1, 2. a) Cheʼ mi lac pejcan Salmo 40:5, ¿chuqui ti majtan tac an i yʌqʼueyonla Jehová? b) ¿Chucoch mi caj laj qʼuel ili uxchajp majtañʌl?

JEHOVÁ jiñʌch juntiquil Dios am bʌ i yutslel. An i yʌqʼueyonla ili majtañʌl tac: Ili Pañimil, wen utsʼatax bʌ lac chumlib, jiñi lac sicojc, wen utsʼatax bʌ bajcheʼ melbil (pʌtbil), yicʼot jiñi Biblia, i Tʼan wen am bʌ i cʼʌjñibal. Cheʼ tsiʼ yʌqʼueyonla ili uxchajp, Jehová tsiʼ yʌqʼueyonla jumpʼejl wem bʌ lac chumlib, cheʼ la cujil pensar yicʼot la cujil tʼan, yicʼot i jacʼbal laj cʼajtiya tac wen am bʌ i cʼʌjñibal (pejcan Salmo 40:5).

² Ti ili estudio mi caj laj qʼuel jiñi uxchajp majtañʌl tsaʼ bʌ i yʌqʼueyonla Jehová. Cheʼ mi lac ñaʼtan jiñi uxchajp, ñumento mi caj laj qʼuel ti ñuc jiñi majtañʌl tac i ñumento mi caj lac mulan la cʌqʼuen i tijicñʌyel jiñi tsaʼ bʌ i meleyonla, jiñi cʼux bʌ miʼ yubiñonla (Ap. 4:11). Cheʼ jaʼel, ñumen chajpʌbilonla mi caj la cajñel chaʼan mi laj coltañob jiñi wiñicob xʼixicob (quixtañujob) am bʌ lotintiyob chaʼan jiñi evolución.

3. ¿Chucoch mach lajalic ili Pañimil yicʼot yan tac bʌ planeta?

³ Mi mucʼʌch lac wen qʼuel bajcheʼ Dios tsiʼ mele ili Pañimil, tsiquil mi laj qʼuel chaʼan ñumen an i ñaʼtʌbal (Ro. 1:20; He. 3:4). I sujmʌch chaʼan an yambʌ planeta tac muʼ bʌ i wijlel tiʼ joytʌlel jiñi Qʼuin, pero cojach ila ti Pañimil miʼ mejlel ti chumtʌl jiñi quixtañujob.

4. Tsictesan yicʼot jumpʼejl ejemplo bajcheʼ mi laj qʼuelben i ñaʼtʌbal Dios cheʼ tsiʼ mele ili Pañimil.

⁴ Miʼ mejlel la cʌl chaʼan ili Pañimil lajal bajcheʼ jumpʼejl barco baqui an cabʌl quixtañujob woli bʌ i majlel ti universo. Pero mach lajalic jumpʼejl barco bajcheʼ ili Lum. Laʼcu lac  ñaʼtan, ¿jaypʼejl ora cuxul miʼ mejlelob ti ajñel yaʼ ti barco cheʼ muqʼuic i bajñel melob icʼ, i bʌl i ñʌcʼob yicʼot i yaʼalob, yicʼot cheʼ maʼañic baqui miʼ mejlel i chocob jiñi maʼañix bʌ miʼ cʼʌjñibʌyel i chaʼañob? Tiʼ sujm, ora mi caj i chʌmelob. Pero ila ti Pañimil chumulob yonlel quixtañujob yicʼot añimal tac. Ili Lum miʼ bajñel mel jiñi icʼ, jiñi bʌlñʌcʼʌl yicʼot jiñi jaʼ i cʼʌjñibal bʌ lac chaʼan. Ili tac ñuc bʌ i cʼʌjñibal chaʼan laj cuxtʌlel maʼañic baqui ora miʼ jilel. Cheʼ jaʼel, jiñi maʼañix bʌ i cʼʌjñibal miʼ cʌytʌl ila ti Pañimil. Pero bej i tʼojol jax ili Lum yicʼot wem bʌ chumlib. ¿Chucoch cheʼʌchi? Jehová tsiʼ mele ili Pañimil chaʼan cheʼ miʼ chojquel jiñi maʼañix bʌ i cʼʌjñibal miʼ mejlel ti sujtel ti wen tac bʌ, i cheʼ jiñi, miʼ chaʼ cʼʌjñel. Laʼ lac tsʼitaʼ taj ti tʼan chaʼpʼejl: Jiñi icʼ yicʼot jiñi jaʼ.

5. ¿Chucoch maʼañic miʼ jilel jiñi icʼ muʼ bʌ lac jap, i chuqui miʼ pʌs?

⁵ Jiñi icʼ ñuc i cʼʌjñibal chaʼan cuxul jiñi quixtañujob yicʼot añimal tac. Jiñi cuxul tac bʌ ila ti Pañimil miʼ japob sʌc bʌ icʼ ti jujumpʼejl jab. Pero cheʼ mi japob icʼ miʼ chocob loqʼuel dióxido de carbono, jiñi bibiʼ bʌ icʼ. Pero jiñi cuxul tac bʌ maʼañic miʼ luʼ jisañob jiñi sʌc bʌ icʼ i jiñi panchan maʼañic miʼ bujtʼel ti bibiʼ bʌ icʼ. ¿Chucoch? Wocolix i yʌlʌ chaʼan bajcheʼ miʼ yʌcʼ i bʌ jiñi icʼ. Jehová tsiʼ mele teʼ tac mach bʌ junlajalic i colemlel muʼ bʌ i tsʼuʼob jiñi bibiʼ bʌ icʼ i sʌquix miʼ chocob loqʼuel. Jiñi bajcheʼ miʼ yʌcʼ i bʌ jiñi icʼ miʼ pʌs chaʼan i sujmʌch cheʼ jiñi Hechos 17:24, 25 miʼ yʌl iliyi: «Dios [...] miʼ yʌqʼueñonla laj cuxtʌlel yicʼot la quiqʼuilel yicʼot pejtelel lac chubʌʼan».

6. ¿Chucoch maʼañic miʼ jilel jiñi jaʼ muʼ bʌ lac jap, i chuqui miʼ pʌs? (Qʼuele jeʼel jiñi recuadro « Jiñi jaʼ: Jumpʼejl majtañʌl tsaʼ bʌ i yʌqʼueyonla Jehová»).

⁶ An cabʌl jaʼ ila ti Pañimil come wen jach bajcheʼ an i ñajtlel yicʼot jiñi Qʼuin. Miʼ ñumen lʌcʼʌl an yicʼot, miʼ jilel pejtelel jiñi jaʼ, i ili Lum tiquiñix miʼ yajñel yicʼot maʼañix majqui miʼ mejlel ti chumtʌl. Pero mi ñumen ñajt an yicʼot, pejtelel jiñi jaʼ miʼ tsʌtsʼan i miʼ sujtel ti hielo ili Pañimil. Wen jach baqui tsiʼ yʌcʼʌ Jehová ili Pañimil, jin chaʼan, pejtelel jiñi jaʼ ñucʼ i cʼʌjñibal chaʼan cuxulonla. ¿Chuqui tac miʼ yujtel chaʼan miʼ yʌcʼ i bʌ jiñi jaʼ? Jiñi Qʼuin miʼ ticwesan jiñi mar yicʼot jiñi lum chaʼan miʼ ticwesan jiñi jaʼ tac i miʼ yʌcʼ i bʌ jiñi tocal tac. Ti jujumpʼejl jab, jiñi Qʼuin cʌlʌxix miʼ ticwesan jiñi jaʼ ti baqui jach. Pejtelel jiñi jaʼ miʼ cʌytʌl yaʼ ti chan cheʼ bʌ 10 qʼuin. Ti wiʼil, miʼ yajlel bajcheʼ jaʼal i miʼ chaʼ majlel yaʼ ti mar tac o baqui lʌmʌl jaʼ. I cheʼʌch miʼ bej ujtel chaʼan miʼ yʌcʼ i bʌ jiñi jaʼ. Pejtelel jiñi muʼ bʌ i yujtel chaʼan maʼañic miʼ jilel jiñi jaʼ, miʼ pʌs chaʼan Jehová an i ñaʼtʌbal yicʼot wen pʼʌtʌl (Job 36:27, 28; Ec. 1:7).

7. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová chaʼan jiñi majtañʌl muʼ bʌ i taj ti tʼan Salmo 115:16?

⁷ Chaʼan mi lac ñumen qʼuel ti ñuc ili Pañimil yicʼot i bʌl, yom mi lac wen ñaʼtan jiñi melbil tac bʌ i chaʼan Jehová (pejcan Salmo 115:16). Ili mi caj i ñijcañonla chaʼan ti jujumpʼejl qʼuin mi la cʌqʼuen wocolix i yʌlʌ Jehová chaʼan pejtelel chuqui mi yʌqʼueñonla. Yicʼot mi lac pʌs chaʼan mucʼʌch la cʌqʼuen wocolix i yʌlʌ cheʼ mi lac chaʼlen wersa chaʼan sʌc miʼ yajñel yaʼ baqui chumulonla.

8. ¿Chucoch miʼ mejlel la cʌl chaʼan wen utsʼatax bajcheʼ tsaʼ mejli jiñi lac sicojc?

⁸ Jiñi lac sicojc wen utsʼatax bajcheʼ tsaʼ mejli. Cheʼ bʌ yaʼ jaxto añonla tiʼ ñʌcʼ lac ñaʼ, jiñi lac sicojc wen chajpʌbil bajcheʼ tsiʼ mele majlel i bʌ, ¡ti jujumpʼejl minuto tsiʼ mele majlel i bʌ ñumen ti mil tsijiʼ bʌ i célula tac  lac sicojc! Miʼ yʌlob chaʼan tiʼ sicojc juntiquil quixtañu añix bʌ i jabilel an 100 mil millón neurona tac, junchajp célula tac. Ili célula tac yaʼ luʼ an ti lac sicojc am bʌ i yalel jumpʼejl kilo yicʼot ojlil. Laʼ laj qʼuel chaʼpʼejl uxpʼejl chuqui miʼ mejlel i mel (chaʼlen) jiñi lac sicojc.

9. Ixcu jatet, ¿chuqui miʼ yʌqʼueñet a ñaʼtan chaʼan jumpʼejlʌch majtañʌl tilem bʌ ti Dios cheʼ la cujil tʼan?

⁹ Miʼ yʌcʼ ti toj sajtel lac pusicʼal cheʼ la cujil tʼan. Laʼcu lac jumucʼ ñaʼtan pejtelel chuqui miʼ yujtel cheʼ mi lac chaʼlen tʼan. Cheʼ mi la cʌl jumpʼejl tʼan, jiñi lac sicojc miʼ suben jiñi la cacʼ, jiñi lac chʼochʼ, jiñi lac xʌcʼtiʼ yicʼot lac tajn chaʼan miʼ ñijcan tac i bʌ. Junlajal yom miʼ ñijcan tac i bʌ chaʼan tsiquil chuqui mi la cʌl. Cheʼ mi lac ñop cabʌl tʼan, jumpʼejl jun tsaʼ bʌ loqʼui ti 2019 tsiʼ yʌlʌ chaʼan jiñi chʼoc alʌlob muqʼuix mejlel i cʌñob tʼan tac. Ili tsaʼ bʌ ajli miʼ taj i bʌ yicʼot am bʌ i yʌlʌyob yambʌ quixtañujob: Cheʼ mi la quilan pañimil (chʼocʼan) muqʼuix mejlel laj cʌn cabʌl tʼan tac. Tiʼ sujm, jumpʼejlʌch majtañʌl tilem bʌ ti Dios cheʼ la cujil tʼan (Éx. 4:11).

10. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová cheʼ la cujil tʼan?

¹⁰ Junchajp bajcheʼ mi la cʌqʼuen wocolix i yʌlʌ Jehová cheʼ la cujil tʼan jiñʌch cheʼ mi laj cʼʌn lac tsictesʌbeñob jiñi muʼ bʌ i ñopob chaʼan jiñi evolución chucoch mi lac ñop chaʼan Dios jiñʌch tsaʼ bʌ i mele pejtelel chuqui tac an (Sal. 9:1; 1 P. 3:15). Jiñi muʼ bʌ i chaʼleñob cʌntesa chaʼan jiñi evolución yomob i yʌqʼueñonla lac ñop chaʼan Dios maʼañic tsiʼ meleyonla yicʼot ili Pañimil. Miʼ mejlel laj cʼʌn jiñi Biblia yicʼot am bʌ i subeyonla ili estudio chaʼan mi laj coltan jiñi lac Tat am bʌ ti panchan yicʼot mi lac tsictesʌben jiñi yom bʌ i ñʌchʼtañob chucoch mi lac wen ñop chaʼan Jehová jiñʌch tsaʼ bʌ i mele jiñi panchan yicʼot ili Pañimil (Sal. 102:25; Is. 40:25, 26).

11. ¿Chuqui yambʌ miʼ yʌqʼueñonla lac ñaʼtan chaʼan wen utsʼatax bajcheʼ tsaʼ mejli jiñi lac sicojc?

¹¹ Miʼ yʌcʼ ti toj sajtel lac pusicʼal pejtelel chuqui miʼ mejlel laj cʌy ti lac jol. Ti wajali, juntiquil científico tsaʼ cʼoti i ñaʼtan chaʼan jiñi lac sicojc miʼ mejlel i cʼajtesan muʼ bʌ i yochel ti 20 millón libro. Pero ili ora miʼ ñaʼtʌntel chaʼan ñumento chuqui miʼ mejlel laj cʌy ti lac jol. Cheʼ jaʼel, an junchajp muʼ bʌ i yʌqʼueñonla lac mel. Laʼ laj qʼuel.

12. Come mach lajaloñicla bajcheʼ añimal tac, ¿chuqui miʼ mejlel laj cʌn joñonla?

¹² Ti ili Pañimil, cojach joñonla miʼ mejlel laj cʌn chuqui wem bʌ yicʼot mach bʌ weñic chaʼan tsaʼ bʌ ujti ti wajali. Cheʼ mi laj cʼajtesan yicʼot mi lac tsajin jiñi tsaʼ bʌ ujti ti wajali, miʼ coltañonla laj cʌn ñumen wem bʌ melbalʌl tac yicʼot lac tojʼesan lac pensar yicʼot chuqui mi lac mel (1 Co. 6:9-11; Col. 3:9, 10). Miʼ mejlel laj cʌntesan jiñi laj conciencia chaʼan miʼ cʌn chuqui wen yicʼot mach bʌ weñic (He. 5:14). Miʼ mejlel laj cʌn lac pʌs cʼuxbiya, pʼuntaya  yicʼot miʼ mejlel laj cʌn chuqui toj bʌ miʼ qʼuel Jehová.

13. Cheʼ bajcheʼ miʼ yʌl Salmo 77:11, 12, ¿bajcheʼ yom mi laj cʼʌn jiñi muʼ bʌ laj cʌy ti lac jol?

¹³ Junchajp bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová cheʼ cabʌl chuqui miʼ mejlel laj cʌy ti lac jol jiñʌch cheʼ mi laj cʼajtesan jajayajl an i coltayonla yicʼot an i ñuqʼuesa lac pusicʼal. Iliyi mi caj i coltañonla lac ñop chaʼan mucʼʌch i cajel i chaʼ coltañonla (pejcan Salmo 77:11, 12; 78:4, 7). Yambʌ bajcheʼ miʼ mejlel lac pʌs jiñʌch cheʼ mi laj cʼajtesan pejtelel chuqui wem bʌ an i melbeyonla jiñi quixtañujob yicʼot mi la cʌqʼueñob wocolix i yʌlʌ. Jiñi doctorob an i qʼueleyob chaʼan ñumen tijicñayob jiñi quixtañujob muʼ bʌ i yʌcʼob wocolix i yʌlʌ. Yom mi lac mel muʼ bʌ i mel Jehová, an chuqui tac miʼ ñajʌtesan. Jumpʼejl ejemplo, cabʌl chuqui miʼ mejlel i cʼajtesan, pero miʼ ñusan lac mul yicʼot miʼ ñajʌtesan jiñi mach tac bʌ weñic tsaʼ lac mele cheʼ tsaʼix laj cʌyʌ (Sal. 25:7; 130:3, 4). I Jehová yom chaʼan cheʼʌch mi lac mel jaʼel cheʼ bʌ an majqui miʼ lowonla (Mt. 6:14; Lc. 17:3, 4).

14. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová cheʼ tsiʼ mele jiñi utsʼatax bʌ lac sicojc?

¹⁴ Miʼ mejlel lac pʌs chaʼan mi laj qʼuel ti ñuc jiñi lac sicojc cheʼ mi laj cʼʌn chaʼan mi la cʌqʼuen i ñuclel Jehová, jiñi tsaʼ bʌ i yʌqʼueyonla. An quixtañujob muʼ bʌ i cʼʌñob bajcheʼ bajñel yomob i miʼ ñaʼtañob chuqui wen o mach bʌ weñic. Pero Jehová jiñʌch tsaʼ bʌ i meleyonla, jin chaʼan ñumen wento i mandar tac, i lac chaʼan mach cheʼiqui (Ro. 12:1, 2). Cheʼ mi lac jacʼben i mandar tac, mi lac taj ñʌchʼtʌlel (Is. 48:17, 18). Yicʼot añʌch i sujmlel chucoch cuxulonla: Jiñʌch cheʼ mi la cʌqʼuen i ñuclel yicʼot mi lac tijicñesʌben i pusicʼal jiñi tsaʼ bʌ i meleyonla, jiñi lac Tat Jehová (Pr. 27:11).

15. ¿Bajcheʼ miʼ pʌsbeñonla Jehová chaʼan mucʼʌch i cʼuxbiñonla cheʼ tsiʼ yʌqʼueyonla jiñi Biblia?

¹⁵ Jiñi Biblia jiñʌch jumpʼejl majtañʌl muʼ bʌ i pʌsbeñonla chaʼan miʼ cʼuxbiñonla  Dios. Jiñi lac Tat am bʌ ti panchan tsiʼ yʌqʼue chʼujul bʌ i yespíritu cabʌl wiñicob chaʼan miʼ tsʼijbuñob jiñi i Tʼan come miʼ wen cʼuxbiñonla. Yaʼ ti Biblia miʼ jacʼbeñonla jiñi ñuc bʌ cʼajtiya tac, chaʼan ¿baqui tilemonla?, ¿baqui bʌ i sujmlel cheʼ cuxulonla? yicʼot ¿chuqui mi caj i yujtel ti talto bʌ qʼuin? Come Jehová yom chaʼan pejtelel i yalobilob miʼ tajbeñob i jacʼbal ili cʼajtiya tac, an i yʌcʼʌ chaʼan miʼ chaʼlentel ti traducir jiñi Biblia ti cabʌl tʼan. Ili ora, jiñi Biblia añix ti 3,000 tʼan tac, cheʼ luʼ traducidojix o lamital jaxto. Jiñʌch jumpʼejl libro muʼ bʌ i wen chaʼlentel ti traducir i pujquem bʌ tiʼ pejtelel pañimil (mulawil). Mach yʌlʌlic baqui chʼoyolob jiñi quixtañujob o chuqui ti tʼan yujilob, cabʌlob miʼ mejlel i cʌñob chuqui miʼ yʌl jiñi Biblia tiʼ tʼañob (qʼuele jiñi recuadro « Añix Biblia ti jiñi tʼan tac am bʌ ti África»).

16. Cheʼ bajcheʼ miʼ yʌl Mateo 28:19, 20 yicʼot muʼ bʌ i yʌl jiñi párrafo, ¿bajcheʼ miʼ mejlel lac pʌs chaʼan mi laj qʼuel ti ñuc cheʼ an lac chaʼan jiñi Biblia?

¹⁶ ¿Bajcheʼ miʼ mejlel lac pʌs chaʼan mi laj qʼuel ti ñuc cheʼ an lac chaʼan jiñi Biblia? Jiñʌch cheʼ mi lac pejcan ti jujumpʼejl qʼuin, mi lac wen ñaʼtan chuqui miʼ yʌl yicʼot cheʼ mi lac chaʼlen wersa lac mel jiñi muʼ bʌ laj cʌn. Cheʼ jaʼel, mi lac pʌsben Jehová chaʼan mi laj qʼuel ti ñuc cheʼ mi lac chaʼlen wersa lac pʌsbeñob jiñi quixtañujob chaʼan bʌ jiñi Biblia (Sal. 1:1-3; Mt. 24:14; pejcan Mateo 28:19, 20).

17. ¿Chuqui ti majtañʌl tac tsaʼ lac taja ti tʼan ti ili estudio, i chuqui mi caj laj qʼuel yaʼ ti yambʌ?|

¹⁷ Ti ili estudio tsaʼ la cʌlʌ uxpʼejl majtañʌl am bʌ i yʌqʼueyonla Jehová: Jiñi utsʼatax bʌ la chumlib, ili Pañimil, jiñi lac sicojc wen utsʼatax bʌ bajcheʼ melbil yicʼot jiñi i Tʼan, jiñi Biblia. Pero an majtañʌl tac am bʌ i yʌqʼueyonla Jehová mach bʌ mejlic laj qʼuel. Ti jiñi yambʌ estudio mi caj laj qʼuel baqui tac bʌ.