1-2. Sumala sa Salmo 40:5, unsang mga regalo ang gihatag ni Jehova kanato, ug nganong ato kanang hisgotan?

SI Jehova maoy mahinatagon nga Diyos. Hunahunaa ang pipila sa mga regalo nga iyang gihatag kanato: ang atong nindot ug talagsaong pinuy-anan, ang yuta; ang atong katingalahang pagkadisenyo nga utok; ug ang iyang bililhong Pulong, ang Bibliya. Tungod niining tulo ka regalo ni Jehova, duna tay kapuy-an, makahunahuna ta ug makakomunikar sa uban, ug matubag ang pinakaimportante natong mga pangutana.​—Basaha ang Salmo 40:5.

² Niining artikuloha, atong hisgotan sa mubo kanang tulo ka regalo. Kon magsige tag pamalandong niana, mas maapresyar nato kana, ug mas molig-on ang atong tinguha sa paglipay sa atong mahigugmaong Maglalalang, si Jehova. (Pin. 4:11) Mahimo pod tang mas epektibo sa pagpangatarongan niadtong nalimbongan sa bakak nga pagtulon-an bahin sa ebolusyon.

3. Nganong talagsaon ang yuta?

³ Ang kaalam sa Diyos klarong makita sa iyang paagi sa paghimo sa atong pinuy-anan, ang yuta. (Roma 1:20; Heb. 3:4) Dili lang ang atong planeta ang naglibot sa adlaw, pero ang yuta talagsaon kay nabatonan niini ang tanang gikinahanglan aron mabuhi ang tawo.

4. Nganong makaingon ta nga ang yuta mas maayo kay sa bisan unsang barko?

⁴ Atong ikakomparar ang yuta sa usa ka barko diha sa lawod. Pero daghag kalainan ang barko nga punog tawo ug ang yuta. Pananglitan, unsa ka dugay mabuhi ang mga tawo sa barko kon  silay magpatunghag oksiheno, pagkaon, ug tubig, ug kon dili nila ikalabay ang ilang basura sa dagat? Sa dili madugay, ang mga tawo nianang barkoha mangamatay. Pero lahi ang yuta kay kini nagsuportar sa kinabuhi sa bilyonbilyong tawo ug mananap. Kini nagpatungha sa tanang oksiheno, pagkaon, ug tubig nga atong gikinahanglan, ug dili ta mahutdan niana. Bisag ang tanang basura nagpabilin sa yuta, ang yuta nindot ug mapuy-an gihapon. Sa unsang paagi naposible kana? Gidisenyo ni Jehova ang yuta nga maka-recycle ug basura. Atong hisgotan sa mubo ang duha sa maayo kaayong pagkadisenyo nga mga siklo​—ang siklo sa oksiheno (oxygen cycle) ug ang siklo sa tubig (water cycle).

5. Unsa ang siklo sa oksiheno, ug unsay gipamatud-an niini?

⁵ Ang oksiheno maoy usa ka gas nga gikinahanglan sa tawo ug mananap aron makapabiling buhi. Gibanabana nga ang mga tawo ug hayop mohanggab ug usa ka gatos ka bilyong tonelada nga oksiheno kada tuig. Sila sab magpagawas ug basura nga gas nga gitawag ug carbon dioxide. Pero dili nila mahurot ug hanggab ang tanang oksiheno, ug ang atmospera dili mapuno ug carbon dioxide. Ngano? Tungod kay si Jehova naglalang pod ug mga tanom​—gikan sa dagkong kahoy ngadto sa gagmayng algae—​nga mosuhop ug carbon dioxide ug mopagawas ug oksiheno. Sa literal nga paagi, ang siklo sa oksiheno nagpamatuod sa giingon sa Buhat 17:24, 25: “Ang Diyos . . . naghatag sa tanang tawo ug kinabuhi ug gininhawa.”

6. Unsa ang siklo sa tubig, ug unsay gipamatud-an niini? (Tan-awa sab ang kahong “ Ang Regalo ni Jehova nga Siklo sa Tubig.”)

⁶ Tungod kay ang yuta naa sa saktong distansiya gikan sa adlaw, kini dunay saktong temperatura aron ang tubig mahimong likido. Kon ang yuta maduolduol ug gamay sa adlaw, ang tanang tubig moalisngaw ug ang yuta mahimong init ug uga kaayo, ug walay mabuhi niini. Kon kini malayo-layog gamay, ang tanang tubig mobantok ug ang yuta mapunog yelo. Kay ang yuta gibutang ni Jehova sa saktong lokasyon, ang siklo sa tubig niini makasuportar ug kinabuhi. Tungod sa adlaw, ang tubig sa kadagatan ug sa yuta moinit, moalisngaw, ug mahimong panganod. Kada tuig, ang adlaw makapaalisngaw ug mga 500,000 kilometro kubiko nga tubig. Ang tubig magpabilin sa atmospera sulod sa 10 ka adlaw sa dili pa kini mahimong ulan o snow. Dayon, ang tubig mobalik sa dagat o ubang mga katubigan, ug magsugod na pod ang siklo. Kining maayong pagkadisenyo ug way hunong nga siklo nagpamatuod nga si Jehova maalamon ug gamhanan.​—Job 36:27, 28; Eccl. 1:7.

7. Unsa ang pipila ka paagi nga ikapakita nato ang atong apresasyon sa regalo nga gihisgotan sa Salmo 115:16?

⁷ Sa unsang paagi molawom ang atong apresasyon sa atong talagsaong planeta ug sa tanang maayong butang niini? (Basaha ang Salmo 115:16.) Ang usa ka paagi mao ang pagpamalandong sa mga butang nga gihimo ni Jehova. Kana magpalihok nato sa pagpasalamat kaniya kada adlaw tungod sa maayong butang nga iyang gihatag kanato. Ug ikapakita nato ang atong apresasyon sa atong planeta pinaagi sa pagtabang nga mamentinar ang kahinlo sa dapit nga atong gipuy-an.

8. Nganong makaingon ta nga ang atong utok maayo kaayong pagkadisenyo?

⁸ Ang utok sa tawo maayo kaayong pagkadisenyo. Dihang tua pa ka sa tiyan sa imong inahan, ang imong utok naporma sumala sa pagkadisenyo niini, ug kada minuto, linibo ka bag-ong selula sa utok ang maporma. Gibanabana sa mga researcher nga ang utok sa hamtong nga tawo dunay duolan sa 100 ka bilyong espesyal nga selula nga gitawag ug neuron. Kini  nga mga selula maayo kaayong pagkaasembol diha sa atong utok, ug ang atong utok may gibug-aton nga 1.5 ka kilo. Konsideraha ang pipila sa katingalahang katakos sa atong utok.

9. Unsay nagpamatuod nga ang atong katakos sa pagsulti maoy regalo gikan sa Diyos?

⁹ Ang atong katakos sa pagsulti maoy milagro. Hunahunaa kadiyot kon unsay mahitabo dihang mosulti ta. Sa matag pulong nga imong isulti, kinahanglang palihokon sa imong utok sa saktong pagkasunodsunod ang mga 100 ka kaunoran sa imong dila, tutonlan, ngabil, apapangig, ug dughan. Importante nâ aron masabtan ang imong isulti. Kon bahin sa katakos sa pagsultig pinulongan, ang usa ka research nga gi-release niadtong 2019 nagpakita nga ang bag-ong natawo nga mga bata makasabot sa tagsatagsa ka pulong. Kini nagpamatuod nga sakto ang gituohan sa mga researcher, nga kita natawo nga may katakos sa pagsabot ug pagkat-on ug mga pinulongan. Sa pagkatinuod ang atong katakos sa pagsulti maoy regalo gikan sa Diyos.​—Ex. 4:11.

10. Sa unsang paagi ikapakita nato ang atong apresasyon sa hinatag sa Diyos nga katakos sa pagsulti?

¹⁰ Ang usa ka paagi nga ikapakita nato ang atong apresasyon sa atong katakos sa pagsulti mao ang pagpatin-aw niadtong nagtuo sa ebolusyon kon nganong nagtuo ta nga ang Diyos maoy naglalang sa tanang butang. (Sal. 9:1; 1 Ped. 3:15) Gusto ta nilang patuohon nga ang yuta ug ang tanang kinabuhi diha niini kalit lang nga mitungha. Gamit ang Bibliya ug ang pipila sa mga punto nga atong nahisgotan niining artikuloha, atong madepensahan ang atong langitnong Amahan ug atong mapatin-aw niadtong andam maminaw kon nganong kombinsido ta nga si Jehova ang Maglalalang sa langit ug yuta.​—Sal. 102:25; Isa. 40:25, 26.

11. Unsa ang usa ka rason kon nganong ang atong utok katingalahan kaayo?

¹¹ Ang atong katakos sa paghinumdom katingalahan kaayo. Kaniadto, gibanabana sa usa ka magsusulat nga ang utok sa tawo makahinumdom ug impormasyon nga katumbas sa 20 ka milyong libro. Pero karon, gituohan nga mas daghan pa niana ang atong mahinumdoman. Unsang talagsaong katakos ang nabatonan sa mga tawo?

12. Sa unsang paagi ang atong katakos sa pagkat-on ug mga leksiyon bahin sa moral nakapalahi kanato sa mga hayop?

¹² Sa tanang linalang sa yuta, tawo lang ang dunay katakos sa pagkat-on ug mga leksiyon bahin sa moral pinaagi sa paghinumdom ug pag-analisar sa nangaging mga panghitabo. Tungod niana, makakat-on tag mas maayong mga sukdanan ug mabag-o nato ang atong paagi sa paghunahuna ug pagkinabuhi. (1 Cor. 6:9-11; Col. 3:9, 10) Sa pagkatinuod, mabansay nato ang atong konsensiya sa pag-ila kon unsay maayo ug daotan. (Heb. 5:14) Kita makakat-on sa pagpakitag gugma, pagkamabination, ug kaluoy. Ug makakat-on ta sa pagsundog sa hustisya ni Jehova.

13. Sumala sa Salmo 77:11, 12, sa unsang paagi gamiton nato ang atong katakos sa paghinumdom?

¹³ Ang usa ka paagi nga makapakita tag  apresasyon sa atong katakos sa paghinumdom mao ang pagpaningkamot nga mahinumdom sa tanang higayon nga si Jehova nagtabang ug naghupay kanato sa nangagi. Kini magpalig-on sa atong pagsalig nga tabangan sab ta niya sa umaabot. (Basaha ang Salmo 77:11, 12; 78:4, 7) Ang laing paagi mao ang paghinumdom ug pagpasalamat sa maayong mga butang nga gihimo sa ubang tawo kanato. Nakita sa mga researcher nga ang mga tawong mapasalamaton sagad mas malipayon. Maayo sab nga atong sundogon si Jehova nga kalimtan ang mga butang nga angayng kalimtan. Pananglitan, si Jehova hingpit ug panumdoman, pero kon mahinulsolon ta, iyang pasayloon ug kalimtan ang atong mga kasaypanan. (Sal. 25:7; 130:3, 4) Ug gusto niya nga mao pod nay atong himoon sa uban dihang mangayo silag pasaylo sa sayop nga ilang nahimo nga nakapasakit kanato.​—Mat. 6:14; Luc. 17:3, 4.

14. Sa unsang paagi ikapakita nato nga atong giapresyar ang atong katingalahang utok?

¹⁴ Ikapakita nato nga giapresyar nato ang atong katingalahang utok pinaagi sa paggamit niini sa pagpasidungog sa Usa nga naghatag niini kanato. Ang pipila naggamit sa ilang utok para sa hakog nga katuyoan​—ang pagtakdag kaugalingong sukdanan kon unsay husto ug sayop. Pero kay si Jehova ang naglalang nato, makadahom gyod ta nga ang iyang mga sukdanan mas maayo kay sa bisan unsang sukdanan nga atong mahimo para sa atong kaugalingon. (Roma 12:1, 2) Kon magkinabuhi ta sumala sa iyang mga sukdanan, kita magmalinawon. (Isa. 48:17, 18) Ug ang atong kinabuhi dunay klarong katuyoan​—ang pagpasidungog sa atong Maglalalang ug Amahan ug ang paglipay kaniya.​—Prov. 27:11.

15. Sa unsang paagi ang regalo ni Jehova nga Bibliya nagpakita sa iyang gugma sa mga tawo?

¹⁵ Ang Bibliya maoy mahigugmaong regalo gikan sa Diyos. Ang atong langitnong Amahan naggamit ug mga tawo sa pagsulat niini tungod kay gimahal ta niya pag-ayo. Pinaagi sa Bibliya, si Jehova nagtubag sa pinakaimportante natong mga pangutana, sama sa: Diin ta gikan?  Unsa ang katuyoan sa kinabuhi? Ug unsay mahitabo sa umaabot? Gusto ni Jehova nga mahibaloan sa tanan niyang anak ang tubag sa maong mga pangutana, busa sa gatosan na ka katuigan, naggamit siyag mga tawo sa paghubad sa Bibliya ngadto sa daghang pinulongan. Karon, ang tibuok Bibliya o ang mga bahin niini mabatonan na sa kapig 3,000 ka pinulongan! Ang Bibliya mao ang kinadaghanag hubad ug labing kaylap nga napanagtag nga basahon sa tibuok kasaysayan. Bisan asa nagpuyo ang mga tawo o bisan unsay ilang pinulongan, ang kadaghanan makabasa sa Bibliya sa kaugalingon nilang pinulongan.​—Tan-awa ang kahong “ Paghubad sa Bibliya Ngadto sa mga Pinulongan sa Africa.”

16. Sumala sa Mateo 28:19, 20, sa unsang paagi ikapakita nato nga atong giapresyar ang Bibliya?

¹⁶ Ikapakita nato nga atong giapresyar ang Bibliya pinaagi sa pagbasa niini adlaw-adlaw, pagpamalandong sa gitudlo niini, ug pagpaningkamot nga mapadapat ang atong nakat-onan. Dugang pa, ikapakita nato ang atong pagpasalamat sa Diyos pinaagi sa pagpaningkamot sa pagsulti sa mensahe niini ngadto sa daghang tawo kutob sa atong maarangan.​—Sal. 1:1-3; Mat. 24:14; basaha ang Mateo 28:19, 20.

17. Unsa nga mga regalo ang atong gihisgotan niining artikuloha, ug unsay hisgotan sa sunod nga artikulo?

¹⁷ Niining artikuloha, atong gihisgotan ang mga regalo sa Diyos sama sa atong pinuy-anan, ang yuta; sa atong katingalahang pagkadisenyo nga utok; ug sa Pulong sa Diyos, ang Bibliya. Apan duna pay laing mga regalo nga gihatag ni Jehova nga dili nato makita. Kining dili makita nga mga regalo hisgotan sa sunod nga artikulo.