1-2. Kala kilondekesa Jisálamu 40:5, mawujitu ebhi a tu bhaba Jihova? Ihi i twanda dilonga mu milongi yiyi?

JIHOVA Nzambi, mukwa kubhana. Xinganeka mu mawujitu a tu bhana mwene: o ngongo yetu ya fwama o inzo yetu ya yuka; o madiwanu a wongo wetu; ni Maka mê, o Bibidya. Kuma Jihova wa tu bhana o mawujitu atatu yâ, twala ni kididi phala kutunga, tu tena kuxinganeka ni kudizwelesa ni akwetu, ni kutambwijila o ibhwidisu ya katunda i tu dibhanga.—Tanga Jisálamu 40:5.

² Mu milongi yiyi, twanda zwela o mawujitu atatu yâ. Kyoso ki tu xinganeka mu mawujitu yâ, twanda kituka athu akwa kusakidila, twanda mesena kusangulukisa o Mubhangi wetu wa henda, Jihova. (Dij. 4:11) Twanda kala we dingi polondo phala kukwatekesa yó ene mwa dinga makutu mu kwa xikinisa kwila ima yeze ngó.

3. Mukonda dyahi o ngongo ki idifu ni jiplaneta jamukwa?

³ O unjimu wa Nzambi u dimonekena kyambote mu ukexilu wa bhange o ngongo, o inzo yetu. (Loma 1:20; Jihe. 3:4) Kwene jiplaneta jamukwa jinyunga o dikumbi, maji o ngongo yetu yene ngó yala ni ima i tu bhangesa kukala ni mwenyu.

4. Kyebhi ki tu tena kumona o unjimu wa Nzambi mu ukexilu ya bhange o ixi? Bhana kifika.

⁴ Sayi jimbandu, tu tena kusokesa o ixi mu universu kala o ulungu ku mu sanza wa kalunga. Maji o ulungu u bhanga o athu kyoso ki uzala ni athu ki wa difu ni ixi. Mu kifika, se athu a kala mu ulungu, anga a bhinga kubhanga o muha mba oxigénio  yâ phala kuhemena, kudya, ni menya, maji ka tena kutexa o ixete ya bhanga, eji laleka thembu kuxi? O athu mu ulungu yú keji laleka kufwa. Maji, o ixi idikila o mwenyu wa athu ni yama. Yene i tu bhana o muha woso, o kudya, ni menya u twa bhindamena, né kiki o ima yiyi ki yene mu bhwa. Sumbala o ima yoso yiyi yala mu ixi, maji o ixi isuluka hanji ni kuwambha kwê. Kiki kibhita kyebhi? Jihova wayudika o ixi ni uhete wa kudizelesa mudye. Twanda zwela kyebhi ki tu tena kumona o unjimu wa Jihova mu unyunginu wa muha ni mu unyunginu wa menya.

5. Mukonda dyahi ki twene mu kamba o muha? Kiki kilondekesa ihi?

⁵ Oxigénio wene o muha wene muhemena o athu, o yama ni ima yoso yala ni mwenyu. O akwa kutokwesa amono kwila o ima yoso yala ni mwenyu i hemena muha wavulu wambote mu muvu woso. O ima yiyi yala ni mwenyu ibhana muha u twixana dióxido de carbono. Né kiki o ima yoso yala ni mwenyu ki yene mu zubha o muha woso. O atmosfera ki wene mu zala ni muha wa dióxido de carbono. Kiki kibhita kyebhi? Mukonda Jihova wa bhange o mixi ni isasa yofele itambula o dióxido de carbono anga ibhana o muha. O unyunginu wa muha u tu bhangesa kuxikina mu izwelu i tu sanga mu divulu dya Ikalakalu 17:24, 25: “Nzambi . . . u bhana oso o kukola o mwenyu ni kubhwima.”

6. Mukonda dyahi ki twene mu kamba menya? Kiki kilondekesa ihi? (Tala we o kaxa “ O Unyunginu wa Menya, Ujitu wa tu Bhana Jihova.”)

⁶ O menya atena kukala mu mawukexilu atatu, kala matadi a jelu, muha, mba menya ngó. Kuma o ngongo yetu ya dikexidila mu kididi kya tokala ni dikumbi, yene itena kukala ni menya. Se ya zukamene kyavulu ku dikumbi o menya oso eji kukuta, o ngongo yeji tema kyavulu, ki kweji kala mwenyu. Se yexile dikanga dyavulu ku dikumbi, o planeta yoso yeji talala kyavulu, yeji kituka ki ditadi kya jelu. Kuma Jihova wa tula o ngongo mu kididi kya tokala, yene yala ni unyunginu wa menya, ubhana o mwenyu. O mwanya wa dikumbi, utemesa o menya mu kalunga, o menya a banda kala munza mba vapolo, anga akituka matuta. Ku muvu umoxi, o menya oso a tunda mu kalunga mukonda dya mwanya, a beta dingi kota, o menya a izanga yoso mu ngongo ndenge. Kyoso o menya kya kituka munza, a banda ku atmosfera, abhita dikwinyi dya izuwa, anga a lawuka kala mvula. Ku disukilu, o menya a vutuke dingi mu kalunga, mba mu jingiji, o unyunginu wa menya anga u dibhitulule dingi. Jihova wa sokejeka o unyunginu yu, phala mu ngongo ki mu kambe menya. Kiki kilondekesa o unjimu ni kutena kwa Jihova.—Jobe 36:27, 28; Ndo. 1:7.

7. Ebhi o mawukexilu u tu londekesa o kisakidilu kyetu ku mawujitu o tumbule mu Jisálamu 115:16?

⁷ Kyebhi ki tu tena kulondekesa o kisakidilu mukonda dya ngongo yetu yayuka, ni ima yoso yala-mu? (Tanga Jisálamu 115:16.) Tu bhanga kiki, mu kuxinganeka mu ima ya bhange Jihova. Kiki kyanda tu bhangesa kusakidila Jihova izuwa yoso, mukonda dya ima yambote ya tu bhana. Tu londekesa we o kisakidilu kyetu mu ku tu bhana o ngongo, kyoso ki tu bhanga yoso phala kuzelesa o kididi bhu twa tungu.

8. Mukonda dyahi tu tena kuzwela kwila, o wongo wetu a ubhange mu ukexilu wa madiwanu?

⁸ O wongo wetu, a ubhange mu ukexilu wa madiwanu. Kyoso ki wexile mu mala dya mamenu, o wongo we wayi ni kudisokejeka mu ukexilu wa katunda, mu ithangana yoso kwa moneka mazunda a jiselula ja wongo, ja ubhe! Akwa kutokwesa amono kwila, o wongo wa mwadyakime, wala ni 100 ja tuzunda a jiselula  jiji. O jiselula jiji, jidibunda phala kukituka o wongo. O wongo wetu, unema 1.5 (kilu imoxi ni kaxaxi). Kindala tu tale o madiwanu atena kubhanga o wongo wetu.

9. Ihi i ku xikinisa kwila, o uhete wetu wa kuzwela ujitu wa tu bhana Nzambi?

⁹ O uhete wetu wa kuzwela, madiwanu. Xinganeka ngo ibhita kyoso ki uzwela. Diba dyoso di uzwela, o wongo we wendesa 100 dya mixibha, yala mu dimi dyê, dikelengu, mizumbu, matama, ni phetu. O mixibha mu idyandu yoso yiyi, ikalakala mu kuzamba kumoxi, phala o izwelu atene ku itendela. Yalungu ni uhete wa kuzwela, mu muvu wa 2019 o adilongi amono kwila, kate mwene o tubwetele, atena kutendela ni kutungununa o izwelu. O milongi yiyi, ikwatekesa dingi o itokwesu ya yó axikina kwila, atu vwala kyá ni uhete wa kutungununa ni kudilonga o madimi. Sé phata, o uhete wetu wa kuzwela, ujitu wa tu bhana Nzambi.—Mak. 4:11.

10. Kyebhi ki tu tena kulondekesa kisakidilu mu ujitu wa kuzwela, wa tu bhana Nzambi?

¹⁰ O ukexilu umoxi wa kulondekesa o kisakidilu mu ujitu wa kuzwela, o kujimbulula o ixikanu yetu kwa Nzambi, kyoso athu kya twibhwidisa se mukonda dyahi ki tu xikina mu milongi ya kwila, ima yoso yeze ngó. (Jisá. 9:1; 1 Phe. 3:15) O athu azokela o milongi yiyi, amba kwila, o ngongo ni ima yoso yala-mu, ki Nzambi wa ibhange. Bhu kaxi ka Bibidya ni jipondo ji twa dilongo mu mbandu yiyi, tu tena kuzokela o Tata yetu ya dyulu, mu kujimbulula ku athu amesena kwívwa, se mukonda dyahi tu xikina ni kidi kyoso kwila, Jihova mwene o Mubhangi wa dyulu ni ixi.—Jisá. 102:25; Iza. 40:25, 26.

11. Mukonda dyahi tu tena kuzwela kwila, o wongo wetu a ubhange mu ukexilu wa katunda?

¹¹ O uhete wetu wa kulembalala, madiwanu. M’ukulu, sayi musoneki wambe kwila, o wongo wetu utena kulembalala milongi yala mu 20 a tuzunda a madivulu amakota. Maji lelu, o athu amono kwila, mbe tu tena kulembalala dingi milongi yavulu, o yoyo ndenge. Sé phata, yú uhete wa madiwanu u twala nawu!

12. Mukonda dyahi o uhete wa kudilonga madisá alungu ni wendelu wambote, u tu bhangesa kuditungula ku yama?

¹² Bhu kaxi ka ima yoso yala ni mwenyu mu ngongo, o athu ene ngó ala ni uhete wa kudilonga madisá alungu ni wendelu wambote, kulembalala ni kutonginina o izulukutu yabhiti m’ukulu. Kyenyiki, tu tena kudilonga ima ya beta dingi kota, kulungulula o ukexilu wetu wa kuxinganeka ni mwenyu wetu. (1 Kol. 6:9-11; Kol. 3:9, 10) Mu kidi, tu tena kulonga o kitongolwelu kyetu, phala kutungula o ima yambote ku ima yayibha. (Jihe. 5:14) Tu tena we kulondekesa o henda, kyadi, kuloloka akwetu, ni kukayela o ukexilu wa Jihova wa kubatula o maka ni kuyuka.

13. Kala kilondekesa Jisálamu 77:11, 12, kyebhi ki twa tokala kukalakala ni ujitu wetu wa kulembalala?

¹³ Tu londekesa o kisakidilu mu ujitu wa kulembalala, mu kusota kulembalala o  ithangana yoso, kyoso Jihova kya tukwatekesa ni ku tu ximbakatesa m’ukulu. Kubhanga kiki kwanda bandekesa o kidyelelu kyetu, kya kwila, ku hádya mwene wanda tu kwatekesa we. (Tanga Jisálamu 77:11, 12; 78:4, 7) O ukexilu wa mukwa o kulembalala o ima yambote i tu bhanga akwetu ni kulondekesa o kisakidilu mu ima ya bhanga. Akwa kutokwesa amono kwila, o athu ala ni ukexilu wa kusakidila, ala dingi ni kisangusangu. Kima kyambote kyoso ki tu kayela o phangu ya Jihova mu ku jimba o ima yamukwa. Mu kifika, Jihova muthu wayuka, mwene ka tena ku jimba kima. Maji kyoso kitu dyela, mwene usola kuloloka ni kujimba o itondalu yetu. (Jisá. 25:7; 130:3, 4) Mwene wa mesena kwila tu loloka we akwetu kyoso kya tu luwalesa anga a tu bhinga muloloki.—Mat. 6:14; Luka 17:3, 4.

14. Kyebhi ki tu londekesa o kisakidilu kyetu, mu ujitu wa katunda, o wongo?

¹⁴ Tu londekesa o kisakidilu kyetu, mu ujitu yu wa katunda, o wongo, kyoso ki tu sota kubhana o fuma kwa Yó wa tu bhana-u. Amukwa a kalakala kyayibha ni wongo wâ, abhanga o ijila yâ, asola mudyâ o ima yambote ni ima yayibha. Kuma Jihova mwene wa tu bhange, tu tena kuzwela kwila, mwene ngó wa tokala ku tu bhana o ijila. O ijila yê ya beta-kota, o yetu ndenge. (Loma 12:1, 2) Tu kala ni kutululuka, kyoso ki tu belesela Jihova. (Iza. 48:17, 18) O kubhanga o vondadi ya Tata yetu o Mubhangi, ku mu sangulukisa o muxima.—Jisa. 27:11.

15. Kyebhi o ujitu wa Bibidya, ulondekesa o henda ya Jihova ku athu?

¹⁵ O Bibidya, ujitu wa henda wa tu bhana Nzambi. O Tata yetu ya dyulu, wabhusu mala phala ku isoneka mukonda wa tu zolo kyavulu. Bhu kaxi ka Bibidya, Jihova u tambwijila o ibhwidisu ya beta-kota, itwene mu dibhanga, kala: Twa tundu kwebhi? Mukonda dyahi twala ku mwenyu? Ihi yanda bhita n’etu ku hádya? Jihova wa mesena kwila, o twana twê twoso, twijiya o itambwijilu ya ibhwidisu yiyi. Kyenyiki, tunde ukulu, mwene wene mu bhangesa  mala kulungulula o Bibidya mu madimi avulu. Lelu, o Bibidya ya muvimba, mba mu mbandu, a ilungulula kyá mu 3.000 a madimi ndenge! O Bibidya, yene o divulu dya beta-kota ku di lungulula ni kudibhana, mu ngongo yoso. Kabasa o kididi kwa tungu mba o dimi dizwela o muthu, avulu atena kutanga o Bibidya mu dimi dyâ dya avwalukilu.—Tala o kaxa “ Kulungula o Bibidya mu Madimi a Africa.”

16. Kala kya londekesa Matesu 28:19, 20, kyebhi ki tu tena kulondekesa o kisakidilu kyetu mu ku tu bhana o Bibidya?

¹⁶ Tu tena kulondekesa o kisakidilu kyetu mu Bibidya, mu ku itanga izuwa yoso, kuxinganeka mu milongi i tu dilonga, ni kubhanga yoso i tu tena phala kukumbidila i twa dilongo. Ku mbandu yengi, tu tena kulondekesa o kisakidilu kyetu kwa Nzambi, mu kulonga athu avulu o njimbu ya Bibidya.—Jisá. 1:1-3; Mat. 24:14; tanga Matesu 28:19, 20.

17. Mawujitu ebhi u twa dilongo mu milongi yiyi ni ihi i twanda dilonga mu milongi yanda kayela?

¹⁷ Mu milongi yiyi twa dilongo o mawujitu a tu bhana Nzambi, kala, o inzo yetu; o ngongo, o madiwanu a wongo ni Mak’â Nzambi, o Bibidya. Maji kwene hanji mawujitu a mukwa a tu bhana Jihova ki tu tena kwa mona ni mesu. Mu milongi ya kayela, twanda dilonga o mawujitu yâ ki tu tena kwa mona ni mesu.