1-2. Premalo Psalam 40:5, kola poklonija o Jehova dindža amendže hem sose ka vačera olendar?

O JEHOVA tano velikodušno Devel. Razmislin samo ando disave poklonija kola ov dindža amendže, sar soj tane: amari šuži Phuv koja tani jekh savršeno dom amendže, amari godi koja tani čerdi ko jekh posebno način hem oleso Lafi, i Biblija. Sebepi akala trin poklonija, amen isi amen than kaj te živina, isi amen sposobnost te razmislina hem te vačera hem dobindžam odgovorija ko but važna pučiba. (Čitin Psalam 40:5.)

² Ko akava članko ka vačera ando akala trin poklonija. So pobuter ka razmislina olendar, pana pobuter ka cenina len hem amari želja te ugodina e Devlese, amare Stvoriteljese, ka ovel pana pobari (Otkr. 4:11). Isto adžahar, ka sikljova sar šaj ko pana pošukar način te vačera e manušencar kola verujinena ki jekh hovavni nauka, ki evolucija.

3. Sose amari Phuv tani posebno?

³ E Devlesi mudrost jasno dičhola ko način sar ov čerdža amari planeta, i Phuv (Rimlj. 1:20; Jevr. 3:4). Iako amari planeta nane jedino koja džala okolo Kham, oj tani posebno sose jedino oj isi la sa o uslovija kola valjani, te šaj o manuša te živinen upro late.

4. Sose šaj te phena so amari Phuv tani pošukar kotar bilo kova brodo kova čerdža jekh manuš?

⁴ Zamislin jekh brodo ko okeani pherdo manušencar. Amari Phuv tani sar odova brodo. Ama, o brodo kova čerdža jekh manuš hem amari Phuv but razlikujinena pe. Na primer, so bi ovela ked bi valjani kokri o manuša ko odova brodo te proizvodinen o kiseonik, i hrana ja o pani? Ja so bi ovela ako nane len kaj te forden o džubre? So mislineja,  kobor dugo bi ačhona dživde? Verovatno, o manuša ko brodo bi merena sigate. Ki aver strana, ki Phuv živinena milijarde manuša hem o životinje. I Phuv dela amendže kiseonik, hrana hem pani hem niked na ačhiljam bizo odola važna buča. Iako sa o otpatkija ačhona ki Phuv, amari Phuv hem ponodri tani šuži hem upro late šaj te živini pe. Sar tano odova moguće? Odolese so o Jehova čerdža i Phuv adžahar te šaj o otpatkija te preradinen pe ko diso šukar hem palem te koristinen pe. Akana ka dikha diso ando duj kružna tokija – kružno tok ando kiseonik hem kružno tok ando pani.

5. Soj tano o kružno tok ando kiseonik hem so ov potvrdini?

⁵ O kiseonik tano gas kova valjani e manušendže hem e životinjendže te šaj te ačhon dživde. Svako berš, o manuša hem o životinje koristinena stotine milijarda tona ando kiseonik. Isto adžahar, on mukhena o otrovno gas kova vičini pe ugljen-dioksid. Ama, amari atmosfera niked na ačhola bizo kiseonik hem niked nane pherdi ando ugljen-dioksid. Sar tano odova moguće? Odolese so o Jehova čerdža razna organizmija, kotar bare kašta dži o but tikne alge, kola lena o ugljen-dioksid, a amendže dena o kiseonik. Ko asavko način, o kružni tok ando kiseonik potvrdini o lafija kola pisinena ko Dela apostolska 17:24, 25: „O Devel... sarinendže dela o dživdipe hem o dah.“

6. Soj tano o kružni tok ando pani hem so odova mothovi ando Jehova? (Isto adžahar, dikh o okvir „ E Jehovaso poklon – o kružno tok ando pani.“)

⁶ O pani postojini ko tečno stanje odolese so i Phuv arakhela pe ki najšukar razdaljina kotar o kham. Ked bi ovena samo hari popaše jekh averese, sa o pani bi isparini hem i temperatura ki Phuv bi ovela odobor bari so i Phuv bi ovela sar pustinja hem upro late na bi šaj te živini pe. Ki aver strana, ked bi i Phuv ovela hari podur ando kham, sa o pani bi ovela ledo, hem o iv hem o ledo bi učharena celo Phuv. Ama, sebepi so o Jehova čhivdža amari Phuv ko asavko najšukar than, o kružni tok ando pani kova isi ki Phuv šaj te podržini amaro dživdipe. O kham tačari o pani ko okeanija hem o pani kova tano ki površina kotar i Phuv. Palo odova, o pani isparini hem stvorinena pe o oblakija. Svako berš prekalo 500 000 kubnih kilometrija ando pani isparini. Odova pani ačhola ki atmosfera oko deš dive hem palo odova perela ki Phuv sar boršim ja sar iv. Ko krajo, o pani palem džala ko okeanija ja ko avera thana kuri isi pani hem o kružni tok ando pani palem ponovini pe. O Jehova čerdža o kružni tok ando pani te šaj uvek te ovel pani ki amari Phuv. Akava mothovi so o Jehova tano mudro hem moćno (Jov 36:27, 28; Prop. 1:7).

7. Sar šaj te mothova so ceninaja o poklon kova dindža amendže o Jehova, a kolestar vačeri pe ko Psalam 115:16?

⁷ So šaj te pomožini amendže pana pobuter te cenina amari planeta hem sa o šukar buča upro late? (Čitin Psalam 115:16.) Jekh način tano adžahar so hor ka razmislina kotar sa so o Jehova čerdža. Odova ka podstaknini amen svako dive te zahvalina e Jehovase aso sa o šukar buča kola ov dela amendže. Ked daja sa amendar o than kuri živinaja te ovel čisto, amen mothovaja so ceninaja amari planeta.

8. Sose šaj te phena so amari godi tani čerdi ko jekh posebno način?

⁸ Amari godi tani čerdi ko jekh posebno način. Ked hijan le ko te dajako vodži, ti godi razvijindža pe premalo plani kova angleder hine čerdo hem svako minuti  prekalo hiljada neve ćelije hine formirime. O istraživačija phenena so jekhe bare manušesi godi isi la prekalo 100 milijardi ćelija, kola vičinena pe neuronija. Amari godi, koja isi la oko jekh tekvaš kilo, tani čerdi kotar akala ćelije. Akana ka dikha nekobor posebna buča kola šaj te čera sebepi amari godi.

9. Sose hijan uverimo so amari sposobnost te vačera tani poklon ando Devel?

⁹ Amari sposobnost te vačera tano diso čudesno. Razmislin so desini pe ked amen vačeraja. Svako puti ked vačereja, prekalo 100 mišićija, kola arakhena pe ki ti čhib, ko to muj, ki ti vilica, ko to korlo hem ko kolin, sarađujinena maškaro peste. Te šaj te haljon pe sa o lafija kola vačereja, odola mišićija valjani te oven uskladime. Amen isi amen sposobnost te vačera razna čhibja. Jekh istraživanje kova hine čerdo 2019. berš, mothovi so o bebe kola tek bijandilje šaj te haljon hem te reagujinen ked šunena o lafija. Akava istraživanje potvrdindža odova so but istraživačija verujindže, so ano amende tani sposobnost te pendžara hem te sikljova razna čhibja. Šaj te ova uverime so amari sposobnost te vačera tani poklon kotar o Devel (Izl. 4:11).

10. Sar šaj te mothova so ceninaja i sposobnost te vačera, koja dindža amendže o Jehova?

¹⁰ Amen mothovaja so ceninaja i sposobnost te vačera, ked okolencar kola verujinena ki evolucija, vačeraja ando odova so amen uverini so o Devel sa čerdža (Ps. 9:1; 1. Petr. 3:15). O manuša kola zastupinena i evolucija phenena so i Phuv hem o dživdipe upro late ulje slučajno. Ako koristinaja e Devleso Lafi hem disave buča kotar akava članko, amen šaj te dokazina so amaro nebesko Dad postojini. Isto adžahar, okolendže kola mangena te šunen, šaj te objasnina sose hijam uverime so o Jehova tano Stvoritelj andi Phuv hem ando nebo (Ps. 102:25; Is. 40:25, 26).

11. Sose amari godi tani diso zadivljujuće?

¹¹ Amari sposobnost te pamtina tani diso zadivljujuće. Angleder, jekh pisco hem naučniko phendža so amari godi isi la sposobnost te pamtini o informacije kola šaj te terdžon ko 20 milionija knjiga. Avdije tano dokazimo so amari sposobnost te pamtina tani but pobari. Odolese, ko than tano te puča amen: „Sebepi asavki memorija, koja sposobnost isi amen sar o manuša?“

12. Sar i sposobnost te sikljova važna pouke razlikujini amen ando životinje?

¹² Kotar sa o stvorenja ki Phuv, jedino o manuša isi len sposobnost te sikljon važna pouke kotar o događaja kola ulje angleder. Sebepi odova, amen šaj te promenina amaro način sar razmislinaja hem sar postupinaja hem šaj te ova pošukar manuša (1. Kor. 6:9-11; Kol. 3:9, 10). U stvari, amen šaj te oblikujina amari savest te šaj te razlikujina odova soj tano ispravno ando odova soj tano neispravno (Jevr. 5:14). Amen šaj te sikljova te mothova mangipe, saosećanje hem milosrđe. Isto adžahar, šaj te sikljova te ova pravedna sar o Jehova.

13. Premalo Psalam 77:11, 12, sar valjani te koristina amari sposobnost te pamtina?

 ¹³ Amen mothovaja so ceninaja i sposobnost te pamtina ked, sar prvo, trudinaja amen te na bistra sar o Jehova angleder pomožindža amendže hem sar utešindža amen. Ked na bistraja odova, tegani ka ova uverime so ov hem ponodri ka pomožini amendže. (Čitin Psalam 77:11, 12; 78:4, 7.) Sar dujto, amen mothovaja so ceninaja i sposobnost te pamtina ked na bistraja sa so avera manuša čerdže amendže hem ked hijam zahvalna aso odova. O istraživačija phenena so o zahvalna manuša verovatno ka oven pobahtale. Sar trito, šukar tano te oponašina e Jehova hem te bistra disave buča. Iako o Jehova isi le savršeno pamćenje, ked kajinaja amen, ov tano spremno te oprostini amendže hem te bistrel amare greške (Ps. 25:7; 130:3, 4). Ov mangela adžahar hem amen te postupina averencar ked olendže tano žao sose povredindže amen (Mat. 6:14; Luka 17:3, 4).

14. Sar šaj te mothova so hijam zahvalna aso posebno poklon, amari godi?

¹⁴ Ked amari godi koristinaja te slavina Okole kova dindža la amendže, amen mothovaja so ceninaja odova poklon. Disave koristinena pi godi te šaj kokri pese te odlučinen soj tano ispravno, a soj tano neispravno. Ama, sebepi so o Jehova tano amaro Stvoritelj, logično tano so olese merilija tane pošukar nego li amare (Rimlj. 12:1, 2). Ked šunaja e Jehova, amen šaj te ovel amen mir ko vilo (Is. 48:17, 18). Amen džanaja sose živinaja – te slavina amare Stvoritelje hem amare Dade hem te čera le te ovel ponosno upro amende (Posl. 27:11).

15. Sar odova so o Jehova dindža i Biblija e manušendže mothovi so ov mangela e manušen?

¹⁵ I Biblija tani poklon kova mothovi kobor amaro Devel mangela amen. Amaro nebesko Dad vodindža e manušen te pisinen la, odolese so ov brinini pe aso pe čhave ki Phuv. Prekali Biblija, o Jehova  odgovorini ko amare najvažna pučiba, sar soj tane: „Sar uljam? Sose živinaja? Savi budućnost adžičeri amen?“ O Jehova mangela sa olese čhave te džanen o odgovorija ko akala pučiba. Odolese, angleder but berša ov podstaknindža e manušen te prevodinen i Biblija ko razna čhibja. Avdije, celo Biblija ja disave olake delovija tane dostupna ko prekalo 3 000 čhibja. I Biblija tani najprevodimi hem najštampimi knjiga ko celo sveto. Bilo kaj te živinen ja bilo koja čhib te vačeren, but manuša isi len prilika te čitinen i Biblija ki pi čhib. (Dikh o okvir „ Sar i Biblija prevodindža pe ko afrička čhibja?“)

16. Premalo Matej 28:19, 20, sar šaj te mothova so ceninaja i Biblija?

¹⁶ Amen šaj te mothova so ceninaja i Biblija ked čitinaja la svako dive, ked hor razmislinaja ando odova sostar oj sikavi amen hem ked trudinaja amen te primenina odova so sikljovaja. Uzo odova, amen mothovaja i zahvalnost e Devlese ked daja sa amendar te vačera so pobuter manušencar kotar odova so sikljiljam kotar i Biblija. (Ps. 1:1-3; Mat. 24:14; čitin Matej 28:19, 20.)

17. Kotar kola poklonija vačerdžam ko akava članko hem sostar ka vačera ko aver članko?

¹⁷ Ko akava članko dikhljam disave poklonija kola dindža amendže o Devel sar soj tane i Phuv, i godi koja tani čerdi ko jekh posebno način hem i Biblija. Ama, isi disave poklonija kola dindža amendže o Jehova, a kola na dičhona amare jačhencar. Kotar odola dragocena buča ka vačera ko aver članko.