1. ¿Alajjpachar imaski ukanakat Jesusajj kamsänsa?

 ¿JAN uñjaski uka regalonakajj utjpachati? Jïsa, utjiwa. Jan uñjaski uka regalonakajj jukʼamp valoraniwa. Jesusajj mä qollun yatichkäna ukhajja, kunatï wali valoranïki ukanak alajjpachar imañatwa parläna, ukanakajj qollqet sipansa jukʼamp valoraniwa. Jupajj sarakïnwa: “Kawkintï suma imatanakamajj utjki ukankarakiniw chuymamajja” sasa (Mat. 6:19-21). Kunanakarutï wali valoranit uñjktan ukanak jikjjatañatakiw chuymasajj chʼamañchistu. Jehová Diosajj suma jaqet uñjkistu ukhajja, ‘kunatï valoranïki ukanak alajjpacharus imkatksna’ ukhamawa. Kunjamtï Jesusajj siskänjja, uka imatanakasar janiw kunas tukjkaspati ni khitis lunthatkaspati.

2. 1) ¿Kunatakis apóstol Pablojj 2 Corintios 4:17, 18 texton chʼamañchistu? 2) ¿Kunanakatsa aka yatichäwin yatjjataskañäni?

² Apóstol Pablojja, ‘kunanakatï jan uñjaski ukanakar chuym churañatakiw’ chʼamañchistu (2 Corintios 4:17, 18 liytʼañataki). Jan uñjaski uka regalonakat yaqhepajja, kuna bendicionanaktï jutïrin Diosat katoqkañäni ukanakawa. Aka yatichäwinjja Diosajj pusi wali suma regalonak churkistu ukanakatwa yatjjataskañäni: 1) Jehová Diosan amigopäña, 2) oraciona, 3) espíritu santon yanaptʼatäña, 4) Jehová Diosampi Jesusampi angelanakampi predicacionan trabajiña. Kunjamsa jan uñjaski uka regalonakar wali valoranit uñjsna ukanakatwa yatjjataskarakiñäni.

3. 1) ¿Jan uñjaski uka regalonakat kawkïris jukʼamp valoranejja? 2) ¿Kunas Diosan amigopäñatak yanaptʼistu?

³ Jehová Diosan amigopäñaw jan uñjaski uka regalonakat jukʼamp valoranejja (Sal. 25:14, TNM). Ukampis niyakejjay Diosajj  santöchejja, ¿kunjamarak jucharar jaqenakan amigopäspasti? Jesusan jiwatapaw ‘akapachat juch apaqe’, ukatwa Diosan amigopäsna (Juan 1:29). Jaqenakar salvañatakejja jiwañkamaw Jesusajj Diosat jan jitheqtkänti, Jehová Diosajj nayratpachwa ukhamäñap yatjjäna. Ukatwa Jesusajj janïr jiwkäna uka nayra jakir jaqenakajj Diosan amigopäpjjäna (Rom. 3:25).

4. Jehová Diosan amigonakapatjja, ¿khitinakas Jesusajj janïr jiwkäna uka tiempon jakapjjäna?

⁴ Diosan amigonakapat yaqhepajja Jesusajj janïr jiwkäna ukhaw jakapjjäna, jupanakat parltʼañäni. Abrahán chachajj Jehová Diosar wal confiyäna. Abrahanajj 1.000 jila maranakas jiwatäjjchïnjja, “nayan munata” amigojawa sasaw Diosajj jupat säna (Is. 41:8). ¿Kunsa ukat amuytanjja? Maynejj jiwatäjjchisa Jehová Diosajj amigoparjam uñjaskakiwa, ukhamajj Abrahán chachat Diosajj janiw armaskiti (Luc. 20:37, 38). Job chachat parltʼarakiñäni. Angelanakajj alajjpachan tantachasipkäna ukhajja, Jehová Diosajj akham sasaw Job chachat säna: “Janiw khitisa oraqenjja utjkiti jupjama cheqa, aski jaqejja, jupasti janipuniw khitirus ñanqha lurañ munkiti” sasa. Ukham sasaw qhawqsa jupar confiyäna uk uñachtʼayäna (Job 1:6-8). Daniel chachajja, jaqenakajj kʼari diosanakar adorapkäna uka markanwa mä 80 maranak jan jitheqtas Jehová Diosar servïna. ¿Kunjamsa Diosajj Danielar uñjäna? Danielajj wali edadanëjjäna ukhajja, kimsa kutiw angelanakajj jupar akham sapjjäna: ‘Diosasti jumarojj walpun munastam’ sasa (Dan. 9:23; 10:11, 19). Cheqansa, Diosajj jiwatäpki uka munat amigonakapar jaktayañ wal muni (Job 14:15).

5. ¿Jehová Diosan suma amigopäñatakejj kunanaksa lurañasa?

⁵ Jaqenakajj pantjasirïpkchisa, jichhürunakan walja millón jaqenakaw Jehová Diosan amigopäpjje. Taqe markanakanjja, walja chachanaka, warminaka, wawanakaw sum sarnaqatapampejj Diosan amigopäñ munapjjatap uñachtʼayasipki. Jehová Diosajj cheq sarnaqer jaqenakampiw ‘suma amigöpjje’ sasaw Bibliajj qhanañchi (Prov. 3:32, TNM). Jesusan jiwatapar confiyatasatwa Diosan amigopäsna. Jesusan jiwatapatwa jakäwis Diosar katuyasiñsa bautisasiñsa puediraksna. Ukanak lurtan ukhajja, walja millón cristianonakjamarakiw Taqe Chʼamani Jehová Diosan ‘suma amigopätanjja’. Jupanakajj jakäwip Diosar katuyasis bautisata cristianöpjjewa.

6. ¿Kunjamsa Jehová Diosan amigopätasat yuspärsna?

⁶ ¿Jehová Diosan amigopätasat kunjamsa yuspäratas uñachtʼaysna? Abrahán ukat Job chachanakat yateqasisa. Jupanakajj 100 jila maranakaw jan jitheqtas Diosar servipjjäna. Qhawqha tiemposay Diosar serviskstanjja, jupanakjamarakiw jan jitheqtas aka jan wali pachan Jehová Diosar serviskakiñasa. Ukhamarakiw Daniel chachat yateqasisajj vidasat sipansa Diosan amigopäñar jukʼamp valoranit uñjañasa (Dan. 6:7, 10, 16, 22). Jehová Diosan yanaptʼapampejja, kunayman yantʼanakwa aguantañäni, ukhamatwa Jupan amigopäskakiñäni (Filip. 4:13).

7. 1) Proverbios 15:8 textorjamajja, ¿kunjamsa Jehová Diosajj oracionanakas uñji? 2) ¿Kunjamsa Jehová Diosajj oracionanakas jaysi?

⁷ Jan uñjaski uka yaqha regalojj oracionawa. Suma amigonakajja kunanaksa piensasipki kunjamäsipkisa taqe ukanakatwa parltʼasipjje. Jehová Diosan amigopäñampejj ukhamarakiwa. Jupajj Biblia taypiw jiwasar parlistu, ukanwa kunsa piensi kunjamas jikjjatasi ukanak yatiyistu. Jiwasanakajj oración taypiw Jupamp parlaraktanjja. Oraskasajja, kunsa  piensasktan, kunjamäsktansa ukanakwa yatiysna. Diosajj oracionanakas istʼasajj kusisiwa (Proverbios 15:8 liytʼañataki). Jehová Dios amigosajj wal munasistu, ukatwa oracionanakas istʼasajj jaysistu. Awisajj janiw jankʼak jayskistuti. Awisasti mayisiskakiñasaw wakisi. Ukampisa Jupajj jaysapunistaniwa janiw ukat pächasiñasäkiti, horasaparu ukhamarak wakisitarjamaw jaysistani. Awisajja janiw kunjamtï munkayätan ukhampun jayskistaspati. Sañäni, kuna jan walintï uñjasktan uk janiw chhaqtaykaspati, ukampisa uka jan wali aguantañatakejj yatiña ukhamarak chʼamwa churistaspa (1 Cor. 10:13).

8. ¿Kunjamsa oracionat Diosar yuspäratas uñachtʼaysna?

⁸ Niyakejjay oracionajj Diosan regalopächejja, ¿kunjamsa yuspärsna? Bibliajj siski ukarjamaw lurañasa, ukan akham siwa: “Oracionsa lurapjjapunim” sasa (1 Tes. 5:17). Jehová Diosajj janiw orasiñasatak obligkistuti. Antisas sapa mayni Jupar orasiñ ajllsna ukwa muni. Ukhamasti sapüru walja kuti orasisaw Diosar yuspäratas uñachtʼaysna. Ukampisa oraskasajj janiw Diosar yuspärañsa, jachʼañchañsa armasiñasäkiti (Sal. 145:2, 3).

9. 1) ¿Chris sat jilatajj kunjamsa oracionar uñji? 2) ¿Kunsa Diosar orasiñat jumajj amuyta?

⁹ Walja maranak Diosar sirvjjasasa, kunjamsa Diosajj oracionanakas istʼanistu uk uñjasasa, jukʼampwa oracionat Diosar yuspärañasa. Chris sat jilatat parltʼañäni, 47 maranakaw Diosar sapürunjam serviski, jupajj akham siwa: “Wali alwat sartasin Jehová Diosar orasiñajj wal gustito. Uka horasarakiw intejj jalsusin sullar qhanjjatasajj sum kʼajti. Uka horasanakan Diosar mayisiñajja taqe regalonakapat yuspärañataki, oración utjatapat yuspärañatakiw yanaptʼitu. Arumthapirojj Diosar orasisin ikintjjañajj wali sumawa, chuymas chuymaw ikjjta” sasa.

10. ¿Kunatsa Diosan espíritu santoparojj wali valoranit uñjañasa?

¹⁰ Diosan yaqha regalopajj espíritu santowa, ukjja wali valoranitwa uñjañasa. Jesusajja espíritu  santo Diosar jan qarjtas mayisipkakim sasaw chʼamañchistäna (Luc. 11:9, 13). Jehová Diosajj espíritu santop toqew “jaqen chʼamapat jilankki uka chʼama” churistu (2 Cor. 4:7; Hech. 1:8). Espíritu santon yanaptʼapampejj kunayman jan walinakwa aguantsna.

11. ¿Kunjamsa espíritu santojj yanaptʼistu?

¹¹ Espíritu santojja, kuna lurañanaktï Diosan markapan katoqtan ukanak sum phoqañatakiw yanaptʼistu. Kunanaktï yatktan ukanak jukʼamp sum lurañatakiw yanaptʼarakistu. Cheqansa, Diosar servisajj kuna sumanaktï lurktan ukanakjja janiw chʼamasampikejj lurktanti, jan ukasti Diosan espíritu santopan yanaptʼapampiw lurtanjja.

12. Salmo 139:23, 24 qellqatarjamajja, ¿kunsa oracionan mayisiñasa?

¹² ¿Kunjamsa espíritu santor wali valoranit uñjatas uñachtʼayaraksna? Inas chuymasan jan wali amuyunaka jan ukajj jan wali munañanaka utjchispa, ukanakat amuyasiñasatakiw Jehová Diosar oracionan yanaptʼa mayisiñasa (Salmo 139:23, 24 liytʼañataki). Uka mayisitasar istʼasajja, Jehová Diosajj espíritu santop taypiw kunanakan cheqañchasiñasas wakisi uk amuyasiñ yanaptʼistani. Jan wali amuyunakatï jan ukajj jan wali munañanakatï chuymasan utjchi ukhajja, ukanakar atipjañatakejj Diosar espíritu santopwa mayisiñasa. Ukham lurañäni ukhajja, jan walinakar uñisitaswa Diosar uñachtʼayañäni, ukatjja jupajj espíritu santopampejj yanaptʼaskakistaniwa (Efes. 4:30).

13. ¿Kunjamatsa espíritu santor wali valoranit uñjsna?

¹³ Kunjamsa espíritu santojj jichha tiempon yanaptʼaskistu ukanakat lupʼisajja, espíritu santorojj jukʼamp valoranitwa uñjañäni. Jesusajj janïr alajjpachar sarkasajj akham sasaw discipulonakapar säna: “Espíritu santojj jumanakjjar jutkani ukhaw chʼam katoqapjjäta, [...] nayat qhanañchapjjarakïta [...] taqe aka oraqpachana” sasa (Hech. 1:8). Uka arunakan phoqasïwip uñjañajj wali musparkañawa. Espíritu santon yanaptʼapampejja, mä 8 millón chikataniw Jehová Diosar oraqpachan servisktanjja. Mä paraisonjamwa  jakaskaraktanjja, kunattejj espíritu santow suma jaqëñasatakejj yanaptʼistu, ukatwa munasiña, kusisiña, sumankaña, paciencianïña, khuyapayasirïña, suma chuymanïña, Diosar confiyaña, llampʼu chuymanïña, munañasampi jan apnaqayasiñajj Diosan markapan utji (Gál. 5:22, 23). ¡Espíritu santojj wali suma regalopuniwa!

14. Prediktan ukhajja, ¿khitinakas yanaptʼapjjestu?

¹⁴ Jan uñjaski uka yaqha regalojj akarakiwa: Jehová Diosampi alajjpachankiri organizacionapampi trabajiña (2 Cor. 6:1). Jupanakaw prediktan ukhajj wal yanaptʼapjjestu. Apóstol Pablojj jupampita yaqha jilat kullakanakampit parlkasajj akham sänwa: “Nanakajj Diosamp chika trabajirïpjjtwa” sasa (1 Cor. 3:9). Prediktan ukhajja, ukhamarakiw Jesusamp trabajtanjja. “Taqe markankir jaqenakar nayan discipulojar tukuyapjjam” sasin Jesusajj discipulonakapar siskäna uka qhepatjja, akham sarakïnwa: “Nayajj sapürupuniw jumanakampïskta” sasa (Mat. 28:19, 20). ¿Kunjamsa angelanakamp trabajiraktanjja? Kunapachatï jaqenakar ‘wiñay suma yatiyäwinak’ yatiytan ukhajja, angelanakaw irpistu, ukham yanaptʼapjjatapat wal yuspärtanjja (Apoc. 14:6).

15. Kunjamsa Jehová Diosajj predicacionan yanaptʼistu uk Bibliankir mä uñachtʼäwimpi qhanañchtʼam.

¹⁵ Alajjpachat jutir yanaptʼampejj ¿kunanakas lurasiski? Kunapachatï Reinon semillap satanttan ukhajja, yaqhep semillanakajj suma chuymanakar purisajj sumwa alsunipjje (Mat. 13:18, 23). ¿Khitis uka semillanak alsuyasin poqoyi? Jesusajj akham sänwa: “Janiw khiti jaqes nayan ukar jutkaspati, janitï [...] alajjpachankir Awkejj irpankaspa ukhajja” sasa (Juan 6:44). Biblianwa uka toqet sum qhanañchistu. Mä kutejja, apóstol Pablojj Filipos markat anqanwa mä qhawqha warminakar predicäna. Jupanak taypinkir Lidia sat mä warmit Bibliajj akham siwa: “Kuntï Pablojj parlaskäna ukanak sum istʼañapatakiw Jehová Diosajj jupar chuym phoqatpach jistʼaräna” sasa (Hech. 16:13-15). Kunjamtï Diosajj Lidiar yanaptʼkänjja, ukhamarakiw walja millón jaqenakarojj markapar irpasinki.

16. Diosar jakʼachasiñ maynir yanaptʼtan ukhajja, ¿khitis jachʼañchatäñapa?

¹⁶ Bibliat yatjjatañ maynir yanaptʼtan ukhajja, ¿khitis jachʼañchatäñapa? Corinto markankir congregacionat qellqkäna ukhaw apóstol Pablojj uka jisktʼar qhanañchäna, akham sasa: “Nayaw ayruntayäta [jan ukajj mallkiyäta], Apolosasti umampiw warjjatarakïna, ukhamarus Diosaw jiltayaskäna. Ukhamajj janiw ayruntirisa ni umamp warjjatiris jachʼañchatäñapäkiti, jan ukasti jiltayki uka Diosaw jachʼañchatäñapa” sasa (1 Cor. 3:6, 7). Bibliat yatjjatañ maynir yanaptʼasajja, Pabljamarakiw Jehová Diosar jachʼañchañasa.

17. Jehová Diosampi Jesusampi angelanakampi yanaptʼapkistu ukarojja, ¿kunjamsa wali valoranit uñjatas uñachtʼaysna?

¹⁷ Predicacionanjja Jehová Diosampi Jesusampi angelanakampi chikaw trabajtanjja, ¿kunjamsa ukarojj wali valoranit uñjsna? Suma yatiyäwinak taqe jaqenakar yatiyañatak chʼamachasisaw wali valoranit uñjtanjja. Jaqenakarojj kunaymanitwa yatiysna. Sañäni, kawkjantï jaqenakajj utjki uka lugaranakanwa yatiysna, utat utsa yatiyaraksnawa (Hech. 20:20). Walja jilat kullakanakarojj taqe cheqan yatiyañaw gusti. Jan uñtʼat mä jaqempi jikisisajj munasiñampiw arunttʼapjje, ukatjja parltʼañatakiw chʼamachasipjje. Jaqejj istʼki ukhajja, wali amuyumpiw Diosan Reinopat parlañ qalltapjje.

18, 19. 1) Diosan arunakap satantasajja, ¿kunjamsa ukarojj umampi warjjatsna? 2) Bibliat yatjjatiri Raphalalani chacharojja, ¿kunjamsa Jehová Diosajj yanaptʼawayi?

 ¹⁸ Niyakejjay ‘Diosamp chika trabajirïstanjja’ janiw aleqakejj Diosan arunakap satañasäkiti, jan ukasti umampiw warjjatañasaraki. Mä jaqetï Bibliat yatjjatañ munchi ukhajja, yatjjatañapatak yanaptʼañasawa jan ukajj mayniruw Bibliat jupamp yatjjatañapatak mayiñasa. Kunapachatï Bibliat mä yateqerejj Jesusan discipulopäñatak chʼamachasiski, amuyupsa chuymapsa Jehová Diosan yanaptʼapampi cambiaskaraki ukhajja, wal kusistanjja.

¹⁹ Sudáfrica markankiri Raphalalani sat chachat parltʼañäni, jupajj layqa jaqënwa. Kuntï Bibliat yateqkäna ukajja wal jupar kusisiyäna. Ukampis jiwatanakampi parlañajj jan walïtap Biblian liytʼäna ukhajja, uk phoqañajj jupatak wali chʼamänwa (Deut. 18:10-12). Qhepatjja amuyunakap mayjtʼayañatakejj jukʼat jukʼatwa Diosamp yanaptʼayasïna. Layqasiñampis qollqe ganaskchïnjja, tiempompejj uk jaytjjänwa. Raphalalani jilatajja jichhajj 60 maranëjjewa, jupajj akham siwa: “Jehová Diosan Testigonakaparojj wal yuspärta, jupanakaw kunaymanit yanaptʼawayapjjetu. Sañäni, jupanakaw trabajo thaqarapipjjetäna. Taqe kunat sipansa Jehová Diosaruw jukʼamp yuspärta, Jupaw jakäwijan cambionak lurañatakejj yanaptʼawayitu, jichhajj Jehová Diosan bautisat Testigopjamaw predikir sarjjta” sasa.

20. ¿Kunsa jichhajj lurañ muntanjja?

²⁰ Aka yatichäwinjja jan uñjaski uka pusi regalonakatwa yatjjatawaytanjja. Taqe uka regalonakat sipansa Jehová Diosan amigopäñaw jukʼamp valoranejja. Jehová Diosan suma amigopäsinjja jan uñjaski uka yaqha regalonakwa katoqsna. Sañäni, oración taypiw Diosar jakʼachassna, espíritu santon yanaptʼapwa katoqsna, Jehová Diosampi alajjpachankir organizacionapampiw predicacionan yanaptʼayasiraksna. Jan uñjaski uka regalonakjja sapürutjamaw jukʼamp valoranit uñjañ muntanjja. Wali suma amigötapatsa Jehová Diosarojj wiñayaw yuspärañäni.