1-2. Спрема Псалм 40:5, саве поклонија денѓа амен о Јехова, хем соске ка кера лафи баши ленде ки акаја статија?

О ЈЕХОВА тано дарежливо Девел. Размислин башо несаве поклонија со денѓа амен. Ов денѓа амен и Пхув, која сој амаро совршено кхер. Денѓа амен годи, која сој керди ко чудесно начин. Хем денѓа амен пло скапоцено Лафи, и Библија. Адалеске со добинѓем акала буќа сар поклон таро Јехова, амен иси амен кхер, шај те размислина хем те комуницирина е јаверенцар, хем иси амен одговор ко најважна пучиба. (Читин Псалм 40:5.)

² Ки акаја статија кратко ка дикха акала трин поклонија. Кобор повише размислинаја баши ленде, добором повише ка ценина лен хем ка бајрол амари желба те кера бахтало е Јехова, амаро Створители кова со бут мангела амен (Отк. 4:11). Освен адава, акаја статија ка поможинел аменге те сикава уверлива доказија околенге со сине погрешно сикавде те верујнен ки еволуција.

3. Соске и Пхув тани посебно планета?

³ Е Девлескири мудрост јасно дикхела пе таро начин сар керѓа и Пхув — амаро кхер (Рим. 1:20; Евр. 3:4). Иако нане и единствено планета со кружинела околу о Кхам, и Пхув тани посебно адалеске со ки лате иси са о условија со ваљанена башо живото.

4. Сар дикхела пе и мудрост е Девлескири таро начин сар керѓа и Пхув? Објаснин.

⁴ Шај те споредина и Пхув ко универзум јекхе бродеа сој ко океани. Ама иси важна разлике машкар о броди сој пхердо манушенцар хем амари Пхув. На пример, кобор  време шај те живинен окола сој ко броди ако ваљани коркори те производинен песке кислород, храна хем пани, хем ако нашти те фрден о ѓубре авријал таро броди? Сигурно ка мерен бут сигате. А сар тано е Пхувјаја? Ој икерела ко живото милијарде суштествија. Ки лате произвединела пе кислород бизо кова со нашти те дишина, исто аѓаар са и храна хем о пани кола со ваљанена аменге, хем акала буќа никогаш на трошинена пе. Иако о ѓубре на фрдела пе авријал тари Пхув, него ачховела ки лате, ој палем тани бут шужи хем шај те живинел пе ки лате. Сар шај те овел адава? О Јехова створинѓа амари планета те шај те рециклиринел о ѓубре, јавере лафенцар те шај палем те користинел ле башо нешто јавер. Ка дикха кратко само дуј чудесно керде циклусија — о кислородно циклус хем о кружно тек е пањескоро.

5. Соске на ачховаја бизо кислород, хем со сикавела адава?

⁵ О кислород тано гаси кова со ваљанела е манушенге хем е животненге те шај те ачховен џивде. Проценинела пе кај, јекхе бершеске, о џивде суштествија дишинена шел милијарде тонија кислород, а издишинена јаглерод диоксид башо кова со мислинела пе кај нане корисно гаси. Сепак никогаш на трошинела пе цело кислород хем и атмосфера никогаш на пхерѓола превише јаглерод диоксид. Соске? Адалеске со о Јехова створинѓа јавера организмија — таро најбаре кашта џи ко најситна алге — кола со користинена о јаглерод диоксид хем мукхена кислород ки атмосфера. Адалеске со акава циклус произвединела о кислород со дишинаја ле, шај те сложина амен е лафенцар сој пишиме ко Дела 17:24, 25, коте со башо Девел вакерела пе: „Ов коркори дела сариненге живото хем керела те дишинен“.

6. Соске на ачховаја бизо пани, хем со сикавела акава? (Дикх хем и рамка „ О кружно тек е пањескоро — поклон таро Јехова“.)

⁶ Ки Пхув иси пани ко течно облик адалеске со амари планета тани дур таро Кхам точно кобор со ваљани. Кеда би овела сине само хари попаше џи лесте, са о пани ка испаринел хем и Пхув ка овел сине пусто хем нане те овел сине живото ки лате. А кеда би овела сине само хари подур таро Кхам, са о пани ка смрзнонел сине хем амари Пхув ка овел сине учхарди ивеа хем мразоја. Ама, адалеске со о Јехова чхивѓа и Пхув ко совршено тхан, о кружно тек е пањескоро шај те икерел о живото ки Пхув. О Кхам таќарела о пани таро океанија хем таро јавера тхана коте со иси пани. О пани испаринела хем аѓаар овена облакија. Секова берш, тари Пхув испаринела бут повише пани него со иси ко са о езерија ки цело Пхув. Акава пани ачховела ки атмосфера околу деш диве англедер те перел сар бршим или ив. Ко крајо, о пани иранела пе ко океанија хем ко морија, хем о кружно тек повторинела пе. О Јехова керѓа акава кружно тек те шај секогаш те овел пани ки Пхув. Акава тано доказ кобор ов тано мудро хем моќно (Јов 36:27, 28; Проп. 1:7).

7. Ко саве начинија шај те сикава кај сием благодарна башо поклон кова сој спомнимо ко Псалм 115:16?

⁷ Со ка поможинел аменге панда повише те ценина амари бут шужи планета хем са о шуже буќа ки лате? (Читин Псалм 115:16.) Јекх начин тано аѓаар со хор ка размислина башо са адава со створинѓа о Јехова. Адава ка поттикнинел амен секова диве те благодарина леске башо шукар буќа со дела амен. Исто аѓаар, сикаваја кај сием благодарна баши Пхув сар поклон таро Девел адалеа со даја са амендар те овел со шај почисто о тхан коте со живинаја.

8. Соске шај те вакера кај амари годи тани керди ко јекх чудесно начин?

⁸ И манушикани годи тани керди ко јекх чудесно начин. Панда џикоте сием сине ко воги амаре дајаке, амари годи развинела пе сине спрема јекх плани кова со о Јехова англедер  керѓа ле, хем милје јавера неве мозочна клетке створинена пе сине ки секоја минута! О истражувачија проценинена кај и годи јекхе возрасно манушескири — која сој пхари само околу 1,5 кг. — тани керди скоро таро 100 милијарде клетке кола со викинена пе невронија. Те дикха само некобор чудесна способностија амаре гоѓакере.

9. Со сикавела туке кај амари способност те кера лафи тани поклон таро Девел?

⁹ Амари способност те кера лафи тани чаче чудо. Размислин само хари со случинела пе кеда кераја лафи. Те шај те вакера секова лафи, и годи мора ко исто време те контролиринел о движибе околу 100 мускуленгоро кола тане дело тари амари чхиб, амаро крло, амаро муј хем амаро колин. А те шај те хаљовел пе адава со вакераја, са акала мускулија мора те функциониринен прецизно хем заедно. О резултатија таро јекх истражибе баши амари способност те сикљова чхибја кола со сине објавиме ко 2019 берш, сикавѓе кај о бебија шај те пенџарен лафија хем те реагиринен ки ленде. Акава истражибе поддржинела о заклучок буте истражуваченгоро — кај панда кеда бијанѓоваја иси амен способност те пенџара лафија хем те сикљова чхибја. Сигурно амари способност те кера лафи тани поклон таро Девел (2. Мој. 4:11).

10. Сар шај те сикава кај ценинаја и способност те кера лафи?

¹⁰ Шај те сикава кај ценинаја о поклон таро Девел — и способност те кера лафи — аѓаар со ка објаснина околенге со верујнена ки еволуција соске на сложинаја амен ленцар (Пс. 9:1; 1. Пет. 3:15). Окола со ширинена адаја теорија мангена те убединен амен кај и Пхув хем о живото ки лате уле случајно. Ако користинаја и Библија хем несаве мисле со дикхлем ки акаја статија, ка шај те бранина амаре Даде сој ко небо. Сар? Аѓаар со ка објаснина околенге сој тане спремна те шунен соске сием увериме кај о Јехова створинѓа о небо хем и Пхув (Пс. 102:25; Иса. 40:25, 26).

11. Која тани јекх причина соске и манушикани годи тани чаче нешто посебно?

¹¹ Амари способност те памтина тани чаче нешто посебно. Англедер, јекх научнико проценинѓа кај и манушикани годи шај те кхедел информацие кола со шај те пишинен пе ко околу 20 милиоња лила. Ама, авдиве мислинела пе кај амари годи иси ла бут побари меморија. Сави јавер посебно способност иси амен адалеске со шај те памтина?

12. Сар амари способност те сикљова морална поуке керела амен поразлична таро животне?

¹² Таро са о суштествија ки Пхув, само е манушен иси способност те сикљовен морална поуке адалеа со шај те памтинен хем те анализиринен о буќа со случинѓе пе ленге англедер. Адалеске, шај те менина амаро начин сар размислинаја хем амаро начин сар живинаја, хем те ова пошукар мануша (1. Кор. 6:9-11; Кол. 3:9, 10). Уствари, амен шај те школујна амари совест те керел разлика машкар адава сој исправно, а сој погрешно (Евр. 5:14). Шај те сикљова те сикава мангипе, сочувство хем милост, хем те сикљова те сикава е Јеховаскере праведна мерилија.

13. Спрема Псалм 77:11, 12, сар ваљани те користина о памтиба кова сој поклон таро Девел?

 ¹³ Шај те сикава кај ценинаја о поклон со шај те памтина аѓаар со ка трудина амен никогаш те на бистра сар о Јехова поможинѓа аменге хем утешинѓа амен англедер. Адава ка керел позорали амари доверба кај ов ки иднина да ка поможинел амен. (Читин Псалм 77:11, 12; 78:4, 7.) Исто аѓаар, ка сикава ценење ако памтинаја о шукар буќа со о јавера керена лен аменге хем ако сием ленге благодарна башо адава. О истражувачија откринѓе кај о благодарна мануша тане побахтале. Исто аѓаар, шукар тано те џа пало е Јеховаскоро пример адалеа со ка бирина те бистра несаве буќа. Иако о Јехова совршено памтинела, ов одлучинела те бистрел несаве буќа. На пример, ако каинаја амен, о Девел одлучинела те простинел аменге хем те бистрел о грешке со керѓем лен (Пс. 25:7; 130:3, 4). Ов мангела амен да те постапина аѓаар е јаверенцар кеда ленге жал со грешинѓе аменге хем поврединѓе амен (Мат. 6:14; Лука 17:3, 4).

14. Сар шај те сикава ценење баши амари чудесно годи која сој аменге поклон таро Девел?

¹⁴ Шај те сикава ценење баши амари чудесно годи адалеа со ка да чест околеске со денѓа ла аменге сар поклон. Несаве користинена пли годи те шај коркори те одлучинен сој исправно а сој погрешно. Ама, адалеске со о Јехова створинѓа амен, разумно тано те очекујна кај лескере мерилија тане пошукар таро било саве мерилија кола со амен шај те чхива аменге (Рим. 12:1, 2). Кеда живинаја спрема лескере мерилија, иси амен мир (Иса. 48:17, 18). Освен адава, јасно аменге која тани и смисла башо адава соске постојнаја — те да чест хем те славина амаре Створителе хем Даде, хем те кера ле бахтало (Изр. 27:11).

15. Сар адава со о Јехова поклонинѓа аменге и Библија сикавела кај ов бут мангела амен?

¹⁵ И Библија тани скапоцено поклон таро амаро Дад сој ко небо. Ов поттикнинѓа верна муршен те пишинен ла адалеске со бут мангела пле чхавен ки Пхув. Преку пло Лафи, о Јехова  дела амен одговор башо најважна пучиба, сар сој: Котар аваја? Која тани и смисла е животоскири? Сави иднина аџикерела амен? Адалеске со мангела са лескере чхаве те дознајнен о одговор таро акала пучиба, ко векија со накхле о Јехова поттикнинѓа несаве манушен те превединен и Библија ко бут чхибја. Авдиве, и цело Библија или делија латар тане преведиме ко повише таро 3.000 чхибја! Ој тани о најпреведимо хем најпечатимо лил ки манушикани историја. Буте манушен иси лен прилика те шунен о хабери тари Библија ки пли чхиб, бизи разлика коте живинена или ки која чхиб керена лафи. (Дикх и рамка „ И Библија — преведими ко чхибја со керена пе лафи ки Африка“.)

16. Спрема Матеј 28:19, 20, сар шај те сикава кај ценинаја и Библија?

¹⁶ Шај те сикава кај ценинаја и Библија аѓаар со ка читина ла секова диве, ка размислина хор башо адава со сикљоваја хем ка да са амендар те применина адава. Освен адава, сикаваја е Девлеске кај сием леске благодарна башо лескоро Лафи адалеа со кераја са со шај те вакера о хабери кобор со шај повише манушенге (Пс. 1:1-3; Мат. 24:14; читин Матеј 28:19, 20).

17. Кола поклонија таро Девел дикхлем ки акаја статија, хем башо со ка кера лафи ки следно статија?

¹⁷ Ки акаја статија дикхлем некобор поклонија таро Девел: амаро кхер, и Пхув; амари чудесно годи; хем е Девлескоро Лафи, и Библија. Ама, о Јехова денѓа амен јавера да поклонија со нашти те дикха лен амаре јакхенцар. Баши ленде ка кера лафи ки следно статија.