1-2. Dapre Psonm 40:5, ki kado Zeova in donn nou e akoz nou pou koz lo zot dan sa lartik?

ZEOVA i en Bondye zenere. Mazin lo serten kado ki Bondye in donn nou. Par egzanp, nou zoli later ki en lakour parfe pour nou, nou laservel merveye ek son Parol, Labib ki vreman presye. Vi ki Zeova in donn nou sa trwa kado, nou annan en landrwa reste, nou kapab reflesir e kominik avek lezot e nou annan larepons pour bann kestyon pli enportan ki nou kapab demande.​—Lir Psonm 40:5.

² Dan sa lartik, nou pou diskit lo sa trwa kado. Ler nou medit lo sa bann kado, nou pou pli apresye zot e nou pou anvi fer nou Kreater kontan. (Rev. 4:11) An plis ki sa, nou pou osi kapab rezonn pli byen avek dimoun ki’n ganny anbete e zot krwar dan evolisyon.

3. Akoz later i spesyal?

³ Nou kapab vwar lasazes Bondye dan lafason ki i’n kree later. (Rom. 1:20; Ebr. 3:4) I annan lezot plannet ki tourn otour soley me later i spesyal parski i annan tou sa ki imen i bezwen pour viv.

4. Akoz later i pli bon ki okenn bato?

⁴ Nou kapab konpar plannet later avek en bato ki pe flote dan lanmer. Me i annan gran diferans ant later ek en bato ranpli avek dimoun. Par egzanp, konbyen letan dimoun dan en bato pou kapab sirviv si zot bezwen prodwir zot prop loksizenn, manze ek delo e si zot pa kapab zet zot salte okenn par? Bann dimoun dan sa bato pa ti pou viv lontan. De lot kote, later i kapab gard plizyer bilyon  dimoun ek zannimo vivan. I prodwir tou sa loksizenn, manze ek delo ki nou bezwen e i toultan annan ase sa bann keksoz. Bann salte ki later i prodwir pa ganny zete dan lespas, kantmenm sa later i reste zoli e nou kapab reste lo la. Ki mannyer sa i posib? Zeova in kree later avek sa abilite pour resikle salte. Nou pou vwar lasazes Zeova dan sa prosesis ki loksizenn ek delo i pas atraver.

5. Ki arive avek loksizenn e ki sa i montre nou?

⁵ Loksizenn i en gas ki imen ek zannimo i bezwen pour viv. Imen ek zannimo i respir en kantite loksizenn tou le lannen. Apre ki imen ek zannimo in respir loksizenn, zot larg en gas ki apel dyoksid karbonn. Kantmenm sa, nou pa zanmen fini servi tou loksizenn e latmosfer pa zanmen ranpli avek tro bokou dyoksid karbonn. Akoz non? Parski Zeova in osi kree en varyete plant diferan groser ki servi sa dyoksid karbonn e larg loksizenn. Vi ki sa prosesis i prodwir ler ki nou respire, nou dakor avek sa parol dan Akt 17:24, 25, ki dir: “Bondye . . . ki donn tou dimoun lavi, [e] i fer zot tou respire.”

6. Ki prosesis delo i pas atraver e ki sa i montre? (Vwar osi sa bwat “ Prosesis delo i en kado sorti kot Zeova.”)

⁶ Vi ki later i dan sa pli bon zistans avek soley, sa i fer ki later i annan sa tanperatir ideal pour delo kapab reste likid. Si later ti en pti pe pli pre avek soley, tou delo ti pou evapore. Later ti pou vin so e nanryen pa ti pou viv lo la. Me si later ti en pti pe pli lwen avek soley, tou delo ti pou vin ays e later ti pou kouver avek lanez ek ays. Vi ki Zeova in met later dan sa pozisyon ideal, delo lo later i ede pour gard bann keksoz lo later vivan. Soley i sof delo dan lanmer ek lo later, sa delo i evapore e i form bann nyaz. Tou le lannen, lakantite delo ki soley i evapore i bokou plis ki sa kantite delo ki dan tou bann lak lo later. Apre ki sa delo in evapore, i reste dan latmosfer pour apepre dis zour avan i vin lapli oubyen lanez. Avek letan, sa delo i koul dan lanmer ouswa dan lezot sours delo e sa prosesis i rekonmans ankor. Zeova in fer sa prosesis pour ki later i toultan annan delo. Sa i montre ki Zeova i saz e pwisan.​—Zob 36:27, 28; Ekle. 1:7.

7. Ki serten fason ki nou kapab demontre lapresyasyon pour sa kado ki’n ganny mansyonnen dan Psonm 115:16?

⁷ Ki mannyer nou kapab montre ki nou vreman apresye nou zoli plannet ek tou son bann bon keksoz? (Lir Psonm 115:16.) En fason nou fer sa i ler nou medit lo bann keksoz ki Zeova in fer. Sa pou fer nou anvi remersye Zeova tou le zour pour tou sa bann bon keksoz ki i donn nou. Nou osi montre ki nou apresye later ler nou gard landrwa kot nou reste prop.

8. Akoz nou kapab dir ki nou laservel in ganny fer dan en fason merveye?

⁸ Laservel imen in ganny fer dan en fason merveye. Ler ou ti ankor dan vant ou manman, ou laservel ti pe devlop dapre lafason ki i sipoze vini e tou le minit, plizyer milye nouvo selil laservel ti pe formen! Bann serser i estimen ki dan laservel en adilt i annan preski 100 bilyon selil ki apel neurons. Sa bann selil i form nou laservel ki pez apepre 1.5 kilo. Annou vwar zis detrwa abilite merveye ki nou laservel i annan.

9. Kwa ki montre ou ki nou abilite pour koze i en kado sorti kot Bondye?

 ⁹ Nou abilite pour koze i en mirak. Reflesir en moman lo sa ki arive ler nou koze. Pour sak mo ki nou dir, nou laservel i fer sir ki sa apepre 100 misk dan nou lalang, lagorz, lalev, lanmaswar ek pwatrin i bouze. Pour ki bann mo i kler ler nou pronons zot, sa bann misk i bezwen bouz dan en lord spesifik. Konsernan sa abilite pour koz en langaz, en letid ki’n ganny pibliye an 2019 i montre ki bann pti baba ki fek ne i kapab rekonnet sak mo endividyelman. Sa letid i siport sa ki plizyer serser i krwar, setadir ki nou ne avek sa abilite pour rekonnet e aprann langaz. San dout, nou abilite pour koze i en kado sorti kot Bondye.​—Egz. 4:11.

10. Ki mannyer nou montre ki nou apresye nou abilite pour koze?

¹⁰ En fason ki nou kapab montre ki nou apresye sa abilite pour koze, i ler nou koz lo nou krwayans dan Bondye avek bann ki krwar dan lansennyman lo evolisyon. (Ps. 9:1; 1 Pyer 3:15) Sa bann ki promot sa lansennyman i dir ki later ek tou sa ki vivan lo la pa ti ganny kree. Si nou servi Labib ek serten pwen ki nou’n diskite dan sa lartik, nou kapab defann nou Papa ki dan lesyel e eksplik bann ki anvi ekoute akoz nou asire ki Zeova i Kreater lesyel ek later.​—Ps. 102:25; Iza. 40:25, 26, NWT.

11. Donn en rezon akoz nou laservel i enpresyonan.

¹¹ Nou kapasite pour rapel i enpresyonan. Dan lepase, en loter ti estimen ki laservel imen i annan sa abilite pour rapel lenformasyon ki dan 20 milyon liv. Par kont, konmela bokou dimoun i krwar ki nou kapab rapel bokou plis ki sa. Vi ki nou annan sa kapasite pour rapel, ki abilite spesyal nou annan?

12. Dan ki fason sa abilite pour aprann ki mannyer nou devret viv, i fer nou diferan avek zannimo?

¹² Vi ki bann imen i kapab rapel e analiz bann keksoz ki’n arive dan lepase, sa i fer ki parmi tou bann kreatir lo later zis nou ki annan sa abilite pour aprann ki mannyer nou devret viv. I pour sa rezon ki nou kapab aprann bann pli bon standar, sanz nou fason panse ek fason viv. (1 Kor. 6:9-11; Kol. 3:9, 10) Anfet, nou kapab antrenn nou konsyans pour rekonnet diferans ant sa ki byen ek sa ki mal. (Ebr. 5:14) Nou kapab aprann pour demontre lanmour, konpasyon ek pitye. Nou osi kapab aprann pour demontre lazistis parey Zeova.

13. Dapre Psonm 77:11, 12, ki mannyer nou devret servi nou abilite pour rapel?

¹³ En fason nou montre ki nou apresye sa abilite pour rapel, i ler nou esey rapel sak fwa ki Zeova in ed e rekonfort nou dan lepase. Sa pou fer nou annan plis konfyans ki i pou ed nou a lavenir.  (Lir Psonm 77:11, 12; 78:4, 7) En lot fason, i ler nou rapel bann bon keksoz ki lezot dimoun i fer pour nou e ler nou demontre lapresyasyon pour sa ki zot fer. Bann serser in trouve ki dimoun ki demontre lapresyasyon i pli ere. I osi bon pour nou swiv legzanp Zeova e swazir pour oubliy serten keksoz. Par egzanp, Zeova i rapel tou keksoz me si nou repantir i swazir pour pardonn e oubliy bann fot ki nou fer. (Ps. 25:7; 130:3, 4) I anvi nou fer parey pour lezot ler zot regret keksoz ki zot in fer ki bles nou.​—Mat. 6:14; Lik 17:3, 4.

14. Ki mannyer nou kapab demontre lapresyasyon pour nou laservel?

¹⁴ Nou kapab demontre lapresyasyon pour nou laservel ler nou servi li pour onor sa Enn ki’n kree nou. Serten i swazir pour servi zot laservel pour deside pour zot menm kwa ki byen e kwa ki mal. Me vi ki Zeova ki’n kree nou, i normal pour ekspekte ki son bann standar i pli bon ki okenn standar ki nou, nou kapab annan. (Rom. 12:1, 2) Ler nou obei bann standar Zeova, nou annan lape. (Iza. 48:17, 18) Nou osi aprann sa ki Zeova i anvi nou fer tan ki nou ankor vivan, setadir pour onor li vi ki i nou Kreater ek Papa e i osi anvi ki nou fer li ere.​—Prov. 27:11.

15. Ki mannyer Labib i montre lanmour ki Zeova i annan pour bann imen?

¹⁵ Labib i en zoli kado sorti kot Zeova. Nou Papa ki dan lesyel ti enspir bann zonm pour ekri Labib akoz i kontan nou en kantite. Dan Labib, Zeova i reponn bann kestyon pli enportan ki nou kapab demande, tel parey: Kote nou sorti? Akoz nou lo later? Ki pou arive dan lavenir? Zeova i anvi ki tou son bann zanfan i konn larepons sa bann kestyon, alor in pous bann zonm pour tradwir Labib dan plizyer langaz. Ozordi,  Labib antye ouswa bann porsyon i disponib dan plis ki 3,000 langaz! Labib i sa liv ki’n ganny plis tradwir e distribye dan listwar. Nenport landrwa kot dimoun i reste oubyen nenport langaz ki zot koze, laplipar i annan sa loportinite pour lir Labib dan zot prop langaz.​—Vwar sa bwat “ Labib i disponib dan bann langaz Afriken.”

16. Dapre Matye 28:19, 20, ki mannyer nou kapab montre ki nou apresye Labib?

¹⁶ Nou kapab montre ki nou apresye Labib ler nou lir li sak zour, nou medit lo sa ki i ansenny nou e fer nou mye pour aplik sa ki nou aprann. An plis, nou demontre nou lapresyasyon pour Bondye ler nou fer tou sa ki nou kapab pour koz avek lezot konsernan sa ki Labib i dir.​—Ps. 1:1-3; Mat. 24:14; Lir Matye 28:19, 20.

17. Ki kado ki nou’n diskit lo la dan sa lartik e ki nou pou diskite dan sa lartik ki swiv?

¹⁷ Dan sa lartik, nou’n vwar bann kado ki Bondye in donn nou, parey later ki nou lakour, nou laservel ki’n ganny fer dan en fason merveye e Parol enspire Bondye, Labib. Me i annan lezot kado ki Zeova in donn nou ki nou pa vwar. Dan sa lartik ki swiv, nou pou diskit lo sa bann trezor ki nou pa vwar.