1-2. Dapre Psom 40:5, ki bann kado Zeova finn donn nou, ek kifer nou pou koz lor la?

ZEOVA enn Bondie bien zenere. Reflesi lor sertin kado ki Li’nn donn nou, par exanp nou zoli planet, nou servo ki extraordiner, ek so Parol, Labib, ki ena boukou valer. Gras-a sa trwa kado-la, Zeova inn donn nou enn plas pou viv, kapasite pou panse ek pou kominik avek lezot, ek repons pou bann kestion inportan ki nou kapav poz noumem.​—Lir Psom 40:5, NW. *

² Dan sa lartik-la, nou pou koz inpe lor sa trwa kado-la. Kan nou medit lor sa bann kado-la, nou pou ena plis rekonesans ek nou pou anvi fer plezir nou Kreater ki kontan nou. (Rev. 4:11) Sa pou osi ed nou pou rezonn avek bann dimounn ki krwar dan levolision.

3. Kifer later diferan ar lezot planet?

³ Nou trouv sazes Zeova dan fason ki Li’nn kree nou planet, Later. (Rom. 1:20; Ebre 3:4) Ena lezot planet ki fer letour soley, me zis later ki ena tou bann kondision ki bizin pou ki ena lavi.

4. Kouma nou kapav trouv sazes Bondie dan fason ki Li’nn kree later? Donn enn lexanp.

⁴ Dan enn sertenn fason, nou kapav konpar lespas ar enn gran losean ek later ar enn bato ki pe flot lor la. Me ena  bann gran diferans ant enn bato ki ranpli ar dimounn ek nou planet. Par exanp, si bann pasaze enn bato ti bizin prodir zot prop loxizenn, manze, ek delo, ek si zot pa ti kapav eliminn zot bann salte, komie letan zot ti pou viv? Zot ti pou mor bien vit, pa vre! Parkont, later kapav antretenir lavi bann milyon dimounn ek zanimo. Later prodir loxizenn, manze, ek delo ki nou bizin, ek zame nou pa pou mank sa bann kitsoz-la. Anplis, later pa eliminn so bann salte dan lespas, zot res lor later mem. Me kanmem sa, later res touzour enn zoli landrwa kot nou kapav reste. Kouma sa li posib? Zeova finn kree later avek kapasite pou resikle bann salte. Asterla, anou koz lor de kitsoz extraordiner ki Zeova inn kree: sik delo ek sik loxizenn.

5. Ki ete sik loxizenn, ek ki sa montre?

⁵ Loxizenn se enn gaz ki bann dimounn ek bann zanimo bizin pou viv. Dapre bann resers, bann kreatir vivan respir plizir milyar tonn loxizenn sak lane, ek zot rezet enn lot gaz ki apel carbon dioxide. Selman, ena touletan ase loxizenn, ek zame latmosfer ranpli ar carbon dioxide. Kifer? Parski Zeova finn osi kree enn varyete plant diferan groser ki respir carbon dioxide ek rezet loxizenn. Sik loxizenn montre ki bann parol ki ena dan Zistwar Bann Apot 17:24, 25 li vre. Sa bann verse-la dir: “Bondie . . . ki donn lavi, ki fer respire.”

6. Ki ete sik delo, ek ki sa montre nou? (Get lankadre “ Sik Delo: Enn Kado Zeova.”)

⁶ Lor later, ena delo dan form likid parski nou planet zis pou zis dan distans ki bizin ar soley. Si later ti inpe pli pre ar soley, tou delo ti pou bwi. Lerla, later ti pou enn ros bien sek, kot pena lavi. Ek si li ti inpe pli lwin ar soley, tou delo ti pou konzele ek later ti pou enn gro boul glason. Me Zeova inn met later dan plas ki bizin pou ki sik delo kapav antretenir lavi. Soley sof delo ki ena dan losean ek lor later, ek sa delo-la evapore pou form bann niaz. Sak lane, soley evapor plizir milyon lit delo. Sa delo-la res dan latmosfer anviron dis zour ek apre li tonbe kouma lapli ouswa lanez. Finalman, sa delo-la retourn dan bann losean, lak, ek larivier, ek sa sik-la rekoumanse. Zeova inn kree sa sik-la pou ki later touletan ena delo. Sa montre ki Zeova ena sazes ek pwisans.​—Zob 36:27, 28; Ekle. 1:7.

7. Kouma nou kapav montre nou rekonesans pou kado Bondie ki mansione dan Psom 115:16?

⁷ Kouma nou kapav montre nou rekonesans pou nou zoli planet ek pou tou bann bon kitsoz ki ena lor la? (Lir Psom 115:16, NW. *) Nou fer sa kan nou medit lor tou seki Zeova finn kree. Sa pou pous nou pou remersie Zeova toulezour pou tou bann bon kitsoz ki Li donn nou. Ek nou montre ki nou apresie later ki Zeova inn donn nou kan nou gard landrwa kot nou reste prop.

8. Kifer nou kapav dir ki nou servo inn fer dan enn fason extraordiner?

⁸ Servo imin inn fer dan enn fason extraordiner. Kan to ti dan vant to mama, to servo ti devlop dan enn fason bien organize: sak minit bann milye nouvo selil ti forme. Dapre bann siantis, dan servo enn adilt ena apepre 100 milyar selil ki apel bann neronn. Sa bann selil-la form nou servo ek nou servo pez apepre 1.5 kilo. Anou get sertin kapasite extraordiner ki nou servo ena.

9. Ki kitsoz montre ki nou kapasite pou koze se enn kado ki Bondie inn donn nou?

 ⁹ Nou kapasite pou koze li enn vre mirak. Reflesi lor seki arive kan to koze. Sak mo ki to dir, to servo avoy bann signal apepre 100 misk ki trouv dan to lalang, to lagorz, to lalev, to lamaswar, ek to ches pou ki zot fer bann mouvman ki bizin. Tou sa bann misk-la bizin bouz dan enn fason bien presi pou ki to kapav koz dan enn fason kler. Dapre enn lartik ki’nn pibliye an 2019 konsernan nou kapasite pou koze, enn ti-baba ki fek ne kapav rekonet ek konpran bann mo. Sa lartik-la finn konfirm seki boukou siantis panse: nou ne avek kapasite pou rekonet ek aprann bann lang. Li kler ki nou kapasite pou koze se enn kado ki Bondie inn donn nou.​—Ex. 4:11.

10. Kouma nou kapav montre nou rekonesans pou sa kado ki Bondie inn donn nou la, setadir nou kapasite pou koze?

¹⁰ Kouma nou kapav montre nou rekonesans pou sa kado ki Bondie inn donn nou la, setadir nou kapasite pou koze? Nou fer sa kan nou explik bann dimounn kifer nou krwar ki Bondie inn kree tou kitsoz, sirtou ar bann ki krwar dan levolision. (Ps. 9:1; 1 Pier 3:15) Bann dimounn ki krwar dan sa teori-la zot dir ki later ek lavi pa finn kree me finn aparet enn kout koumsa. Me nou kapav servi Labib ek bann pwin ki nou’nn examine dan sa lartik-la pou defann nou Papa ki dan lesiel. Nou pou kapav osi explik bann dimounn kifer nou sir ki Zeova inn kree lesiel ek later.​—Ps. 102:25; Iza. 40:25, 26.

11. Sit enn lot kapasite extraordiner ki nou servo ena.

¹¹ Kapasite ki nou ena pou rapel bann kitsoz li extraordiner. Dan lepase, enn ekrivin ti estime ki nou servo kapav rapel bann linformasion ki ena dan apepre 20 milyon liv. Me azordi, nou’nn dekouver ki servo imin kapav rapel boukou plis linformasion ki sa. Gras-a nou memwar, ki kapasite nou ena?

12. Dan ki sans bann imin diferan ar tou bann kreatir ki ena lor later? Explike.

¹² Parmi tou bann kreatir ki ena lor later, zis bann imin ki ena kapasite pou tir bann leson. Kifer? Parski nou kapav rapel ek analiz bann levennman ki finn ariv nou dan lepase. Sa kapasite-la ed nou pou ena bann pli bon valer moral ek pou sanz nou fason panse ek nou konportman. (1 Kor. 6:9-11; Kol. 3:9, 10, NW) Nou kapav form nou konsians pou fer diferans ant seki bon ek seki move. (Ebre 5:14) Nou kapav osi aprann pou manifeste bann kalite kouma lamour, konpasion, ek mizerikord. Ek nou kapav imit lazistis Zeova.

13. Dapre Psom 77:11, 12, kouma nou bizin servi kapasite ki nou ena pou rapel bann kitsoz?

¹³ Kouma nou kapav montre ki nou apresie kado Bondie, setadir nou kapasite pou rapel bann kitsoz? Nou fer sa kan  nou fer zefor pou rapel tou bann lokazion ki Zeova inn ed nou ek rekonfort nou dan lepase. Sa pou fer nou ena konfians ki Li pou ed nou dan lavenir osi. (Lir Psom 77:11, 12 *; 78:4, 7) Enn lot fason ki nou montre ki nou apresie kado Bondie se kan nou rapel tou bann bon kitsoz ki lezot inn fer pou nou ek ki nou montre zot nou rekonesans. Bann siantis inn dekouver ki bann dimounn ki ena rekonesans zot pli ere. Anplis, sa fer nou dibien osi kan nou swiv lexanp Zeova ek nou swazir pou bliye sertin kitsoz. Par exanp, mem si Zeova ena enn memwar ki parfe, Li swazir pou pardonn ek bliye erer bann dimounn ki’nn repanti. (Ps. 25:7; 130:3, 4) Alor, kan enn kikenn ki’nn bles nou regret erer ki li’nn fer, Zeova anvi ki nou azir kouma Li, setadir ki nou pardonn sa dimounn-la.​—Mat. 6:14; Lik 17:3, 4.

14. Kouma nou kapav montre nou rekonesans pou kado ki Zeova inn donn nou, setadir nou servo?

¹⁴ Kouma nou kapav montre nou rekonesans pou kado ki Zeova inn donn nou, setadir nou servo? Se kan nou servi li pou onor Zeova. Ena dimounn ki servi zot servo dan enn fason egois. Zot etabli zot prop prinsip konsernan seki bon ek seki pa bon. Me Zeova Li nou Kreater, alor so bann prinsip pli bon ki ninport ki prinsip ki nou kapav etabli. (Rom. 12:1, 2) Nou viv anpe kan nou swiv so bann prinsip. (Iza. 48:17, 18) Anplis, sa fer nou ena enn lobzektif dan lavi: donn loner nou Kreater ek nou Papa ek rann Li fier.​—Prov. 27:11.

15. Kifer nou dir ki Labib se enn kado ki Bondie inn donn nou parski Li kontan nou?

¹⁵ Labib enn kado ki Bondie inn donn nou parski Li kontan nou. Par so lespri sin, nou Papa ki dan lesiel finn gid bann zom pou ekrir Labib parski Li gagn traka so bann zanfan ki lor later. Zeova servi  Labib pou reponn bann kestion inportan ki nou kapav poz noumem, kouma: Kotsa nou sorti? Kifer nou lor later? Ek ki pou arive dan lavenir? Zeova anvi ki tou so bann zanfan gagn repons sa bann kestion-la. Alor, pandan plizir santenn lane, Li’nn fer an sort ki bann dimounn tradir Labib dan plizir lang. Azordi, Labib disponib an antie ouswa an parti dan plis ki 3,000 lang! Samem liv ki’nn plis tradir ek distribie dan listwar. Ninport kotsa zot reste ek ninport ki lang zot koze, laplipar dimounn kapav lir Labib dan zot prop lang.​—Get lankadre “ Tradiksion Labib dan Plizir Lang Afriken.”

16. Dapre Matie 28:19, 20, kouma nou kapav montre nou rekonesans pou kado Bondie, setadir Labib?

¹⁶ Nou montre nou rekonesans pou kado Bondie, setadir Labib, kan nou lir li toulezour, nou medit lor seki li ansegn nou ek nou fer tou seki nou kapav pou met seki nou aprann an pratik. Anplis, nou montre nou rekonesans kan nou fer nou best pou partaz seki Labib ansegne ar maximum dimounn.​—Ps. 1:1-3; Mat. 24:14; lir Matie 28:19, 20.

17. Lor ki kado nou finn koze dan sa lartik-la, ek ki nou pou examine dan prosin lartik?

¹⁷ Dan sa lartik-la, nou’nn koz lor trwa kado ki Bondie inn donn nou: nou zoli planet, nou servo ki extraordiner, ek so Parol, Labib. Me Zeova inn osi donn nou bann lezot kado ki nou pa kapav trouve. Nou pou examinn sa dan prosin lartik.