CHIHANDE CHAKULINANGULA 21
Uno Mweji Kumusakwililanga Kalunga haMawana Amihana Tahi?
“Ove Yehova Kalunga kami, vyuma unalingi omwo vyavula! Milimo yove yakukomwesa yayivulu, kaha nawa weji kutushinganyekanga chikuma.”—SAMU 40:5.
MWASO 5 Milimo yaKalunga Yakukomwesa
VYUMA NATUSHIMUTWILA *
1-2. Kweseka naSamu 40:5, mawana muka atuhana Yehova, kaha mwomwo ika natuwashimutwilila?
YEHOVA apwa Kalunga wazumbu. Mawana amwe atuhana shina pulaneti yino twatwamaho, nawongo uze atunga mujila yakukomwesa, naMazu enyi Mbimbiliya yize yapwa yakulipwila. Kuhichila mumawana kana, Yehova atuhana limbo lyakutwamaho, nauhashi wakushinganyeka nawakuhanjika, kaha nawa akumbulula vihula vyavilemu vize tunahase kuhulisa.—Tangenu Samu 40:5.
2 Muchihande chino natushimutwila hali awa mawana atatu atuhana Kalunga. Nge natushinganyekanga hamawana kana, kaha natuwamona kupwa amalemu nakufwilanga nawa kulinga vyuma vyakwivwisa Yehova Tengi yetu kuwaha. (Kuso. 4:11) Nachitukafwa nawa tutachikize mwakukafwila vaze vahungumwisa nakunangula chakwamba ngwavo vyuma vyalijilile vivene.
PULANETI YETU YAKULIPWILA YAMAVU
3. Mwomwo ika pulaneti yamavu yapwila yakulipwila?
3 Jila Yehova atengelelemo pulaneti yamavu yasolola hatoma nge atwama namangana chikuma. (Loma 1:20; Hepe. 3:4) Hajipulaneti josena jize jeji kujingulukanga kulikumbi, pulaneti yamavu yikiko kaha yatwama navyuma vize vyeji kukafwanga vatu vayoye.
4. Mwomwo ika natwambila ngwetu yino pulaneti yetu yamwaza chikuma kuhambakana wato?
4 Yino pulaneti yamavu tunahase kuyifwanyisa kuwato uze uli hakachi kakalungalwiji. Olozenyi pulaneti yetu yalihandununa nawato. Chakutalilaho, kachi nge vatu vali muwato navavalweza ngwavo valitungile vavene peho yavo, navyakulya, nameya nakuhona kumbila majilo, kutala navayoya halwola lwalusuku tahi? Vatu kana kaveshi kushimbula nakufwako. Oloze yino pulaneti yatwama navyuma vyavivulu vize vyeji kukafwanga vyuma vyakuyoya vyosena vitwaleho lika kuyoya. Yeji kutunganga peho navyakulya nameya, kaha nawa vyuma kana kavyakumako. Numba tuhu tweji kumbilanga majilo amavulu, oloze yino pulaneti yetu hanga yapwila lika yamwaza chikuma. Mwomwo ika? Yehova ayitungile mujila yize nayilingisa vyuma vyamajilo vyalumuke nakupwa cheka vyuma vyamwaza. Natushimutwila omwo meya napeho yize tweji kuhwimanga vyeji kulitungululanga.
5. Uno peho yaoxygen yeji kulitunganga ngachilihi, kahechi chasolola ika?
5 Peho yaoxygen yikiko veji kuhwimanga kuvyuma vyakuyoya vyosena kuhakilako vene nayetu vatu. Vaka-kuhehwojola vamba ngwavo vyuma vyakuyoya vyeji kuhwimanga peho yaoxygen yayivulu chikuma mumwaka. Kaha nawa vyeji kulovolanga peho yacarbon dioxide. Chipwe ngocho kavakumisa kuhwima peho yaoxygen yosenako, kaha nawa peho yacarbon dioxide kayavula chikuma kuhambakana yaoxygenko. Mwomwo ika? Mwomwo Yehova atengele nawa vyuma vyeka vyavivulu vize vyeji kuhwimanga peho yacarbon dioxide nakulovola peho yaoxygen. Shikaho hakuwana nge Yehova atuhana peho yakuhwima, tweji kwitavilanga mazu vasoneka hali Vilinga 17:24, 25 ngwavo: “Kalunga . . . eji kuhananga vatu vosena kuyoya nakuhwima navyuma vyosena.”
6. Uno meya eji kulitungululanga ngachilihi, kahechi chasolola ika? (Talenu nawa lipwata lyakwamba ngwavo “ Meya Apwa Wana waKufuma Kuli Yehova.”)
6 Meya amutulwiji kawakondako mwomwo pulaneti yetu vayihaka hachihela chamwaza. Kachi nge vayihachishile chindende kulikumbi, kachi meya osena omamo lyehi mutulwiji. Kaha nawa nge vayisosolweseleko chindende kulikumbi kachi meya osena alumuka nakupwa lilolwa. Shikaho, hakuwana nge Yehova ahaka pulaneti yetu hachihela chamwaza, chalingisa tupwenga nameya amavulu akuzachisa milimo yetu. Likumbi lyeji kulingisanga meya akakumuke nakuya muutangatanga nakupwa jino mavwi. Meya aze eji kukakumukanga nakuya muutangatanga apwa amavulu chikuma kuhambakana aze atwama mutulwiji. Meya kana eji kutwamanga muutangatanga kafwe hamakumbi 10, numba anoke kupwa vula chipwe mbundu. Nge vula yinanoko lyehi meya kana eji kuyanga cheka mutulwiji. Echi kulitungulula chameya chasolola nge Yehova atwama namangana nangolo nawa.—Yopa 36:27, 28; Kwambu. 1:7.
7. Jijila jimwe muka tunahase kusolwelamo kusakwilila chetu kuli Yehova hamawana vavuluka hali Samu 115:16?
7 Vyuma muka navitukafwa tusakwilile Yehova hakutuhana pulaneti yetu navyuma vyatwamaho? (Tangenu Samu 115:16.) Chuma chimwe shina kuhunanananga havyuma atenga Yehova. Echi nachitulingisa tumusakwililenga hakumbi hakumbi havyuma vyamwaza atuhana. Kaha nawa natusolola ngwetu twamusakwilila Yehova, hakulamanga membo etu kupwa aunyoji.
YEHOVA ATUHANA WONGO
8. Mwomwo ika natwambila ngwetu wongo wetu vautunga mujila yakukomwesa?
8 Wongo wamutu vautunga mujila yakukomwesa. Omu wapwile mujimo lyanoko, wongo waputukile kulitunga mujila yakulonga nakutunga nawa maselusi amavulu mumunyutu himunyutu. Vaka-kuhehwojola vawana ngwavo muwongo wamutu wakukola mwatwama maselusi amavulu chikuma aze vavuluka ngwavo neurons. Awa maselusi vawakungulwila hamwe ngocho alema kafwe kilongalamu yimwe nachimbwa. Tushimutwilenu vyuma vimwe weji kulinganga wongo.
9. Vyuma muka vyamilingisa mwitavile ngwenu uhashi wakuhanjika wapwa wana wakufuma kuli Kalunga?
9 Uhashi wakuhanjika wapwa wakulipwila. Achishinganyekenu havyuma vyeji kusolokanga nge tuli nakuhanjika. Shimbu kanda muvuluke kala lizu, wongo weji kuvangilanga kulingisa mishisa kafwe 100 yakulilimi, nayakumiliu, nayamivumbo, nayakujimbangi, namishisa yamutulo yizachile hamwe. Eyi mishisa yosena yatela kuzachila hamwe numba mazu namuhanjika evwakane. Vyuma vahehwojwele mu 2019 kutalisa kukulinangula malimi vyasolwele nge kemba eji kwivwanga lizu hilizu navahanjika vatu. Kuhehwojola kanechi chakundwiza vishinganyeka vyavaka-kuhehwojola vavavulu vyakwamba ngwavo vatutenga nauhashi wakulinangula malimi. Chikupu vene, uhashi wakuhanjika wapwa hiwana wakufuma kuli Kalunga.—Kulo. 4:11.
10. Natusolola ngachilihi ngwetu twasakwilila Kalunga hakutuhana wana wakuhanjika?
10 Jila yimwe tunahase kusolwelamo ngwetu twasakwilila Kalunga hakutuhana wana wakuhanjika shina kwambulilako vakwetu vyuma twafwelela, nakuvalumbunwina ovyo twakanyina kunangula chakwamba ngwavo vyuma vyalijilile vivene. (Samu 9:1; Petu. 1, 3:15) Vatu vaze vafwelela mukunangula kana vashinganyeke ngwavo ano mavu navyuma vyosena vyatwamaho vyejile mukukasumuna. Tunahase kuzachisa Mbimbiliya navishina vili muchihande chino mangana tuhakwile Setu wamwilu nakulumbunwina vaze vasaka kutwivwilila vejive ovyo vyatulingisa tufwelele ngwetu Yehova ikiye atengele melu namavu.—Samu 102:25; Isa. 40:25, 26.
11. Chuma chimwe muka chalingisa wongo wamutu kupwa wakulipwila?
11 Kalunga atuhana nawa uhashi wakwanuka vyuma. Kunyima, muka-kusoneka mikanda umwe ambile ngwenyi wongo wamutu unahase kwanuka mijimbu yamumikanda 20,000,000. Oloze makumbi ano vawana nge wongo wamutu unahase kwanuka mijimbu yayivulu chikuma kuhambakana eyi tunavuluka. Chikupu vene ou hiwana wakulipwila.
12. Uno uhashi wetu wakulinangula vilinga vyamwaza watulingisa ngachilihi tulihandunune natunyama?
12 Havyuma vyosena atenga Yehova, vatu kaha vakiko vatwama nauhashi wakulinangula vilinga vyamwaza hakwanuka nakukekesa vyuma vyakunyima. Ngocho, tunahase kupwa tuvatu vamwenemwene nakwalumuna vishinganyeka navilinga vyetu. (Koli. 1, 6:9-11; Kolo. 3:9, 10) Kaha nawa tunahase kunangula chivezu chetu mangana chitukafwe kuhandununa vilinga vyakwoloka nevi vyakuhenga. (Hepe. 5:14) Tunahase nawa kulinangula mwakusolwela zangi nakutetela nakeke, nakulondezeza Yehova uze atwama nachiyulo.
13. Kweseka naSamu 77:11, 12, twatela kuzachisa ngachilihi uhashi wakwanuka?
13 Tunahase kusolola ngwetu twasakwilila Kalunga hakutuhana uhashi wakwanuka vyuma kachi nge natwanukanga jijila napunga nakutukafwilamo nakutuvendejeka. Echi nachitukafwa tufwelele ngwetu nakulutwe nawa mwakatukafwa. (Tangenu Samu 77:11, 12; 78:4, 7) Twatela nawa kwanukanga vyuma veji kutulingilanga vakwetu vatu nakuvasakwilila. Vaka-kuhehwojola vawana ngwavo vatu vaze vatwama namuchima wakusakwilila, vapwa vakuwahilila. Kaha nawa twatela kulondezeza Yehova hakusakulanga vyuma twatela kwanukanga. Chakutalilaho, numba tuhu chapwa chachikalu Yehova kuvulyama vyuma, oloze nge tunapihilila nakwalumuka, eji kukonekelanga nakuvulyama vyuma tweji kulimbenjanga. (Samu 25:7; 130:3, 4) Shikaho asaka nayetu tukonekelenga vakwetu nge vanalikonekela hachuma vanatupihisa.—Mateu 6:14; Luka 17:3, 4.
Natusolola ngwetu twasakwilila Yehova hakutuhana wongo kachi nge natuuzachisanga mujila yize nayimuvumbika (Talenu palangalafu 14) *
14. Natusolola ngachilihi ngwetu twasakwilila Kalunga hakutuhana wongo?
14 Kachi nge natuzachisanga wongo wetu mujila yize nayineha kavumbi kuli Kalunga kaha natusolola ngwetu twamusakwilila hakutuhanawo. Vatu vamwe veji kuzachisanga wongo wavo hakusakula kulinga vyuma vanasake vavene. Oloze hakuwana nge Yehova ikiye atutengele, nachipwa chamwaza kukavangiza vyuma mwatulweza. (Loma 12:1, 2) Nge natukavangizanga jishimbi jenyi, kaha natutwamanga mukuunda. (Isa. 48:17, 18) Natutachikiza nawa chuma chachilemu twatela kulinga mukuyoya, chikiko kuvumbika Tengi yetu kaha nawa Setu, nakumwivwisa kuwaha kumuchima.—Vishi. 27:11.
MBIMBILIYA YAPWA WANA WAKULIPWILA ATUHANA YEHOVA
15. Mwomwo ika natwambila ngwetu Yehova atuzanga hakutuhana Mbimbiliya?
15 Mbimbiliya hiwana wakufuma kuli Kalunga. Ahwiminyinyine vatu vayisoneke mwomwo atuzanga chikuma. Shikaho Yehova eji kukumbululanga vihula vyavilemu vyakufwana nge: Uno twafuma kulihi? Mwomwo ika tweji kuyoyelanga? Vyuma muka tuli nakutalilila kulutwe? Yehova asaka vatu vosena vatachikize mwakukumbulwila vihula kanevi, ngocho nalingisa vatu valumune Mbimbiliya mumalimi amavulu. Makumbi ano, Mbimbiliya yosena yamuundu chipwe yachihanda yili jino mumalimi akuzomboka 3,000. Kaha ukiko mukanda valumuna mumalimi amavulu nakuupangila kuvatu vavavulu kuhambakana mikanda yeka yosena. Shikaho vatu vavavulu vanahase kulinangula Mbimbiliya mulilimi lyavo chamokomoko nakuchihela vatwama.—Talenu lipwata lyakwamba ngwavo, “ Kwalumuna Mbimbiliya muMalimi amuAfrica.”
16. Kweseka naMateu 28:19, 20, natusolola ngachilihi ngwetu twasakwilila Kalunga hakutuhana Mbimbiliya?
16 Natusolola ngwetu twasakwilila Kalunga hakutuhana Mbimbiliya kachi nge natuyitanganga hakumbi hakumbi, nakushinganyeka havyuma natutanga, nakuvizachisa mukuyoya chetu. Kaha nawa twatela kuzata nangolo mangana twambulileko vatu vavavulu mujimbu watwamamo.—Samu 1:1-3; Mateu 24:14; tangenu Mateu 28:19, 20.
17. Mawana muka tunashimutwila muchihande chino, kaha mawana muka natushimutwila muchihande nachikavangizaho?
17 Tunashimutwila hamawana amwe aze atuhana Kalunga. Atuhana mavu aze apwa limbo lyetu lyamwaza, nawongo uze atunga mujila yakukomwesa, naMazu enyi ahwima Mbimbiliya. Oloze kwatwama nawa mawana eka amavulu atuhana Yehova aze katwamona namesoko. Natushimutwila hamawana kana muchihande nachikavangizaho.
MWASO 12 Yehova Apwa Kalunga Wakulitulaho
^ par. 5 Chino chihande nachitukafwa tusakwililenga Yehova hamawana atatu atuhana. Nachitukafwa nawa twijive mwakushimutwilila navaze veji kuhanjikanga ngwavo kakwatwama Kalungako.
^ par. 64 MAZU AKULUMBUNUNA MUVWIMBIMBI: Ndumbwetu wapwevo ali nakulinangula lilimi lyakulifuchi lyeka mangana anangulenga vamwiza Mazu aKalunga.
