1-2. Sâm 40:5-a sawi angin, Jehova’n eng thilte nge min pêk a, engvângin nge chûngte chu kan sawiho vang?

JEHOVA chu Pathian thilphal tak a ni a. A thilpêk ṭhenkhat hi han ngaihtuah teh: mawi tak leh danglam taka siam kan chênna leilung; mak danglam taka siam kan thluak; leh a Thu, Bible hlu takte hi. Chûng thilpêk pathumte hmangin, Jehova chuan chênna tûr in te, ngaihtuah theihna leh inbiak pawh theihna te, leh kan zawh theih azawnga zawhna pawimawh ber berte chhânna min pe a ni.—Sâm 40:5 chhiar rawh.

² He thuziakah hian, chûng thilpêk pathumte chu tâwi têin kan sawiho vang. Chûngte chu kan chhût ngun poh leh lâwmna kan nei lehzualin, hmangaihna nei tak Siamtu, Pathian Jehova tihlâwm duhna kan nei lehzual ang a. (Thup. 4:11) Chanchhâwnna thurin dik lo hmanga buma awmte ṭanpui tûrin kan inbuatsaih ṭha lehzual thei bawk ang.

3. Engvângin nge leilung hi a danglam bîk êm êm?

³ Pathian finna chu kan chênna leilung a siam dânah hian chiang takin a lang a. (Rom 1:20; Heb. 3:4) Kan leilung hi nî hêltu awmchhun a ni lo; mahse, mihringte nunna chhawmdâwl thei tûra dinhmun dik taka a awm avângin a danglam bîk êm êm a ni.

4. Engvângin nge leilung hi mihringte siam lawng aiin a ṭha zâwk tia kan sawi theih?

⁴ Vân boruak zau taka awm leilung hi tuifinriata lawng pakhat nên engemaw chen khaikhin theih a ni a. Mahse, leilung hi mihring siam, mi a khata an chuanna lawng lakah chuan danglam tak a ni. Entîr nân, lawnga chuangte chuan oxygen te, ei tûr te, leh tuite mahnia an insiam chawp a ngaiin, bawlhhlawhte chu lawng pâwnah paih thei lo ta se, lawng chhûngah  eng chen nge an awm theih ang? Chu lawnga chuangte chu rei lo têah an thi ngei ang. Chumi nêna inang lo takin, leilung chuan nunna nei thil siam tlûklehdingâwn tam tak chu a châwm reng a. Mihringte mamawh oxygen te, ei tûr te, leh tuite chu a pe reng a, chûngte chu kan tlachham ngai lo. Bawlhhlawhte chu vân boruakah paih chhuah ni lo mah se, leilung chu a mawi ngaiin a la mawi reng a, chên theihin a la awm reng a ni. Chu chu engtin nge a nih theih? Jehova chuan leilung hi amaha insiam ṭha leh zêl thei tûra a siam vâng a ni. Chutianga mak danglam taka a insiam ṭhat theih dânte zînga pahnih, oxygen kal kual dân leh tui kal kual dân chu tâwi têin i lo enho vang u.

5. Oxygen kal kual dân chu eng nge ni a, chu chuan eng nge a nemngheh?

⁵ Oxygen chu mihringte leh ramsate nun reng theih nâna mamawh boruak chi khat a ni a. Nunna nei thil siamte hian kum khat chhûngin oxygen tam tak kan hîp nia chhût a ni. Chûng nunna nei thil siamte vêk chuan carbon dioxide tia koh boruak chi khat chu kan thaw chhuak leh a. Mahse, oxygen zawng zawng chu kan hîp zo vek ngai lo ang bawkin, boruak chu carbon dioxide-a a khah avângin thâw thei lovin kan awm ngai hek lo. Chu chu engtin nge a nih theih? Jehova chuan thil nung chi dang—thingkûng lian tak tak aṭanga hnim tê tak tê tê thlengin—a siam a, chûngte chuan carbon dioxide chu hîpin, oxygen an pe chhuak a ni. Chutiang chuan, he thil kal kual dân hian kan boruak hîp tûr a siam avângin, Tirhkohte 17:24, 25-naa: ‘Pathian chu engkim hnêna nunnate, thâwknate leh thil zawng zawngte petu a ni,’ tih thu hi a nemnghet a ni.

6. Tui kal kual dân chu eng nge ni a, chu chuan eng nge a târ lan? (“ Jehova Thilpêk Tui Kal Kual Dân,” tih bâwm chu en rawh.)

⁶ Leilung hi nî aṭanga a tâwk chiaha hlaa a awm avângin, leilungah hian tui a awm thei a ni. Tlêma nî a hnaih hret chuan, tui zawng zawng chu a sat lutuk avângin a so ral ang a, leilung hi nunna neite awm theih lohna hmunah a chang ang. Tlêma nî a hlat hret a nih pawhin, tui zawng zawng chu a khal vek ang a, leilung hi tui khal mûm lian takah a chang ang. Jehova’n a tâwk chiaha hlaa a dah avângin, leilunga tui kal kual dân chuan nung reng thei tûrin min siam a ni. Nî chuan tuifinriata tui leh leilung boruak chu a ti sa a, chu chuan chhûma insiam tûr tui hûte a chhuahtîr a. Kum tinin, nî hian tui liter maktaduai tam tak chu tui hû-ah a chantîr a. Chûng tui hûte chu ruah, a nih loh leh vûra a chan hmain vân boruakah ni sâwm vêl a awm a ni. Chu tui chu a tâwpah, tuifinriatah leh tui awmna hmun dangahte a lo lêt leh a, chutiang chuan a kal kual reng a. Jehova chuan leilunga tui a awm reng theih nân he tui kal kual dân hi a siam a, chu chuan a finzia leh thil a tihtheihzia a târ lang a ni.—Job. 36:27, 28; Thur. 1:7.

7. Sâm 115:16-a târ lan thilpêk avânga kan lâwmzia lantîr theih dân kawng ṭhenkhat chu eng nge ni?

⁷ Kan leilung mak danglam tak leh thil ṭha min pêkte avânga kan lâwmzia engtin nge kan lantîr theih? (Sâm 115:16 chhiar rawh.) Kan lantîr theih dân kawng khat chu Jehova thil siamte chhût ngunna hmangin a ni. Chu chuan Jehova min pêk thil ṭhate avânga nî tin lâwmna lantîr tûrin min chêttîr ang. Chu bâkah, kan awmna hmun chu kan theih ang tâwka tithianghlimin kan lâwmzia kan lantîr thei bawk a ni.

8. Engvângin nge kan thluak hi mak danglam taka siam a ni kan tih theih?

⁸ Mihring thluak hi mak danglam taka siam a ni a. Nu pum chhûnga kan awm lai aṭangin, kan thluak chu duan a nih angin a rawn ṭhang  chho va, minute tin hian thluak cell thar sâng tam tak a insiam a ni. Mi thiamte chuan mi puitling tawh thluakah hian neuron an tih cell tlûklehdingâwn 100 dâwn lai a awm an ring a. Chûng cell-te chu a hlâwma awmin, pound 3.3 (1.5 kg) vêla rit a ni. Thluak thiltihtheihzia hi tlêm azâwng han ngaihtuah teh.

9. Kan ṭawng theihna hi Pathian thilpêk a ni tih engin nge rinnghehtîr che?

⁹ Kan ṭawng theihna hi thil mak tak mai a ni a. Kan ṭawng laia thilthleng hi han ngaihtuah teh. Thu mal pakhat i sawi apiangin, i thluak chuan i lei, i hrawk, i hmui, i khabe, leh i âwma tihrâwl 100 vêl chêt dân chu a thunun a. Thu malte fiah taka lam ri tûr chuan, chûng tihrâwlte chu dik taka a chêt sawn a ngai a ni. Ṭawng thiam theih dân chungchângah, kum 2019-a neih zirna pakhat chuan nau piang hlimte hian thu mal tin hi an hre thiam theiin, an chhâng lêt thei tih a târ lang. Chu chuan ṭawng hre thiam thei leh zir thei tûrin kan lo piang tih mi thiam tam takte sawi chu a nemnghet a ni. Ni e, kan ṭawng theihna hi Pathian thilpêk a ni.—Ex. 4:11.

10. Pathian thilpêk kan ṭawng theihna avânga kan lâwmzia engtin nge kan lantîr theih?

¹⁰ Kan ṭawng theihna thilpêk avânga kan lâwmzia lantîr theih dân kawng khat chu chanchhâwnna ringtute hnêna Pathianin thil engkim a siam tih kan rin nachhan hrilh hi a ni. (Sâm 9:1; 1 Pet. 3:15) Chanchhâwnna ringtute chuan leilung leh a chhûnga nunna awm zawng zawng hi tihpalh thil thua lo awm a ni tih ring tûrin min duh a. Bible leh he thuziaka kan sawiho tâk thute hmangin, Jehova chu lei leh vân Siamtu a ni tih kan rinzia ngaithla duhtute hnêna hrilhin, kan Pa vâna mi chu kan ṭan thei a ni.—Sâm 102:25; Is. 40:25, 26.

11. Kan thluak hi thil mak tak a nih chhan pakhat chu eng nge ni?

¹¹ Thil kan hriat reng theihna hi mak tak a ni a. Tûn hmain, ziaktu pakhat chuan, mihring thluak hian lehkhabu lian tak maktaduai 20 vêla thu inziakte chu a hre reng thei niin a sawi a. Mahse, tûnah chuan, kan thluak hian chu aia tam chu a hre thei nia ngaih a ni. Kan hriat reng theihna avângin eng tih theihna danglam bîk tak nge kan neih?

12. Engtin nge nungchang lama kan inzir theihna chuan ramsate laka min danglamtîr?

¹² Leia thil siam zawng zawng zîngah mihringte chauh hi hun kal tawha thilthlengte hriat rengna hmanga nungchang lama inzir thei awmchhun kan ni a. Chuvângin, tehkhâwng ṭha lehzualte chu kan zir thei a, kan ngaihtuah dân leh kan nun dân kawngte chu kan thlâk thei a ni. (1 Kor. 6:9-11; Kol. 3:9, 10) Chu bâkah, thil dik leh dik lo thliar hrang thei tûrin kan chhia leh ṭha hriatna chu kan sâwizawi thei bawk. (Heb. 5:14) Hmangaihna te, khawngaihna te, leh zahngaihnate lantîr dân kan zir thei a. Jehova rorêl dikna entawn dân kan zir thei bawk.

13. Sâm 77:11, 12-na nêna inmilin, hriat reng theihna thilpêk chu engtin nge kan hman ang?

¹³ Hriat reng theihna thilpêk avânga kan  lâwmzia lantîr theih dân kawng khat chu Jehova’n hun kal tawha min ṭanpui dân leh min thlamuan dânte hriat reng hi a ni a. Chu chuan nakin hunah pawh min ṭanpui ang tih min rinnghehtîr a ni. (Sâm 77:11, 12 chhiar rawh; Sâm 78:4, 7) Kawng dang leh chu, mi dangte’n kan chunga thil ṭha an tihte hriat rengna leh chûng an thiltihte avânga lâwmna lantîr hi a ni a. Zir chîk mite chuan lâwm nachâng hretute chu an hlim lehzual tih an hmuchhuak a ni. Jehova entawn a, thil ṭhenkhat theihnghilh chu kan tân thil ṭha tak a ni bawk. Entîr nân, Jehova hriat reng theihna chu a ṭha famkim a; mahse, kan inchhîr chuan min ngaidamin, kan thil sual tihte chu min theihnghilhsak a. (Sâm 25:7; 130:3, 4) Ani chuan mi dangte’n min tihnat a, kan chunga thil sual an tih avânga pawi an tih hian, amah ang bawka ngaidam a, theihnghilh ve tûrin min duh a ni.—Mt. 6:14; Lk. 17:3, 4.

14. Thilpêk mak danglam tak kan thluak avânga kan lâwmzia engtin nge kan lantîr theih?

¹⁴ Thilpêk mak danglam tak kan thluak avânga kan lâwmzia lantîr theih dân chu, chumi min Petu chawimawi zâwnga hman hi a ni. Mi ṭhenkhat chuan thil dik leh dik lo chungchângah mahnia tehkhâwngte siamin, an thluak chu hmasial takin an hmang a. Mahse, Jehova chu min siamtu a nih avângin, a tehnate chu mahnia kan insiam tehnate aiin a ṭha zâwk hle ang tia ngaih chu thil inâwm tak a ni. (Rom 12:1, 2) A tehnate mila kan nun hian, kan nun chu a him a. (Is. 48:17, 18) Chuvângin, min Siamtu leh kan Pa chawimawi a, amah tihlâwm hi kan nun chhan ber a ni tih chiang takin kan hria a ni.—Thuf. 27:11.

15. Pathian thilpêk Bible hian Jehova’n mihringte a hmangaihzia engtin nge a târ lan?

¹⁵ Bible hi Pathian hnên aṭanga kan dawn thilpêk ṭha tak a ni a. Kan Pa vâna mi chuan leia a fate a ngaihsak êm avângin, chu lehkhabu chu ziak tûrin mi ṭhenkhat chu thlarauvin a thâwk khum a. Bible hmangin, Jehova chuan kan zawh theih azawnga zawhna pawimawh ber berte chu min chhâng a ni, chûng zawhnate  chu: Khawi aṭangin nge kan lo awm? Nunin a tum chu eng nge ni? Kan hma lam hun tûr chu eng nge ni? tihte hi a ni. Jehova chuan a fate chu chûng zawhnate chhânna hre tûra a duh avângin, kum zabi tluan chhuakah, mite chu ṭawng tam taka Bible letling tûrin a chêttîr a. Tûn laiah, Bible bu pum emaw, a ṭhen lai emaw chu ṭawng 3,000 chuanga hmuh theih a ni! Bible hi khawvêla lehkhabu azawnga lehlin tam ber leh sem chhuah tam ber a ni a. Mite awmna hmun leh ṭawng hman chu engpawh ni se, mi a tam zâwkte chuan mahni pianpui ṭawng ngeiin Bible thuchah kente chu an zir thei a ni.—“ Bible Chu Africa Ṭawng Hmantea Hmuh Theih A Ni,” tih bâwm chu en rawh.

16. Matthaia 28:19, 20-na ṭanchhanin, Bible kan neih avânga kan lâwmzia engtin nge kan lantîr theih?

¹⁶ Bible kan neih avânga kan lâwmzia chu nî tina chhiar a, kan thu chhiarte chhût ngun, leh kan theih ang tâwka nunpuina hmangin kan lantîr thei a ni. Chu bâkah, Bible-a Pathian thuchahte chu mi a tam thei ang berte hnêna hrilhna hmangin, Pathian chunga kan lâwmzia kan lantîr thei bawk.—Sâm 1:1-3; Mt. 24:14; Matthaia 28:19, 20 chhiar rawh.

17. He thuziakah hian eng thilpêkte nge kan sawiho va, a dawta thuziakah eng nge kan sawiho vang?

¹⁷ Pathian thilpêk kan chênna leilung te, mak danglam taka siam kan thluak te, leh Pathian thlarau thâwk khuma ziah a Thu, Bible chungchângte chu kan sawiho tawh a. Chu bâkah, mita hmuh theih loh, Jehova thilpêk dangte pawh a la awm a ni. Chûng hmuh theih loh ro hlute chu a dawta thuziakah sawiho a ni ang.