1-2. Dookɛ̄ kpa Le-yɔɔ 40:5 kɔ doo, pya amunu dɔɔ̄nu na Jɛhova enɛa i a, e e na i gaa le nɔ bu lo ekobee ue ama a?

JƐHOVA lu Bari a dɔɔ̄nu bu yaaribah. Naa kɛɛrɛbu pio dɔɔ̄nu a enɛa i doodoo: i kɛnɛkɛ̄ a kpedɛɛ̄ sa lee etɔɔ̄ bu, i puī alu edɛm bu nyɛŋia sīdee; le ye Muɛ̄ Ue a kuī lo a le Baibol. Tɛ̄maloo taa pya dɔɔ̄nu ama, Jɛhova enɛa i kɛ̄ etɔɔ̄, enɛa i ekpo lo e’ɛrɛ ekɛɛrɛ sa dap kɔ ue nɛ pya dɔɔ̄na, sa e’agara pya ebip alu gbɛnɛ lo i dap bip.—Buū Le-yɔɔ 40:5.

² Bu lo ekobee ue ama, i gaa le nɔ nu akiiloo taa pya dɔɔ̄nu ama. Kuma sɔ̄ i ɛrɛ ekɛɛrɛ nyɔɔ pya dɔɔ̄nu ama kɛ̄ i tɔgɛ nage nia loo doo lo, e kɛ̄ i taɛ lo e’ɛɛrɛbu Jɛhova i nɛɛ dɛmnu e’aga nage tɛ̄ doo lo. (Mum 4:11) E doo nage kɔ i dap yerebah nɛ pya elua edag kɔ Bari naa bee dɛm nu.

3. E na anua kɛnɛkɛ̄ lu keebee a?

³ I muɛ̄ suānu Bari bu kɛ̄ a dɛm nyɔuwe ama doo. (Rom 1:20; Hib 3:4) A ɛrɛ nage pya dɔɔ̄na planet a tɛɛ̄ ɛŋɛnɛ zue, mɛ kɛnɛkɛ̄ lu keebee nyɔnɛbee a le taɛ kɛ̄ a ye bɔloo lo a doo nage kɔ pya nɛɛ a tɔɔ̄dum.

4. E na anua i dap kɔ kɛnɛkɛ̄ lee ee ɛrɛgeba fah maā nɛɛ kwa a?

⁴ Bu pio sīdee, kɛnɛkɛ̄ le doodoo fah maā a gaa yɛɛ nyɔɔ gbɛnɛ pɛnɛ. Mɛ a ɛrɛ gbɛnɛ kee a le yɛɛ fah maā nɛɛ kwa, lo pya nɛɛ wee yii bu, le kɛnɛkɛ̄. Bu edoba, kuma mɛ sɔ̄ na pya nɛɛ a le bu fah maā edap tɔɔ̄dum lo a le alaba na ba kwa efɔp ba zuura, nuede, maā e’ɔ̄  sa ba naa dap top ekpaɛkɛ̄ bie ee ani? Pya nɛɛ a le bu lo fah maā e’u. Bu kiiya sī, kɛnɛkɛ̄ doo kɔ gbɛnɛ-edo nu a dap tɔɔ̄dum. A nɛ i nu a i bɛɛ̄ doodoo efɔp i zuura, nuede, maā e’ɔ̄, e pya nu a i bɛɛ̄ kaāna ama naa tah kɛ̄. Kere pya nu alu ekpaɛkɛ̄ mma a kɛnɛkɛ̄, kɛnɛkɛ̄ le gaa kpedɛɛ̄ sa dap lu etɔɔ̄ bu. Lo ama doodoo wa waɛ? Jɛhova dɛm kɛnɛkɛ̄ ama lokwa pya nu alu ekpaɛkɛ̄ dap sikɛ̄ lee loo kɛnɛkɛ̄. Bu ekpurubah, i gaa le kɔ ue nyɔɔ kɛ̄ efɔp le maā tɛ̄na doo.

5. E na alu efɔp oxygen a, e e na a tɔgɛ a?

⁵ Efɔp a kura oxygen lu efɔp pio nu a le dum zuura, gbaā nage loo nɛɛ. Elua emuɛ̄ kɔ bu ziī ziī zua, pio nu a le dum zuura oxygen nu alu booboo biliɔn sɔ̄. Pya nu a le dum ama lɛa efɔp a kura carbon dioxide bu wa. Kerewo, pya nu a le dum ama naa zuura efɔp oxygen sah kɛ̄, e sī-dee naa mma tɛ̄maloo “pɔrɔ” efɔp a kura carbon dioxide. E na anua a naa mma a? Nyɔnɛbee Jɛhova dɛm nage pya dɔɔ̄na nu a le dum, aāloo gbɛnɛka te mmɛ loo lo nwīgbagbara lo ba zuura efɔp carbon dioxide sa lɛa oxygen bu. Kuma sɔ̄ kɛ̄ efɔp ama tɛ̄na doo doo kɔ i ɛrɛ lo i dap zuura a, a gbaaloo ue a le bu kpa Doonu pya Nɛɛ lɛɛratam 17:24, 25 lo a kɔ, “[Bari] nɛ dɛ̄dɛɛ̄ nɛɛ dum le piogi.”

6. Maā wee tɛ̄na doodoo wa, e e na a tɔgɛ a? (Buū ekpo a kura “ Kɛ̄ Maā Tɛ̄na Doo Lu Dɔɔ̄nu A Aabah Jɛhova.”)

⁶ Maā le a kɛnɛkɛ̄ nyɔnɛbee nyɔuwe ama lu esere taɛ kɛ̄ a ye bɔloo aāloo zue. Nyɔɔwo, lo zue bee tɔɔ̄ kina waɛloo kɛ̄, dɛ̄dɛɛ̄ maā ebee kaga tah, kɛnɛkɛ̄ aramiā, sa lɔgɔ nu naale ebee dap tɔɔ̄dum. Lo a le kɛnɛkɛ̄ bee binia kina aāloo zue, dɛ̄dɛɛ̄ maā ebee lu eba eba, sa doo kɔ dɛ̄dɛɛ̄ kɛnɛkɛ̄ alu ice. Nyɔɔbee Jɛhova sere kɛnɛkɛ̄ taɛ kɛ̄ a ye bɔloo a, doo kɔ kɛnɛkɛ̄ a ɛrɛ maā sa nu dap tɔɔ̄dum. Zue legere maā a le bu gbɛnɛ pɛnɛ le lo a le nyɔɔ kɛnɛkɛ̄ sa doo kɔ maā a kii sī-dee sa lu tɔ̄dee. Bu ziī ziī zua, zue su nu alu 120,000 cubic miles (500,000 cu km) maā lɛɛ kɛnɛkɛ̄. Lo maā tɔɔ̄ sī-dee nu alu lop biradee lɛɛ a dɔɔ lu boo ale snow. Lo maā obia kii bu gbɛnɛ pɛnɛ ale dɔɔna kɛ̄ maā wee le, sa doo kɔ maā a sikɛ̄ le kɛnɛkɛ̄. Kuma kɛ̄ maā gbɔɛ̄ kɛ̄ sa doo kɔ dum a le doo, tɔgɛ kɔ Jɛhova ɛrɛ suānu le ekpo.—Job 36:27, 28; Eklis 1:7.

7. Pio e na i doo lo etɔgɛ nia loo dɔɔ̄nu alu ebaatɛ̄ bu kpa Le-yɔɔ 115:16 a?

⁷ Bu mɛ sīdee na i tɔgɛ nia loo kɛnɛkɛ̄ alu nyɛŋia sa i nɛ pya i ebɛɛ̄ ama a? (Buū Le-yɔɔ 115:16.) Ziī sīdee na tɛ̄maloo e’ɛrɛ ekɛɛrɛ nyɔɔ pya nu Jɛhova edɛma. Lo ama eyere i mɛm loo kɔ i doo yaa Jɛhova dɛ̄dɛɛ̄ dee loo pya lele nu a i nɛ. E i tɔgɛ kɔ i tɔgɛ nia loo kɛnɛkɛ̄ tɛ̄maloo esere kɛ̄ i tɔɔ̄ ɛɛrɛ.

8. E na anua i dap kɔ i puī lu ekwa bu nyɛŋia sīdee a?

⁸ Kɛ̄ alu edɛm puī nɛɛ doo lu nyɛŋia. Sɔ̄ o bee le bu ka, o puī bee lu ekwa dookɛ̄ a bee lu enɔɔ sere kɛ̄ doo, e gbɛnɛkpo cell lu ekwa yere bu i puī bu ziī ziī minit. Pya egbiātɛ̄ nu kɔ puī nɛɛ a elua gbɛnɛ nɛɛ ɛrɛ nu a dap  lu 100 biliɔn cell lo alu ekue neurons. Pya lo cell elua ebɔŋɛnɛloo sa ye edɔnia dap lu 3.3 pounds (1.5 kg). Naa kɛɛrɛ pio nu puī dap doo alu nyɛŋia.

9. E na a a tɔgɛ kɔ ekpo kɔā ue lu dɔɔ̄nu a aabah Bari a?

⁹ Dɔɔ̄nu kɔā ue lu nyɛŋia. Naa kɛɛrɛ nu akiiloo kɛ̄ i kɔ ue doo. Kuma sɔ̄ o gaa kɔ ziī ziī bee ue, o puī baɛloo nu alu 100 sip a le bu o edɛm, edee-oo, ekpa nyɔɔnu, bɛɛ, le nyiɛ a. Lokwa a dap lu ekue ziī ziī bee ue leere, pya sip ama ɛrɛ elu esere wa ziī ziī kɛ̄ a wa bɔloo lokwa a dap lu edābeeloo ue i gaa kɔ. Kiiloo ekpo lo ekɔ keekee muɛ̄ ue, ziī kpa a bee lu ekwa bu zua 2019 tɔgɛ kɔ pya nwiī a mɛā aā dap dābeeloo ziī ziī bee ue. Egbiātɛ̄ nu ama yerekpotɛ̄ gbɛnɛ-edo nu pya gbītɛ̄ nu yiga, lo a kɔ alu emaɛ̄ i sa i nɛ ekpo enɔā keekee muɛ̄ ue. Bu kaka, i ekpo kɔā ue lu dɔɔ̄nu a aabah Bari.—A’aa 4:11.

10. Bu mɛ sīdee na i dap tɔgɛ nia loo dɔɔ̄nu kɔā ue lo Bari enɛa i a?

¹⁰ Ziī sīdee i dap tɔgɛ nia loo dɔɔ̄nu kɔ ue na tɛ̄maloo ebaatɛ̄ i yira bu Bari nɛ pya nɛɛ ba bip nu anua ii yiga kɔ nu bee bugia le. (Yɔɔ 9:1; 1 Pit 3:15) Pya ba nyimɛ lo tɔgɛnu gbī kɔ i yiga kɔ kɛnɛkɛ̄ le dɛ̄dɛɛ̄ nu a le dum bugia le. Susu Baibol le pya kpog-bee nu i enɔā bu ekobee ue ama daānu, i dap kɔ ue bee i yira bu i Tɛ a le li bunyɔɔ sa baatɛ̄ nɛ pya a gbī esuā nu anua i yiga kɔ Jɛhova na a bee dɛm bunyɔɔ le kɛnɛkɛ̄ a.—Yɔɔ 102:25; Ais 40:25, 26.

11. E na alu ziī nu anua i puī lu keebee a?

¹¹ I ekpo lo enyɛŋiabu nu lu nyɛŋia. Sɔ̄ akii adumɛ, ziī nɛɛ ɛm kpa bee ɛm kɔ puī nɛɛ nyɛŋiabu pya yereue a dap yii bu nu alu 20 miliɔn ekpo kpa. Kerewo, nyaawo lu ekɔ kɛ̄ i puī nyɛŋiabu nu doo eewo. Amunu keebee ekpo na nɛɛ ɛrɛ a?

12. Ekpo i ɛrɛ lo enɔ nu a lee doo kɔ i lu kee loo nam doodoo wa?

¹² Yɛɛ dɛ̄dɛɛ̄ nu alu edɛm a le bu nyɔuwe, aba nɛɛ na a ɛrɛ ekpo enɔā sīdee tɔɔ̄dum a lee tɛ̄maloo enyɛŋiabu sa kɔ ue nyɔɔ nu a bee sira sɔ̄ akii adumɛ a. Nu esira aabu na bee, i dap nyaana i ekɛɛrɛ sa tɔɔ̄dum bu sīdee a lee. (1 Kɔr 6:9-11; Kɔl 3:9, 10) Bu kaka, i dap kpɔā i ekɛɛrɛ beenyiɛ lo eyere nukuādɛɛ̄ loo kee a le yɛɛ le le pɔrɔ. (Hib 5:14) I dap nɔ etɔgɛ wereloo, fɛgɛ dogo, le toesaɛ̄. E i dap nɔ kɛ̄ Jɛhova tɔgɛ kaāna biaɛ doo.

13. Aāloo nu a le bu kpa Le-yɔɔ 77:11, 12, bu mɛ sīdee na i dap su dɔɔ̄nu nyɛŋiabu nu daānu a?

¹³ Ziī sīdee i tɔgɛ nia loo dɔɔ̄nu  nyɛŋiabu nu na sɔ̄ i piiga lo ewee nyɛŋiabu pya sīdee Jɛhova eyerebah i nɛ sa i nɛ egbɔ̄nyiɛ sɔ̄ akii adumɛ. Lo ama edoo kɔ i dɛrɛ nyiɛ nyɔɔ kɔ a gaa le yere nage bah i nɛ li deesī. (Buū Le-yɔɔ 77:11, 12; 78:4, 7) Dɔɔ̄na sīdee na lo enyɛŋiabu lele nu pya dɔɔ̄na edora i nɛ sa tɔgɛ nia loo pya nu ba doo. Pya egbiātɛ̄ nu emɔna kɔ pya nɛɛ a tɔgɛ nia wee ɛrɛ ɛɛbu. I nɔnage Jɛhova sa biaɛfii lo e’ibere pio nu. Bu edoba, Jɛhova para nyɛŋiabu nu, mɛ lo i kiiya, a biaɛfii lo e’aaloo i nɛ sa ibere pya i tɛɛ̄ ekwɔ. (Yɔɔ 25:7; 130:3, 4) E a gbī kɔ i doo wo nɛ pya dɔɔ̄na sɔ̄ ba tɔgɛ kɔ ekwɔ ba tɛɛ̄e kiɛ̄e wa.—Mat 6:14; Luk 17:3, 4.

14. Bu mɛ sīdee na i dap tɔgɛ nia loo nyɛŋia dɔɔ̄nu puī lo Jɛhova enɛa i a?

¹⁴ I dap tɔgɛ nia loo nyɛŋia dɔɔ̄nu i puī tɛ̄maloo esu nɛā ka nɛɛ a bee i nɛ. Pio nɛɛ biaɛfii lo esu wa puī daānu bu pɔrɔ sīdee, lo a le su daānu dookɛ̄ alaba gbī doo, sa biaɛfii lo edoo nu ba kɛɛrɛ kɔ a lee ale a bee piya. Mɛ nyɔɔbee Jɛhova na a bee i dɛm a, a lee kɔ i muɛ̄ kɔ alɛɛ daakuu lee ee lo ili. (Rom 12:1, 2) Lo i tɔɔ̄ nyɔɔ daakuu Jɛhova, i le bu efɛɛloo. (Ais 48:17, 18) E i nɔ nu Jɛhova gbī kɔ i doo sɔ̄ i le dum, lo a le nɛ ka Nɛɛ a bee i dɛm le i Tɛ sa doo kɔ bu ye a ɛɛ.—Kam 27:11.

15. Bu mɛ sīdee na Baibol lu dɔɔ̄nu Jɛhova nɛ miɔŋɔ nɛɛ a tɔgɛ kɔ a were i loo a?

¹⁵ Baibol lu dɔɔ̄nu a aabah Bari. I Tɛ a le li bunyɔɔ bee nɛ kaɛ edɔɔ̄ pya nɛɛ lokwa ba dap ɛm ye ue nyɔnɛbee a kuūdɛɛ̄loo pya ye miɔŋɔ a le a kɛnɛkɛ̄. Tɛ̄maloo Baibol, Jɛhova agara pya ebip a kuī eera lo a kɔ: Mɛ kɛ̄ na i aa a? E na alu ekɛɛrɛ a le dumɛ dum a? E e na esira li deesī a? Jɛhova gbī  kɔ dɛ̄dɛɛ̄ pya ye miɔŋɔ a nɔ nu akiiloo ture pya ebip ama, ɛɛ na anua bu gbɛnɛ-edo zua lo a eyerebah nɛ pya ye nɛɛ kɔ ba a tap Baibol yere bu gbɛnɛ-edo muɛ̄ ue. Nii’ee, yube ekpo Baibol ale siga loo le bu nu a luge 3,000 muɛ̄ ue. Baibol na aba kpa alu etap sa dɔɔ̄ yaari tɛ̄ma ɛŋɛnɛ dɛ̄dɛɛ̄ kɛ̄ a. Kaɛlɛɛ ɛrɛgeba kɛ̄ pya nɛɛ le, muɛ̄ ue ba kɔ, gbɛnɛ-edo nɛɛ ɛrɛ dee lo enɔ yereue Baibol bu wa muɛ̄ ue.—Buū ekpo a kura “ Dodoo Kɔ Baibol A Le Bu Pya Muɛ̄ Ue Africa.”

16. Dookɛ̄ kpa Matiu 28:19, 20 kɔ doo, bu mɛ sīdee na i dap tɔgɛ kɔ i tɔgɛe nia loo Baibol a?

¹⁶ I dap tɔgɛ nia loo Baibol tɛ̄maloo ebuū ye dɛ̄dɛɛ̄ dee, ɛrɛ ekɛɛrɛ nyɔɔ pya nu a tɔgɛ, sa doo kuma kɛ̄ i dap doo lo esu pya nu i nɔ yere bu dogo. Gbaāloo wo, i tɔgɛ nia loo Bari tɛ̄maloo edoo dɛ̄dɛɛ̄ nu i dap lo ekɔ yereue a le bu nɛ pya dɔɔ̄na.—Yɔɔ 1:1-3; Mat 24:14; buū Matiu 28:19, 20.

17. Amunu dɔɔ̄nu na i ekɔa nu akiiloo bu ekobee ue ama a, e e na i kɔ nu akiiloo bu lo ekobee ue enyɔɔnɛ a?

¹⁷ Aā sɔ̄ i ekɔa pya dɔɔ̄nu Bari i nɛ doodoo kɛnɛkɛ̄ lo a lu i be, i puī alu nyɛŋia, le Muɛ̄ Ue Bari lo a le Baibol. Mɛ a ɛrɛ pya dɔɔ̄na dɔɔ̄nu Jɛhova i nɛ lo ii dap mɔmadɛɛ̄. Pya dɔɔ̄nu ii mɔmadɛɛ̄ ama elu ekɔ ue nyɔɔ bu lo ekobee ue a nyɔɔnɛ.