1-2. Mikitini ˈOlic 40:5, pafeliay ci Yihofa kitaanan to maanan sapatelong hani? Oniya lalakaw hano milengo toniya sapatelong hani?

HINAPALADAˈAY ci Yihofa, pafeliay to adihayay sapatelong i tamdaw, mahawpay ko makapahay a cikiw, kasapaan a ponoˈ, sanoodoˈay a kimad Fangcalay Cudad. Oniya tolo sapatelong ni Yihofa, pairaay to kitiraan ita, ira ko inaneng misimsim ato masasowal, ngaˈayho mahela ko caˈof no kalimlaan a salicay no kaˈorip.—ˈOsien ko ˈOlic 40:5.

² Oniya lalakaw wa milengo toniya tolo sapatelong. Ano haratengen ita to masakalimlaan koniya sapatelong, wa matongal ko kasemer toniya sapatelong, makalim a pakahemek to misangaˈay a Tatapangan ci Yihofaan.—Paˈarawan 4:11.

3. Hano edengan cecayay aca ko cikiw hani?

³ Patadoan ni Yihofa kita a misangaˈ to kitiraan a cikiw. Kasapaan ko pisafaco to cikiw, paihkalay to taneng Ningra. (Loma 1:20; Hipray 3:4) Adihayay ko mitaliyokay to cidal lomakat a foˈis, kawra edengan ko cikiw ngaˈayay kitiraan no tamdaw.

4. Tadtaden o pisafaco to cikiw samanay paihkal to taneng no Kawas.

⁴ Ngaˈayay patinakoen ita to maˈedefay a lomaˈ ko cikiw, matomesay ko tamdaw i lalomaˈ. Haratengen, i lalomaˈay tamdaw oniyah ko misangaˈ to nanom, kakaenen ato saka saselaˈ a fali, hanaca cowa ka ngaˈay mifalah to hadec i papotal, wa hakowa ko halafin no ˈorip nangra  hani? Kawra ngaˈayay paˈorip ko cikiw to masawalwalay a tamdaw, cowa ka emin ko nanom, kakaenen ato saka saselaˈ a fali. Soˈlin cowa ka falahen ko hadec i papotal, kamayan a makorac makapah ko cikiw, ngaˈayay a kitiraan. Misamanay hani? Misafacoan ni Yihofa ko sapisafaeloh a ˈicel no cikiw, tinakoen o pikoliyol no saka saselaˈ a fali ato nanom. Dotoc songilaˈen ita a minengneng ko tosa tinakoan.

5. Samanay o pikoliyol no saka saselaˈ a fali hani? Misawacayay koni to maanan?

⁵ O tamdaw ato ˈaˈadopen sahtoay misaaliay to saka saselaˈ a fali. Mihecahecaan, adihayay ko mapalakay no tamdaw ato ˈaˈadopen a sakasaselaˈ a fali, hanaca mihadakay to adihayay Eyang-howatan (no Kowaping a sowal). Kawra, kamayan maedeng ko saka saselaˈ a fali, cowa ka pakidem adihay ko Eyang-howatan. Misamanay hani? Samanen misangaˈay ci Yihofa to masakenakenaay a pinaloma. Miselipan no pinaloma ko Eyang-howatan, misangaˈ to saka saselaˈ a fali. Mihaenay misawacayay to sowal no Dmak 17:24, 25, itini sinael somowalay o Kawas ko “pafeliay to ˈorip ato saselaˈan ato kalomaamaan i polong no tamdamdaw.”

6. Samanay ko pikoliyol no nanom hani? Misawacayay koni to maanan? (Nengnengen ko sapatongal lalakaw ‘ O Pikoliyol no Nanom o Sapafeli ni Yihofa a Sapatelong.’)

⁶ O nanom tano malosoˈay a pakayraan materek i cikiw, samanen matatodongay ko laˈed no cikiw ato cidal. Ano mangata to miming, o mamalo lahod ko polong a nanom, o fafaedet a maˈicang ko cikiw, awato ko maˈoripay. Ano maraay to miming, o mamalo soeda ko polong a nanom, malo soeda koniya cikiw. Patatodongan ni Yihofa ko kitiraan no cikiw, hato ngaˈayay ko pikoliyol no nanom i cikiw, midama to sakaˈorip. O cidal palahoday to nanom no riyar ato fafekangay no sera a nanom, tayra kakarayan malo ˈoˈol. To mihecahecaan tada adihayay ko malo lahoday a nanom. O lahod no nanom maedeng 10 romiˈad materek i kakarayan, ikor malo ˈorad ato soeda matefad, salikor patikolay i ˈalo, fanaw ato riyar. Oniya pikoliyol padamaay to cikiw ira ko maedengay a nanom, misawacayay to citanengay, taˈangayay ko ˈicel ni Yihofa.—Yopu 36:27, 28; Patnakay 1:7.

7. Sasamaan ko demak ita paihkal to misalimlaay ko niyah to sapafeli ni Yihofa kitaanan a cikiw hani?

⁷ Sasamaan kita ngaˈ matongal ko pisalimla to sano odoˈay a cikiw ato masakenaay a dafong no cikiw hani? (ˈOsien ko ˈOlic 115:16.) O cecay pakayraan i, micerid miharateng to kalimlaan ko sapatelong ni Yihofa kitaanan. Ano misalimla kita toniya sapatelong, o mamiakoˈid to Kawas to romiˈamiˈad, wa misaˈicel mitafo to makoracay.

8. Pisafaco to ponoˈ no tamdaw hano o kafahkaˈan hani?

⁸ O kafahkaˈanto ko pisafaco to ponoˈ no tamdaw! Ya itiniho kita i tiyad no wina i, misatapangayto tano paˈayawan misafaco a pakayraan lomahad ko ponoˈ, cecay ehon pinaay ˈofad ko lomahaday a ˈalamat no ponoˈ! Lalomaˈ no ponoˈ no tamdaw iraay ko tatemer. Paihkalay ko mikingkiway, itini ponoˈ no matoˈasay tamdaw 1000 walwal ko tatemer. Oniya ˈalamat tano kafahkaan a pakayraan a makakadep, mansa o kareteng no ponoˈ mangata 2 kongcin. Iraay ko kafahkaan a inaneng no ponoˈ, nengnengen ita ko pina a tinakoan.

9. Hano pakasoˈlin kiso o sakacaciyaw a inaneng mikitiniay i sapatelong ni Yihofa hani?

 ⁹ Kafahkaan ko sakacaciyaw a inaneng. Haratengen koniya kafahkaan a demak: Ano mihadak kita to cecay sowal, miontingan no ponoˈ ko sema, takolaw, filfil, ngaroy ato 100 a fatil no falohang, mitooray to masaˈosiay a kadadoedo no tatemik no fatil, ngaˈ ihkal a mahadak ko sowal. Pakayni inaneng a caciyaw, o mihadakan a mikingkiwan i 2019 miheca paihkalay, o mihofocan a wawa ngaˈayay mihapinang to cowa kalecad a sowal. Misawacayay konini to harateng no citanengay tamdaw—hofoc han ko tamdaw iraay to ko inaneng mihapinang ato minanam to sowal. Awaay ko hasasa, o sakacaciyaw a inaneng o mikitiniay ci Yihofaan a sapatelong.—Kasadakan 4:11.

10. Wa ngaˈay kita samaan ko demak paihkal to misalimlaan kita to sakacaciyaw a inaneng?

¹⁰ Ngaˈayay kita pasayra i pakasoˈlinay to sinkalon a tamdaw mitadtad to no niyah a pihakelongan, paihkal to misalimlaay kita to sakacaciyaw a inaneng. (ˈOlic 9:1; 1 Pitiro 3:15) Pakasoˈlinay to sinkalon a tamdaw sapasifanaˈaw to tamdaw, o cikiw ato pinaˈorip i cikiw sahtoay o fahal sanay a masadak. Ngaˈay kita misakadademak to Fangcalay Cudad, ato kalimlaan noniya lalakaw misawacayay to kakarayan a Wama, pasayra i makahiay mitengil a tamdaw mitadtad hano pakasoˈlin kita ci Yihofa ko misangaˈay to kakarayan ato sera.—ˈOlic 102:25; Isaya 40:25, 26.

11. Iraayho ko maanan a kafahkaan a inaneng no ponoˈ no tamdaw hani?

¹¹ Masakafahkaan ko sapiharateng a inaneng ita. Iraay ko misaˈosiay a tamdaw, o ponoˈ no tamdaw pakaharatengay to lalakaw no 2000 ˈofad a cacudadan. Kawra sowal no citanengay tamdaw, o maharatengay no tamdaw ikakaay ko adihay tonini. Samanen iraay ko hatiniay sapiharateng a inaneng, mamadangar no tamdaw ko maanan a demak hani?

12. Cowa ka hecad to ˈaˈadopen, wa ngaˈay mademak ita ko maanan?

¹² Itini lalomaˈ no pinaˈorip i cikiw, edengan ko tamdaw iraay ko sapisalof to capeling a inaneng, samanen ngaˈayay ko tamdaw pakayni patikol miharateng ato mifolfol to mafekaday a demak minanam to sapasifanaˈ, mifalic to kaˈorip no niyah ato pakayraan a misimsim, malo ngaˈayayto a tamdaw. (1 Korinto 6:9-11; Kolosay 3:9, 10) Ngaˈayay pahatatanamen ita ko makapahay falocoˈ no niyah, mafanaˈ pafafidaˈ to ngaˈayay tatiihay. (Hipray 5:14) Ngaˈayayho kita paihkal to ciolahay falocoˈ, siniˈadaay a falocoˈ, wa ngaˈayho palahad to malecaday ni Yihofa moecelay a harateng.

13. Mikitini ˈOlic 77:11, 12, sapaihkalaw kita to misalimlaay ko niyah to sapafeli no Kawas sapiharateng a inaneng, sasamaan ko hademak hani?

¹³ Sapaihkalaw kita to misalimlaay ko  niyah to sapafeli no Kawas sapiharateng a inaneng, cecay pakayraan i, misaˈicel a miharateng to samanay ko Kawas misaliyaliyaw padama ato mihinom kitaanan, o papatongal to pakasoˈlin ita to papadama Cingra kitaanan no ikor. (ˈOsien ko ˈOlic 77:11, 12; 78:4, 7) O roma pakayraan i, haratengen ko nano demak no tao kitaanan, halo paihkal to piakoˈid cangraanan. Paihkalay ko mikingkiwan, iraay ko miakoˈiday falocoˈ a tamdaw matongalay ko lipahak. Roma i, minanam kita ci Yihofaan, mipawan to kalo demak. Malefotay ko sapiharateng a inaneng ni Yihofa, kawra ano makahi kita pasasiyor, wa sododen Ningra kita mipawan to nano raraw ita. (ˈOlic 25:7; 130:3, 4) Mihaenay, ano midokaˈ ko tao kitaanan a miliˈay i, pahecaden ita ci Yihofaan misodod cangranan, hanaca misaˈicel mipawan to mifekaday a demak.—Matay 6:14; Luka 17:3, 4. 

14. Pafeliay ko Kawas kitaanan to masakafahkaan a ponoˈ, sasamaan kita miakoˈid Cingraanan hani?

¹⁴ Pafeliay ko Kawas kitaanan to masakafahkaan a ponoˈ, miakoˈiday kita Cingraanan, wa saka dademaken koniya sapatelong midoko Cingranan. O roma tamdaw sapisaloaw to coos, o niyah sanay misaˈosi to ngaˈayay ato tatiihay a palinian. Kawra, o misangaˈay kitaanan ci Yihofa, o palinian Ningra ikakaay ko kangaˈay to palinian ita. (Loma 12:1, 2) Mitoor to palinian Ningra maˈorip, wa rihaday ko falocoˈ, wa paˈdil to kakarayan Wama, ngaˈay pakahemek to falocoˈ Ningra, hatini ko kaˈorip ngaˈ o soˈlinay ciepocay.—Taneng 27:11; Isaya 48:17, 18.

15. O sapatelong a Fangcalay Cudad samanay paihkal to kaolah ni Yihofa kitaanan?

¹⁵ Fangcalay Cudad o sapatelong no Kawas. Maolahay ko kakarayan Wama ita to fafekangay no sera a wawa, mansa mikayat to tamdaw mitilid to Fangcalay Cudad. Pakayni toniya cudad, pacaˈofay to adihayay kalimlaan a salicay ci Yihofa, tinakoen, mikicowaay kita a ira? O maanan  ko araaw no tamdaw a maˈorip? Sasamaan no ikor? Tokel ni Yihofa nanay mafanaˈ ko polong a tamdaw to caˈof noniya salicay, mansa papihongyaken ko tamdaw to adihayay kasasiroma no sowal no Fangcalay Cudad. Anini, o Fangcalay Cudad mataˈlifayto ko 3000 a sasowalen! O sakakaay ko adihay no mitepangan ko Fangcalay Cudad, saadihayay ko kasasiroma no sowal, ˈalomanay tamdaw ngaˈayay miasip tono wina sowal a Fangcalay Cudad. (Nengnengen ko sapatongal lalakaw “ Mihongyak Tono Afrika Sowal a Fangcalay Cudad.”)

16. Mikitini Matay 28:19, 20, sasamaan kita paihkal to misalimlaay ko niyah to sapatelong a Fangcalay Cudad hani?

¹⁶ Ano misalimlaay kita toniya sapatelong, miasip to romiˈamiˈad, misongilaˈ midotim, ato sakadademaken. Roma i, misarocod kita, milasil to lihaf no Fangcalay Cudad i ˈalomanay tamdaw.—ˈOlic 1:1-3; Matay 24:14; ˈosien ko Matay 28:19, 20.

17. (1) Oniya lalakaw milengoay to maanan a sapatelong no Kawas kitaanan hani? (2) O dotoc a lalakaw wa milengo to maanan hani?

¹⁷ Maharekayto kita milengo, pafeliay ko Kawas kitaanan to makapahay a cikiw hakitiraan, kafahkaan a ponoˈ, ato sanoodoˈay a Fangcalay Cudad. Pafeliayho ci Yihofa kitaanan to roma sapatelong, o cowa ka ˈaraw no mata, dotoc a lalakaw wa milengo toniya odoˈ.