1-2. Ka kɛɲɛ ni Zaburuw 40:6 ye, Jehova ye nilifɛn jumanw lo di an ma? Mun na an bena kuma o nilifɛnw koo la barokun nin na?

JEHOVA tɛgɛ foninin lo. Miiri a ka nilifɛn dɔw koo la. A ye sigiyɔrɔ ɲuman di an ma, o min ye dugukolo ye ani k’an kunsɛmɛ dilan cogo kabakoman na. A y’a ka Kuma nafaman fana di an ma, o min ye Bibulu ye. O nilifɛn saba sababu la, an be ni sigiyɔrɔ ye, an be se ka miiri ani ka kumaɲɔgɔnya kɛ ni tɔɔw ye. An b’an ka ɲiningali jɔnjɔnw fana jaabiliw sɔrɔ.—Zaburuw 40:6 kalan.

² Barokun nin na, an bena kuma dɔɔni o nilifɛn saba koo la. N’an tora ka miiri u la, u koo bena to ka diya an ye kosɔbɛ. An bena a ɲini fana k’an Danbaga kanulen Jehova dusu diya (Yir. 4:11). Kalan dɔ b’a fɔ ko bɛgɛnw lo yɛlɛma yɛlɛmana ka kɛ mɔgɔw ye. U ye minw lafili n’o kalan ye, an bena se ka hakilijagabɔ kɛ n’olu ye koɲuman.

3. Mun na dugukolo ɲɔgɔn tɛ yen?

³ Ala ka hakilitigiya be ye ka gwɛ dugukolo dancogo fɛ (Ɔrɔm. 1:20; Eburuw 3:4). Dugukolo dɔrɔn lo tɛ tile munumunu, planɛti wɛrɛw be yen. Nka, dugukolo ɲɔgɔn tɛ yen sabu adamadenw be se ka ɲɛnamaya kɛ ale dɔrɔn lo kan.

4. Mun na an be se k’a fɔ ko faranfasiba be kurun yɛrɛ yɛrɛ ni dugukolo cɛ?

⁴ Dugukolo be komi kurunba dɔ min be baji kan. Nka faranfasiba be kurun yɛrɛ yɛrɛ ni dugukolo cɛ. Ɲɛyirali fɛ, mɔgɔw fanin be kurun dɔ kɔnɔ ani a ɲinina u fɛ k’u ka ɔksizɛni, dumuni ni jii dilan u yɛrɛ ma. U fana man ɲi ka ɲamaɲama si fili jii la. O mɔgɔw bena se ka to niin na fɔɔ wagati juman? U tɛna mɛɛn ka sa.  Nka, mɔgɔw ni bɛgɛn miliyari caaman be ɲɛnamaya kɛra dugukolo kan. An mako be ɔksizɛni, dumuni ni jii min na, dugukolo b’o dilan ani an tɛ fɔn u la ka ye. Hali ni ɲamaɲamaw be to dugukolo kan, a bele cɛ ka ɲi ani ɲɛnamaya bele be se ka kɛ a kan. O be se ka kɛ cogo di do? Jehova ye dugukolo dan walisa ɲamaɲamaw ka yɛlɛma ka kɛ fɛɛn nafamanw ye tugun. An ka labɛn kabakoman fila dɔw lajɛ, Jehova ye minw kɛ walisa ɔksizɛni ani jii ka se ka sɔrɔ.

5. Ɔksizɛni be sɔrɔ cogo di ani o be mun lo tiɲɛntigiya yira?

⁵ Ɔksizɛni ye gazi ye mɔgɔw ni bɛgɛnw mako be min na walisa ka to niin na. A yirala ko ninmanfɛnw be ɔksizɛni tɔni miliyari kɛmɛ ɲɔgɔn lo sama saan o saan ani ka karibonigazi bila. O n’a ta bɛɛ, ɔksizɛni caaman bele be to ani karibonigazi tɛ caya kojugu. O be se ka kɛ sabu Jehova ye biinw ni yiri sifa caaman dan minw be karibonigazi sama ani ka ɔksizɛni bila. Ɔksizɛni sɔrɔcogo be Kɛwaliw 17:24, 25 ka kumaw tiɲɛntigiya yira. A fɔra yen ko: “[Ala] lo be nii, ani sii, ani fɛɛn tɔɔ bɛɛ di adamaden ma.”

6. Jii be sɔrɔ cogo di ani o be mun lo yira? (Koorilen nin fana lajɛn: “ Jii sɔrɔcogo ye Jehova ka nilifɛn dɔ ye.”)

⁶ Jii be dugukolo kan sabu dugukolo bilara yɔrɔ bɛnnin na ka kɛɲɛ ni tile ye. Ni dugukolo tun gwɛrɛla dɔɔni dɔrɔn tile kɔrɔ, jii bɛɛ tun bena gwɛlɛn ka taga sankolo la. Dugukolo tun bena gwan kojugu ani ka kɛ yɔrɔ janin ye. Ɲɛnamaya tun tɛna se ka kɛ a kan. Ni dugukolo yɔrɔ tun janyana dɔɔni dɔrɔn tile ma, jii bɛɛ tun bena simi ani dugukolo tun bena kɛ galasikuru belebeleba ye. Komi Jehova ye dugukolo bila yɔrɔ bɛnnin na, jii be sɔrɔ a kan ani o sababu la, ɲɛnamaya be se ka kɛ yen. Jii minw be kɔgɔjiw la ani dugukolo kan, tile b’olu gwan ani u dɔ be gwɛlɛn ka taga sankolo la ka kɛ sankabaw ye. Saan o saan, jii litiri miliyɔn caamanba lo be gwɛlɛn. O jii be tile 10 ɲɔgɔn kɛ sankolo la. O kɔ, a be kɛ nɛzi wala sanji ye. O jii be woyo ka taga kɔgɔjiw ni kɔɔw la ani u be segi ka gwɛlɛn ka taga sankolo la. Jehova y’o labɛn kɛ walisa jii kana fɔn dugukolo kan. O b’a yira ko a ye Hakilitigi ani Setigi ye.—Zɔbu 36:27, 28; Waaj. 1:7.

7. Nilifɛn min kofɔra Zaburuw 115:16 kɔnɔ, an be se ka Jehova waleɲuman lɔn cogo di o kosɔn?

⁷ An be se ka Jehova waleɲuman lɔn cogo di an ka dugukolo cɛɲumanba n’a kɔnɔnafɛnw kosɔn? (Zaburuw 115:16 kalan). O kɛcogo dɔ ye ka miiri a ka danfɛnw koo la. O bena an lasun k’a waleɲuman lɔn loon o loon a ka nilifɛn ɲumanw kosɔn. An be Jehova waleɲuman lɔn fana dugukolo koo la, an kɛtɔ k’an jija walisa an sigidaw saniyanin ka to.

8. Mun na an be se k’a fɔ ko an kunsɛmɛ labɛnna cogo kabakoman na?

⁸ Adamaden kunsɛmɛ labɛnna cogo kabakoman na. Kabi i bamuso kɔnɔ, i kunsɛmɛ labɛnna ka kɛɲɛ ni pilan tigitigi dɔ ye. Kunsɛmɛkisɛ waa caaman tora ka fara a kan miniti o miniti! Sɛgɛsɛgɛrikɛlaw y’a fɔ ko baliku kunsɛmɛ kɔnɔ, kunsɛmɛkisɛ miliyɔn 100 ɲɔgɔn lo be yen ani u be weele ko neroniw. O kunsɛmɛkisɛw lajɛnin lo ye kunsɛmɛ ye. Kunsɛmɛ be kilo kelen  ni tilan ɲɔgɔn bɔ. An k’a ka setigiya kabakoman damanin lajɛ.

9. See min b’an ye ka kuma, mun lo b’a yira k’o ye Ala ka nilifɛn lo ye?

⁹ See min b’an ye ka kuma, o ye kabako lo ye. Miiri k’a filɛ min be kɛ n’an be kumana. Walisa ka kuma kelen fɔ, i kunsɛmɛ b’a kɛ i fasa 100 ɲɔgɔn be baara kɛ ɲɔgɔn fɛ. O fasaw b’i nɛnkun, i kaan, i dagolow, i dagwagaw ani i disi la. Walisa i ka kuma ka gwɛ, o fasaw bɛɛ ka ɲi ka baara kɛ cogo tigitigi dɔ la. See min b’an ye ka kaanw fɔ, rapɔɔri dɔ bɔra o koo la saan 2019. O rapɔɔri y’a yira ko denɲɛnin be se ka kumaw faamu ani ka koow kɛ ka kɛɲɛ n’o ye. O bɛnnin lo ni sɛgɛsɛgɛrikɛla caaman ka miiriya ye. Olu fɛ, see min b’an ye ka kaanw faamu ani k’u degi, an be wolo n’o ye. Siga t’a la, o setigiya ye Ala ka nilifɛn lo ye.—Ɛkiz. 4:11.

10. See min b’an ye ka kuma, an be se ka Ala waleɲuman lɔn cogo di o kosɔn?

¹⁰ Mɔgɔ dɔw b’u yɛrɛ ɲininga fɛɛn min kama an lanin t’a la ko bɛgɛnw lo yɛlɛma yɛlɛmana ka kɛ mɔgɔw ye. See min b’an ye ka kuma, an be se ka Ala waleɲuman lɔn o koo la cogo minw na, u la dɔ ye k’an ka lannakow ɲɛfɔ o mɔgɔw ye (Zab. 9:2; 1 Piyɛri 3:15). Minw be mɔgɔw kalan ko bɛgɛnw lo yɛlɛma yɛlɛmana ka kɛ mɔgɔw ye, olu b’a fɛ an k’a miiri ko dugukolo ani ninmanfɛn minw b’a kan, olu nana u yɛrɛ ma le. An be se ka tɛmɛ Bibulu ani barokun nin ka miiriya dɔw fɛ k’an sankolola Faa lafasa. Minw b’a fɛ ka mɛnni kɛ an fɛ, an b’a ɲɛfɔ olu ye fɛɛn min kama an lanin b’a la ko Jehova lo ye sankolo ni dugukolo Danbaga ye.—Zab. 102:26; Ezayi 40:25, 26.

11. Kuun minw kama an kunsɛmɛ ye fɛɛn kabakoman ye, u la dɔ ye juman ye?

¹¹ See min b’an ye k’an hakili to koo dɔw la, o fana ye kabako lo ye. Fɔlɔ la, sɛbɛrikɛla dɔ tun y’a fɔ ko mɔgɔ be se k’a hakili to kunnafoni minw na a kunsɛmɛ barika la, n’u sɛbɛra, u be se gafe deen miliyɔn 20 ɲɔgɔn ma. Nka sisan, a yirala ko mɔgɔ be se ka koo caamanba to a hakili la ka tɛmɛ o kan. An be se ka mun lo kɛ o setigiya kabakoman barika la?

12. See min b’an ye k’an yɛrɛ degi ɲɛnamaya kɛcogo ɲuman na, mun na o b’a to an be dan na ni bɛgɛnw ye?

¹² Dugukolo kan, adamadenw dɔrɔn lo be se k’u yɛrɛ degi ɲɛnamaya kɛcogo ɲuman na. An b’o kɛ, an kɛtɔ k’an hakili to an ka koo tɛmɛninw na. O la, an be se ka kokɛcogo ɲumanw degi ani k’an ka miiriya n’an ka ɲɛnamaya kɛcogo yɛlɛma (1 Kor. 6:9-11; Kɔlɔs. 3:9, 10). An yɛrɛ be se k’an dusukun kolo walisa a ka koo ɲuman ni koo jugu lɔn ka bɔ ɲɔgɔn na (Eburuw 5:14). An be se k’a yira ko an be tɔɔw kanu, an be makari ani an be hinɛ u la. An be se ka Jehova ka tilenninya ladegi fana.

13. Ka kɛɲɛ ni Zaburuw 77:12, 13 ye, see min b’an ye k’an hakili to koo dɔw la, an ka ɲi ka baara kɛ n’o ye cogo di?

 ¹³ See min b’an ye k’an hakili to koo dɔw la, an ka Jehova waleɲuman lɔn o kosɔn. An be se k’o kɛ cogo minw na, u la dɔ ye ka banba k’an hakili jigi Jehova y’an dɛmɛ ani a y’an dusu saalo cogo minw na. O bena a to an be la a la kosɔbɛ ko a bena an dɛmɛ sini ma (Zaburuw 77:12, 13; 78:4, 7 kalan). Mɔgɔw ye koo ɲuman minw kɛ an ye, an k’an hakili to o la fana ani an k’u waleɲuman lɔn o kosɔn. Sɛgɛsɛgɛrikɛlaw y’a yira ko minw be tɔɔw waleɲuman lɔn, olu ka teli ka ninsɔndiya sɔrɔ. Jehova b’a latigɛ k’a hakili bɔ koo dɔw kan. An k’a ladegi o la fana. Ɲɛyirali fɛ, hali k’a sɔrɔ a tɛ ɲinɛ fewu, n’an nimisara an ka jurumuw na, a b’a latigɛ ka yafa ani k’a hakili bɔ u kan (Zab. 25:7; 130:3, 4). Ni dɔ y’an hakɛ ta, Jehova b’a fɛ an fana ka yafa o tigi ma.—Mat. 6:14; Luka 17:3, 4.

14. An b’a yira cogo di ko an be Jehova waleɲuman lɔn an kunsɛmɛ kosɔn?

¹⁴ An kunsɛmɛ ye Jehova ka nilifɛn kabakoman ye. An be se k’a yira ko an b’a waleɲuman lɔn, an kɛtɔ ka baara kɛ n’o nilifɛn ye walisa ka nɔɔrɔ la a Dibaga kan. Dɔw b’a latigɛ ka baara kɛ n’u kunsɛmɛ ye walisa ka sariyaw sigi u yɛrɛ ye ɲuman ni juguman koo la. Jehova lo y’an Danbaga ye. O kama, a ka ɲi an k’a faamu ko an be se ka sariya minw sigi an yɛrɛ ye, Jehova ka sariyaw nafa ka bon n’u bɛɛ ye (Ɔrɔm. 12:1, 2). N’an b’a ka sariyaw labato, an be kɛ hɛɛrɛ la (Ezayi 48:17, 18). An be kuun bɛrɛ sɔrɔ an ka ɲɛnamaya la fana. O kuun ye ka nɔɔrɔ la an Danbaga kan ani k’a dusu diya, ale min y’an Faa ye.—Talenw 27:11.

15. Jehova kɛtɔ ka Bibulu di an ma, o b’a yira cogo di ko a b’an kanu?

¹⁵ Ala ye Bibulu di an ma sabu a b’an kanu. An sankolola Faa ye hakili senu di cɛɛ dɔw ma u ye Bibulu sɛbɛ sabu a b’an  kanu kosɔbɛ. Bibulu sababu fɛ, Jehova b’an ka ɲiningali jɔnjɔnw jaabi i n’a fɔ nunu: An bɔra min? Ɲɛnamaya kuun ye juman ye? An ka siniɲasigi bena kɛ cogo di? Jehova b’a fɛ an bɛɛ k’o ɲiningaliw jaabiliw sɔrɔ. O kama, a ye mɔgɔ caaman lasun u ye Bibulu bayɛlɛma kaan caaman na. Bi, Bibulu kuturu wala a yɔrɔ dɔw be sɔrɔ kaan 3 000 ni kɔ la! Gafe si ma bayɛlɛma ani ka jɛnsɛn ka se Bibulu ma. Mɔgɔw mana kɛ yɔrɔ o yɔrɔ ani u ka kaan mana kɛ min o min ye, u fanba be se ka Bibulu kalan u yɛrɛ ka kaan na.—Koorilen nin lajɛ: “ Bibulu bayɛlɛmana kaan caaman na minw be fɔ Afiriki.”

16. Ka kɛɲɛ ni Matiyo 28:19, 20 ye, an b’a yira cogo di ko an be Jehova waleɲuman lɔn Bibulu kosɔn?

¹⁶ An ka Bibulu kalan loon o loon, ka miiri a kan ani k’an seko bɛɛ kɛ k’a ka kalanw sira tagama. An k’an jija fana k’o kalanw kofɔ mɔgɔ caamanba ye. O la, an b’a yira ko an be Jehova waleɲuman lɔn Bibulu kosɔn.—Zab. 1:1-3; Mat. 24:14; Matiyo 28:19, 20 kalan.

17. An kumana nilifɛn jumanw lo koo la barokun nin na? An bena kuma mun lo koo la barokun nata la?

¹⁷ Barokun nin na, an kumana Ala ka nilifɛn nunu koo la: Dugukolo, o min y’an sigiyɔrɔ ye, an kunsɛmɛ, o min dilanna cogo kabakoman na ani Bibulu, o min sɛbɛra hakili senu barika la. Nka, Jehova ye nilifɛn wɛrɛw di an ma minw tɛ ye ɲɛɛ na. An bena kuma olu lo koo la barokun nata la.