1. Pakayni kakarayan a hafay, somowalay ci Yis to maanan hani?

ADIHAYAY a odoˈ maˈaraway, kawra sakakaay ciepocay a odoˈ o cowa ka ˈaraw. Itini kimad ni Yis i lotok sanay, o kakarayan a hafay ikakaay ko epoc tono dafongan a hafay. Sanay ko dotoc a sowal: ‘Icowaay ko hafay iso, itiraay ko falocoˈ iso.’ (Matay 6:19-21) O maanan ko misaaretengan ita, orira ko micangacangan. Misaˈicel kita milifok to pihayda no Kawas, o ‘mitalingay to hafay i kakarayan.’ Sowal ni Yis, o mahaenay a hafay cowa ko mamalahdaw anca matakaw.

2. (1) Mikitini 2 Korinto 4:17, 18, pakalalokay ci Pawlo kitaanan misamocek to maanan? (2) Oniya lalakaw wa milengo to maanan?

² Pakalalokay ko tarokos ci Pawlo kitaanan misamocok toya ‘cowa ka ˈaraw’ a demak, mahawpay ko mamalifok a sapalemed i faelohay hekal. (ˈOsien ko 2 Korinto 4:17, 18.) Kawra, aniniho wa irato ko cowa ka ˈaraw a odoˈ no mita, oniya lalakaw wa milengo to sepat a odoˈ: Malawidang to Kawas, sapitolon a sapatelong, fangcalay saocor, ato mikitiniay kakarayan a sapadama. Wa milengoho ko lalakaw, samaan ko hademak ita o misalimlaay toniya sapatelong.

3. O sakakaay kalimlaan a odoˈ o maanan hani? Hano wa ngaˈay ira ko hatiniay a odoˈ ita hani?

³ Itini i cowa kaˈaraw a odoˈ, o kalimlaan i, o kalawidang ita ato Kawas ci Yihofaan. (ˈOlic 25:14) Makoracay ko Kawas hano ngaˈay malawidang to ciraraway a tamdaw hani? Samanen  o patafangan ni Yis a sapatefoc wa ngaˈay ‘mihepol to raraw no tamdamdaw’. (Yohani 1:29) Mafanaˈay ci Yihofa, wa tahira i patay ko madimadi ni Yis, paira to sakalidong no tamdamdaw, mihaenay itini ˈayaw no kinafalah ci Yis wa ngaˈayto Cingra malawidang to cowa kalefot a tamdaw.—Loma 3:25.

4. ˈAyaw no tayni i fafekang no sera ci Yis i, o cimacima ko malowidangay ni Yihofa a tamdaw hani?

⁴ ˈAyaw no tayni i fafekang no sera ci Yis i, o roma tamdaw malawidangayto ni Yihofa. Masalalomaˈay koya matomesay ko pakasoˈlinay falocoˈ a Apraham, ikor no mapatayay cingra 1000 miheca, kamayan ‘o widang Ako’ sanay ci Yihofa cingranan. (Isaya 41:8) Mihaenay, soˈlin mapatayayto ci Apraham, kawra kamayan o maˈoripay i harateng no Kawas, o widang cingra sanay ko pinengneng ni Yihofa. (Luka 20:37, 38) O roma tinakoan ci Yopu. Kina cecayay, itini ˈaˈayaw no ˈalomanay coyoh somowalay ci Yihofa, ci Yopu o ‘marocekay ko madimadi, mangodoay to Kawas, miliyasay to tatiihay demak.’ (Yopu 1:6-8) Roma i ci Taniil. Madimadiay matayal ci Yihofaan cingra itiniay i cowa pidoko to Kawas a kitakit maedeng 80 miheca, samaanay ko pinengneng ni Yihofa cingranan hani? Soˈlin itiya o malitengayto cingra, kawra kina toloay ko coyoh somowal to ‘tada masakalimlaan’ ko pinengneng no Kawas cingranan. (Taniil 9:23; 10:11, 19) Makalimay ci Yihofa mipatikol a paˈorip toniya mapatayay a widang.—Yopu 14:15.

5. Sasamaan ko demak ita wa ngaˈay palahad to ngaˈayay kalawidang to Kawas hani?

⁵ Anini pinaay soˈot ˈofad cowa kalefot a tamdaw malawidangay ni Yihofa. Oniya tamdaw mikitiniay i cowacowa aira, ano faˈinayan fafahiyanto anca matoˈasay kaemangay, tano waywayan misawacay to sapiingidaw ko niyah ci Yihofaan. Hano ngaˈay cangra malawidang ni Yihofa hani? Sowal no Fangcalay Cudad, ‘kalawidangay to moecelay a tamdaw’ ci Yihofa. (Taneng 3:32) Oniya tamdaw o pakasoˈlinay to sapatefoc, mansa ngaˈayay patafang to tireng micada to paputisem, palahad to ngaˈayay kalawidang to Kawas. Ano mihaen ko demak ita, wa ngaˈay malacafay to pinaay soˈot ˈofad patafangay to tireng micadaay to paputisem a Krisciyang, malo ngaˈayay a widang ni Yihofa.

6. Samaan ko demak ita o misalimlaay to kalawidang to Kawas hani?

⁶ Samaan ko demak ita o misalimlaay to kalawidang to Kawas hani? O pidoko ni Apraham aci Yopu to Kawas mataˈlifay ko 100 miheca, pahecaden ita cangra, ano hakowato ko halafin a midoko to Kawas, padadotoc a madimadi. Pahecaden ita ci Taniil, minengneng to kalawidang to Kawas ikaka ko kalimlaan to ˈorip no niyah. (Taniil 6:7, 10, 16, 22) Ira ko sapadama ni Yihofa, o papakahadidi kita to masakenaay sapalifet, tahadaˈoc malo widang ni Yihofa.—Filipi 4:13.

7. (1) Mikitini Taneng 15:8, samanay ko pinengneng ni Yihofa to satolon ita hani? (2) Sasamaan ci Yihofa pacaˈof to satolon ita hani?

⁷ O roma cowa ka ˈaraw a odoˈ o mitolonay. Kalalaˈed no ngaˈayay widang mikifalocoˈay a masasowal, malecaday ko kalalaˈed ita ci Yihofaan. Pakaynian ni Yihofa i Fangcalay Cudad pasifanaˈ kitaanan to harateng ato nafalocoˈan Ningra, wa ngaˈay kita pakayni satolon mifanaˈ Cingranan to soˈlinay nafalocoˈan ato harateng no niyah. Maolahay ci Yihofa mitengil  to satolon ita. (ˈOsien ko Taneng 15:8.) Cowa ko pitengil aca Ningra, pacaˈofayho to satolon ita, samanen tada maolahay Cingra kitaanan. Latekay kalikiay pacaˈof Cingra, latekay o papadadotoc kita a mitolon. Ano samaanto, wa ngaˈay pakasoˈlin kita, wa itini ci Yihofa i matatodongay a toki, tano sangaˈayay a pakayraan pacaˈof kitaanan. Manaokaniw, o pakayraan no Kawas a pacaˈof cowa ko mamalecad o milongocan ita alatek. Tinakoen, cowa ko tatangsol Cingra misaysay to pasangaray ita, kawra o papafeli to taneng ato ˈicel kitaanan, ho ‘ngaˈay pakahadidi’ kita.—1 Korinto 10:13.

8. Sasamaan kita misalimla to mitolonay a sapatelong hani?

⁸ Sasamaan kita misalimla to mitolonay a sapatelong hani? Cecay pakayraan i, tooren ko limoˈot no Kawas ‘padadotoc mitolon.’ (1 Tisalonika 5:17) Cowa ko papacieci ci Yihofa kitaanan mihaen to demak, mikangodoay Cingra to pasalat ita, pakalalok kitaanan ‘padadotoc caka pisawad’ mitolon. (Loma 12:12) Mameten ita ko toki to romiˈamiˈad masasowal ci Yihofaan, mihaen o misalimlaay toniya sapatelong. Mitolon kita i, aka mapawan miakoˈid ato pakahemek ci Yihofaan.—ˈOlic 145:2, 3.

9. Pakayni i satolon, o cecay faˈinayan salikaka paihkalay to maanan nafalocoˈan a harateng hani? Pakayni i satolon, samanay ko harateng iso hani?

⁹ Ano halafinayto ko toki ita midoko to Kawas, wa adihay ko malifokay a sapacaˈof no satolon, matongal ko pisalimla toniya mitolonay a sapatelong. Salikaka ci Kerise miemin to toki a misakafah 47 miheca, sanay: “Tada maolahay kako pacerem a lomowad, adihay ko toki a mitolon ci Yihofaan. Itini pitolon, minengnengho to matediay no cidal a ˈaresing, tada palipahakay to falocoˈ! Miocoray koni takowanan miakoˈid to sapafeli no Kawas masakenaay a sapatelong, miakoˈid Cingraanan paira to toki ako mitolon Cingraanan. Mahererek ko cecay romiˈad, mitolon ci Yihofaan padamaay takowanan ira ko tingalaway falocoˈ rihaday a mafotiˈ.”

10. Hano sasalimlaen ita ko fangcalay saocor hani?

¹⁰ O roma sasalimlaen ita a odoˈ i, o fangcalay saocor. Pakalalokay ci Yis kitaanan padadotoc mitolon, micangacang to Kawas pafeli toniya sapatelong kitaanan. (Luka 11:9, 13) Wa pacaˈof ko Kawas to satolon ita, malifok ita ko ‘tadamaanay a ˈicel.’ (2 Korinto 4:7; Dmak 1:8) Ira ko sadama no fangcalay saocor, wa ngaˈayto kita mihadidi to masakenaay a sapalifet.

11. O fangcalay saocor iraay ko maanan sapadama kitaanan hani?

¹¹ O fangcalay saocor ngaˈayay pacakat to ˈicel ita, ngaˈay misongilaˈ midemak to sapatorod no Kawas kitaanan a demak. Mafanaˈay kita, ano awaay ko fangcalay saocor, o tayal ita to Kawas wa awa ko ngaˈayay a minaroˈan.

12. Pakayni ˈOlic 139:23, 24, wa ngaˈay kita pakayni i maanan a demakan mitolon hani?

¹² Sasamaan ko hademak ita o misalimlaay to fangcalay saocor hani? Ngaˈayay cangacangen ita ci Yihofa pakayni i fangcalay saocor padama kitaanan a mihapinang, itini kemoday falocoˈ iraay ko mararaway a harateng ato coos hokira. (ˈOsien ko ˈOlic 139:23, 24.) Ano mahapinang ita ko pasangaray, cangacangen ko Kawas pafeli kitaanan to fangcalay saocor, padama kitaanan miconged to mararaway harateng ato coos. Misarocod kita mihaen ko demak, o paihkalay to cowa ka ciharateng kita malahdaw ko fangcalay saocor ni Yihofa.—Ifiso 4:30.

13. Samaan ko demak ita wa matongal ko pisalimla to fangcalay saocor hani?

¹³ Ano maharateng ita ko milaˈosian no fangcalay saocor a demak, wa matongal ko pisalimla toniya kalimlaan a sapatelong. ˈAyaw no patikol ci Yis tayra i kakarayan somowalay to nisawawaan: ‘Ano maepodto i tamowanan ko fangcalay saocor i, o caciˈicel kamo. O mamisawacay kamo to pakayniay i takowanan . . . tangasa i tolas no hekal.’ (Dmak 1:8) Anini malaˈosiayto ko sowal ningra, mataˈlifay ko  850 ˈofad icowacowaay pala a tamdaw madimadiay midoko ci Yihofaan. Roma i, padamaayho ko Kawas kitaanan palahad to ‘minaroˈan no fangcalay saocor,’ mahawpay ko olah, lipahak, rihaday, mihadidi, siniˈada, ngaˈayay, pakasoˈlinay falocoˈ, damsayay, pakaˈmetay to tireng, mansa ngaˈayto kita malacecay to salikaka. (Kalatiya 5:22, 23) Soˈlinayto taˈangayay ko sapadama no fangcalay saocor kitaanan!

14. Ano malingad kita mitosil i, cima ko papadama kitaanan hani?

¹⁴ O cowa ka ˈaraw saka sepat a odoˈ i, ngaˈay ‘ malacafay matayal’ to Kawas, ci Yisan ato coyoh. (2 Korinto 6:1) Ano malingad kita mitosil i, iraay ko toki mihaen to demak. Sowal ni Pawlo o niyah ato roma mitosilay sahtoay o ‘kalacafayay to Kawas a matayal.’ (1 Korinto 3:9) Palimoˈotay ci Yis to mikotoday cingraanan a tamdaw, malingad a padama to polong kasafinawlan malo nisawawaan ningra, dotoc mikiˈokay to kakalacafay cangraanan, mihaenay o malacafayay kita ci Yisan a matayal. (Matay 28:19, 20) Sasamaan ko coyoh a midama kitaanan hani? Ano ‘milasil to ngaˈayay lihaf i . . . polong a tamdaw’ kita i, wa mikayat ko coyoh kitaanan.—Paˈarawan 14:6.

15. Hadaken ko tinakoan, ano mitosil kita i, soˈlinay ci Yihofa ko misolotay to tamdaw.

¹⁵ O mikitiniay i kakarayan a sapadama, wa malaˈosi ita ko maanan demak hani? Ano mitosil kita i, o roma tamdaw wa micada to soˈlinay kimad hanaca mamafalic ko waywayan. (Matay 13:18, 23) Cima ko palahaday to sapaloma no soˈlinay kimad ato ciheci to ngaˈayay minaroˈan hani? Somowalay ci Yis, ano cowa ko ‘masolotay no Wama ko tamdaw’, wa awa ko tamdaw mikotod cingranan. (Yohani 6:44) Ira ko cecay tinakoan no Fangcalay Cudad ngaˈay mitadtad toniya demak. Kinacecayay, misawacayay ci Pawlo to fafahiyan i potal no niyaroˈ no Filipi, masalalomaˈay koya fafahiyan ci Litiya, itiya ‘fohatan ni Yihofa ko falocoˈ ningra, papicadaan cingra to milasilan ni Pawlo a lihaf.’ (Dmak 16:13-15) Anini iraay ko pina soˈot ˈofad a tamdaw mahecaday ci Litiyaan masolotay ni Yihofa, micada to soˈlinay kimad.

16. Mitosil kita i malifokay a minaroˈan o cima ko papanokayen to ˈdil hani?

¹⁶ Mitosil kita i malifokay a minaroˈan o cima ko papanokayen to ˈdil hani? Sapatikami ni Pawlo to Korintoay a kasakopang pacaˈofay toniya salicay, sanay cingra: ‘O palomaay kako, o micefosay ci Apolos, nikawrira, o Kawas ko palahaday tonini.’ (1 Korinto 3:6, 7) Ngaˈay kita palecad ci Pawloan, itini pitosilan ano ira ko malaˈosiay a demak i, wa panokayen ko ˈdil ci Yihofaan.

17. Samaan ko demak ita o misalimlaay to kalacafay matayal to Kawas aci Kristoan ato coyoh hani?

¹⁷ Samaan ko demak ita o misalimlaay to kalacafay matayal to Kawas aci Kristoan ato coyoh hani? Misarocod patenak to ngaˈayay lihaf no Fangcalay Cudad i tao, itini kaˈalomanan a pisawacay ato pakalomalomaˈ a mitosil. (Dmak 20:20) ˈAlomanay tamdaw maolahay mirienang to itini i cowa ko misaˈosian a kitiraan misawacay, ano malitemoh ko kafahalan tamdaw, isaˈayaw mihamham to tamdaw, ikor misatapang malaholol. Ano maolahay cingra i, wa ngaˈay falicen ko sowal patayni i lihaf no Hongti Kitakit no Kawas.

18-19. (1) Samaan kita micefos to sapaloma no soˈlinay kimad hani? (2) Hadaken ko tinakoan hena, ci Yihofa samaanay padama to micekiway tamdaw.

 ¹⁸ Malo ‘kalacafayay to Kawas a matayal,’ cowa ko ‘pipaloma’ aca ita, caceriden a ‘micefos.’ Ano maolahay ko tao to Fangcalay Cudad, wa misaˈicel kita patikol milisoˈ cingranan, anca tahidangen ko tao mihaen to demak, o patosokan i misatapang minanam to Fangcalay Cudad. Ikor no misatapang minanam to Fangcalay Cudad, itini sadama ni Yihofa maˈaraway to palidlid saan mafalic ko harateng no pacekiwan, maedeng o lalipahak kita.

¹⁹ Itini Katimol Afrika cecay tamdaw ci Rafalalani, o miˈedaway cingra. Tada maolahay cingra to mananamay a soˈlinay kimad no Fangcalay Cudad, kawra pasangar saan mitoor to limoˈot no Fangcalay Cudad eca ka masasowal to mapatayay tamdaw. (Limoˈot 18:10-12) Ikor, padamaan no Kawas cingra palidlid saan mafalic ko harateng. Soˈlin edengan a lifon ningra ko miˈedaway a tayal, salikor sawad saan toniya tayal. Anini ci Rafalalani 60 ko miheca, sanay cingra: “Adihayayto ko sadama no salikaka takowanan, tinakoen padama takowanan mikilim to tayal, tada miakoˈiday kako cangraanan. Kawra sakakaay aakoˈiden ako ci Yihofa, padamaay Cingra takowanan mifalic, hato ngaˈayay kako patafang to tireng micada to paputisem, mirienang to mitosilay a demak.”

20. Misetek kiso to falocoˈ misamaan ko hademak?

²⁰ Oniya lalakaw milengoay to sepat a cowa ka ˈaraw a odoˈ, masaka limlaan o kalawidang ci Yihofaan. Malawidang kita ci Yihofaan, wa ngaˈay milifok to roma odoˈ, mahawpay ko mitolon, fangcalay saocor, ato mikitiniay i kakarayan a sapadama a mitosil. Nanay matongal ko pisalimla ita toniya sapatelong. O hinapaladaˈay a widang ci Yihofa, o tatahadaˈoc kita miakoˈid Cingranan!