1-2. Nitihka Masmur 40:5, nama tiga iti pemeri ke udah diberi Jehovah ngagai kitai, lalu nama kebuah kitai deka berandauka nya?

JEHOVAH nya Petara ti gerah jari. Peratika sekeda utai ke udah diberi Iya. Ambika chunto, Iya udah meri kitai dunya ti manah, untak, enggau Bup Kudus. Ketegal tiga iti pemeri tu, kitai bisi endur diau, ulih berunding enggau bejaku, sereta bulih saut ke utai ti ditanya kitai.—Bacha Masmur 40:5.

² Ba artikel tu, kitai deka berandauka tiga iti pemeri nya. Enti kitai belematika sida, nya ngasuh kitai deka agi beterima kasih sereta ngagaka ati Jehovah, ke nempa semua utai. (Pem. 4:11) Lalu, kitai mega ulih nulung orang ke dilimpangka teori evolusi.

3. Nama kebuah dunya kitai ngalitka ati?

³ Lebuh beratika chara dunya kitai digaga, kitai nemu Jehovah nya Petara ti bepenemu. (Rom. 1:20; Heb. 3:4) Taja pan bisi planet bukai ti bepusin ngelingi mata panas, tang dunya kitai ngalitka ati. Iya bisi semua utai ke diguna ngambika mensia ulih idup.

4. Baka ni penemu Jehovah ulih dipeda ari chara Iya ngaga dunya? Terangka.

⁴ Dunya kitai tau disemaka baka perau ti melepung ba tasik. Tang, bisi sekeda utai ke enda sama entara perau enggau dunya  kitai. Ambika chunto, perau nya penuh enggau orang. Enti sida patut ngasilka oksigen, pemakai enggau ai kediri empu, lalu enti sida enda ulih muai utai ti kamah ke tasik, nama deka nyadi? Sida tentu enda ulih idup lama. Tang, dunya ulih ngasilka oksigen, pemakai, sereta ai ti diguna bebiliun iku mensia enggau jelu idup. Lalu semua utai nya enda nemu abis. Taja pan utai ti kamah agi mengkang ba dunya, tang dunya agi manah sereta ulih endur diau. Baka ni tu tau nyadi? Jehovah ngaga dunya ngambika ulih ngubah utai ke udah dibuai nyadi utai ke ulih diguna baru. Aram kitai beratika penemu Jehovah ari dua iti chara, iya nya chara oksigen enggau ai diproses ngambika tau dikena baru.

5. Nama kebuah oksigen enda nemu abis, lalu tu nunjukka nama?

⁵ Mensia enggau jelu begunaka oksigen ngambika ulih idup. Utai idup ba dunya nyintak seratus biliun tan gis oksigen ninting taun. Utai idup ti sama ngesuhka gis karbon dioksida. Taja pia, oksigen enda nemu abis dikena sida, lalu karbon dioksida enda kelalu mayuh diasilka. Nama kebuah? Laban Jehovah nempa bemacham utai tumbuh ke ulih nukar karbon dioksida ngagai oksigen. Proses tu ngamatka jaku ba Kereja Rasul 17:24, 25 ke madahka Petara ‘meri pengidup enggau seput ngagai semua mensia.’

6. Nama kebuah ai enda nemu abis, lalu tu nunjukka nama? (Peda mega kutak “ Ai Nya Pemeri ari Jehovah.”)

⁶ Ketegal Jehovah ngengkahka dunya ba endur ti ngena, dunya ulih bisi ai. Enti dunya mimit semak enggau mata panas, ai deka nyadi wap lalu dunya nyadi angat sereta rangkai. Nadai utai ulih idup. Enti dunya jauh mimit ari mata panas, ai deka beku lalu dunya nyadi ais. Tang ketegal dunya be endur ti ngena, mata panas ngangatka ai ba tasik enggau ba tanah lalu ngasilka wap. Wap ai tu niki ke langit nyadi remang. Kira-kira sepuluh hari udah nya, iya labuh nyadi ujan. Ai ke labuh nya pulai baru ngagai tasik tauka endur bukai. Ketegal proses tu, ai seruran bisi. Ninting taun, penyampau ai ke diubah mata panas nyadi wap mayuh agi ari penyampau ai ke bisi ba semua danau ba dunya. Proses ke nyadi ba ai nunjukka Jehovah nya Petara ti bepenemu-dalam sereta bisi kuasa.—Jop 36:27, 28; P-jar. 1:7.

7. Nama sekeda chara kitai ulih beterima kasihka pemeri ke dipadah ba Masmur 115:16?

⁷ Endang amat, dunya kitai udah digaga enggau manah. Baka ni kitai nunjukka diri beterima kasihka pemeri tu enggau semua utai manah ke bisi dia? (Bacha Masmur 115:16.) Siti chara nya belematika utai ke udah digaga Jehovah. Nya deka meransang kitai beterima kasihka Jehovah ninting hari laban udah meri utai ti manah ngagai kitai. Lalu kitai mega nunjukka diri beterima kasihka lebuh nyaga pemeresi ba endur kitai diau.

8. Nama kebuah kitai ngumbai untak mensia digaga enggau chara ti ngalitka ati?

⁸ Untak mensia chukup ngalitka ati. Lebuh dalam kandung indai, untak kitai mansang enggau chara ti teratur, lalu beratus ribu iti sel untak ti baru diasilka tiap minit! Bala pemansik madahka, untak mensia ke besai tuai ulih ngundan nyauka 100 biliun iti sel ke dikumbai neuron. Semua sel tu begabung lalu nyadi untak ke sepemerat 1.5 kg (3.3 paun). Pikirka sekeda utai ti ngalitka ati ke ulih digaga untak.

9. Nama nunjukka penau bejaku nya pemeri ari Petara?

⁹ Penau bejaku nya utai ti ngalitka ati. Pikirka utai ke nyadi lebuh kitai bejaku. Tiap  kali kitai nyebut siti leka jaku, untak kitai patut nentuka kira-kira 100 iti buah isi ba dilah, rekung, mulut, rang, enggau dada engkebut ba maya ti sama. Tu nulung kitai nyebut leka jaku enggau terang. Siti pansik ke dikeluarka ba taun 2019 nunjukka anak mit ke baru ada ulih ngelala jaku ke disebut orang. Tu nyukung penemu bala pemansik ke pechaya, mensia digaga ngembuan penau ulih ngelala sereta belajarka bansa jaku. Endang terang penau tu pemeri ari Jehovah.—P-sut. 4:11.

10. Baka ni chara kitai beterima kasihka penau bejaku ke udah diberi Petara?

¹⁰ Baka ni chara kitai beterima kasihka penau bejaku ke udah diberi Petara? Siti chara nya lebuh kitai madahka kebuah kitai arapka Petara nya Penempa ngagai sida ke arapka teori evolusi. (Mas. 9:1; 1 Pet. 3:15) Sida deka kitai pechaya, dunya enggau semua utai ke idup dia nyadi kediri empu. Kitai ulih ngena Bup Kudus sereta sekeda poin ba artikel tu kena ngetanka nama Jehovah lalu nerangka kebuah kitai pechaya Iya ke nempa langit enggau dunya ngagai sida ke deka ninga.—Mas. 102:25; Isa. 40:25, 26.

11. Nama nunjukka untak mensia amat ngalitka ati?

¹¹ Untak kitai ulih ngingatka mayuh utai. Seiku penulis kala madahka, untak mensia ulih ngingatka penerang ti disemaka enggau 20 juta iti bup. Tang diatu, bala pemansik madahka untak kitai ulih ngingatka mayuh agi ari nya. Nama kebuah tu amat ngalitka ati?

12. Baka ni mensia bebida ari jelu?

¹² Ari semua utai idup ke bisi ba dunya, semina mensia aja ke bisi penau ingatka utai ke udah nyadi ba pengidup sida lalu belajar ari nya. Ketegal tu, kitai ulih ngubah chara berunding enggau pengidup, lalu nyadi orang ke manah agi. (1 Kor. 6:9-11; Kol. 3:9, 10) Indah kitai ulih ngelatih penemu ati kena ngelala utai ti betul enggau salah. (Heb. 5:14) Kitai ulih belajar ngayanka pengerindu, penyiru, enggau pengasih. Lalu kitai mega ulih neladan pengelurus Jehovah.

13. Sejalai enggau Masmur 77:11, 12, baka ni kitai patut ngena pemeri ulih ngingatka utai?

¹³ Siti chara kitai beterima kasihka pemeri ulih ngingatka utai, iya nya nguji ngingatka maya Jehovah ke udah nulung sereta meransang kitai. Tu ngasuh kitai andalka Iya mega deka nulung kitai dudi hari. (Bacha Masmur 77:11, 12; 78:4, 7) Siti agi chara iya nya, ngingatka utai manah ke udah digaga orang ngagai kitai sereta beterima kasihka utai ti digaga sida. Bala pemansik beratika orang ke nemu beterima kasih deka agi gaga ati. Kitai mega patut neladan Jehovah lebuh milih enda ngingatka sekeda utai. Ambika chunto, Jehovah ulih ngingatka semua utai pasal kitai, tang enti kitai nesal ati, Iya milih deka  ngampun lalu enggai ngingatka penyalah kitai. (Mas. 25:7; 130:3, 4) Iya mega deka kitai ngampun sereta enda ngingatka penyalah sida ke udah ngemediska ati kitai.—Mat. 6:14; Luk. 17:3, 4.

14. Baka ni chara kitai beterima kasihka untak ti udah diberi Jehovah?

¹⁴ Kitai nunjukka diri beterima kasihka untak ti udah diberi Jehovah lebuh kitai ngena pemeri nya ngemuliaka Iya. Ketegal Jehovah nempa kitai, standard Iya bekaul enggau utai ti betul enggau salah tentu manah agi ari enggi kitai. Tang sekeda orang enggai nitihka runding Iya lalu sida nentuka utai ti betul enggau salah ke diri empu. (Rom. 12:1, 2) Lebuh kitai ngasika Jehovah, pengidup kitai deka lantang. (Isa. 48:17, 18) Lalu kitai nemu tuju pengidup, iya nya ngemuliaka Penempa kitai, Jehovah, sereta ngasuh Iya temegah ati enggau kitai.—J-lam. 27:11.

15. Baka ni pemeri Bup Kudus nunjukka Jehovah sayauka mensia?

¹⁵ Bup Kudus nya pemeri ari Jehovah. Ketegal Iya sayau bendar ke kitai, Iya ngena roh kudus ngiring mensia nulis Bup Kudus. Nengah Bup Kudus, Iya nyaut tanya ari kitai baka: Ari ni penatai kitai? Nama tuju pengidup? Lalu baka ni gaya pengidup jemah ila? Jehovah deka semua orang nemu saut ngagai tanya nya. Nya alai, Iya ngiring mensia nyalin Bup Kudus ngagai mayuh bansa jaku. Kemayaharitu, semua tauka sebagi ari Bup Kudus udah disalin ngagai lebih ari 3,000 iti  bansa jaku! Bup Kudus nya bup ti pemadu mayuh disalin sereta disadung di serata dunya. Enda ngira dini alai orang diau tauka nama bansa jaku ke dikena sida, sida ulih macha Bup Kudus ngena bansa jaku diri empu.—Peda kutak “ Nyalin Bup Kudus Dalam Mayuh Bansa Jaku Afrika.”

16. Bepelasarka Matthew 28:19, 20, baka ni kitai nunjukka diri beterima kasihka Bup Kudus?

¹⁶ Kitai nunjukka diri beterima kasihka Bup Kudus lebuh kitai macha sereta belematika iya ninting hari, lalu enggau naka ulih nitihka utai ti dipelajar ari Bup Kudus. Kelimpah ari nya, kitai nunjukka diri beterima kasih ngagai Jehovah lebuh kitai enggau naka ulih madahka pesan ari Bup Kudus ngagai mayuh orang.—Mas. 1:1-3; Mat. 24:14; bacha Matthew 28:19, 20.

17. (a) Nama tiga iti pemeri ke udah dikerandauka kitai ba artikel tu? (b) Nama deka dikerandauka kitai pengudah artikel tu?

¹⁷ Ba artikel tu, kitai udah berandauka tiga iti utai ke udah diberi Jehovah, iya nya dunya ke alai kitai diau, untak ti ngalitka ati, enggau Bup Kudus. Tang bisi mega pemeri bukai, lalu pemeri nya enda ulih dipeda. Kitai deka berandau pasal pemeri nya pengudah artikel tu.