1-2. Psalmdi 40:5 ǃoagub Jehovaba mâ ǀkhaega mā da hâ tsî tae-i ǃaroma da ǁîna nî ǃhoaǃgao?

JEHOVAB ge māǀnamxa Eloba. ǀNî ǀkhaegu hînab mā da hâgu xa ǂai re: ǃhūbaib, sida îsa tsî ǀō-aisa ǁan ǃkhaib; buruxa ǀgaub ǃnâ kurusa ǂkhûs tsî Elobmîs. Jehovab ge nē ǃnona ǀkhaega a mā da ǃkhais ǃaroma da ge hâ ǃkhai-e ūhâ, ǂâi tsî a ǃhoa ǁkhā tsî ǃgom dîdi ai ǃereamde ūhâ.​—Khomai re Psalmdi 40:5.

² Nē ǁkhāǁkhāǃâs ge nē ǃnona ǀkhaega nî ǃhoaǃgao. Nē ǀkhaegu xa da ga ǂâi o, o da ge ǃgôaǃgâsiba omkhâi tsî Jehovab sida Kuru-aoba nî ǂkhîǂkhî ǂgao. (J.ǂHa. 4:11) Supuses tsîna da ge khoen hîna evolusieb ǃnâ ra ǂgomna a hui ǁkhā.

3. ǃHūbaiba tae-i ǃaroma nau ǃkhaiga xu ra ǀkhara?

³ Elob gā-aisib ge sada ǁan ǃkhaisab ge kuru ǀgauba xu a mûhe ǁkhā. (Rom. 1:20; Heb. 3:4) Sada di ǁanǃkhaib ge sores ǂnamipe ǀgui ǃgû tama hâ xawe sada ûiga i nî aiǃgû kai ǀgaub ǃnâ a kurusa.

4. Tae-i ǃaroma da a mî ǁkhā ǃhūbaib khoe-i xa kuruhe hâ ǂgaub xa a ǂoaǂamsa di?

⁴ ǃHūbaib tsî ǀhommi-aib tsîna da ge hurib ai hâ ǂgaus ǀkha a ǀgōpeǀnō ǁkhā. Xaweb ge kai ǃkharagagusiba hâ khoena ūhâ ǂgaus tsî sida ǃhūbaib ǁaegu. Aiǁgause, khoen hîna ǂgaus ǃnâ hâna mati kō ǁaeba nî ûi, aitsaman ga ǀomǂgān da ra ǂoab, ǂû-i tsî ǁgammi tsîna kurubasen tsî ǀapoba āxū tama io? ǁNā ǂgaus ǃnâ hâ khoen  ge kaise ǃhaese nî ǁō. Xawe ǃhūbaib ge ǂgui xamanin tsî khoena ûitsamase ra ūhâ. ǂÂusa ǂûn, ǁgammi tsî ǀomǂgā da ra ǂoab tsînab ge ǃhūbaiba ra kuru tsî nē xūn ge tātsē toa tama hâ. Nē xūn ra sîsen-ūhe o ra ǃgau ǀapob ǃhūbaib ai ra hâ ǀgara xaweb ge ǃhūbaiba hoaǁae a îsa. Nēsa mati ra sîsen? Jehovab ge ǃhūbaiba ǁnāti ge kuru îb ǀuriba sîsen-ūhe ǁkhā ǀgaub ǃnâ ǀkharaǀkharahe. ǀOmǂgāhe ra ǂoab tsî ǁgammi tsîn da ǃanuǃanuhe ǀgaub Jehovab gā-aisiba ra ǁgau ǀgauba da ge nî ǃhoaǃgao.

5. ǀOmǂgā da ra ǂoaba mati ra sîsen tsî nēsa tae-e ra ǁgau?

⁵ Khoen tsî xamanin tsîn ge ǀomǂgā da ra ǂoaba ǂhâ hâ ûis ǃaroma. ǂAnǂuihe i ge ge khoen kaise ǂgui ǀomǂgāhe ra ǂoaba kurib ǃnâ ra sîsen-ūsa. Nēs khaoǃgân ge khoen tsî xamanin hoana ǁîn sîsen-ū tama hâ ǂoaba ra ǀomǂui. Xawen ge khoen tsî xamanin tsîna ǀomǂgā da ra ǂoaba toa kai tama hâ tsî da ge ǂoab tsîna ǀomǂui dara ǂoab ǀkha ǀoaǀoa tama hâ. Tae-i ǃaromasa nēsa? Jehovab ge kai tsî ǂkhari haina ge kuru în ǀomǂui da ra ǂoaba-ū tsîn ǀomǂgā da nî ǂoaba kuru. ǀOmǂgā da ra ǂoab ra sîsen ǀgauba ǃoa da ga kō o, o da ge ǃNaeǃkhaidi 17:24, 25 ǃnâ xoasa mîdi a ama ǀgausa ra mû: “hoanab kom ûib tsî ǀoms” tsîna ra mā.

6. ǁGam-e mati ra ǃanuǃanusen tsî nēsa tae-e ra ǁgau? (“ ǁGammi ǃanuǃanusen ǀgaub ge Jehovaba xu hâ ǀkhaeba” di hâ boksisa mû re.)

⁶ ǁGam-e da ge ǃhūbaib ai ūhâ ǃhūbaib ǂhanu ǃnūsiba soresa xu ǂnôa amaga. ǂKharirose da ga sores ǀgūse hâ o, ob ge ǃhūbaiba ǁgam-e ūhâ tide tsîn ge ûitsama xūn tsîna nî ǁō. ǃHūbaib ga ǂkharirose ǃnūse ǂnû hâ o, o i ge hoaraga ǁgam-e ga ǃkhoa hâ tsîb ge hoaraga ǃhūbaiba ga ǃkhoa hâ. Jehovab ge ǃhūbaiba ǃgâi ǃkhaib ai ǀgui mâi amaga da ge haoǁae ǁgam-e ūhâ tsîb ge ûiba ra aiǃgû. Sores ge hurib ǁgam-e ǃhūbaiba xu ra daokhâi tsî i ge nē ǁgam-e ǀanudi ǃnâ ra ǀkharaǀkharasen. Mâ kurib hoabas ge soresa 500,000 cu km ǁgam-e ra daukhâi. Nē ǁgammi daukhâihe hâs khaoǃgâ i ge disi tsēde ǀhommi ǃnâ hâ tsî ǀanub ase ra ǁnā. Nē ǁgammi ge hurib tsî ǃāga ǃoa ra ôa tsî ǁkhawa ra daukhâihe. Jehovab ge nē ǀgauba ge ǂnuiǂgā îb ǃhūbaiba hoaǁae ǁgam-e ūhâ. Nēs ge ra ǁgau Jehovab gā-ai tsî a ǀgaisa ǃkhaisa.​—Job. 36:27, 28; Aoǁn. 1:7.

7. Mâ ǀgaugu ǃnâ da Psalmdi 115:16 ǃnâ ra mîhe ǀkhaeba da ra ǃgôaǃgâ ǃkhaisa nî ǁgau?

⁷ Tae-e nî hui da î da sida planeets tsî ǁîs ai hâ xūna da ra ǃgôaǃgâ ǃkhaisa ǁgau? (Khomai re Psalmdi 115:16.) Jehovab ge kuru xūn xa da ge a ǂâi ǁkhā. Nēs ge nî hui da Jehovaba tsēs hoasab da mā da xūna da ra ǃgôaǃgâ ǃkhaisa ǁgausa. Tsî da ge hâ da ra ǃkhaiga ǃanuse ūhâs ǀkha nî ǁgau ǃhūbaiba da ra ǃgôaǃgâ ǃkhaisa.

8. Tae-i ǃaroma da a mî ǁkhā sada ǂkhûs kuru-e ge xūn ǃnâ ra mâǂoa di?

⁸ Khoe-i ǂkhûs ge buruxa ǀgaub ǃnâ a kurusa. ǁHās ǃnâ du hâ hînas ge sadu ǂkhûsa xoa ǁguibahes hâ ǀgaub ai ra kurusen tsî gu ge ǀoadisidi ǂkhuruga mâ haib hoab ǃnâ ra ǀarosen. Ôaǃnâ-aogu ge ra mî kai hâ khoe-i ǂkhûs 100 biliuns ǀgūse hâ ǂkhurun hîna neurons di ra ǂgâihena  ūhâ di. Nē ǂkhurugu hîna 1.5 kg gu ge sada ǂkhûsa ra kuruǂui. ǀNî mâǂoa ra xūn hînas ra ǂkhûsa dīna ǃoa kō re.

9. Tae-e ra ǁgau ǃhoas ǁkhāsib Eloba xu hâ ǀkhae ǃkhaisa?

⁹ Sada ǃhoas ǁkhāsib ge buruburuxa. ǂÂi re tae-i ra īsa ǃhoa da ga o. Mâ mîs hîna da ra mîs hoas ǀkhas ge sada ǂkhûsa nami, dommi, amǁgaukha, ǃnanigu tsî ǁkhâib tsîna ra sîsen-ū. Nē xūn hoan hîna da go mîn ge ǀgui ǁaeb ai nî sîsenǀhao mîhe ra xū-e da ga ǁnâuǃā ǂgao o. Sada ǃhoas ǁkhāsiba ǃoa ra ǁnaeǁgauseb ge 2019ǁî kurib ǃnâ ge ǁgâihe ǂkhaniba ra mî ǀgôaron ǀasa mîna ǃhaese ra ǁkhāǁkhāsen ǃkhaisa. Nē ôaǃnâs ge ra ǂanǃgâ sada ǀasa gowaga ǁkhāǁkhāsens ǁkhāsib ǀkha kuruhe hâ ǃkhaisa. Amaba da ga mî o, sada ǃhoas ǁkhāsib ge ǀkhaeba Eloba xu.​—Eks. 4:11.

10. Mati da ǃhoas ǁkhāsib hîna da Eloba xu ge hōba da ra ǃgôaǃgâ ǃkhaisa a ǁgau ǁkhā?

¹⁰ ǀGui ǀgaub hîna da ǃhoas ǁkhāsib ǀkhaeba da ra ǃgôaǃgâ ǃkhaisa a ǁgau ǁkhāb ge, khoena ǁguiǃābasa tae-i ǃaroma da evolusies ǃnâ ǂgomba tama hâsa. (Psa. 9:1; 1Pet. 3:15) ǁNān hîna ǃhūbaib tsî ûib tsîn ge ǁnati ǀgui tsoatsoa di ra mîn ge nē xūn ǃnâ a ǂgom tsoatsoa kai da ǁkhā. Xawe da ge Elobmîs ǃnâ da ge ǁkhāǁkhāsen xūn tsî nē ǁkhāǁkhāǃâs ǃnâ ra ǃhoaǃgaohe xūn tsîna a sîsen-ū ǁkhā tsî nēs ǃnâ-ū sada di ǀhomsi ǁGûba a ǁkhauba ǁkhā. Nēsa da ge ǁnān hîna ra ǃgâ ǂgaona ǀhommi tsî ǃhūbaib Kuru-aob Jehovab ǃnâ da tae-e ra ǂgombasa ǁguiǃābanis ǃnâ-ū a dī ǁkhā.​—Psa. 102:25; Jes. 40:25, 26.

11. Mâ ǀgaub ǃnâs sada ǂkhûsa a ǀō-aisa?

¹¹ Sada ǁkhāsib xūna ǂâihos dib. ǃKharu ge ǁaeb ǃnâb ge ǀgui xoa-aoba ge mî, sada ǂkhûs ge 20 milliun ǂkhanidi di ǂansa a ǃkhōǂgā ǁkhā. Xawe i ge nēsisa ra mîhe sada ǂkhûs nēs xa ǃnāsa ǂansa a sâu ǁkhā ǃkhaisa. Sada ǂkhûs ǁkhāsib xa da tae-e a dī ǁkhā?

12. Mati da xamanina xu ra ǀkhara, xūna ǁkhāǁkhāsens dawa i ga ǀkhī o?

¹² ǃHūbaib ai ge kuruhe xūn hoan ǃnân ge khoen ǀguina ǃkharu ge ǁaeb ǃnâ ge ī xūn xa ǂai-oa tsî ǁîna xu a ǁkhāǁkhāsen ǁkhā. Nēs ǃaroma da ge ǃgâi xūna ǁkhāǁkhāsen tsî sada ûiga a ǃgâiǃgâi ǁkhā. (1Kor. 6:9-11; Kol. 3:9, 10) Sada di ǃgâiǂâis tsîna da ge a ǁkhāǁkhā ǁkhā is tae-i a ǂhanus tsî tsūs ǁaegu hâ ǃkharagagusiba ǂan. (Heb. 5:14) ǀNammi, tsâbaǁhaoxasib tsî ǀûbaǀnamxasiba ǁgaus tsîna da ge a ǁkhāǁkhāsen ǁkhā. Tsî da ge Jehovab di ǂhanu-aisiba ǁgaes tsîna a ǁkhāǁkhāsen ǁkhā.

13. Psalmdi 77:11, 12 ǃoagu da sida ǃkhōmâisǁkhāsiba mati nî sîsen-ū?

¹³ ǀGui ǀgaub xūna ǂâihōs ǁkhāsiba da  ra ǃgôaǃgâ ǃkhaisa ǁgaus ge Jehovab ge mati ǃkharu ge ǁaeb ǃnâ hui tsî ǂkhâǃnâda ǀgauba ǂâihōsa. Nēs ge sada ǃnâ ǂgomǃgâsiba nî omkhâi ǁîb sada huis ǀkha nî aiǃgûsa. (Khomai re Psalmdi 77:11, 12; 78:4, 7) ǀNî ǀgaub nēsa da a dī ǁkhāb ge nau khoen ge dība da xūn xa ganganxasiba ǁgausa. Ôaǃnâ-aon ge ge ǂanǂui ganganxasiba ra ǁgau khoen ǃnāsa ǁaeba a ǂkhî ǃkhaisa. Jehovab tsîna da ge ra ǁgae ǂgao ǀnî xūna ǀurus ǃaroma. Aiǁgause, Jehovab ge xū-e ǀuru tama is ǁkhāsiba ūhâ xaweb ge ǃhausen da ga o, o sada ǁorena ǀûba tsî ra ǀuru. (Psa. 25:7; 130:3, 4) Tsîb ge ǁkhā xū-e da nî dīsa ra ǂhaba nau khoen ga sida ra tsûtsû xū-e dī xawe a ǃhausen o.​—Mat. 6:14; Luk. 17:3, 4.

14. Mati da sada ǂkhûs ǀkhaeba ǃgôaǃgâsiba nî ǁgau?

¹⁴ Sada di ǀō-aisa ǀkhaeb ǂkhûs diba da ra ǃgôaǃgâ ǃkhaisa da ge a ǁgau ǁkhā. Nēsa ge kuruba ǃgôasiba ra ǁgau ǀgaub ǃnâ sada ǂkhûsa sîsen-ūs ǃnâ. ǀNî khoen ge ǁîn ǂkhûsa ǁîn ǃgâib ǃoa ǀgui ra sîsen-ū tsî aitsama ra mîǁgui tae-i ǂhanu tsî ǂhanu tamasa. Xawe Jehovab a sada di kuru-ao amaga gu ge ǁîb di mîǁguigu tae-i ǂhanu tsî tsūs diga sida digu xa a ǂhanu-ai. (Rom. 12:1, 2) Jehovaba da ga ǁnâuǀnam o, o da ge ǂkhîba ra ūhâ. (Jes. 48:17, 18) Tsî da ge ra ǁkhāǁkhāsen Jehovab tae-e sada xū ra ǃâubasensa tsî nēs ǃnâ-ū sada kuru-ao tsî ǁGûba ra ǂkhîǂkhî.​—ǂKhm. 27:11.

15. Elobmîs ǀkhaeba tae-e Elob khoena ūba hâ ǀnammi xa ra ǁgau?

¹⁵ Elobmîs ge ǀnamǀnamsa ǀkhaeba Eloba xu. Sada ǀhomsi ǁGûb ge khoega ge sîsen-ū i gu Elobmîsa xoa ǀnamdab a ǃkhais ǃaroma. Elobmîs ǃnâ-ūb ge Jehovaba ǂhâǂhâsa dîde ra ǃeream hîna da ra dîsende, aiǁgause: Maba xu tara hā? Ûib ǂâibasensa a tae? Hānîǁaeba taena  ǃkhōǂgā hâ? Jehovab ge ǂhaba hâ în ǁîb di ôan hoana nē dîdi ai ǃereamde hō. ǁNā amagab ge kurigu ge ī khami khoena ge sîsen-ū în Elobmîsa ǂgui gowagu ǃnâ ǂnûiǃkhuni. Nētsēs ge hoa Elobmîs tamas ka io Elobmîs ǃā-e 3 000 gowagu ǃnâ a hō-e ǁkhā. Elobmîs ge ǃnāsase a ǁgâisa tsî a māǂuisa ǂkhanisa. Mapa ǀguin ga khoena hā tsî mâ gowa i ǀgui-en ga ǃhoa xawen ge ǁîn gowab ǃnâ Elobmîsa a hō ǁkhā.​—“Elobmîsa Afrikab gowagu ǃnâ māǂuis” di hâ boksisa mû re.

16. Mateub 28:19, 20 ǃoagu da mati a ǁgau ǁkhā Elobmîsa da ra ǃgôaǃgâ ǃkhaisa?

¹⁶ Elobmîsa tsēs hoasa khomais tsî khomai da ra xūna ǂâiǃnâ tsî ûiǂuis ǃnâ-ū da ge a ǁgau ǁkhā Elobmîs ǃaroma da a ganganxa ǃkhaisa. Sada ǃgôaǃgâsib tsîna da ge a ǁgau ǁkhā ǂgui khoena Elobmîs ǃnâ da ra ǁkhāǁkhāsen xūn xa mîbas ǃnâ-ū.​—Psa. 1:1-3; Mat. 24:14; khomai re Mateub 28:19, 20.

17. Mâ ǀkhaegu xa da nē ǁkhāǁkhāǃâs ǃnâ go ǃhoaǃgao tsî tae-e da sao ra ǁkhāǁkhāǃâs ǃnâ nî ǃhoaǃgao?

¹⁷ Nē ǁkhāǁkhāǃâs ǃnâ da ge ǃhūbaib Eloba xu hâ ǀkhaeb sada buruxa ǂkhûs tsî Elobmîs ǀkhaeb xas tsîna go ǃhoaǃgao. Xawe ǀnî ǀkhaegu tsîna da ge Eloba xu ge hō hîna da mû tama hâna. Sao ra ǁkhāǁkhāǃâs ǃnâ da ge ǁnā ǀkhaegu xa nî ǃhoa.