1-2. Menurut Masmur 40:6, hadiah kai saja si ibereken Jahwe? Janah ngkai maka perlu sibahas kerna si e?

JAHWE e Dibata si meriah kel akapNa mere. Melala hadiah si nggo ibereNa man banta. Misalna, ibereNa kita ingan tading si sempurna eme doni si mejile. Iban Jahwe ka otak manusia si seh kel luar biasana si erban kita banci rukur ras ngerana alu mehuli. Selain si e, ibere Jahwe kita Pustaka. Alu bage, banci siteh jawapen arah penungkunen-penungkunen si seh kel pentingna kerna kegeluhen.​—Baca Masmur 40:6.

² Bas artikel enda, sibahas kari teluna hadiah e. Perlu siukuri kerina si nggo ibereken Jahwe gelah reh bagesna pengerganta nandangi hadiah-hadiah e. Reh belinna ka sura-surata erban meriah ukur Jahwe, Dibata si perkeleng si nciptaken kita. (Ket. 4:11) Selain si e, banci kita reh beluhna mereken penjelasen man kalak si nggo itipu ajaren evolusi.

3. Engkai maka seh kel unikna doni enda?

³ Luar biasa kel cara Jahwe nciptaken doni enda. E buktina maka seh kel pentarna Dibata e. (Rom. 1:20; Heb. 3:4) Labo planet doni ngenca si ngkelilingi matawari. Tapi, doni ngenca si seh kel unikna. Engkai? Perban bas planet doni ngenca manusia banci nggeluh.

4. Arah cara doni iciptaken, kai buktina maka pentar kel Dibata e? Ban contohna.

⁴ Doni enda, si lit bas alam semesta, banci ipeseri ras sada kapal si lit i tengah laut si mbelang janah dem penumpangna. Tapi lit piga-piga bedana. Siumpamakenlah  penumpang bas kapal e arus ibanna sendiri panganna, launa, ras oksigenna. Janah la banci iambekken kalak e sampah kai pe ku darat kapal. Banci nge kalak e tetap nggeluh adi bage keadanna? Pasti lang. Tapi, adi bas doni enda, miliaren mahluk banci nggeluh perban doni enda ngasilken oksigen, pangan, ras lau, janah kerina e la pernah keri. Sampah si lit bas doni enda la iambekken ku luar angkasa. Aminna pe bage, doni enda tetap mejile janah banci iingani. Engkai? Perban iban Jahwe doni enda banci erban siklus daur ulang. Sibahas kari dua contoh siklus daur ulang si mbuktiken maka pentar kel Jahwe e, eme siklus oksigen ras siklus lau.

5. Kai siklus oksigen e? Janah enda mbuktiken kai?

⁵ Gelah banci nggeluh, manusia ras binatang perlu oksigen. Iperkiraken, lit seratus miliar ton oksigen si iperluken manusia ras binatang tiap tahun. Tapi, oksigen bas doni enda la pernah keri. Kerina manusia ras binatang e pe mpedarat gas si igelari karbon dioksida. Aminna pe bage, la pernah mbuesa karbon dioksida si lit bas atmosfer. Engkai? Perban iciptaken Jahwe erbage-bage sinuan-sinuan, mulai arah alga si kitik seh asa batang kayu si galang. Kerinana e merluken karbon dioksida janah ngasilken oksigen. Siklus oksigen enda mbuktiken maka Dibata Jahwe me si “mereken kegeluhen [ras] kesah.”​—Perb. 17:24, 25.

6. Kai siklus lau e? Janah kai si terbukti arah siklus e? (Nen ka kotak “ Siklus Lau—Hadiah arah Jahwe.”)

⁶ Lau si lit i doni banci tetap cair perban pas kel jarak doni ku matawari. Adi ndehersa doni ku matawari, lau si lit i doni banci menguap. Melas me doni enda, kerah, janah la banci iingani. Tapi, adi sitik saja doni enda ndauh arah matawari, beku me kerina lau janah doni enda dem alu salju ras es. Jelas me, perban pas kel iban Jahwe ingan doni enda, siklus lau banci erban manusia, binatang, ras sinuan-sinuan tetap nggeluh. Erkiteken las matawari, lau si lit bas laut ras i doni menguap janah jadi embun ntah pe awan. Tiap tahun, melala kel lau si menguap, janah buena lebihen asangken lau si lit bas kerina danau i doni. Kenca menguap, lau e lit bas atmosfer kira-kira sepuluh wari dekahna, kenca si e nusur jadi udan ntah pe salju. Dungna, mulihken ka me lau e ku laut ntah pe ku sungai, janah mulihi me terjadi siklus lau. Iban Jahwe siklus enda gelah la pernah keri lau bas doni. Enda jadi bukti maka pentar kel Jahwe e janah mbelin kel kuasaNa.​—Jop 36:27, 28; Peng. 1:7.

7. Kai buktina siergai kel hadiah si ikataken bas Masmur 115:16?

⁷ Kai nge si banci silakoken gelah siergai kel planetta si luar biasa enda bage pe kerina si mehuli si lit i je? (Baca Masmur 115:16.) Salah sada carana eme alu ngukuri kerina ciptan Jahwe. Alu bage, tersuruh ukurta ngata bujur man Jahwe tiap wari erkiteken kerina si nggo iberekenNa man banta. Janah sibuktiken ka siergai doni enda adi sijaga inganta tading tetap bersih.

8. Kai buktina maka luar biasa kel carana otakta iban?

⁸ Luar biasa kel carana otak manusia iban. Sanga kita bas beltek denga, ratur  kel perkembangen otakta, janah tiap menit lit terbentuk ribun sel si mbaru! Iperkiraken peneliti maka i bas otak manusia dewasa, lit menam 100 miliar sel khusus si igelari neuron. Sel-sel enda me si mbentuk otakta, si beratna kira-kira 1,5 kilogram. Sibahas kari kai saja si erbanca maka luar biasa kel otak manusia e.

9. Kai buktina banci kita ngerana eme hadiah bas Dibata nari?

⁹ Luar biasa kel siakap perban banci kita ngerana. Cuba ukuri kai si terjadi sanga kita ngerana. Sanga sada kata saja pe sibelasken, lit terjadi pergeraken kira-kira 100 otot bas dilahta, kalah-kalahta, biberta, rahangta, ras tententa, janah kerina e otakta si ngaturkenca. Kerina pergeraken otot e arus terjadi i bas waktu si tepat gelah kata-katata banci iangkai kalak. Selain si e, melala ilmuwan si tek maka kenca manusia lahir, banci itehna ras ipelajarina bahasa. Enda ibuktiken sada penelitin si iterbitken bas tahun 2019. Menurut penelitin e, bayi si mbaru denga lahir banci itandaina ras itanggapina kata-kata si ibegina. Jelas me, banci kita ngerana eme sada hadiah bas Dibata nari.​—Kel. 4:11.

10. Kai buktina siergai hadiah Dibata si erban kita banci ngerana?

¹⁰ Kai buktina siergai hadiah Dibata si erban kita banci ngerana? Sada carana eme alu njelasken kinitekenta kerna Dibata man kalak si tek ajaren evolusi. (Msm. 9:2; 1 Pet. 3:15) Menurut kalak e, doni enda ras kerina si nggeluh i je terjadi bage-bage saja, labo iciptaken Dibata. Alu nggunaken ayat-ayat Pustaka bage pe kerina si nggo sibahas bas artikel enda, banci sibela Bapakta si i surga. Adi lit kalak si nggit megiken kita, banci sijelasken man bana ngkai kita tek maka Jahwe si nciptaken langit ras doni.​—Msm. 102:26; Jes. 40:25, 26.

11. Kai salah sada alasenna maka luar biasa kel otakta?

¹¹ Luar biasa kel siakap perban banci kita nginget. Mbarenda, iperkiraken sekalak penulis maka otak manusia banci nginget informasi si buena bali bagi isi 20 juta buku. Tapi gundari, tek ilmuwan maka situhuna banci nge siinget terbuen informasi. Perban bage buena si banci siinget, kai si banci silakoken?

12. Kai nge bedana kita ras binatang?

¹² Arah kerina si nggeluh bas doni enda, manusia ngenca si banci erlajar arah pengalamen. Hasilna, banci siubah carata rukur ras geluhta gelah kita jadi kalak si terulin. (1 Kor. 6:9-11; Kol. 3:9, 10) Banci ka silatih pusuh peratenta gelah banci sibedaken kai si benar ras kai si salah. (Heb. 5:14) Banci ka kita erlajar uga carana ncidahken kekelengen, lias ate, ras perkuah ate. Janah banci kita erlajar ngusih Jahwe si adil.

13. Menurut Masmur 77:12, 13, uga arusna carata nggunaken hadiah Dibata si erban kita banci nginget?

 ¹³ Kai buktina siergai kel hadiah Dibata si erbanca kita banci nginget? Salah sada carana eme nginget kerina si nggo ilakoken Jahwe guna nampati ras mpegegehi kita. Alu bage, banci kita tek maka terus isampatiNa kita. (Baca Masmur 77:12, 13; 78:4, 7) Cara si deban eme alu nginget kai si mehuli si nggo ilakoken kalak man banta janah ngata bujur kita man bana. Menurut penelitin, kalak si meteh ngata bujur biasana lebih ermeriah ukur. Lit ka cara si deban guna ngergai hadiah Dibata si erban kita banci nginget. Arus siusih Jahwe si la nginget kesalahenta. Aminna pe sempurna ingeten Jahwe, nggit Ia ngampuni kita janah ilupakenNa kesalahenta adi kita ertobat. (Msm. 25:7; 130:3, 4) Bage ka min ateNa silakoken man kalak si mindo maap man banta perban nggo kitik banna ukurta.​—Mat. 6:14; Luk. 17:3, 4.

14. Kai buktina siergai otak si ibereken Jahwe?

¹⁴ Otakta eme hadiah si seh kel luar biasana arah Jahwe. Sibuktiken maka siergai kel hadiah e adi sigunaken otakta guna kemulian Jahwe. Lit si nggunaken otakna guna nentuken sendiri kai si benar ras kai si salah. Tapi perban Jahwe si nciptaken kita, pasti ndauh ulin patokenNa asangken patokenta sendiri. (Rom. 12:1, 2) Adi siikutken patoken Jahwe eme Si Nciptaken kita ras Bapakta, reh tenangna me geluhta. (Jes. 48:17, 18) Selain si e, jelas me tujun geluhta eme erban meriah ukur Jahwe janah mere kemulian man baNa.​—Kua. 27:11.

15. Engkai maka sikataken Pustaka e bukti keleng ate Jahwe kita?

¹⁵ Perban keleng ate Jahwe kita, igunakenNa kesah si badia guna nampati piga-piga dilaki nulis Pustaka. Arah Pustaka, ijawap Jahwe penungkunen-penungkunenta si seh kel pentingna. Misalna:  Ja nari rehna manusia? Kai tujun geluh enda? Uga kari masa depanta? Ate Jahwe siteh min kerina jawapenna. Emaka, ibanNa gelah tersuruh ukur piga-piga kalak nerjemahken Pustaka ku melala bahasa. Gundari, Pustaka si lengkap ntah pe si lenga lengkap nggo lit bas lebih 3.000 bahasa! Mbarenda nari seh asa gundari, Pustaka me buku si mbuena iterjemahken ras ibagiken. I japa pe kalak tading ntah bahasa kai pe si ipakena, teremen kalak banci mbaca Pustaka bas bahasana sendiri.​—Nen kotak “ Nerjemahken Pustaka ku Bahasa-Bahasa i Afrika.”

16. Menurut Matius 28:19, 20, kai buktina siergai Pustaka?

¹⁶ Bukti siergai Pustaka eme adi sibaca tiap wari, siukuri isina, janah siusahaken ndalanken kai si nggo sipelajari. Selain si e, siusahaken ka asa ngasupta mberitaken berita si meriah arah Pustaka man nterem jelma. Adi bage siban, sibuktiken maka ngata bujur kel kita man Dibata.​—Msm. 1:1-3; Mat. 24:14; baca Matius 28:19, 20.

17. Hadiah kai saja si nggo sibahas bas artikel enda? Janah kai si man bahasenta bas artikel seterusna?

¹⁷ Bas artikel enda, nggo sibahas piga-piga hadiah arah Jahwe. IberekenNa doni jadi inganta tading, otakta si seh kel luar biasana, ras Pustaka. Tapi, ibereken Jahwe ka piga-piga hadiah si deban si la banci siidah. Sibahas kari kerna hadiah-hadiah e bas artikel seterusna.