1. Aha do na didok Jesus taringot arta na di banua ginjang?

DANG sude arta boi taida. Gariada arta na ummarga sian sude dang boi diida matatta. Tikki pasahatton Jamita di Dolok, didok Jesus dao do ummarga arta na di banua ginjang sian arta na di portibi on. Dung i didok ibana muse, “Ai didia artam, disi do roham.” (Mat. 6:19-21) Molo adong sada arta na mararga situtu di hita, tottu marsitutu do hita lao mandapotton i. Jadi tapapungu ma arta na di banua ginjang. Carana, tabahen ma goar na denggan di adopan ni Jahowa. Songon na didok Jesus, arta sisongon i dang boi sega manang ditakko halak.

2. (a) Songon na didok si Paulus di 2 Korint 4:17, 18, aha do na ikkon taparrohahon? (b) Aha do na lao taulas di parsiajaran on?

² Dijujui si Paulus do hita asa mamparrohahon “angka na so tarida”. (Jaha 2 Korint 4:17, 18.) Akka arta na so boi taida on, tarmasuk ma pasu-pasu na lao tadapot di tano na imbaru. Di parsiajaran on, taulas ma opat silehon-lehon na so boi diida mata alai boi tadapot saonari. I ma parale-aleon tu Jahowa, tangiang, pangurupion marhite tondi parbadia, dohot pangurupion sian Jahowa, Jesus dohot akka suru-suruan tikki marbarita. Asing ni i, taulas ma carana mangargai silehon-lehon i.

3. Aha do silehon-lehon na ummarga sian sude, jala boasa boi tadapot i?

³ Parale-aleonta tu Jahowa do silehon-lehon na ummarga sian sude. (Ps. 25:14) Tutu do Debata na badia boi marale-ale dohot jolma na mardosa? I do. Alana dilehon  Ibana do Jesus gabe tobusan lao “manesa dosa ni portibi on”. (Joh. 1:29) Andorang so mate dope Jesus, nungnga diboto Jahowa pasti toktong do setia Jesus sahat tu na mate. I do alana, gabe boi Ibana marale-ale tu akka halak na mangolu andorang so mate dope Jesus.​—Rom 3:25.

4. Paboa ma contoh akka ale-ale ni Debata na mangolu andorang so ro Jesus tu tano on.

⁴ Pikkirhon ma akka ale-ale ni Debata na mangolu andorang so ro Jesus tu tano on. Misalna si Abraham. Togu do haporseaonna tu Jahowa. Lobi sian 1.000 taon dung mate si Abraham, didok Jahowa do ibana “hasudunganku”. (Jes. 41:8) Sian on taboto, nang pe nungnga mate sasahalak, alai toktong do gabe ale-ale ni Jahowa ibana. Dang dihalupahon Jahowa si Abraham. (Luk. 20:37, 38) Contoh na asing, i ma si Job. Tikki marpungu akka suru-suruan na di surgo, las do roha ni Jahowa makkatai taringot si Job. Didok Jahowa do si Job i sahalak na ‘daulat, tigor, biar mida Debata, jala dipadao rohana sian hajahaton’. (Job 1:6-8) Asing ni i, setia do si Daniel tu Jahowa nang pe tinggal di luat ni akka halak na so manomba Jahowa hira-hira 80 taon. Boha do pakkilalaan ni Jahowa tu ibana? Tolu hali do didok suru-suruan molo si Daniel i “baoa hasudungan ni roha” ni Debata. (Dan. 9:23; 10:11, 19) Pos do rohatta, tarpaima-ima do Jahowa lao pahehehon sude ale-alena naung mate.​—Job 14:15.

5. Aha do na ikkon taulahon asa boi gabe ale-ale ni Jahowa?

⁵ Saonari on, adong marjuta halak na marale-ale tu Jahowa, nang pe dang sempurna nasida. Godang do bawa, borua, dohot dakdanak di liat portibi on na lomo rohana gabe ale-ale ni Debata. Jala dipatudu nasida do i marhite parniulaon na denggan. Didok di Bibel, marale-ale do Jahowa “tu halak partigor”. (Poda 3:32) Asa boi gabe ale-ale ni Jahowa, ikkon porsea do hita tu tobusan ni Jesus. Alani tobusan i, gabe boi ma hita mangalehon diri tu Jahowa jala tardidi. Tikki taulahon i, gabe rap ma hita dohot marjuta donganta na asing, na marale-ale tu Debata Natumimbul!

6. Songon dia carana mangargai parale-aleonta tu Jahowa?

⁶ Songon dia carana mangargai parale-aleonta tu Jahowa? Tatiru ma si Abraham dohot si Job, na toktong setia tu Debata saleleng marratus taon. Manang sadia leleng pe hita manomba Jahowa, toktong ma hita setia. Jala songon si Daniel, ikkon ummarga do parale-aleonta tu Jahowa sian ngolutta sandiri. (Dan. 6:8, 11, 17, 23) Ala diurupi Jahowa, boi do taadopi sude tantangan jala toktong do hita marale-ale tu Ibana.​—Plp. 4:13.

7. (a) Hombar tu Poda 15:8, boha do pakkilalaan ni Jahowa taringot tangiangta? (b) Songon dia do Jahowa mangalusi tangiangta?

⁷ Silehon-lehon na asing na so boi taida, i ma tangiang. Molo marale-ale hita tu sasahalak, tottu las do rohatta paboahon sude pakkilalaanta tu ibana. Ibana pe songon i do. Songon i ma parale-aleonta tu Jahowa. Marhite Bibel, dipaboa Jahowa do pikkiran dohot pakkilalaanna tu hita. Jala hita pe boi do makkatai tu Ibana marhite tangiang. Boi do tapaboa sude pakkilalaanta. Las do roha ni Jahowa manangihon tangiangta. (Jaha Poda 15:8.) Alai dang  holan i. Lomo do tong rohana mangalusi tangiangta. Adong do tangiang na hatop dialusi. Alai olo do sipata dang pittor dialusi Jahowa tangiangta. Jadi ikkon toktong do tatangiangkon i. Pos ma rohatta, alusan ni Jahowa do tangiangta di tikki na pas jala marhite cara na dumenggan. Olo do ra dialusi Jahowa tangiangta marhite cara na so hea tabayangkon. Misalna, olo do dang disalpuhon Jahowa hasusaan na taadopi. Alai dilehon Ibana do tu hita bisuk dohot gogo asa sabar hita manaon i.​—1 Kor. 10:13.

8. Songon dia hita patuduhon pangargaion ala boi martangiang?

⁸ Songon dia hita patuduhon pangargaion ala boi martangiang? Sada cara, i ma mangoloi paretta ni Jahowa asa “sai martangiang”. (1 Tes. 5:17) Dang hea dipaksa Jahowa hita asa martangiang. Alai dilehon do tu hita kebebasan lao mamillit. Jadi molo martangiang hita ganup ari, on patuduhon na taargai do silehon-lehon i. Alai ingot ma, tikki martangiang, tapasahat ma pujian jala tadok ma mauliate tu Jahowa.​—Ps. 145:2, 3.

9. Aha do na dihilala sahalak donganta tikki martangiang, jala songon dia do pakkilalaanmuna tikki martangiang?

⁹ Lam leleng hita manomba Jahowa jala mangida songon dia Ibana mangalusi tangiangta, gabe lam tamba ma pangargaionta tu tangiang. On ma na dihilala si Chris, sahalak donganta bawa na marhobas sepenuh waktu saleleng 47 taon. Didok ibana, “Las hian do rohakku boi hatop dungo tikki manogot jala boi martangiang tu Jahowa. Tikki bissar mataniari, tabo do huhilala molo martangiang au tu Ibana, jala mangida akka toppaanna na massai uli! On mangonjar rohakku lao mandok mauliate tu Ibana alani sude silehon-lehonna, termasuk ma i tangiang. Jala dung martangiang au tikki borngin, boi ma au modom jala dame ma pakkilalaanku.”

10. Boasa ikkon tapangido tondi parbadia ni Jahowa?

¹⁰ Silehon-lehon na asing, i ma tondi parbadia ni Jahowa. Disuru Jesus do hita asa martangiang mangido tondi parbadia. (Luk. 11:9, 13) Marhite tondi parbadia, dilehon Jahowa do tu hita ‘hagogoon na sumurung’. (2 Kor. 4:7; Ul. 1:8) Gabe boi ma hita martahan mangadopi sude hasusaan.

11. Songon dia tondi parbadia boi mangurupi hita?

¹¹ Boi do tondi parbadia mangurupi hita mangulahon tugas di organisasi ni Jahowa. Marhite tondi parbadia, boi do dibahen Jahowa asa lam denggan bakat naung adong di hita. Jadi, molo marhasil hita mangulahon sada tugas, tapasahat ma pujian tu Jahowa.

12. Songon na didok di Psalmen 139:23, 24, aha do na boi tatangiakkon?

¹² Sada cara hita mangargai tondi parbadia ni Jahowa, i ma martangiang asa diurupi Jahowa hita mamboto atik na adong do pikkiran manang giot-giot na sala di rohatta. (Jaha Psalmen 139:23, 24.) Jala ikkon martangiang do muse hita mangido tondi parbadiana asa margogo hita mangalo pikkiran dohot giot-giot na sala i. Molo taulahon songon i, on patuduhon na marsitutu do hita asa unang dipaso Jahowa tondi parbadiana lao mangurupi hita.​—Eps. 4:30.

13. Songon dia asa lam taargai tondi parbadia?

¹³ Molo tarimangi akka naung diulahon tondi parbadia di tikkinta saonari, gabe lam taargai ma silehon-lehon sian Jahowa on. Andorang so nakkok Jesus tu surgo, didok ibana do tu akka siseanna, “Jaloonmuna ma huaso tingki songgop tondi parbadia tu hamu, jala paboaonmuna ma taringot tu ahu . . . sahat tu ujung ni tano on.” (Ul. 1:8) On ma na masa di tikkinta saonari. Alani tondi parbadia, adong ma hira-hira ualu satonga juta halak di liat portibi on na marpungu lao manomba Jahowa. Jala boi do hita  marsada ala diurupi tondi parbadia hita patuduhon akka parange na denggan, songon holong, las ni roha, dame, sabar, haburjuon, pangalaho na denggan, haporseaon, lambok ni roha, dohot mangorom diri. (Gal. 5:22, 23) Takkas ma, mararga situtu do tondi parbadia i!

14. Ise do na gabe dongan saulaonta tikki marbarita?

¹⁴ Sada silehon-lehon do di hita ala boi gabe “dongan saulaon” ni Jahowa, Jesus, dohot akka suru-suruan. (2 Kor. 6:1) Rap saulaon do hita dohot nasida manang didia pe hita marbarita. Didok si Paulus do taringot dirina dohot sude na dohot tu ulaon on, “Dongan saulaon ni Debata do hami.” (1 Kor. 3:9) Molo marbarita hita, gabe rap saulaon do muse hita dohot Jesus. Dung diparettahon Jesus akka apostelna asa mambahen ‘saluhut halak sian nasa bangso gabe sisean’, didok ibana do, “Sai na dongananku do hamu.” (Mat. 28:19, 20) Boha taringot akka suru-suruan? Las do rohatta ala diurupi akka suru-suruan hita lao paboahon “barita na uli sisaleleng ni lelengna tu angka jolma na di tano on”!​—Pgk. 14:6.

15. Paboa ma contoh di Bibel na patuduhon diurupi Jahowa do hita tikki marbarita.

¹⁵ Aha do hasilna ala diurupi Jahowa hita tikki marbarita? Songon boni na madabu tu tano na denggan, adong do piga-piga halak na olo manjalo barita na tapasahat. (Mat. 13:18, 23) Ise do na mambahen nasida gabe manjalo hasittongan jala marparbue? Didok Jesus, dang adong manang ise pe na boi gabe siseanna “anggo so Ama . . . i na manogu ibana”. (Joh. 6:44) Adong do contohna di Bibel taringot on. Hea do marbarita si Paulus tu akka borua di luar ni kota Pilippi. Disurat do di Bibel taringot sada sian akka borua i na margoar si Lidia. Didok disi, “Dibungka Jahowa ma rohana asa dijalo na nidok ni si Paulus.” (Ul. 16:13-15) Songon si Lidia, adong do marjuta halak na asing na diurupi Jahowa tu hasittongan.

16. Ise do na tama tapuji molo marhasil hita di ulaon marbarita?

¹⁶ Ise do na tama tapuji molo marhasil hita di ulaon marbarita? Dipaboa si Paulus do alusna tikki dibahen ibana surat tu huria na di Korint. Didok, “Ahu do na manuan, si Apollos do na maniram, alai Debata do na patubuhon i. Na rumingkot ndang na manuan manang na maniram, alai Debata na patubuhon i do na rumingkot.” (1 Kor. 3:6, 7) Songon si Paulus, ikkon sai tapasahat do pujian tu Jahowa molo marhasil hita di ulaon marbarita.

17. Songon dia hita patuduhon pangargaionta ala boi gabe “dongan saulaon” ni Jahowa, Jesus, dohot akka suru-suruan?

¹⁷ Songon dia hita patuduhon pangargaionta ala boi gabe “dongan saulaon” ni Jahowa, Jesus, dohot akka suru-suruan? Ikkon taulahon ma sian nasa tolapta lao paboahon barita na uli tu halak na asing. Godang do carana mangulahon i, songon kesaksian di tempat umum dohot “sian jabu tu jabu”. (Ul. 20:20) Godang do akka donganta na mambahen kesaksian tidak resmi. Tikki pajuppang nasida dohot halak na so ditanda, burju jala lambok do nasida mamukka pakkataion. Molo olo do ibana ditogihon makkatai, marbisuk do nasida pasahatton barita na uli.

18-19. (a) Songon dia do hita maniram boni hasittongan? (b) Paboa ma sada contoh na patuduhon songon dia Jahowa mangurupi sahalak parsiajar Bibel.

 ¹⁸ Ala gabe “dongan saulaon ni Debata” do hita, dang holan manuan hita, alai dohot do maniram boni hasittongan. Molo taboto adong halak na berminat, marsitutu ma hita manjuppangi ibana muse. Manang tapangido ma sahalak donganta asa mangurupi ibana marsiajar Bibel. Las do rohatta mangida songon dia Jahowa mangurupi parsiajar Bibel i mambahen hamubaon di ngoluna.

¹⁹ Parrohahon ma pengalaman ni sahalak donganta di Afrika Selatan na hea gabe datu. Lomo do rohana marsiajar Bibel. Alai tikki diboto ibana dang lomo roha ni Jahowa molo makkatai hita tu halak naung mate, maol do tarjalo ibana i. (5 Mus. 18:10-12) Ujungna, olo do ibana marhamubaon. Dang olo be ibana gabe datu, nang pe holan i pansarianna. Saonari nungnga marumur 60 taon donganta on. Didok ibana, “Mauliate ma hudok tu Sitindangi Ni Jahowa. Godang do pangurupion ni nasida tu au. Diurupi do au asa dapot karejo. Alai na urrikkot, mauliate ma hudok tu Jahowa ala diurupi ibana do au asa muba. Saonari, boi ma au gabe Sitindangina naung tardidi jala dohot tu ulaon marbarita.”

20. Aha do na naeng ulahononmuna?

²⁰ Di parsiajaran on, nungnga taulas be opat silehon-lehon na arga na so boi diida mata. Na umbalga sian sude, i ma parale-aleonta tu Jahowa. Ala marale-ale hita tu Jahowa, gabe boi ma tadapot silehon-lehon na asing. Boi do hita martangiang tu ibana, diurupi tondi parbadia, jala diurupi Jahowa, Jesus, dohot akka suru-suruan tikki marbarita. Anggiat ma lam taargai sude silehon-lehon i. Jala toktong ma hita mandok mauliate tu Jahowa, ala nungnga gabe Ale-ale na burju ibana tu hita.