigu esi hi ganeyago nya mba pheya khu gu pimisa si nga resa sigaradzo pangoni. (Jak. 3:2) Ga siemo soso, gudzirudzisa gu ngu hi phasa gu rula ni gu woneleya lidimi lathu. — Mav. 17:27.

Robert dzi garadzide ngudzu gasi gu haguleya gurula ni gudziphara. Si mu phaside kharini? Wari khuye: “Olu ambari ha gu tshangana ni sigaradzo, nyo zama gu engiseya gwadi mwangadzi wangu, nyi ganeya naye khu gurula nyi bwe nyi si vbiredzeyi gu goroga. Wupari wangu ni mwangadzi wangu wu tshukwatide ngudzu.”

Gudzirudzisa gu ngu hi phasa gu pwanana gwadi ni vambe. Vathu nya vangi va vbiredzeyago gu goroga va mwalo dzipari nya dzingi. Ganiolu, gudzirudzisa gu na hi phasa ‘gu sayisa . . . gurula vbakari gwathu.’ (Efes. 4:2, 3) Cathy hi mu khumbugidego gupheyani, wari khuye: “Gurula gu ngu nyi phasa gu pwanana ni vambe ambari olu si garadzago gu pwana ni vathu nyo khaguri.”

Gudzirudzisa gu ngu hi reseya gurula monyoni. Bhibhiliya yo pwananisa “guti gutago khu ga Nungungulu” ni gudzirudzisa. (Jak. 3:13, 17) Muthu nya gudzirudzise a na ni “monyo nya gurule.” (Mav. 14:30) Martin a dzi garadzidego ngudzu gasi gu haguleya gudzirudzisa a tugude esi: “Olu kha nyi ngo gurumedza gu kheni silo gu vbwetega tepo yatshavbo si gimbiya khedzi nyi si vbwetago khidzo eni. Nigu isoso si ngu nyi phasa gu manega ni gurula monyoni.”

Khu lisine, gu vbwetega hi dzi garadza gasi gu khala vathu nya gurule. Ndriyathu moyo wari khuye: “Gasi gu ganeya lisine ambari matshigwanaya dzimbe dzitepo monyo wangu wu ngu ba wu viya khu gu goroga.” Ganiolu Jehovha a gu uye a hi kutsago gudzirudzisa a na hi phasa gu si kodza. (Isa. 41:10; 1 Thim. 6:11) Uye a nga tshatshazeya gudzigaradza gwathu a bwe a hi “ninga tshivba” gasi hi tiya. (1 Ped. 5:10) Kha nga mupostoli Pawulo, khu gu gimbiya nya tepo, hi na kodza gu pimedzeya Kristo khu gu “dzi vega vbavbatshi ni gu dzi sodzisa.” — 2 Kor. 10:1.