1. Yesu uyero ang’o pi piny m’akana mi polo?

LONYO tie dupa ma kumgi nen. Ento lonyo ma pigi tek lee kumgi nen ungo. Kinde ma Yesu ubino ponjo iwi got, eweco pi lonyo mi polo ma pigi tek nisagu lonyo mange zoo. I ng’eye emedo lemandha ma e: “Ka ma piny peri m’akana ni i ie, adundeni bende bibedo keca.” (Mat. 6:19-21) Ka waneno nia piny moko pire tek lee, wabitimo kero mwa ceke kara wanwang’e. Wakanu ‘piny m’akana mwa i polo’ nwang’u wabeii ku yore moko ci kara Yehova ung’eiwa. Yesu ukoro nia lonyo maeno copo nyothere ngo, man juromo kwale de ngo.

2. (a) Nimakere ku 2 Jukorinto 4:17, 18, Paulo uketho cwinywa nia watim ang’o? (b) I thiwiwec maeni wabineno lembang’o?

² Jakwenda Paulo uketho cwinywa nia ‘wanen ba gin ma nen ungo.’ (Som 2 Jukorinto 4:17, 18.) I kind piny ma nen ungone, acel utie mugisa ma wabinwang’u i ng’om ma nyen ma Mungu ung’olo iwa. I thiwiwec maeni, wabiweco iwi lonyo ang’wen ma nen ungo ma copo mio iwa bero tin eni: mer ma ceng’ini ku Yehova, rwo, tipo maleng’, man kony ma Yehova, Yesu man jumalaika gibed gimio iwa kinde ma wani tic mi lembanyong’a. Wabineno bende ayi ma wacopo nyutho ko foyofoc mwa ni Yehova pi lonyo maeno ma kumgi nen ungo.

3. Lonyo ma kume nen ungo ma lee nisagu zoo utie ang’o, man ang’o m’uketho wacopo nwang’e?

³ Lonyo ma kume nen ungo ma lee nisagu zoo utie mer ma ceng’ini ku Yehova Mungu. (Zab. 25:14) Yehova utie Mungu ma leng’. Re ecopo bedo jarimbwa ma ceng’ini nenedi  ma ke wan waleng’ ungo e? Lembuno copere pilembe jamgony ma Yesu uthiero “ukabu dubo [mi dhanu] mi ng’om.” (Yoh. 1:29) Kadok i wang’e ma fodi Yesu ubino ngo iwi ng’om, Yehova ular ung’eyo nia Yesu bigwoko bedoleng’ pare cil i tho kara ebodh dhanu. Eno uketho Yehova ubed utheyo mer ku dhanu ma gikwo i rundi ma con, ma nwang’u fodi Yesu ubin utho ngo.​—Rum. 3:25.

4. Kemii lapor mi dhanu moko m’ukwo i rundi ma con ma gibedo jurimb Yehova.

⁴ Wakenen lapor mi dhanu moko mi rundi ma con ma gibedo jurimb Yehova. Abraham ubino ku yioyic ma nging’ nging’. Oro ma kadhu 1 000 i ng’ei tho pa Abraham, Yehova ulwong’e nia “jarimba.” (Isa. 41:8) Eno ubenyutho nia kadok tho de copo lalu ngo mer m’i kind Yehova ku jurimbe. I wang’ Yehova Abraham utie kwo. (Lk. 20:37, 38) Ng’atu mange utie Yob. Kinde ma jumalaika gibino i coko moko i polo, Yehova uyero wec m’unyutho nia egeno Yob. Eyero nia Yob utie “ng’atu ma ndhu cu man atira, ng’atu ma lworo Mungu, man ma lokre cen ni dubo.” (Yob 1:6-8) Ka Daniel ke? Yehova uwinjere nenedi pi jaratic pare maeno m’utimo ire ku bedopwe pi oro ma romo 80, ke i kind dhanu ma wore ngo? Eoro jumalaika ucidh uyero ni jadwong’ maeno wang’ adek zoo nia etie ‘ng’atu ma [Mungu] maru dit.’ (Dan. 9:23; 10:11, 19) M’umbe jiji, Yehova ubekuro kud ava nindo m’ebicero i ie jurimbe ma githo.​—Yob 14:15.

5. Ukwayu watim ang’o kara wabed jurimb Yehova?

⁵ Tin, dhanu milioni dupa gitie jurimb Yehova. I ng’om zoo, dhanu dupa ma co, ma mon man awiya gibenyutho nikadhu kud i timo migi nia andha gitie jurimb Yehova. Calu ma Biblia uyero, Yehova theyo mer “ku ju m’atira.” (Rie. 3:32) Gin ma ketho theyo mer kugi utie yioyic ma gitie ko i lam mi jamgony ma Yesu thiero. Lam mi jamgony umio iwa kaka ma waromo thierara ko ni Yehova man walimo batizo. Ka watimo lembe maeno ma pigi tek, wabimondo i kind Jukristu milioni dupa ma gidaru thieriri ni Yehova man gilimo batizo, uketho gitwio mer kude, en m’etie Ng’atu ma dit m’usagu zoo!

6. Wacopo nyutho nenedi nia mer m’i kindwa ku Yehova pire tek lee i iwa?

⁶ Wacopo nyutho nenedi nia mer m’i kindwa ku Yehova utie gin ma pire tek lee i iwa? Calu Abraham man Yob ma gigwoko bedoleng’ migi ni Yehova pi oro ma dupa, wan de ukwayu wamedara asu nigwoko bedoleng’ mwa ni Yehova kadok wacaku timo ire niai con i ng’om maeni ma rac. Calu Daniel ke, ukwayu waketh mer m’i kindwa ku Yehova ubed ni gin ma pire tek nisagu kadok kwo mwa. (Dan. 6:7, 10, 16, 22) Ka watimo kumeno, Yehova bikonyowa kara wacir peko ceke ma waromo nwang’ara ko, e wabimedara asu nibedo jurimbe.​—Flp. 4:13.

7. (a) Nimakere ku Lembrieko 15:8, Yehova winjere nenedi ka waberwo i bang’e? (b) Yehova bedwoko wang’ rwo mwa nenedi?

⁷ Lonyo mange ma kume nen ungo utie rwo. Jurimo mandha bekoro paru migi i kindgi, man ng’atuman koro kite m’ewinjere ko ni wadi. Nyo ku Yehova de tie kumeno? Eyo! Yehova weco i bang’wa man enyutho iwa paru pare nikadhu kud i Biblia. Wan ke waweco i bang’e, man wakoro ire paru mwa m’ukanere i adundewa nikadhu kud i rwo. Yehova winjere nenedi ka wabeweco i bang’e? Anyong’a  nege lee kan ebewinjo rwo mwa. (Som Lembrieko 15:8.) Calu m’etie jarimbwa m’umaruwa lee, ewinjo rwo mwa awinja kende ngo, ento edwoko wang’e bende. Saa moko edwoko wang’e ndhundhu. Saa mange ke kwayu nia warwo wang’ dupa pi lembe ma rom. Ento asu wabedo ku genogen nia ebidwoko wang’ rwone i saane man i ayi m’ukwayere. Saa moko, Yehova dwoko wang’ rwo mwa i ayi ma nwang’u waparu ngo apara de. Ku lapor, kakare nikabu peko ma wabenwang’ara ko, ecopo mio iwa rieko man tego mi “cire.”​—1 Kor. 10:13.

8. Waromo nyutho foyofoc mwa nenedi pi rwo?

⁸ Waromo nyutho foyofoc mwa nenedi pi rwo? Mi kwong’o, nwang’u ‘waberwo areri’ calu ma Yehova ubekwayu i bang’wa. (1 Tes. 5:17) Yehova cung’owa ngo acung’a nia warwo. Eweko watie agonya, re ebekwayuwa nia ‘wabed asu i rwo.’ (Rum. 12:12) Pieno, wacopo nyutho nia rwo tie gin ma pire tek lee iwa nwang’u wabekwaye wang’ dupa kubang’ nindo. Kinde ma waberwo, wiwa kud uwil nifoyo Yehova man niyunge.​—Zab. 145:2, 3.

9. Umego moko uyero ang’o pi rwo, in ke iwinjiri nenedi pi rwo?

⁹ Tek wabemedara nitimo ni Yehova man waneno ayi m’ebedwoko ko wang’ rwo mwa, eno bicwaluwa nidwoko ire foyofoc lee pi rwo. Wakenen lapor p’umego Chris m’udaru timo oro 47 i tic mi saa ceke. Ekoro kumae: “Amaru niai kugweno con pi nirwo i bang’ Yehova. Etie lembe ma ber mi tuko ngo niweco i bang’e saa ma fodi piny ling’, man kinde ma der ceng’ m’ubewok awoka uketho thoi uberiang’ini! Eno cwala nifoye pi giramia ceke m’emio iwa, uketho i ie bende rwom mi weco i bang’e nikadhu kud i rwo. Uthieno de arwo, e anindo ma nwang’u atie ku pidocwiny ma leng’.”

10. Pirang’o ubekwayu wanen tipo maleng’ ni gin ma pire tek lee?

¹⁰ Lonyo mange ma kume nen ungo utie tipo maleng’ pa Mungu. Yesu uketho cwinywa  nia wabed wakwai Mungu umii iwa tipo maleng’. (Lk. 11:9, 13) Yehova betio ku tipo pare maleng’ eno pi nimio iwa “tego” ma lee. (2 Kor. 4:7; Tic. 1:8) Ku kony mi tipo maleng’, waromo ciro peko ceke ma wabekadhu kud i ie.

11. Tipo maleng’ romo konyowa nenedi?

¹¹ Yehova copo tio ku tipo pare maleng’ pi nimedo kor bodho man copo ma dong’ watie ko con, kara watim tic m’emio iwa i dilo pare. Pieno, ka wabenwang’u adwogi ma beco i tic pa Mungu, wang’ei nia tipo maleng’ re m’ubekonyowa.

12. Nimakere ku Zaburi 139:23, 24, wacopo kwayu tipo maleng’ ukonywa nitimo ang’o?

¹² Wacopo nyutho nenedi nia tipo maleng’ pa Mungu pire tek lee i iwa? Yo acel utie nikwayu Yehova ukonywa wang’ei ka nyo awanya ma rac kunoke paru moko m’umaku piny ungo ni i adundewa. (Som Zaburi 139:23, 24.) Tek warwo i ayi maeno, Yehova bitio ku tipo pare maleng’ pi nikonyowa. Kinde ma wanyang’ nia watie kud awanya ma rac kunoke paru moko m’umaku piny ungo, wacikara nikwayu Yehova umii iwa tipo maleng’ kara wanwang’ kero mi riemogi. Ka watimo kumeno, Yehova bineno nia andha wabeii kara kud watim lembe moko ci ma copo cere nimio iwa tipo maleng’.​—Ef. 4:30.

13. Waromo timo ang’o pi ninyutho foyofoc mwa pi tipo maleng’?

¹³ Wacopo nyutho foyofoc mwa pi tipo maleng’ nwang’u wabeparu pi lembe ceke ma tipo maleng’ ubetimo i rundi mwa eni. I wang’ nidok i polo, Yesu uyero ni julub pare kumae: “Wubinwang’u tego, nwang’u tipo maleng’ uwok i wiwu: man wubibedo jumulembe para . . . cil i tung’ ng’om.” (Tic. 1:8) Wec maeno ubepong’o i ayi ma wang’u ijo tin eni. Ku kony pa Yehova, dhanu ma romo milioni abora ku nusu ma ginwang’iri i tung’ ng’om zoo gibetimo thier ni Yehova. Bende, wa dhanu pa Yehova wabekwo i acel pilembe tipo maleng’ ubekonyowa nicego kite ma beco ma calu ve mer, mutoro, kwiocwiny, mwonyolembe hai, bedo ber ku dhanu,  berocwiny, yioyic, molcwiny, man kwerigijo. Ka jucoko dhu kite maeno zoo, giwodho gin ma julwong’o “nying’ tipo.” (Gal. 5:22, 23) Andhandha, tipo maleng’ utie giramia ma yawe mbe!

14. Kinde ma wani lembanyong’a jukani ma bekonyowa ma re wanenogi ngo?

¹⁴ Watie ku rwom mi ‘timo karacelo’ ku Yehova, Yesu man jumalaika; eno tie lonyo ma lee mandha ma re kume nen ungo. (2 Kor. 6:1) Saa ceke ma wani tic mi lembanyong’a, wang’ei nia wabetimo karacelo kugi. Paulo uyero wec m’ulubo e pire gire man pi dhanu mange ma gibino timo kugi tic maeno: “Wan wa jutic ma watimo karacelo waku Mungugi.” (1 Kor. 3:9) Ka waberweyo lembanyong’a, nwang’u wabetimo bende karacelo ku Yesu. Poi nia i ng’ei ma Yesu ung’olo ni julub pare nia ‘gicidh, giketh dhanu m’i kind thek ceke dok julub,’ emedo kumae: “Wanuti wakudu thiri thiri.” (Mat. 28:19, 20) Ka jumalaika ke? Wabedwoko foyofoc lee ni Yehova pilembe eketho jumalaika de betelo wiwa kinde ma waberweyo “lembanyong’a ma [rondo ku rondo] . . . ni ju m’ubedo wi ng’om”!​—Nyu. 14:6.

15. Kemii lapor moko mi Biblia m’unyutho nia andha Yehova bekonyowa lee i tic mi lembanyong’a.

¹⁵ Kony ma wabenwang’u niai kud i bang’ Yehova, Yesu man jumalaika uketho wabetundo nitimo ang’o? Kinde ma wabecoyo kodhi mi Ker, moko podho i adunde ma cuu man edongo. (Mat. 13:18, 23) I andha ng’a ma ketho kodhi maeno mi lemandha dongo man cego nyinge? Yesu ukoro nia ng’atu moko mbe ma copo doko jalub pare “tek Wego . . . kupeye ngo.” (Yoh. 6:44) Biblia uweco iwi lapor moko m’unyutho nia eno tie lemandha. Nindo moko, jakwenda Paulo urweyo lembanyong’a ni jumamon moko ceng’ini kud adhura mi Filipi. Biblia uyero pi dhakune acel ma nyinge Ludia nia Yehova ‘yabu adundene’ kara ewinj lembe ma Paulo uyero. (Tic. 16:13-15) Calu Ludia, tin de Yehova utelo dhanu milioni dupa i bang’e.

16. Ng’a m’ucikere ninwang’u yung pir adwogi ma beco ma wabenwang’u i tic mi lembanyong’a?

¹⁶ Ng’a m’ucikere ninwang’u yung pir adwogi ma beco ma wabenwang’u i tic mi lembanyong’a? Paulo udwoko wang’ penji maeno kinde m’ekiewo pi cokiri mi Korinto kumae: “Apidho, Apolo ke kwoyo pi; ento nyai m’enyai ko Mungu mio en. Ka kumeno ng’atu m’upidho en e gin moko ngo, kadok en m’ekwoyo pi de; ndhu Mungu re m’umio nyai m’enyai ko.” (1 Kor. 3:6, 7) Calu Paulo, ka wanwang’u adwogi ma beco i tic mi lembanyong’a, wacikara nimio yung ni Yehova.

17. Wacopo nyutho foyofoc mwa nenedi pi rwom mi timo karacelo ku Yehova, Yesu man jumalaika?

¹⁷ Wacopo nyutho foyofoc mwa nenedi pi rwom ma watie ko mi timo tic karacelo ku Yehova, Yesu man jumalaika? Waromo nyutho foyofocne nwang’u wabesayu yore ceke mi rweyo lembanyong’a. Ku lapor, nwang’u waberweyo kaka ma dhanu bepong’ lee i ie, man ‘ot ku ba ot.’ (Tic. 20:20) Umego ku nyimego dupa bemaru rweyo bende i saa ma gipangu ngo. Ka girombo ku ng’atu ma ging’eyo ngo, gimothe ku yaw yaw man giyenyo ayi mi caku wec kude. Ka ng’atune ugamu dhoggi ma ber, giloko wecne ku rieko kara udok i kum lembanyong’a mi Ker.

18-19. (a) Wabed wakwoyo pii iwi kodhi mi lemandha nenedi? (b) Kekor ayi ma Yehova ukonyo ko japonj Biblia moko.

 ¹⁸ Calu ma “watimo karacelo waku Mungugi,” wacikara ngo nipidho kodhi mi lemandha apidha kende, ento kwayu wakwoi bende pii i wie. Nenedi? Tek ng’atu moko ufoyo ku lembe ma warweyo ire, watimo kero mwa ceke pi nidoliewe, kunoke wamaku yub kara ng’atu mange ucidh uliewe, ma re nwang’u lembakeca utie nicaku kude ponji mi Biblia. Saa ma ponji pare ubemedere, anyong’a negowa nineno kite ma Yehova ubekonye ko niloko timo man paru pare.

¹⁹ Wakewec iwi lapor p’umego moko ma nyinge Raphalalani ma kwo i ng’om mir Afrique du Sud. I wang’ ning’eyo lemandha, ebino ajoga. Ento i ng’eye, ecaku ponjo Biblia ku Jumulembe man ponjine ubed unyang’e lee. Re kinde m’esomo i Biblia nia Mungu kwero niweco ku tipo kwaru, niyio lembene bino yot ungo ire. (Poi. 18:10-12) Ento nok nok, eyio Mungu ubinyo paru pare. Egam eweko tic mir ajoga, kadok ebino tic m’ebed ekwo ko. Kawoni, Raphalalani utie ku oro 60; kewinj lembe m’ekoro e: “Abedwoko foyofoc lee dit ni Jumulembe pa Yehova kum gikonya i yore dupa, ku lapor gikonya anwang’u tic. Ento m’usagu zoo, abedwoko foyofoc ni Yehova pilembe ekonya nitimo alokaloka i kwo para, uketho alimo batizo man tin aberweyo lembanyong’a karacelo ku Jumulembe pare.”

20. Ikeco nitimo ang’o?

²⁰ I thiwiwec maeni, waweco iwi lonyo ang’wen ma watie ko, ma re kumgi nen ungo. Lonyone ma dit m’usagu zoo utie rwom mi bedo ku mer ma ceng’ini ku Yehova. Eno ketho wanwang’u bero mi lonyo mange bende: wacopo coro i vute nikadhu kud i rwo, wanwang’u kony mi tipo maleng’, man wanwang’u kony niai i bang’ Yehova, Yesu man jumalaika kinde ma wani tic mi lembanyong’a. Dong’ wamedara nineno lonyo maeno ma nen ungo ni piny ma pigi tek, man m’usagu zoo, kud wawek nidwoko foyofoc ni Yehova kum etie jarimo ma yawe mbe.