1-2. Mazamure 40:5 maaran, Yihooway nuussi immido imotati aybee, qassi ha huuphe yohuwan nu eta xannaˈanay aybissee?

YIHOOWAY keha Xoossaa. I nuuyyo immido amarida imotata qoppa; hegeetikka, deˈanawu nuussi injjetiya loˈˈiya biittaa, maalaalissiya ogiyan merettida nu guuggiyaanne alˈˈo gidida A Qaalaa Geeshsha Maxaafaa. Yihooway nuuyyo ha heezzu imotata immiis; hegaappe denddidaagan, nuuni deˈiyo sohoy deˈees, qassi qoppananne haratuura haasayana danddayoosinne nuuni oychchana danddayiyo keehi koshshiya oyshatuyyo zaaruwaa demmoos.—Mazamure 40:5 nabbaba.

² Ha huuphe yohuwan, nuuni ha heezzu imotata qanttan beˈana. Nuuni he imotata wotti dentti qoppiyo wode, nuna medhdhida siiqiya Yihoowa kaseegaappe aaruwan galatanawunne A ufayssiyaabaa oottanawu koyana. (Ajj. 4:11) Lodda laamiyaa timirttiyan cimettida asatakka loytti maaddana danddayoos.

3. Saˈay hara ubba pilaaneetetuppe dummatiyoy aybissee?

³ Xoossay saˈaa medhdhido ogiyaa nuuni qoppiyo wode, I aadhdhida eranchcha gidiyoogaa akeekoos. (Roo. 1:20; Ibr. 3:4) Awa ayfiyaa yuuyiya hara pilaaneeteti deˈoosona, shin saˈay asaa deˈuwawu koshshiya ubba hanotaa kunttiyo gishshawu keehi dumma.

4. Xoossay aadhdhida eranchcha gidiyoogaa I saˈaa medhdhido ogiyaappe nuuni waati akeekana danddayiyoo? Qonccissa.

⁴ Nuuni salo gufanttuwan deˈiya saˈaa ano abban deˈiya wolwoluwaara geeddarssana danddayoos. SHin asay kumido wolwoluwaappe saˈay dummatiyo keehi gitabati deˈoosona. Leemisuwawu, asay banttawu okisijiniyaa, qumaanne haattaa medhdhana koshshiyaakko, qassi moorettidabaa wolwoluwaappe gaxi olana xayikko hegan ay keena wodiyaa paxa deˈanee? He wolwoluwan  deˈiya asay sohuwaara hayqqana. SHin, biilooniyan qoodettiya asaynne mehee doˈay saˈan deˈees. Saˈay nuussi koshshiya okisijiniyaa, qumaanne haattaa ubbaa medhdhiyo gishshawu he koshshiyaabati nuuyyo awudenne wuri erokkona. Moorettidabay ubbay saˈan attiyaaba gidikkonne, saˈay deˈanawu loˈˈiya soho. Hegaadan waani hanana danddayii? Saˈay moorettidabaa haranttuwaa goˈettana danddayiyo loˈˈobawu laammanaadan oottidi Yihooway saˈaa medhdhiis. Nuuni okisijiniyaara gayttidaagaaninne haattaara gayttidaagan simmi simmi haniyaaban Yihoowa aadhdhida eratettaa waati akeekana danddayiyaakko xannaˈana.

5. Nuuyyo geeshsha carkkoy wurennay aybissee, qassi hegee ay qonccissii?

⁵ Okisijinee asaynne mehee doˈay deˈuwan deˈanawu koshshiya gaaze. Deˈuwan deˈiyaabati layttan layttan geeshsha carkkuwaa keehi daruwaa shemppidi gelissoosona. Karbbon dayokisayd giyo moorettida gaaziyaa he meretati shemppidi kessoosona. SHin ha meretati geeshsha carkkuwaa ubbaa goˈettana xayikkonne saloy moorettida carkkuwan mule kumi erenna. Aybissi? Moorettida carkkuwa ekkidi geeshsha carkkuwaa kessiya deˈuwan deˈiyaabatanne yesuwan dumma dumma gidida mokkiyaabata Yihooway medhdhido gishshataassa. Ha simmi simmi haniyaabay nuuni shemppiyo carkkuwaa medhdhiyo gishshawu, Oosuwaa 17:24, 25y ‘Xoossay deˈuwaanne shemppuwaa asa ubbaassi immees’ yaagiyoogaa maayettana danddayoos.

6. Nuuyyo haattay wurennay aybissee, qassi hegee ay qonccissii? (“ Haattay Yihoowa Imota” giya saaxiniyaakka xeella.)

⁶ Saˈay awa ayfiyaappe bessiyaagaa keena haakkidi deˈiyo gishshawu, haattaa goggiyaaba oottiyaagaa keena hoˈˈo. Saˈay ba sohuwaappe guuttaa awa ayfiyaakko shiiqiyaakko, saˈan deˈiya haattay penttuwan pude denddana, qassi saˈay deˈuwan deˈiya aybinne baynna hoˈˈiyaanne mela soho gidana. Saˈay awa ayfiyaappe guuttaa haakkiyaakko, ubba haattay shachcha gidana, qassi saˈay shachchan kamettana. Yihooway saˈaa likke sohuwan wottido gishshawu, saˈan haattaara gayttidaagan simmi simmi haniyaabay deˈuwawu maaddees. Away ano abbaaninne saˈan deˈiya haattay hoˈˈanaadan oottees, qassi shaara gidanaadan he haattaa saˈaappe penttuwan pude denttees. Layttan layttan, away ubbasaappe keehi daro haattaa penttuwan pude denttees. Ha haattay ira woy shaachcha gididi bukkanaappe kase tammu gallassa gidiyaagaa saluwan takkees. Haattay wurssettan goggidi ano abbatun woy hara haattatun gayttees, yaatidi haranttuwaa penttuwan pude denddees. Haattaara gayttidaagan simmi simmi haniyaabaa Yihooway giigissido gishshawu saˈan haattay ubbatoo deˈees. Hegee Yihooway aadhdhida eranchchanne wolqqaama gidiyoogaa bessees.—Iyy. 36:27, 28; Era. 1:7.

7. Mazamure 115:16n qonccida imotaa gishshawu Yihoowa galatiyoogaa nuuni bessana danddayiyo amarida ogeti aybee?

⁷ Maalaaliya nu pilaaneetiyaanne an deˈiya loˈˈoba ubbaa gishshawu kaseegaappe aaruwan Yihoowa galatanaadan nuna aybi maaddana danddayii? (Mazamure 115:16 nabbaba.) Issibay Yihooway medhdhidobata wotti dentti qoppiyoogaa. Hegee Yihooway nuuyyo immido loˈˈobaa gishshawu A galla galla galatanaadan nuna denttettana. Qassi nuuyyo danddayettida keenan nu deˈiyo heeraa geeshshatettan oyqqiyoogan saˈaa nashshiyoogaa bessoos.

8. Nuuni nu guuggee maalaaliya ogiyan merettiis gaana danddayiyoy aybissee?

⁸ Asaa guuggee maalaaliya ogiyan merettiis. Neeni ne aayee uluwan deˈiyo wode, ne guuggee Xoossay wottido maaran dicciis, qassi daqiiqan daqiiqan shaˈan qoodettiya ooratta seeleti merettidosona! Gastta asaa guuggiyan 100 biiloone  gidiya niwurone geetettiya seeleti deˈiyoogaa xannaˈiyaageeti yootoosona. He seeleti issippe 1.5 kilo giraame gidiyaagaa deexxiya nu guuggiyaa medhdhoosona. Guuggee oottiyo maalaalissiyaabatuppe amaridaageeta ane beˈa.

9. Nu haasayiyo imotaa Xoossay immidoogaa bessiyaabati aybee?

⁹ Haasayiyoogee maalaalissiyaaba. Nuuni haasayiyo wode, haniyaabaa ane qoppa. Neeni issi qaalaa haasayiyo wode, ne guuggee ne inxxarssaa, qooriyaa, menttershshaa, goggocuwaanne tiraa dibbatuppe 100 gidiyaageeti issippe qaaxxanaadan oottees. Neeni qaalata geeshshada xeeganaadan, he dibbati maara qaaxxana koshshees. Haasayiyoogaa xeelliyaagan, 2019n kiyida xinaatee biron yelettiya naati ubba qaalata akeekana danddayiyoogaa qonccissiis. He xinaatee nuuni yelettiyo wodekka doonata akeekananne tamaarana danddayiyoogaa daro eranchchati yootiyo qofaa minttees. Nu haasayiyo imotaa Xoossay immidoogee qoncce.—Kes. 4:11.

10. Yihooway immido haasayiyo imotaa gishshawu nuuni A galatiyoogaa waati bessana danddayiyoo?

¹⁰ Lodda laamiyan ammaniyaageetuyyo Xoossay ubbabaa medhdhidoogaa nuuni ammaniyoy aybissakko qonccissiyoogee haasayiyo imotaa nu nashshiyoogaa bessana danddayiyo issi oge. (Maz. 9:1; 1 PHe. 3:15) Lodda laamiyan ammaniyaageeti saˈaynne saˈan deˈuwan deˈiyaabay merettibeenna giidi yootoosona. Nuuni Geeshsha Maxaafaanne ha huuphe yohuwan xannaˈido amaridabata goˈettikko, saluwan deˈiya nu Aawawu exatana danddayoos; qassi Yihooway saluwaanne saˈaa Medhdhidaagaa gidiyoogaa nu ammaniyoy aybissakko siyanawu koyiyaageetuyyo qonccissana danddayoos.—Maz. 102:25; Isi. 40:25, 26.

11. Nu guuggee maalaalissiyaaba gidiyo issi gaasoy aybee?

¹¹ Nuuni hassayiyo abbee maalaalissiyaaba. Asaa guuggee 20 miiloone gita maxaafatun deˈiya qofaa hassayiyo abbee deˈiyoogaa issi xaafee beni yootiis. SHin, nuuni haˈˈi hegaappe keehi darobaa hassayana danddayiyoobadan qofettees. Asaayyo deˈiya dumma abbee aybee?

12. Nuuni waani deˈana koshshiyaakko tamaariyoogan mehiyaappe doˈaappe waani dummatiyoo?

¹² Saˈan deˈiya ubba meretatu giddon, kase nuna gakkidabaa hassayiyoogan kandduwaabaa tamaarana danddayiyay asa xalla. Hegaappe denddidaagan, nu qoppiyoobaanne nu deˈuwaa laammana danddayoos, yaatidi loˈˈo asa gidoos. (1 Qor. 6:9-11; Qol. 3:9, 10) Nuuni likke gididabaanne likke gidennabaa giddon deˈiya dummatettaa akeekanawu nu kahaa loohissana danddayoos. (Ibr. 5:14) Nuuni siiqiyoogaa, qarettiyoogaanne maariyoogaa tamaarana danddayoos. Qassi suure pirddiya Yihoowa milatiyoogaa tamaarana danddayoos.

13. Mazamure 77:11, 12y yootiyoogaadan, hassayiyo imotaa nu waati goˈettana koshshii?

¹³ Yihooway nuna kase maaddidonne minttettido ubbabaa nuuni hassayanawu baaxetiyoogee hassayiyo imotaa gishshawu A galatiyoogaa bessiyo ogetuppe issuwaa. Yaatiyoogee, I nuna sinttappekka maaddanaagaa nuuni  loytti ammanettanaadan oottees. (Mazamure 77:11, 12 nabbaba; 78:4, 7) Hara ogee hara asay nuuyyo oottiyo loˈˈobata hassayiyoogaanne eti oottiyoobawu eta galatiyoogaa. Galatiya asay haratuppe aaruwan ufayttana danddayiyoogaa eranchchati akeekidosona. Nuuni Yihoowa leemisuwaa kaalliyoogeenne issi issibaa doganawu baaxetiyoogeekka loˈˈo. Leemisuwawu, Yihooway hassayiyoogan wottiyoobi baynnaagaa gidikkonne, nuuni nagaraappe simmiyo wode, I atto geesinne nuuni mooridobaa dogees. (Maz. 25:7; 130:3, 4) Qassi harati nuna qohidobaa gishshawu maarotaa oychchiyo wode nuunikka aagaadan oottana mala I koyees.—Maa. 6:14; Luq. 17:3, 4.

14. Maalaalissiya imota gidida nu guuggiyaa gishshawu Yihoowa galatiyoogaa nuuni waati bessana danddayiyoo?

¹⁴ Nuuni nu guuggiyaa immidaagaa bonchchissiya ogiyan hegaa goˈettiyoogan ha maalaalissiya imotaa gishshawu Yihoowa galatiyoogaa bessana danddayoos. Issoti issoti likke gididabaanne likke gidennabaa banttawu kuuyanawu bantta guuggiyaa goˈettoosona. SHin Yihooway nuna medhdhido gishshawu, I nuuyyo kessiyo maarati nuuni nuuyyo kessana danddayiyo ay maarappenne loˈˈo giidi qoppiyoogee bessiyaaba. (Roo. 12:1, 2) Nuuni Yihoowawu azazettiyo wode sarotettan deˈoos. (Isi. 48:17, 18) Qassi nuuni paxa deˈiyo wode oottanaadan Yihooway koyiyoobaa akeekoos; hegee nuna medhdhida nu Aawaa bonchchisseesinne I ufayttanaadan oottees.—Lee. 27:11.

15. Yihooway Geeshsha Maxaafaa immidoogee I asaa siiqiyoogaa waati bessii?

¹⁵ Geeshsha Maxaafay Xoossay siiquwan immido imota. Saluwan deˈiya nu Aaway nuna keehi siiqiyo gishshawu, hegaa xaafanaadan attuma asata ba ayyaanan kaalettiis. Nuuni oychchiyo kaallidi deˈiyaageetu mala keehi koshshiya oyshatu zaaruwaa Yihooway Geeshsha Maxaafaa baggaara immees: Nuuni awuppe yiidoo? Deˈuwawu halchchidobi aybee? Sinttappe aybi hananee? Yihooway ba naati ubbay he oyshatu zaaruwaa eranaadan koyiyo gishshawu,  daro doonatun Geeshsha Maxaafaa birshshanaadan asaa denttettiis. Ha wodiyan, kumetta Geeshsha Maxaafay woy A shaahoy 3,000⁠ppe dariya doonatun deˈees! Geeshsha Maxaafay asi deˈido wode ubban ay maxaafappekka aaruwan birshshettidanne daro asaa gakkida maxaafa. Asay awan deˈikkokka woy ay doona haasayikkokka, etappe daroti bantta doonan Geeshsha Maxaafaa nabbabana danddayoosona.—“ Geeshsha Maxaafaa Afirkkaa Doonatun Birshshiyoogaa” giya saaxiniyaa xeella.

16. Maatiyoosa 28:19, 20⁠ppe akeekiyoogaadan, Geeshsha Maxaafaa gishshawu Yihoowa galatiyoogaa nuuni waati bessana danddayiyoo?

¹⁶ Nuuni Geeshsha Maxaafaa galla galla nabbabiyoogan, appe tamaariyoobaa wotti dentti qoppiyoogaaninne tamaaridobaa oosuwan peeshshanawu baaxetiyoogan Geeshsha Maxaafaa gishshawu Yihoowa galatiyoogaa bessana danddayoos. Qassi nuuyyo danddayettida ubban Geeshsha Maxaafay yootiyoobaa daro asawu odiyoogan Xoossaa galatiyoogaa bessoos.—Maz. 1:1-3; Maa. 24:14; Maatiyoosa 28:19, 20 nabbaba.

17. Nuuni ha huuphe yohuwan xannaˈido imotati aybee, qassi kaalliya huuphe yohuwan ay xannaˈanee?

¹⁷ Hanno gakkanawu, Xoossay nuuyyo immido biittaabaa, maalaalissiya ogiyan merettida nu guuggiyaabaanne Xoossay kaalettin xaafettida A Qaalaa, Geeshsha Maxaafaabaa xannaˈida. SHin Yihooway nuussi immido, nuuni ayfiyan beˈana danddayenna imotati deˈoosona. Ha ayfiyan beˈana danddayennabata nuuni kaalliya huuphe yohuwan xannaˈana.