1-2. Mukuzwirana na Nduyo 40:6, ngo zvapi zvipo zvotakapuwa ndi Jehovha zve ngenyi tinoda kujija ngo pamusoro pazvo?

JEHOVHA ndi Mwari anokova. Rangariranyi ngo zvipo zvaakatipa: Masejere akaita nyika yedu ndau yakaperera kuitira itusu, uruzvi hwedu hunoshamaisa no Soko rake rinosisira, Bhaibheri. Ngo pamusoro po zvipo zvitatu izvi, Jehovha wakatipa ndau yo kurarama, wakatiitazve kuti tikwanise kurangarira no kubhuya no vamweni zve anokwanisazve kudavira muvhunjo jinosisira maningi jatingaita.​—Verenganyi Nduyo 40:6.

² Pa jijo iyi, tinozojija ngo pamusoro po zvipo zvitatu izvi. Patinonasa kurangarijisisa ngo pamusoro pazvo, tinozobongesera maningi ngo zvipo izvi zve tinozoda kudakajisa musiki wedu ano rudo, Jehovha. (Apokalipsi 4:11) Tinozovazve vakanasiririka kuti tibesere vese vaya vakacengejwa ngo jijiso jo kunyepa jokuti zviro zvakaita kuphinduka-phinduka.

3. Ngenyi nyika yakasiyana no maparaneta amweni?

³ Uzivi hwa Mwari hunovoneka ngo njira yaakarura nyika. (Varoma 1:20; Vaheberi 3:4) Kuno maparaneta amweni anotenderera zuva, asi nyika ndiyona yega basi ino zvese zvinodiwa kuti vandhu vapone.

4. Ngenyi tingananga kuti nyika iri ushoni kupinda piketi?

⁴ Tingaezanisa denderejwa rese ro nyika no piketi iri pakati po jombe. Asi pano musiyano unosisira maningi pakati po piketi yakazara ngo vandhu no nyika yedu. Inga muezaniso, vandhu vari mupiketi vaizopona mukuvo wakadini, kudari ivona vakaita voga okisijheniyo, zvokuha no kumwa zve kudari vakatama  kusveja kunja svina? Vandhu vaizofa ngo kukasika. Mukusiyana, nyika inokwanisa kuita kuti mabhirioni o vandhu no zvinyama zvipone. Inobudisa okisijheniyo, zvokuha no kumwa yatinoda zve mukuvo wese inoramba ino zviro izvi. Pikija svina yese yecisvejehwa pa nyika pano, iyona iri kwenderera mberi iri ndau yakaseja zve inofanehwa kugara. Zvinokwanisika kudini izvi? Jehovha wakasika nyika mu njira yo kuti iyona inokwanisa kucinja svina kuva zviro zvinoshandiswazve ngo njira imweni. Tinozovona kuti tingaitisa kudini kuti tivone uzivi hwa Jehovha ngo maitihwe o okisijheniyo no njira yaanoita kuti kumwa irambe iripo.

5. Zvicinyi zvinoitika ku zvinyama, vandhu no muti kuti zvirambe zvecipona zve ngozvapi zvinovonesa kuti izvi ngo zvokadi?

⁵ Okisijheniyo i mbhepo inoita kuti vandhu no zvinyama zvirambe zvecipona. Zvakavoneka kuti pa gore rimwe, zvinyama no vandhu, zvinoshandisa zana ro mabhiriyau o okisijheniyo zve zvinobudisa mbhepo inozwi dhiyokisidho yo karbhono. Asi okisijheniyo aizomboperi, nee dhiyokisidho yo karbhono aiwandisi kupindirija mudida. Zvinoitikisa kudini izvi? Ngokuti Jehovha wakasika muti yakakura no mudoko. Muti yondhoyo, inotora dhiyokisidho yo karbhono, yopekeja zvinyama no zvandhu okisijheniyo. Ngo pamusoro po zviitiko izvi, ngo panobuda mwiha watinofemari, izvi zvinowirirana no magama anowanika pana Maitiro o Vapostori 17:24, 25, ao anoti: “[Mwari] . . . anopa vese uhomi [no] kufema.”

6. Zvicinyi zvinoitika kuti kumwa igare indoripo zve ngozvapi zvinovonesa kuti izvi ngo zvokadi? (Vonanyi bhokiso rinoti: “ Kumwa Cipo Cinovha ka Jehovha.”)

⁶ Kumwa inowanika pa nyika ngokuti paraneta yedu airipi ndhambo kana phedo no zuva. Kudari paraneta yedu noyainga phedo no zuva, kumwa yese yo pasi pano, yaizovira zve yaizopejisira ngo kuoma zvokuti apacaizova no upenyu. Kudari paraneta yedu no yainga ndhambo padoko no zuva, kumwa yese yaizobatana yoita buwe zve nyika yaizozara ngo kumwa yo mapuwe. Zvecivoneka kuti Jehovha wakadira nyika pa ndau payo, kumwa iri mu nyika inokwanisa kuita kuti pave no upenyu. Zuva rinopisa kumwa yo mu jombe no kumwa inowanika pa nyika zve kumwa iyi, inoita buruusi yoenda koita makore. Pa gore, mutengo unokhwedera kuita 500.000 kirometro kubhiko wo kumwa, unoita buruusi. Kumwa iyi, inogara pa atomosfera ko gumi ro njiku isati yana kana kuita kumwa yo mapuwe. Kuvha iponapo, inohwirirazve mu jombe no pa nyika zve inoramba icindodaro. Jehovha wakaita izvi kuti kumwa igare indoripo pa nyika. Izvi zvinovonesa kuti Jehovha ano uzivi no simba.​—Jobe 36:27, 28; Mucumaeri 1:7.

7. Ngojapi njira jatingabongesera ndijona ngo cipo catinowapa pana Nduyo 115:16?

⁷ Tingakhombijisa kudini kubongesera ngo pamusoro po paraneta yedu inoshamaisa no zviro zvese zvainayo? (Verenganyi Nduyo 115:16.) Njira imwe ngo yo kurangarijisisa ngo pamusoro po zviro zvakaita Jehovha. Izvi zvinotindundira kuti tibonge Jehovha njiku jese ngo zviro zvese zvakanaka zvaakatipa. Tinokhombijazve kuti tinobongesera ngo nyika yedu ngo kuita ukhirini patinogara kudari zvecikwanisika weya.

8. Ngenyi tingananga kuti uruzvi hwedu wakaitwa mu njira inoshamaisa?

⁸ Uruzvi hwedu wakaithwa mu njira inoshamaisa. Pomainga mu ndani ma mai wenyu, uruzvi hwenyu hwairongwa mukuzwirana no zvaiitika zve mabhirioni o maserura aiumba uruzvi upsa pa museswa umwe nga umwe! Vapsakisisi  vakaeja kuvona kuti vasharuka vano mutengo unokhwedera kuita zana ro mabhirioni o maserura anodanijwa neuroniyo anowanika mu uruzvi. Maserura aya, anoumba uruzvi hwedu zve anorema mutengo unokwana kuita kiru imwe no padoko. Ngativone zviro zvinganani zvinoshamaisa zvinoitwa ngo uruzvi.

9. Ngozvapi zvinomukhohwesa kuti kukwanisa kwedu kuvereketa i cipo cinovha ka Mwari?

⁹ Kukwanisa kwedu kuvereketa, cishamaiso. Rangariranyi zvinoitika patinonga tecivereketa. Gama rimwe nga rimwe ratinonanga, uruzvi hwedu unotungamirira kutamba-tamba kunoita zana ro mujira, jinowanika pa rurumi, pa dokoriro, pa muromo, pa shaya no mu hana. Kuti munase kubudisa magama ngo njira kwayo, mujira iji, jinodikana kutamba-tamba ngo njira yakarongeka. Ngo pamusoro po kukwanisa kuvereketa ndumi, jijo imweni yakaitwa mu gore ro 2019, yakavonesa kuti mwana wavha kubahwa, angakwanisa kusana magama ake. Jijo iyi, inobesera zvinotendhwa ngo vapsakisisi kuti tinobahwa tecikwanisa kuziva no kujijira ndumi. Ngo zvokadi kuti, kukwanisa kwedu kuvereketa i cipo cinovha ka Mwari.​—Exodo 4:11.

10. Tingakhombijisa kudini kuti tinobonga ngo cipo co kuvereketa?

¹⁰ Njira imwe yatingakhombija kuti tinobongesera ngo cipo co kukwanisa kuvereketa, ngo yokusanangurira vandhu vese vanotenda zvouphindu-uphindu, kuti ngenyi itusu tinotenda kuti Mwari ndiyena wakasika zviro zvese. (Nduyo 9:2; 1 Pedru 3:15) Vandhu vanobesera zvitendhwa izvi, vanonanga kuti nyika no upenyu azvizivi kuruhwa. Kudari tikashandisa mafundo manganani atapera kuvona pa jijo iyi, tinozojivirira Baba vedu vo kudenga no kusanangurira vese vanotipurukira kuti ngenyi tino cokwadi cokuti Jehovha ndi Musiki wo denga no nyika.​—Nduyo 102:26; Isaia 40:25, 26.

11. Ngocapi cinoitisa kuti uruzvi hwedu huve hunoshamaisa?

¹¹ Kukwanisa kwedu kuceukija, kunoshamaisa. Kareko, mwanarume umweni wakananga kuti uruzvi hwo mundhu hunokwanisa kurangarira masoko anokwakwatija mutengo unokwana makumaviri o mamirioni o mabhuku makuru. Pikija zvakadaro, nyamasi uno, kunorangarihwa kuti tingakwanisa kuceukija zvizinji kupinda izvi. Ngocapi ciro cinokwaniswa kuitwa ngo vandhu basi?

12. Kuitisa kudini kukwanisa kwedu kujija maponero aushoni anotisianisa no zvinyama?

¹² Pakati po zvisikwa zvese, vandhu ndivona basi vanokwanisa kujija ngo pamusoro po maponero. Vanoita zvondhozvo ngo kuceukija no kuzemena zvakaitika kare. Inga muviyo, tingakwanisa kujijira ndhungamiriro jaushoni no kucinja marangaririre edu. (1 VaKorinto 6:9-11; VaKolosi 3:9, 10) Ngo kudaro, tinokwanisa kuroveja hana yedu no kuziva kusianisa zviro zvakanaka no zvakashata.  (Vaheberi 5:14) Tingajijira kuvonesa rudo, unyasha no usizi. Tingakwanisa kujija kutevejera ururami hwa Jehovha.

13. Mukuzwirana na Nduyo 77:11, 12, tinodikana kushandisa kudini cipo cedu co kuceukija zvakaitika?

¹³ Njira imwe yatingavonesa kubongesera cipo co kuceukijira zvakaitika, ngo yo kueja kurangarira nguva jese jotakabesehwa ndi Jehovha no kuvangiswa ndiyena. Izvi zvinovangisa kuthemba kwedu kuti iyena anozotibesera kumbejiyo. (Verenganyi Nduyo 77:11, 12; 78:4, 7) Njira imweni ngo yo kurangarira zviro zvakanaka zvatiri kuitihwa ngo vandhu vamweni no kuvabonga ngo zvovari kuitaro. Vapsakisisi vakavona kuti vandhu vanobongesera vanovonesa kuva vakadakara maningi. Tingaitazve zvakanaka ngo kutevejera Jehovha ngo kukanganwa zvotakaposehwa. Inga muezaniso, Jehovha ano murangariro wakakwana, asi patinokhauya, anotiregerera, wotozvikanganwa. (Nduyo 25:7; 130:3, 4) Iyena anoda kuti itusu tiitevo kudaro ku vamweni kudari ivona vakakumbira kuregerehwa ngo zvovakaposa.​—Mateu 6:14; Luka 17:3, 4.

14. Tingakhombijisa kudini kubongesera ngo cipo cinoshamaisa co uruzvi hwedu?

¹⁴ Tingakhombija kubongesera ngo cipo cinoshamaisa co uruzvi hwedu ngo kucishandisa mu njira inokuja wiya wakatipa. Vamweni vanosana kushandisa uruzvi hwavo kuti vagutise zvido zvavo zvo umbau, pakujisanira vega zvakanaka no zvakashata. Asi, zvecivoneka kuti Jehovha wakatisika, ndhungamiro jake ndijona basi jakanaka kupinda ndhungamiro jedu. (VaRoma 12:1, 2) Patinopona mukuzwirana no ndhungamiro jake, tinova no runyararo. (Isaia 48:17, 18) Zve tinojijira kuita zvinoda Jehovha patinonga tecipona, kuti tikuje Musiki wedu no kumuita kuti adade ndisu.​—Mazwi Akangwara 27:11.

15. Kuitisa kudini Bhaibheri i cipo co rudo cakavha kuna Jehovha?

¹⁵ Bhaibheri, cipo cinokhombija rudo huna Mwari na itusu. Baba wedu vo mugore, vakafemera vandhu kuti varitare ngokuti vanotida maningi. Ecishandisa Bhaibheri, Jehovha  anodavira muvhunjo jinosisira maningi jatingaita, jakadari inga iji: Itusu takavhepi? Ngocapi cinangwa co upenyu? Zvicinyi zvinozoitika kumbejiyo? Jehovha anoda kuti vana vake vese vazive mupinguro jo muvhunjo iji. Ngo kudaro, iyena wakaita kuti vandhu vasanduje Bhaibheri mu ndumi jakawanda. Nyamasi uno, Bhaibheri rese kana bindikati raro, rinowanika mu ndumi jinodarika 3.000! Bhaibheri ndirona rega basi bhuku rinosandujwa no kubudiswa kupinda mabhuku amweni ese. Azvinenyi kuti tiri kugara kwapi kana kuti tinovereketa nduminyi, tino mukana wo kujija Bhaibheri mu ndumi yedu.​—Vonanyi bhokiso rinoti: “ Kusandujwa ko Bhaibheri mu Ndumi jo Afrika.”

16. Mukuzwirana na Mateu 28:19, 20, tingakhombijisa kudini kureremeja Bhaibheri?

¹⁶ Tingakhombija kuti tinoreremeja Bhaibheri ngo kuriverenga njiku jese, kurangarijisisa ngo zvarinojijisa no kuita zvatinokwanisa kuti tishandise zvatinojijaro. Mukuengejera, tingakhombija kubongesera kwedu Jehovha ngo kuita zvese zvatinokwanisa kuti ticumaere vandhu vese vatinokwanisa.​—Nduyo 1:1-3; Mateu 24:14; verenganyi Mateu 28:19, 20.

17. Ngozvapi zvipo zvotajija pa musoro uno zve ngozvapi zvatinozojija pa musoro unotevera?

¹⁷ Pa jijo iyi, takwanisa kuvona zvipo zvatinopuwa ndi Mwari, zvakadari inga nyika yedu; uruzvi hwedu hunoshamaisa pomwe no Soko rakafemehwa ndi Mwari, Bhaibheri. Asi, pano zvipo zvimweni zvatinopuwa ndi Jehovha zvaticikakwanisi kuvona. Tinozobhuya ngo pamusoro po zvipo izvi zvicikavoneki pa musoro unotevera.