1. Rosai Yesus ikofen ḇekur arasai ḇero nanggi?

KOPOK komam arasai nakam ro komgasna ḇa. Ḇekaku ya, arasai ḇepyum syadi ima kopok komam na ḇa. Fafisu Yesus dawos faya ḇyedi ro bon, dapḇair arasai ḇero nanggi ḇe roi ḇepyum syadi ro arasai ḇero dunya ine. Na koryur arasai ro nanggi kuker kosewar fa kosmai kyaremso ro Yahwe I. Yesus doḇe arasai anna napok namuk ḇa ḇaido skaraw na ḇa. Ikofen kako ḇo doḇe, ”Ro moḇ [arasai] ḇena naisya roya, ro dia snembri isya kako.” (Mat. 6:19-21) Komam roi oso ḇyesyowi kaku ido, na kosewar kaku fa kosmai na.

2. (a) Ro 2 Korintus 4:17, 18, rosai Manwawan Paulus danun ḇe ko fa komamepen na? (b) Rosai nari kawos ro farkarkor ine?

² Manwawan Paulus danun ḇe ko fa ’komamepen roi komam ḇa na’. (Wasya 2 Korintus 4:17, 18.) Roi komam ḇa nane iso arasai kosmai kwar na, ma payamyum nari kosmai ro dunya babo Allah ḇyeasas kwar na. Ro farkarkor ine, nari kawos arasai rifyak kosmai kwar ro fafisu ine kopok komam na ḇa. Isoine ḇaḇebati kuker Allah, nadi, fafnoḇek ro Allah rur ḇesren Ḇyedi, ma fafnoḇek kosmai ro Yahwe, Yesus, ma malaikat sya. Na kawos kako moḇsa kofasnai koma koḇesyowi kaku arasai rifyak nane.

3. Arasai rosai komam ḇa mboi ḇyesyowi kaku, ma rosai ḇefrur fa bisa kaksmai na?

³ Arasai komam na ḇa mboi ḇyesyowi kaku iso ḇaḇebati kuker Allah Yahwe I. (Mz. 25:14) Allah ima isren kaku, mboi rariso bisa ḇyebati kuker snonggaku ḇesasar koine?  Ine snar Yesus imarwarek ko kwar fa ’ipyos sasar dunya ine’. (Yoh. 1:29) Fafisu Yesus imar ḇaim, Yahwe ifawi ḇepon kwar Yesus nari isouser isof imar insama ḇyuk fasaspar faro snonggaku sya. Iso ḇefrur fa snonggaku ḇekenem rofyor Kristus imar ḇaim, Allah bisa ḇyebati kuker si.​—Rm. 3:25.

4. Fafisu Yesus ryama ḇe supswan ine ḇaim, mansei monda Allah bati Ḇyesi?

⁴ Fafisu Yesus ryama ḇe supswan ine ḇaim, snonggaku ono sisya sakḇebati kuker Allah kwar. Oser ya iso Abraham i, snon ine ikyar kaku faro Allah. Fyor Abraham imar, swaf taun ri 1.000 nande mura, Yahwe dor i ḇe bati Ḇyedi. (Yes. 41:8) Inja, marmar na ipok idwarek ḇaḇebati koḇena kuker Yahwe I ḇa. Yahwe ḇyefnder Abraham i ḇaḇeri. (Luk. 20:37, 38) Yahwe bati Ḇyedi oso ḇese iso Ayub i. Fafisu malaikat sya sfanjur kam ro nanggi, Yahwe ikofenḇair ḇekur Ayub i. Yahwe doḇe Ayub ima ’nya sne ḇenapes, isoasuser, imgak faro Allah, ma ḇyinggwan ro roi ḇeḇyeḇa na’. (Ayb. 1:6-8) Oso wer iso Daniel i. Ro swaf taun ri 80, ḇyarekus snonggaku ḇesyom ḇe Yahwe I ḇa sya. Mboi, ifarmyan ḇe Yahwe I pdef. Moḇsa Yahwe myam Daniel i rai? Rarwan rikyor malaikat ryama myamfar nabi ḇemansar kaku kwar ine fa ikofen ḇe i snar Allah iswar kaku i. (Dan. 9:23; 10:11, 19) Kokyar kaku Yahwe na myander kaku fa ḇye bati Ḇyesi ḇemar kwar sya fa sikenem kaḇer.​—Ayb. 14:15.

5. Rosai fandun fa kofrur ya insama kakḇebati kuker Yahwe I?

⁵ Baboine kako, snonggaku riyuta sinapes ḇa mboi sakḇebati kuker Yahwe I. Kofawi na ro? Snon, bin, ma romawa sibor sfasnai ro kenem sena snar sḇebati kaku kuker Allah. Refo doḇe Yahwe ’ḇyebati fanam kaku faro snonggaku ḇena sne ḇenapes’. (Ams. 3:32) Sḇebati kuker Yahwe I kukro sikyar faro Yesus farsarser marmar ḇyedi. Yesus imarwarek ko kwar, inja komarisen koḇuk kenem koḇena fa kofarmyan ḇe Yahwe I ma koḇebaptis. Kofrur roi ḇefandun nane ido, na kakḇebati fanam kuker Allah Ḇepoik Syadi ro farsyos ḇeba ine fnoḇek snonggaku riyuta ḇebaptis kwar ansi.

6. Moḇsa kofasnai koḇesyowi wis koḇena kuker Allah rai?

⁶ Moḇsa kofasnai koḇesyowi ḇaḇebati koḇena kuker Allah rai? Ipyum fa kakfrur raris Abraham ma Ayub su, ro swaf taun utin oser syadi susouser pdef faro Yahwe I. Inja, kofarmyan fyoro kwar ke roḇa yo, fandun fa kosouser pdef faro Yahwe I. Raris Daniel i, koḇesyowi syadi wis koḇena kuker Allah ro kenem ine. (Dan. 6:7, 10, 16, 22) Kuker fafnoḇek ro Yahwe I, na komkuepen rofyor kosmai samswen, ma kofaduru ḇaḇebati koḇena kuker I fa syambraḇ pdef.​—Flp. 4:13.

7. (a) Ro Amsal 15:8, moḇsa Yahwe myam nadi koḇena rai? (b) Moḇsariso Yahwe kyarem nadi koḇena rai?

⁷ Arasai ḇese komam ḇa na iso nadi. Snonggaku risuru suḇebati ido, na sumarisen sufarfyar roi sukara ma suḇaḇir na. Ine iso roi kaksmai ro ḇaḇebati kuker Yahwe I. Allah Yahwe dawos yoḇ ko ro Refo fa ikofenḇair roi kyara ma ḇyaḇir na. Kawos yoḇ Yahwe I ro nadi fa kokofenḇair roi kokara ma roi ḇero kosnesna. Yahwe imarisen ryower nadi koḇena. (Wasya Amsal 15:8.) Ima Bati koḇedirya, inja na kyarem nadi koḇena kako. Fafisu ono, Yahwe kyarem fasaw  na. Mboi ono wer, fandun fa kofararyor pdef. Rarirya mboi, kokyar Yahwe na kyarem nadi koḇena ro swaf ḇesrow ma ro nyan ḇemnis kaku. Imboḇae, fafisu ono Yahwe kyarem nadi koḇena kuker nyan kokara na ḇa. Imnis raris, Yahwe na duf samswen koḇena bur ko ḇa, mboi ḇyuk fawawinanem ma samambraḇ insama kosambraḇ fa kokamar na.​—1 Kor. 10:13.

8. Moḇsa na kofasnai koḇesyowi nadi ḇe roi ḇepyum ro Yahwe I rai?

⁸ Moḇsa na kofasnai koḇesyowi nadi ḇe roi ḇepyum ro Yahwe I rai? Nyan oser iso kosouser anun ro Refo ḇewan ko fa koḇenadi faswef. (1 Tes. 5:17) Yahwe idafdif ko ḇa fa koḇenadi fa kor I. Komkei kokinfir fa koḇenadi ḇe I, ma Yahwe ḇyesyowi na. Mboi, Yahwe danunepen ko fa ’kofarmku ro nadi ya’. (Rm. 12:12) Inja, kofasnai koḇesyowi nadi ine kuker koḇenadi ro ras nakam. Ma koswarepen fafisu koḇenadi, ipyum fa kokofen kasumasa faro Yahwe ma kosandik I.​—Mz. 145:2, 3.

9. Rariso mambesrar oso myam nadi ya, ma Au ido moḇsa wakmam nadi ya rai?

⁹ Ro fafisu kofarmyan ḇe Yahwe I, na komam ro manggunko moḇsa Yahwe kyarem nadi koḇena kwar. Nane nafrur fa koḇesyowi syadi swaf fa koḇenadi. Iso mambesrar oso ḇenir ḇe Chris, roi ḇyaḇir na. Ifarmyan ro oras nakam swaf taun ri 47. Doḇe, ”Yamarisen yakḇok ro arwo prim fa yanadi ḇe Yahwe I. Moḇ ya iknon kaker, insape ori ya dek fa isnai, ma wawur nasnai nasnaper ro rokaker na. Ine dun sneprei kaku. Mura yakofen kasumasa faro Yahwe I kukro ḇyuk roi nane ḇe aya, ma ḇyuk syowi ḇeba kako fa yaḇenadi. Yanadi ro roḇ raposa, sneri iknon kaku ḇo yenef.”

10. Rosai ḇefnai kaku fa koḇesyowi Allah rur ḇesren Ḇyedi?

¹⁰ Roi ḇepyum ḇese Yahwe ḇyuk kwar komam na ḇa iso rur ḇesren Ḇyedi. Yahwe ḇye rur ḇesren fa nbuk samambraḇ  ḇeba kaku ḇe ko. (2 Kor. 4:7; Kis. 1:8) Rur ḇesren nafnoḇek ko fa komkuepen pdef fyor samswen nkur ko. Iso ḇefnai fa Yesus danun ḇe ko fa kor rur ḇesren ya.​—Luk. 11:9, 13.

11. Moḇsa rur ḇesren nafnoḇek ko rai?

¹¹ Rur ḇesren nafnoḇek ko fa kombran pyum fararmyan ḇe Allah. Rur ḇesren nafnoḇek ko kako fa kokir syadi ma kona kosambraḇ. Inja, rofyor kosmai roi ḇepyum ro fararur ma fararmyan koḇena, kokyar nanema ndarirya kukro fafnoḇek ro Allah rur ḇesren Ḇyedi.

12. Ro Mazmur 139:23, 24, rosai na kor ḇe Yahwe I ro nadi koḇena?

¹² Moḇsa kofasnai koḇesyowi Allah rur ḇesren Ḇyedi rai? Nyan oser iso kor Yahwe I fa ifnoḇek ko insama komam pyum ro kosnesna ma swaruser koḇena marisen ḇesasar naisya kaker ke roḇa. (Wasya Mazmur 139:23, 24.) Koḇenadi radine ido, Yahwe na ḇye rur ḇesren Ḇyedi fa ifnoḇek ko insama kofawi kona kakara ḇaido marisen ḇesasar. Fyor kofawi kwar, koḇenadi kaku insama Allah ḇyuk rur ḇesren Ḇyedi samande kosambraḇ fa kopampum kakara ma marisen ḇesasar anna. Rarirya, kofasnai koma komewer kofrur roi nari ḇefnai fa Yahwe imnai ḇyuk rur ḇesren Ḇyedi.​—Ef. 4:30.

13. Moḇsa koḇesyowi syadi rur ḇesren ya rai?

¹³ Koḇesyowi syadi rur ḇesren ya kuker kokara rosai Allah rur Ḇyedi ifrur kwar ro fafisu koḇedine. Fyor Yesus dek kaḇer ḇe nanggi ḇaim, ikofen ḇe manfamyan ḇyesi, ’Nari mgosmai papoik, rofyor Rur Ḇesren dadofes ḇe mgo, ma nari mgoḇesaksi ḇe aya isof supswan pember ya.’ (Kis. 1:8) Wos nane komam ryarirya kwar ro baboine. Snar fafnoḇek rur ḇesren ya, snonggaku sisyadi ro yuta riwar syaran utin riwonem ro supswan ine ḇesiper sisyom Yahwe I. Komarisen kako komam koḇeoser ro payamyum ḇe manbekanaek kukro Allah rur ḇesren Ḇyedi ifnoḇek ko. Naiso eḇedari kofasnai  rari ḇepyum raris saswar, raryaḇ, aski, sne ḇenaḇye, frur pyum, kakyar, ma farmkuepen. Rari ḇepyum nane iso rur ya bon ḇyenairi. (Gal. 5:22, 23) Kaku ḇeri, rur ḇesren ima roi ḇepyum koḇesyowi kaku na!

14. Mansei ḇesaramper ko rofyor kora koḇaryas?

¹⁴ Arasai komam ḇa ḇese wer iso syowi ḇeba fa kofararur fnoḇek Yahwe I. (2 Kor. 6:1) Kofrur na rofyor kaksowarpu ro fararur ḇaḇeḇaryas ya. Paulus dap manggundi ma snonggaku ḇesowarpu ro fararur ine ḇe ”min ḇefararur fnoḇek Allah”. (1 Kor. 3:9) Kakfararur kayam fnoḇek Yesus kako ro fararmyan ya. Yesus iwan manfamyan ḇyesi fa sfarkor snonggaku ro er syakam fa sḇe manfamyan ḇyesi raposa, ikofen wer, ’Nari yarous mgo besya kwar.’ (Mat. 28:19, 20) Ḇar malaikat sya kako sisaramper fararur ine. Komarisen kaku malaikat sya sfarkin ko fa koḇaryas abar ḇepyum ḇekain fyoro faro snonggaku ro supswan ine!​—Why. 14:6.

15. Fawarpan fawar oso ro Refo ḇefasnai Yahwe isaramper kaku fararmyan koḇena.

¹⁵ Snar kosmai fafnoḇek ḇeramuma ro nanggi, bon rosai kosmai ya? Rofyor koḇaryas abar Karajan imnis ra kokef mor, ono naisya nasapi ro sne ḇepyum, mura nasure. (Mat. 13:18, 23) Mansei ḇefrur mor anna fa nasur ma ne bon? Yesus doḇe snonggaku oso na dakḇe manfamyan faro i rofyor ’Mami ḇewan i duni maro i’. (Yoh. 6:44) Fawar oso ro Refo fyasnai roi ine. Ras oso, Manwawan Paulus isya ḇyaryas abar Karajan faro bin ḇeḇeso ro mnu Filipi ḇandiri. Komam kada, rosai Refo ikofen ḇekur bin oso snori Lidia: ”[Yahwe] ḇyas sneri, isof kyarkara roi Paulus dawos na.” (Kis. 16:13-15) Raris Lidia i, Yahwe iyer snonggaku riyuta ḇesesya kako.

16. Mansei ḇesyus fa ḇesmai sanandik faro bon kosmai ro fararmyan ya?

¹⁶ Mansei ḇefrur kaku fa kosmai bon ro fararmyan ya? Manwawan Paulus kyarem fakfuken anya rofyor fyas syapram ḇe sidang Korintus. Doḇe, ’Ayai ḇeker ya ma Apolos i ḇeruḇ ya, mboi Allah manggundi ḇardi ḇeḇuk fa rokaker ḇyena nasur ya. Inja Allah iso ḇeḇefandun ya, snar i ḇeḇuksur ya. Ḇeker ya ma ḇeruḇ ya suḇefandun manggun ḇa.’ (1 Kor. 3:6, 7) Raris Paulus i, fandun fa koḇuk sanandik ḇe Yahwe I kukro iso ḇeḇuk bon ro fararmyan koḇena.

17. Moḇsa kofasnai kasumasa faro syowi ḇeba kosmai fa kofararur fnoḇek Allah, Kristus, ma malaikat sya?

¹⁷ Moḇsa kofasnai kasumasa faro syowi ḇeba kosmai fa kofararur fnoḇek Allah, Kristus, ma malaikat sya? Kofrur na kuker komyaren kosewar swaf fa koḇaryas abar ḇepyum faro snonggaku ḇesesya. Nyan nabor bisa koḇukiḇaryas ya, imnis ra koḇaryas ro moḇ snonggaku ḇebor sisya ro ya ma ro rum ḇe rum. (Kis. 20:20) Naek ma srar ono sisya simarisen sḇaryas ro fafisu ḇesena. Fafisu sisrow randak snonggaku oso, na sisewar fa sawos myaren asuser yoḇ i. Imarisen ido, na sikofenḇair ḇe i abar ḇepyum ḇekur Karajan Allah.

18-19. (a) Moḇsa koruḇ mor Karajan ya rai? (b) Fawarpan fawar oso ḇefasnai rariso Yahwe ifnoḇek ḇefarkor Refo oso.

¹⁸ ”Min ḇefararur fnoḇek Allah” koine, fararur koḇena iso kokef mor Karajan  monda ḇa. Fandun fa koruḇ na kako. Inja oso imarisen ido, na kosewar kaku fa korama kaḇer yoḇ i ḇaido kor manḇaryas binḇaryas ḇese fa sra smamfar i. Kosrow i fa korandak farkarkor Refo kuker i. Fafisu fyarkor Refo, na komam moḇsa Yahwe ifnoḇek i fa fyadwer nyan kakara ma sne ḇyedi. Nane nafrur fa komarisen kaku.

¹⁹ Komampan fawar ro mambesrar oso ro sup Afrika ḇar Wamires, snori Raphalalani. Randak iwara, ima snon ḇeyuf robor diri. Fafisu fyarkor Refo, imarisen faro rosai ifawi na. Ḇape, samswen ḇe i fafisu ifawi Allah moḇ myam snonggaku ḇeyawos kuker sinan apus ḇemar kwar sya. (Ul. 18:10-12) Fawawas, Raphalalani fyadwer nyan kakara ḇyena fa namnis Allah marisen Ḇyena. Mura, ismai fararur ḇese oḇa mboi kyinfir fa duf robor wer ḇa. Kirine, ḇyeumur taun ri 60 kwar. Doḇe, ”Yakofen kasumasa kukro Saksi Yahwe sifnoḇek kaku aya kwar. Rupa ra sisewar pyan fararur ḇe aya. Ḇepyum syadi wer, yakofen kasumasa kukro Yahwe ifnoḇek aya fa yafadwer kenem yedine. Inja, bisa yakḇebaptis ma kirine yasowarpu fa yakḇaryas.”

20. Rosai komarisen fa kofrur ya?

²⁰ Ro farkarkor ine, kawos kwar arasai rifyak komam ḇa na. Arasai ḇeba syadi ya iso syowi ḇeba fa koḇebati kuker Yahwe I. Naiso ḇefrur fa kosmai arasai ḇese wer, isoine syowi ḇeba fa koḇenadi faro Yahwe I; kosmai fafnoḇek ro rur ḇesren; ma kosmai fafnoḇek ḇeramuma ro nanggi faro ḇaḇeḇaryas. Na komarisen koḇesyowi syadi arasai komam ḇa nane. Ma komarisen kokofen kasumasa ḇesya kwar faro Yahwe I kukro ima Bati ḇefrur pyum kaku koḇediri.