1, 2. (1) Salmus 40:5 ninqannö, ¿imatatan Jehoväqa qaramashqantsik? (2) ¿Imanirtan tsë kimampita yachakushun?

JEHOVÄQA kuyakoq Teyta Diosmi. Tsëmi kawanapaq Patsata kamanqanman, urusnintsik o toqshuntsik shumaq rurashqa kanqanman y Palabran Bibliaman yarpärishun. Tsë kimantam Jehoväqa qaramashqantsik. Mëchö täränapaq, alli pensar parlapänakunapaq y imatapis musyëta munar yachakunapaq (leyi Salmus 40:5 *).

² Tsë kimanta Jehovä qaramanqantsikpitam kë yachatsikuychö yachakushun. Tsë qaramanqantsikman yarparqa, Kamakoq Teytantsiktam agradecikushun y respetashun (Rev. 4:11). Y Teyta Dios mana kanqanta creitsir engañashqa nunakunata yanapanapaqpis listum këkäshun.

3. ¿Imapaq kamashqatan kë Patsa?

³ Kawëkanqantsik Patsa imanö kamashqa kanqanta rikarqa, Teyta Dios alli yachaq kanqantam musyantsik (Rom. 1:20; Heb. 3:4). Cläru parlakuychöqa, Inti o Rupay jiruroqnimpa tumaq mas planëtakunapis kanmi, tsënö kaptimpis kë Patsallatam nunakuna shumaq kawanapaqqa ruramushqa.

4. Patsata Teyta Dios imanö kamanqampita parlakaramuy.

⁴ Patsaqa imëka atska nunan cargashqa ëwëkaq barcunömi. Peru Patsaqa manam igualantsu nuna ruranqan  barcuwanqa. Këman yarpë: vientu, mikuy y yaku mana kaptin, y basürata waqtaman jitayänampaq mana kaptinqa, ¿ëka tiempuraq barcuchö nunakuna kawayanman? Raschi wanur ushariyanman. Kananna këman yarpë: Patsachö tukuyläya kawaqkunaman. Kë Patsantsikqa kawanapaq vientuta, mikuyta y yakutam yuritsin, tsëkunaqa manam ushakantsu, y basürataqa manam ni mëman jitantsiktsu kikinllam ushakärin. Tsënö karmi Patsaqa kawanapaq shumaq kamashqa. ¿Imanirtan tsënö? Jehoväqa Patsata rurashqa kikinlla altsakänampaq y limpiakänampaqmi. Tsëmi kawanapaq vientu imanö limpiuyanqanta y yaku imanö yurinqanta yachakurishun.

5. (1) ¿Imanötan kawanapaq vientuqa limpiuyan? (2) ¿Imanötan tsënö kanqanta musyantsik?

⁵ Kawanapaq vientu mana kaptinqa animalkuna y nunakunapis manachi kawashwantsu. Nunakuna y animalkunaqa atska kutim kawanapaq vientuta shoquyan o shütayan. Tsënö kaptimpis kawanapaq vientuqa manam ushakantsu y mana sirweq vientuqa manam Patsaman juntantsu. ¿Imanir? Kawanapaq vientuqa imëpis limpiuyanmi. Jehoväqa plantakunata y imëkatam kamashqa llapan mana sirweq vientu qarqunqantsikta shoquyänampaq o shütayänampaq, tsëpitanam kawanapaq vientuqa yarqamun. Tsëpaqmi Bibliachöqa Hëchus 17:24, 25 kënö nin: “Diosmi [...] llapan nunakunata kawëninkuna, jamaninkuna y llapan imëkankunapis qon”.

6. (1) ¿Imanirtan yakuqa ushakantsu? (2) ¿Imatatan tsëqa rikätsimantsik? (Rikäri “ Yakuqa Jehoväpa qarëninmi” neqta).

⁶ Intipita o Rupaypita kë Patsa alli sitiuman churashqa kaptinmi, Patsachöqa yaku kan. Ichik mas amänunchö kaptinqa, limpuchi yaku tsakirinman y Patsa alläpa achachaptinchi ni imapis kanmantsu. Y ichiklla mas karuchö kaptinqa, entëru Patsachi raju o rapi tikrarinman. Alli tantiyëkur Patsata Jehovä churashqa kaptinmi, Patsacho yakuqa ushakantsu. ¿Imanötan tsëqa? Inti o Rupay qoñötsiptinmi llapan yaku pukutëman tikrarin. Cada watam Inti o Rupayqa yakuta qoñötsir atska pukutëman tikratsin. Tsëpitanam ciëlupita tamyamur o rashtarnin lamarman o qochakunam yapë kutin. Yakuwan tsënö pasanqanmi musyatsimantsik, Jehovä yachaq y puëdeq kanqanta (Job 36:27, 28; Ecl. 1:7).

7. ¿Imata rurartan Salmus 115:16 ninqanta cäsukushwan?

⁷ Patsata y tsëchö imëka këkaqkunapita agradecikunapaqqa, Jehovä llapan kamanqanmanmi yarpänantsik (leyi Salmus 115:16 *). Tsëmi qaramanqantsikpita cada junaq agradecikunapaq yanapamäshun. Y agradecïdu kanqantsiktaqa rikätsikushun, Patsa limpiu kanampaq yanapakurmi.

8. ¿Imanirtan celebruntsik shumaq rurashqa kanqanta nintsik?

⁸ Nunapa urusnin o toqshunqa shumaq rurashqam. Mamantsikpa pachanllachöraq këkashqam Teyta Dios munanqannö urusnintsikqa shumaq rurakar qallarqan. Y tiempu pasanqanmannömi rurakar sïguin. Yachaq nunakunam niyan,  celebruntsik espantakuypaq rurashqa kanqanta. Tsënö karpis kïlï mediullam lasan. Celebru imakuna rurëta puëdinqanta yachakurishun.

9. ¿Imanötan musyantsik yachëyoqta Teyta Dios kamamashqantsikta?

⁹ Parlakuyta yachënöqa manam imapis kantsu. Parlanapaqqa qalluntsikta, kunkantsikta, chakallwantsikta y pëchuntsikta celebruntsik kuyutsiptinran parlakuyta puëdintsik. 2019 watachömi niyarqan, tsëraq yurishqa wamrakuna parlayanqanta wiyar yachakuyanqanta. Wakinkunapis tsënölla niyanqanmi rikätsimantsik, noqantsikpis yachakuyta puëdikarna yurinqantsikta. Tsëmi cläru musyantsik parlakuyta yachëyoqta Teyta Dios kamamashqantsikta (Ex. 4:11).

10. ¿Imataraq rurashwan parlëta yachanqantsikpita agradecikurqa?

¹⁰ Parlëta yachanqantsikpitaqa, ¿imanötan agradecikushwan? Imapis kikinlla rurakashqa kanqanman creeq nunakunata, Diosnintsiklla llapanta kamashqa kanqanta yachatsirninmi (Sal. 9:1; 1 Pëd. 3:15). Imëkapis kikinlla rurakashqa kanqanta creeqkunaqa, Patsata y llapan kawaqtapis Teyta Dios mana kamashqanta creinatam munayan. Tsëmi Biblia y kë revistaqa ciëluchö Teytantsikta defendinapaq yanapamäshun. Y ciëluta y Patsata Jehovä Diosnintsiklla kamashqa kanqanta yachatsikunapaqpis yanapamäshunmi (Sal. 102:25; Is. 40:25, 26).

11. ¿Ima mastan musyatsimantsik urusnintsik o toqshuntsik alli rurashqa kanqanta?

¹¹ Imanö shumaqmi imëkata yarpanqantsikqa. Juk yachaq nunam kënö nirqan: “Peqantsik o umantsikqa 20 millon librukuna ninqantam yarpëta puëdin”. Tsënö kaptimpis kananqa pensayan mas yarpëta puëdinqantsiktam. Tsëmi cläru musyantsik nunaqa shumaq kamashqa kanqantsikta. Tsëta rikärishun.

12. Unë imanö kawanqantsikpita yachakurqa, ¿ima rurëtatan puëdintsik?

¹² Patsachö llapan kawaqkunapitaqa, nunallam mana allita rurar kawakunqantsikpita yachakur alli kaqtana rurëta puëdintsik. Tsëmi Jehovä munanqanta cäsukurna mana allikuna yarpëta y rurëta jaqintsik (1 Cor. 6:9-11; Col. 3:9, 10). Awmi, ima alli kanqanta y ima mana alli kanqanta reqinapaqqa alli pensëtaraqmi yachakunantsik (Heb. 5:14). Tsënö karmi kuyakoq këta, ankupäkoq o llakipäkoq këta y wakinkunapaq alli kaq rurëta yachakushun.

13. Salmus 77:11, 12, ninqannö, ¿imakunatatan qonqashwantsu? Y ¿imakunatatan qonqëkushwan?

¹³ Urusyoq kamashqa kanqantsiktaqa agradecikushwan, mëtsika kuti Jehovä shoqamarnintsik yanapamashqantsikta  mana qonqarmi. Tsëqa yapëpis yanapamänapaq kaqmanmi markäkushun o yärakushun (leyi Salmus 77:11, 12 *; 78:4, 7). Y juknöpaqa agradecikushwan, wakinkuna allikunata rurar yanapamashqantsikta mana qonqar y agradecikurmi. Yachaq nunakunapis agradecikuyta yachaqkunaqa kushi kushi kayanqantam niyan. Imatapis yarparqa Jehovänömi kanantsik. Peqa llapanta yarparpis, jutsantsikpita arrepentikushqaqa perdonamarnintsikmi qonqëkun (Sal. 25:7; 130:3, 4). Y noqantsikpis pënölla wakinkunata perdonanatam munan (Mat. 6:14; Lüc. 17:3, 4).

14. Urusyoq kanqantsiktaqa, ¿imanötan agradecikushwan?

¹⁴ Urusyoq kanqantsiktaqa agradecikushun, kamamaqnintsikta alabarninllam. Wakin nunakunaqa allita o mana allita akrakuyänampaqmi, tsë qarëtaqa utilizäyan. Peru kikin Jehovä Diosnintsik kamamashqantsik karninmi noqantsikpaq ima mas alli kanqanta musyan (Rom. 12:1, 2). Y pë nimanqantsikkunata wiyakurninqa yamë y kushishqam kawakushun (Is. 48:17, 18). Noqantsikqa kawantsik, Jehovä Diosnintsikta alabanapaq y pëllata imëpis kushitsinapaqmi (Prov. 27:11).

15. ¿Imanirtan Bibliataqa Jehovä qaramarquntsik?

¹⁵ Teyta Diosqa kuyakoq karmi Bibliata ruratsimushqa. Nunakunata kuyarmi ciëluchö Teytantsikqa unë sirweq nunakunawan Palabranta qellqatsirqan. Tsëwanmi Jehoväqa kawë vïdachö musyë munanqantsikta musyatsimantsik. Y wakinqa këkunam kayan: ¿pitan kamamarquntsik?, ¿imapaqtan kawantsik?  y ¿imanöraq shamoq tiempuchö kawashun? Tsënö tapukuykunata musyanapaqmi Jehoväqa unëpitana Bibliata tukuyläya parlayanqanmannö tikratsiyänampaq permitishqa. Kananqa llapan o wakinlla karpis kima waranqapitapis masnam tukuyläya parlayanqankunachö Bibliaqa kan. Nunakunaqa, ima librupitapis masqa Bibliatam katsiyan. Nunakuna mëchö tärarpis y imanö parlarpis Teyta Diospita yachakuytaqa puëdiyanmi (Rikäri “ Africachö parlayanqanmannö Bibliata tikratsiyan” neqta).

16. Mateu 28:19, 20 ninqannö, ¿imanötan agradecikushwan Bibliata katsinqantsikpita?

¹⁶ Cada junaq leyirnin, yachakunqantsikman pensar y imanö kawanapaq yachatsimanqantsikta cäsukurninmi. Y Teyta Diostaqa agradecikuntsik Biblia ninqanta imëkanöpapis wakin nunakunata yachatsirninmi (Sal. 1:1-3; Mat. 24:14; leyi Mateu 28:19, 20).

17. ¿Imapitatan yachakurquntsik? Y ¿imapitanatan juknin kaq yachatsikuychöqa yachakushun?

¹⁷ Këchöqa yachakurquntsik tärëkanqantsik Patsata, urusnintsikta o toqshuntsikta y Palabran Bibliata Teyta Dios qaramanqantsikpitam. Peru mana rikanqantsik kaqkunatapis Jehoväqa qaramarquntsikmi. Juknin kaq yachatsikuychömi tsëpita yachakushun.