ARTÍCULO ÑA̱ KAʼVIYÓ 21
¿Á táxiyó tíxa̱ʼvi ndaʼa̱ Ndióxi̱ xa̱ʼa̱ regalo ña̱ ta̱xira ndaʼa̱yó?
“Nda̱saaví kúú ña̱ʼa ña̱ ke̱ʼún Jehová Ndióxi̱ miíi̱. Ku̱a̱ʼání kúú ña̱ʼa ña̱ ke̱ʼún ta saátu ña̱ ndákanixi̱níún xa̱ʼa̱ ndi̱ʼi̱” (SAL. 40:5).
YAA 5 Ña̱ʼa ke̱ʼé Jehová liviníña
ÑA̱ KA̱ʼA̱NYÓ XA̱ʼA̱ *
1, 2. a) Nda̱a̱ táki̱ʼva káchi Salmo 40:5, ¿ndáa regalo kúú ña̱ ta̱xi Jehová ndaʼa̱yó? b) ¿Nda̱chun sakuaʼayó xa̱ʼa̱ u̱ni̱ ña̱ regalo yóʼo?
JEHOVÁ kúúra iin Ndióxi̱ ta̱ va̱ʼaní-ini. Ná ndakanixi̱níyó xa̱ʼa̱ sava ña̱ va̱ʼa ña̱ ta̱xira ndaʼa̱yó: ñuʼú nu̱ú ndóoyó, meke (ximpeke) xi̱níyó ña̱ va̱ʼaní na̱kuva̱ʼa, xíʼin tu̱ʼunra ña̱ Biblia ña̱ ndáyáʼviní. Ta su̱ví nda̱saa ña̱yóʼo kúú ña̱ nítaxi Jehová, chi ta̱xitura nu̱ú kundooyó, ta̱xira ña̱ ná ndakanixi̱níyó ta saátu ña̱ ka̱ʼa̱nyó, ta saátu táxira ña̱ ná kunda̱a̱-iniyó xa̱ʼa̱ pregunta ña̱ ndáka̱tu̱ʼun xíʼin miíyó (kaʼvi Salmo 40:5). *
2 Nu̱ú ña̱ artículo yóʼo sakuaʼayó xa̱ʼa̱ u̱ni̱ ña̱ regalo yóʼo. Tá ná ndakanikaxi̱níyó xa̱ʼa̱ ña̱yóʼo, kundayáʼvikaña nu̱úyó ta kuni̱kayó sakusi̱íyó-ini Jehová, ta̱ kúʼvi̱ní-ini xíni miíyó (Apoc. 4:11). Ta saátu koo tu̱ʼvakayó ña̱ chindeétáʼanyó xíʼin na̱ yiví na̱ kándíxa ña̱ evolución.
ÑUʼÚ NU̱Ú NDÓOYÓ VA̱ʼANÍ NA̱KUVA̱ʼAÑA
3. ¿Nda̱chun va̱ʼaníka na̱kuva̱ʼa ñuʼú yóʼo?
3 Tá xítoyó ndáa ki̱ʼva i̱xava̱ʼa Ndióxi̱ ñuʼú yóʼo, kúnda̱a̱-iniyó ña̱ kúúmiíníra ña̱ ndíchi (Rom. 1:20; Heb. 3:4). Ña̱ nda̱a̱ kúú ña̱ íyo inkaka planeta ña̱ káva̱ sa̱tá ñu̱ʼu, soo ñuʼú kúú ña̱ va̱ʼaníka na̱kuva̱ʼa chi iinlá nu̱ú ña̱yóʼo íyo ña̱ xíniñúʼu na̱ yiví ña̱ kutakuna.
4. ¿Ndáa ki̱ʼva kúnda̱a̱-iniyó ña̱ ndíchiní Ndióxi̱ xa̱ʼa̱ ki̱ʼva ña̱ ke̱ʼéra ñuʼú yóʼo? Ka̱ʼa̱n xa̱ʼa̱ iin ejemplo.
4 Kivi ka̱ʼa̱nyó ña̱ ñuʼú yóʼo íyoña nda̱a̱ táki̱ʼva íyo iin barco tú ku̱a̱ʼa̱n nu̱ú ti̱kui̱í, tú ñúʼu ku̱a̱ʼání na̱ yiví ti̱xin. Soo xa̱a̱ síín na̱kuva̱ʼa tú barco yóʼo, nu̱ú ñuʼú yóʼo. Ná ka̱ʼa̱nyó xa̱ʼa̱ ña̱yóʼo, ¿nda̱saa tiempo kivi kutaku na̱ ku̱a̱ʼa̱n xíʼin tú barco tá miína ná ixava̱ʼa ta̱chí ña̱ ndakiʼinna, ña̱ kuxuna xíʼin ti̱kui̱í, ta va̱ása kivi katana mi̱ʼí nu̱ú tá mar? ¿Á su̱ví ña̱ nda̱a̱ kúú ña̱ kama kuvina? Soo nu̱ú ñuʼú yóʼo íyo ku̱a̱ʼání ña̱ táku. Ña̱ ñuʼú yóʼo kúú ña̱ táxi ta̱chí ña̱ ndákiʼinyó, ña̱ xíxiyó xíʼin ti̱kui̱í tá xíniñúʼuyó, ta nda̱a̱ ni iin yichi̱ va̱ása ndíʼi ña̱yóʼo. Saátu, ña̱ʼa ña̱ va̱ása xíniñúʼukayó va̱ása xátayóña chí sa̱tá ñuʼú. Soo ni saá ña̱ ñuʼú yóʼo livi íyoña ta va̱ʼa ndóoyó nu̱úña. ¿Nda̱chun va̱ʼa íyo ña̱yóʼo saá? Jehová va̱ʼaní i̱xava̱ʼara ña̱yóʼo chi va̱ʼa ndásaxa̱áña ña̱ íyo nu̱úña. Ná ka̱ʼa̱nyó xa̱ʼa̱ u̱vi̱ ña̱yóʼo: ki̱ʼva ña̱ ndúxa̱á ta̱chí ña̱ ndákiʼinyó, xíʼin ki̱ʼva ña̱ ndúxa̱á ti̱kui̱í.
5. a) ¿Ndáa ki̱ʼva ndúxa̱á ta̱chí ña̱ ndákiʼinyó? b) ¿Ndáaña náʼa̱ ña̱yóʼo?
5 Tá kǒo ta̱chí ña̱ ndákiʼinyó va̱ása kivi kutakuyó ni tí kití. Saáchi ndiʼi ña̱ táku ña̱ íyo nu̱ú ñuʼú yóʼo ku̱a̱ʼání ta̱chí ndákiʼinña. Soo tá ndákiʼinyó ta̱chíyó, táváyó iin ña̱ naní dióxido de carbono á ta̱chí ña̱ yaku̱a̱. Soo ni saá, va̱ása ndíʼi ña̱ ta̱chí yóʼo, ta ndiví va̱ása chútúña xíʼin ña̱ dióxido de carbono. ¿Nda̱chun va̱ʼa íyo ña̱yóʼo saá? Tíxa̱ʼvi ña̱ ndúxa̱á ta̱chí. Ku̱a̱ʼání nu̱ú ña̱ʼa i̱xava̱ʼa Jehová, tá kúú algas ña̱ válíní xíʼin yitu̱n tú náʼnuní, túyóʼo ndákiʼinnú ña̱ dióxido de carbono tasaá táxinú ta̱chí ña̱ ndákiʼinyó. Ki̱ʼva ña̱ ndúxa̱á ta̱chí ña̱ ndákiʼinyó va̱ʼaní kítáʼanña xíʼin ña̱ va̱xi nu̱ú Hechos 17:24, 25 ña̱yóʼo káchiña: “Ndióxi̱ [...] kúú ta̱ táxi ña̱ táku ndiʼi na̱ yiví, ta̱chí ña̱ ndákiʼinna xíʼin ndiʼika ña̱ʼa ña̱ xíniñúʼuna”.
6. a) ¿Ndáa ki̱ʼva ndúxa̱á ti̱kui̱í? b) ¿Ndáaña náʼa̱ ña̱yóʼo? (Koto recuadro “ Ki̱ʼva ña̱ ndúxa̱á ti̱kui̱í iin regalo Jehová kúúña”).
6 Nu̱ú ñuʼú yóʼo íyo ti̱kui̱í, saáchi va̱ʼaní na̱kuva̱ʼaña ta va̱ása yatinní íyoña nu̱ú ñu̱ʼu. Tá yatinka loʼo ná koo ña̱ ñuʼú yóʼo nu̱ú ñu̱ʼu, yi̱chi̱ ndiʼi ti̱kui̱í ta niʼníní koo nu̱úña ta yi̱chíní kooña. Soo tá xíka loʼo ná kooña nu̱ú ñu̱ʼu, vi̱xinní koo ta ndiʼi ti̱kui̱í nduurá hielo ta saátu ña̱ ñuʼú yóʼo nduuña hielo. Xa̱ʼa̱ ña̱ va̱ʼaní chi̱ndúʼú Jehová ñuʼú yóʼo, va̱ʼa ndúxa̱á ti̱kui̱í ta ña̱yóʼo chíndeétáʼanña xíʼinyó ña̱ kutakuyó. ¿Ndáa ki̱ʼva íyo ña̱yóʼo? Ña̱ ñu̱ʼu sása̱a̱ña ti̱kui̱í tá íyo mar ta saátu tá íyo nu̱ú ñuʼú yóʼo, ta ti̱kui̱í yóʼo yíchi̱rá tasaá ndúurá vi̱kó. Ndiʼi ku̱i̱ya̱ ña̱ ñu̱ʼu sáyi̱chi̱ña ku̱a̱ʼání ti̱kui̱í. Tá ti̱kui̱í yóʼo kíndo̱orá chí ndiví ki̱ʼva u̱xu̱ ki̱vi̱, ta tándi̱ʼi ndúurá sa̱vi̱ á nieve, tasaá ndíkó tukurá chí mar á inkaka nu̱ú ñúʼu ti̱kui̱í. Tasaá kíxáʼa ndúxa̱á tuku ti̱kui̱í, ña̱ va̱ʼaní na̱kuva̱ʼa ña̱yóʼo náʼa̱ña ña̱ ndíchiní Jehová ta íyoní ndee̱ra (Job 36:27, 28; Ecl. 1:7).
7. ¿Ndáa ki̱ʼva náʼa̱yó ña̱ táxiyó tíxa̱ʼvi xa̱ʼa̱ regalo ña̱ káʼa̱n Salmo 115:16?
7 Ña̱ va̱ʼa kuʼvi̱ka-iniyó kuniyó ñuʼú nu̱ú ndóoyó xíʼin ndiʼi ña̱ʼa ña̱ íyo nu̱úña, xíniñúʼu ndakanixi̱níyó xa̱ʼa̱ ndiʼi ña̱ i̱xava̱ʼa Jehová (kaʼvi Salmo 115:16). * Ña̱yóʼo chindaʼá miíyó ña̱ taxiyó tíxa̱ʼvi ndaʼa̱ra ndiʼi ki̱vi̱ xa̱ʼa̱ ndiʼi ña̱ va̱ʼa ña̱ táxira ndaʼa̱yó. Ta saátu náʼa̱yó ña̱ táxiyó tíxa̱ʼvi ndaʼa̱ra tá limpio íxaayó nu̱ú ñuʼú ña̱ ndóoyó.
VA̱ʼANÍ NA̱KUVA̱ʼA MEKE XI̱NÍYÓ
8. ¿Nda̱chun kivi ka̱ʼa̱nyó ña̱ viíní na̱kuva̱ʼa meke xi̱níyó?
8 Meke xi̱níyó va̱ʼaní na̱kuva̱ʼaña. Tá xi̱ndika̱a̱yó ti̱xin siʼíyó, meke xi̱níyó viíní na̱kuva̱ʼaña. Ta ti̱xin ña̱ iin minuto xi̱kuva̱ʼa ku̱a̱ʼání célula ña̱ xa̱á. Na̱ xíni̱ va̱ʼa káʼa̱nna ña̱ meke xi̱ní iin na̱ xa̱a̱ chée kúúmiíña ki̱ʼva 100,000 millón célula ña̱ naní neurona. Ta ña̱ célula yóʼo viíní ñúʼuña xi̱níyó ta ve̱eña ki̱ʼva iin kilo sava. Ná kotoyó sava ña̱ kivi keʼé meke xi̱níyó.
9. ¿Nda̱chun va̱ʼa kúnda̱a̱-iniún ña̱ iin regalo ña̱ ta̱xi Ndióxi̱ ndaʼa̱yó kúú ña̱ káʼa̱nyó?
9 Ña̱ káʼa̱nyó iin milagro kúúña. Ná ndakanixi̱níyó xa̱ʼa̱ ña̱ ndóʼo ku̱ñuyó tá káʼa̱nyó. Ña̱ va̱ʼa ka̱ʼa̱nyó iinlá tu̱ʼun, meke xi̱níyó xíniñúʼu sakanda̱ña ki̱ʼva 100 tu̱chi ña̱ íyo yáa̱yó, su̱kúnyó, yuʼúyó, leke yuʼúyó xíʼin kándíkayó. Ndiʼi ña̱ tu̱chi yóʼo inkáchi xíniñúʼu kanda̱ña ña̱ va̱ʼa kunda̱a̱-inina xíʼin ña̱ káʼa̱nyó. Ta xa̱ʼa̱ ña̱ va̱ʼa ña̱ kúúmiíyó ña̱ sakuaʼayó inka tu̱ʼun, iin estudio ña̱ ka̱na tá ku̱i̱ya̱ 2019 ni̱ka̱ʼa̱nña ña̱ na̱ va̱lí na̱ sa̱kán káku kivi kunda̱a̱-inina xíʼin sava tu̱ʼun. Ña̱ ku̱nda̱a̱-inina xa̱ʼa̱ yóʼo, kítáʼanña xíʼin ña̱ káʼa̱n na̱ nándukú xa̱ʼa̱ ña̱yóʼo: nda̱a̱ tá kákuyó va̱ʼa kúnda̱a̱-iniyó sava tu̱ʼun ta saátu ña̱ kivi sakuaʼayó inka nu̱ú tu̱ʼun. Xa̱ʼa̱ ña̱yóʼo, ña̱ káʼa̱nyó iin regalo ña̱ ta̱xi Ndióxi̱ ndaʼa̱yó kúúña (Éx. 4:11).
10. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ káʼa̱nyó?
10 Iin ki̱ʼva ña̱ na̱ʼa̱yó ña̱ táxiyó tíxa̱ʼvi xa̱ʼa̱ ña̱ káʼa̱nyó kúú ña̱ kuniñúʼuyóña ña̱ natúʼunyó xíʼin na̱ yiví na̱ kándíxa ña̱ evolución, ta ka̱ʼa̱nyó xíʼinna nda̱chun kándíxayó ña̱ mií Ndióxi̱ kúú ta̱ i̱xava̱ʼa ndiʼi ña̱ʼa (Sal. 9:1; 1 Ped. 3:15). Na̱ sánáʼa̱ xa̱ʼa̱ ña̱ evolución kúni̱na ña̱ ná kandíxayó ña̱ kǒo na̱ ní ixava̱ʼa ñuʼú xíʼin ndiʼi ña̱ táku ña̱ íyo nu̱úña. Kivi kuniñúʼuyó Biblia xíʼin sava ña̱ va̱xi nu̱ú artículo yóʼo ña̱ va̱ʼa ka̱ʼa̱nyó ña̱ nda̱a̱ xa̱ʼa̱ yiváyó ta̱ íyo chí ndiví, ta ka̱ʼa̱nyó xíʼin na̱ kúni̱ kuniso̱ʼo nda̱chun kándíxayó ña̱ mií Jehová kúú ta̱ i̱xava̱ʼa ndiví xíʼin ñuʼú (Sal. 102:25; Is. 40:25, 26).
11. ¿Ndáa inka xa̱ʼa̱ kúú ña̱ kivi ka̱ʼa̱nyó ña̱ va̱ʼaní na̱kuva̱ʼa xi̱níyó?
11 Ku̱a̱ʼání ña̱ʼa ndákaʼányó xa̱ʼa̱. Tá ya̱chi̱, iin ta̱ científico ku̱nda̱a̱-inira ña̱ kivi ndakaʼán na̱ yiví xa̱ʼa̱ ku̱a̱ʼání ña̱ʼa, tá ná kaʼyíyó ña̱yóʼo ki̱ʼva 20 millón libro kooña. Soo vitin káʼa̱nna ña̱ ku̱a̱ʼáníka ña̱ʼa kivi ndakaʼányó xa̱ʼa̱. Ta saátu, tíxa̱ʼvi ña̱yóʼo kúúmiíyó inka ña̱ va̱ʼaní. Ná kotoyó ndáaña kúúña.
12. Tíxa̱ʼvi ña̱ ndákaʼányó xa̱ʼa̱ ña̱ ndo̱ʼoyó tá ya̱chi̱, ¿ndáaña kivi xa̱a̱yó keʼéyó?
12 Nu̱ú ndiʼika ña̱ táku ña̱ íyo nu̱ú ñuʼú yóʼo, iinlá na̱ yiví kúú na̱ kivi ndakaʼán xa̱ʼa̱ ña̱ ndo̱ʼona tá ya̱chi̱ ta nasamana ña̱ kéʼéna. Tá ná ndakaʼányó xa̱ʼa̱ ña̱ ndo̱ʼoyó tá ya̱chi̱, chindeétáʼanña xíʼinyó ña̱ nasamayó ña̱ ndákanixi̱níyó xíʼin ña̱ kéʼéyó tasaá xa̱a̱yó kooyó iin na̱ yiví va̱ʼa (1 Cor. 6:9-11; Col. 3:9, 10). Saátu kivi sanáʼa̱yó ña̱ xínitúni̱yó ña̱ ndakuniña ña̱ va̱ʼa xíʼin ña̱ va̱ása va̱ʼa (Heb. 5:14). Ta saátu kivi na̱ʼa̱yó ña̱ kúʼvi̱-iniyó xíniyó inkana, ña̱ kúndáʼvi-iniyó xíniyóna ta íxakáʼnu-iniyó xa̱ʼa̱na, ta kivitu sakuaʼayó nda̱kú koo iniyó nda̱a̱ táki̱ʼva íyo mií Jehová.
13. Nda̱a̱ táki̱ʼva káchi Salmo 77:11, 12, ¿ndáa ki̱ʼva kivi kuniñúʼuyó regalo ña̱ ta̱xi Jehová ndaʼa̱yó ña̱ ndakaʼányó xa̱ʼa̱ ña̱ʼa?
13 Iin ki̱ʼva ña̱ kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ndákaʼányó xa̱ʼa̱ ndiʼi ña̱ʼa, kúú ña̱ chika̱a̱yó ndee̱ ña̱ ndakaʼányó xa̱ʼa̱ ndiʼi yichi̱ ña̱ chi̱ndeétáʼan Jehová xíʼinyó ta sa̱ndíkora-iniyó. Saá kúú ña̱ kivi kandíxakayó ña̱ va̱ása sandákoora ña̱ chindeétáʼanra xíʼinyó (kaʼvi Salmo 77:11, 12; * 78:4, 7). Inka ki̱ʼva ña̱ na̱ʼa̱yó ña̱ ndáyáʼvi ña̱yóʼo nu̱úyó, kúú ña̱ ndakaʼányó xa̱ʼa̱ ndiʼi ña̱ va̱ʼa ña̱ kéʼé inka na̱ yiví xíʼinyó ta taxiyó tíxa̱ʼvi ndaʼa̱na. Na̱ káʼvi va̱ʼa xa̱ʼa̱ ña̱yóʼo, ku̱nda̱a̱-inina ña̱ na̱ yiví na̱ táxi tíxa̱ʼvi si̱íníka íyona. Ta saátu ndíku̱nyó yichi̱ Jehová tá nándósóyó xa̱ʼa̱ sava ña̱ʼa, chi ta̱yóʼo nándósóra xa̱ʼa̱ sava ña̱ʼa. Tá kúú, ni va̱ʼaní ndákaʼán Jehová xa̱ʼa̱ ndiʼi ña̱ʼa, soo nándósóra xa̱ʼa̱ ña̱ va̱ása va̱ʼa ña̱ ke̱ʼéyó ta íxakáʼnu-inira xa̱ʼa̱yó tá ndándikó-iniyó (Sal. 25:7; 130:3, 4). Ta kúni̱ra ña̱ saá ná keʼéyó xíʼin na̱ ke̱ʼé ña̱ va̱ása va̱ʼa xíʼinyó (Mat. 6:14; Luc. 17:3, 4).
Náʼa̱yó ña̱ táxiyó tíxa̱ʼvi xa̱ʼa̱ ña̱ viíní na̱kuva̱ʼa xi̱níyó, tá xíniñúʼuyóña ña̱ ndasakáʼnuyó Jehová. (Koto párrafo 14). *
14. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ va̱ʼaní i̱xava̱ʼara xi̱níyó?
14 Kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ va̱ʼaní na̱kuva̱ʼa meke xi̱níyó tá xíniñúʼuyóña ña̱ ndasakáʼnuyó Ndióxi̱ ta̱ ta̱xiña ndaʼa̱yó. Sava na̱ yiví va̱ása vií xíniñúʼuna ña̱yóʼo, ta ndáka̱xinna keʼéna ña̱ kúni̱ miína kúúña ña̱ va̱ʼa á ña̱ va̱ása va̱ʼa. Soo, Jehová kúú ta̱ i̱xava̱ʼa miíyó, ña̱kán va̱ʼaníka ña̱ káʼa̱nra xíʼinyó keʼéyó nu̱úka ña̱ kúni̱ miíyó keʼéyó (Rom. 12:1, 2). Tá ndíku̱nyó ña̱ káʼa̱nra va̱ʼaní íyoyó (Is. 48:17, 18). Ta íyo iin xa̱ʼa̱ kúú ña̱ tákuyó: ña̱ ixato̱ʼóyó Ndióxi̱ ta sakusi̱íyó-inira (Prov. 27:11).
IIN REGALO ÑA̱ NDÁYÁʼVINÍ KÚÚ ÑA̱ BIBLIA
15. ¿Ndáa ki̱ʼva náʼa̱ Jehová ña̱ kúʼvi̱ní-inira xínira miíyó xa̱ʼa̱ ña̱ ta̱xira Biblia ndaʼa̱yó?
15 Xa̱ʼa̱ ña̱ ta̱xi Ndióxi̱ tu̱ʼunra ña̱ Biblia ndaʼa̱yó náʼa̱ra ña̱ kúʼvi̱ní-inira xínira miíyó. Yiváyó xi̱niñúʼura na̱ ta̱a na̱ ni̱xi̱yo tá tiempo xi̱naʼá ña̱ ka̱ʼyína tu̱ʼunra, saáchi ndíʼi̱ní-inira xa̱ʼa̱ se̱ʼera na̱ íyo nu̱ú ñuʼú yóʼo. Nu̱ú tu̱ʼunra ndákuiinra pregunta ña̱ ndáyáʼviní ña̱ ndáka̱tu̱ʼun xíʼin miíyó, tá kúú ña̱, ¿ndáa míí ki̱xiyó?, ¿ndáa xa̱ʼa̱ kúú ña̱ tákuyó?, ta ¿ndáaña kuu chí nu̱únínu? Xa̱ʼa̱ ña̱ kúni̱ Jehová ña̱ ndiʼi na̱ se̱ʼera ná kunda̱a̱-inina xa̱ʼa̱ ña̱yóʼo, xa̱a̱ ku̱a̱ʼání ku̱i̱ya̱ chíndeétáʼanra xíʼin na̱ hermano ña̱ sándaya̱ʼana ña̱ Biblia ku̱a̱ʼá nu̱ú tu̱ʼun. Tiempo vitin, iníí ña̱ Biblia á sava táʼvíña, xa̱a̱ íyoña yáʼaka 3,000 nu̱ú tu̱ʼun. Ña̱ libro yóʼo kúú ña̱ ku̱a̱ʼáníka nu̱ú tu̱ʼun sándaya̱ʼana, ta xa̱a̱ ku̱a̱ʼáníña xáxana. Ni nda̱a̱ ndáaka nu̱ú íyo na̱ yiví á nda̱a̱ ndáaka tu̱ʼun káʼa̱nna, ku̱a̱ʼánína kivi xa̱a̱na sakuaʼana xa̱ʼa̱ ña̱ káʼa̱n Biblia, chi íyoña tu̱ʼun miína (koto recuadro “ Sa̱ndáya̱ʼana Biblia tu̱ʼun ña̱ káʼa̱nna chí África”).
16. Nda̱a̱ táki̱ʼva káchi Mateo 28:19, 20 ta saátu ña̱ káʼa̱n párrafo, ¿ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira Biblia ndaʼa̱yó?
16 ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira Biblia ndaʼa̱yó? Xíniñúʼu kaʼviyóña ndiʼi ki̱vi̱, ndakanixi̱níyó xa̱ʼa̱ ña̱ sánáʼa̱ña ta chika̱a̱yó ndee̱ ña̱ keʼéyó ña̱ káʼa̱nña. Saátu táxiyó tíxa̱ʼvi ndaʼa̱ra, tá chíka̱a̱yó ndee̱ ña̱ sanáʼa̱yó na̱ yiví xa̱ʼa̱ ña̱ káʼa̱n Biblia (Sal. 1:1-3; Mat. 24:14; kaʼvi Mateo 28:19, 20). *
17. ¿Ndáa regalo kúú ña̱ ni̱ka̱ʼa̱nyó xa̱ʼa̱ nu̱ú artículo yóʼo, ta ndáaña ka̱ʼa̱nyó xa̱ʼa̱ nu̱ú inka artículo?
17 Nu̱ú ña̱ artículo yóʼo ni̱ka̱ʼa̱nyó xa̱ʼa̱ u̱ni̱ regalo ña̱ ta̱xi Jehová ndaʼa̱yó: ñuʼú nu̱ú ndóoyó, meke xi̱níyó ña̱ va̱ʼaní na̱kuva̱ʼa, xíʼin ña̱ Biblia. Soo sava regalo ña̱ ta̱xi Jehová ndaʼa̱yó va̱ása kívi kuniyóña. Nu̱ú ña̱ inka artículo kunda̱a̱-iniyó xa̱ʼa̱ ña̱yóʼo.
YAA 12 Jehová, Ndióxi̱yó ta̱ káʼnu
^ párr. 5 Ña̱ artículo yóʼo chindeétáʼanña xíʼinyó ña̱ kuni̱kayó taxiyó tíxa̱ʼvi ndaʼa̱ Jehová, ta saátu ña̱ chindayáʼviyó u̱ni̱ regalo ña̱ ta̱xira ndaʼa̱yó. Ta saátu chindeétáʼanña xíʼinyó ña̱ vií natúʼunyó xíʼin na̱ yiví na̱ káʼa̱n ña̱ kǒo Ndióxi̱ íyo.
^ párr. 1 Salmo 40:5: “Nda̱saaví kúú ña̱ʼa ña̱ ke̱ʼún Jehová Ndióxi̱ miíi̱. Ku̱a̱ʼání kúú ña̱ʼa ña̱ ke̱ʼún ta saátu ña̱ ndákanixi̱níún xa̱ʼa̱ ndi̱ʼi̱, nda̱a̱ ni iinna va̱ása kivi kitáʼan xíʼin yóʼó. Ku̱a̱ʼání kúúña tá ná natúʼi̱n xa̱ʼa̱ña á tá ná ka̱ʼi̱n xa̱ʼa̱ña, va̱ása kivi kaʼvii̱ ndiʼiña”.
^ párr. 7 Salmo 115:16: “Ndiví kuenta Jehová kúúña, soo ñuʼú yóʼo ndaʼa̱ na̱ yiví ta̱xiraña”.
^ párr. 13 Salmo 77:11, 12: “Ndakaʼíi̱n xa̱ʼa̱ ña̱ ke̱ʼé Jah; ndakaʼíi̱n xa̱ʼa̱ ndiʼi ña̱ va̱ʼa ña̱ ke̱ʼún tá ya̱chi̱. 12 Ndakanixi̱níi̱ xa̱ʼa̱ ndiʼi ña̱ kéʼún ta saátu ndakanixi̱níi̱ xa̱ʼa̱ ki̱ʼva ña̱ kéʼúnña”.
^ párr. 16 Mateo 28:19, 20: “Ña̱kán, kúáʼanndó nu̱ú ndiʼi na̱ yiví ña̱ iníísaá ñuyǐví, ta sanáʼa̱ndóna ña̱ ná kundiku̱nna yi̱ʼi̱, ta ná ndakuchina xíʼin ki̱vi̱ yiváyó xíʼin ki̱vi̱ se̱ʼera ta saátu xíʼin ki̱vi̱ espíritu santo. 20 Sanáʼa̱ndóna ña̱ ná kuniso̱ʼona ndiʼi ña̱ ni̱ka̱ʼi̱n xíʼinndó. Ta ndakaʼánndó, ña̱ koi̱ xíʼinndó ndiʼi tiempo nda̱a̱ ná ndiʼi-xa̱ʼa̱ ñuyǐví”.
^ párr. 68 ÑA̱ KÁʼA̱N XA̱ʼA̱ NA̱ʼNÁ: Iin ñá hermana sákuaʼañá inka tu̱ʼun ña̱ va̱ʼa natúʼunñá xa̱ʼa̱ Ndióxi̱ xíʼin na̱ yiví na̱ ke̱e inka ñuu.
