1. Aha do na ihatahon Jesus pasal arta na i nagori atas?

LANG ganup sibere-bere humbani Naibata boi ididah hita. Sasintongni, harganan do sibere-bere na lang boi ididah ai. Bani Ambilan i Dolog, ihatahon Jesus harganan do arta na i nagori atas marimbangkon habayakon. Dob ai nini use, “Ai ija artamu, ijai do uhurmu.” (Mat. 6:19-21) Somalni, anggo adong na maharga iahap hita, marusaha do hita laho mandapotkon ai. Tontu harga tumang do ‘arta i nagori atas’ ai banta. Janah ihatahon Jesus lang boi maseda ai atap pe itangko halak. Halani ai, marusaha do hita patumpuhon arta ai. Artini, marusaha do hita ase iharosuhkon Naibata.

2. (a) Domu bani 2 Korint 4:17, 18, aha do na iojur si Paulus hubanta? (b) Aha do na laho iulas hita bani artikel on?

² Si Paulus mangojur ase “ikawahkon [hita] na so taridah in”. (Basa 2 Korint 4:17, 18.) Na so taridah in maksudni ai ma pasu-pasu na laho ibere Naibata hubanta bani ari simagira. Bani artikel on iulas hita ma dong ompat sibere-bere ai na boi dapot hita humbani sonari: parhasomananta pakon Naibata, boi martonggo hu Bani, pangurupion ni tonduy na pansing, ampa pangurupion ni Jahowa, Jesus, pakon malekat ibagas pangidangionta. Holi iulas hita homa sonaha hita boi mangkargai ganup sibere-bere ai.

3. Sibere-bere aha do na sibanggalan, janah mase hita boi mandapot ai?

³ Sibere-bere na sibanggalan ai ma parhasomananta pakon Naibata Jahowa. (Ps. 25:14) Sonaha Naibata na pansing tumang boi marhasoman pakon jolma na pardousa? On boi halani dong tobusan ni Jesus Kristus na “mamorsan dousa ni dunia on”. (Joh. 1:29) Paima roh Jesus hu tanoh on, domma ibotoh Jahowa setia do holi Jesus mangidangi i tanoh on  ronsi matei ase boi ia paluahkon jolma. Halani ai ma dong halak na boi marhasoman pakon Naibata hassi pe lape matei Kristus laho manobus jolma.​—Rom 3:25.

4. Paima roh Jesus hu tanoh on, ise ma halak na ongga gabe hasoman ni Naibata?

⁴ Paima roh Jesus hu tanoh on, domma dong halak na gabe hasoman ni Naibata. Umpamani, si Abraham halak na toguh marhaporsayaon bani Jahowa. Hassi pe domma 1.000 tahun matei ia, ihatahon Jahowa do ia ‘huan-kuan-Ni’. (Jes. 41:8) Tongtong do idingat Ia si Abraham. Jadi gari hamatean pe lang boi mambahen Jahowa sirang humbani hasoman-Ni. (Luk. 20:37, 38) Dong homa si Job. Sanggah martumpu malekat i surga, ihatahon Jahowa do i lobei ni sidea anggo si Job ai halak na “daulat, pintor, mabiar mangidah Naibata, anjaha ipadaoh do uhurni humbani hajahaton”. (Job 1:6-8) Anjaha dong homa si Daniel. Hassi pe domma hira-hira 80 tahun ia tading i tongah-tongah ni halak na lang sisombah Jahowa, tapi totap do ia setia mangidangi Jahowa. Sonaha ma pangahap ni Jahowa hu bani? Dong tolu hali ihatahon Jahowa anggo si Daniel “haholongan ni uhur ni Naibata”. (Dan. 9:23; 10:11, 19) Tontu pos do uhurta anggo Jahowa sihol papuhohon ganup hasoman-Ni na dob matei.​—Job 14:15.

5. Aha do na maningon bahenonta ase boi gabe hasoman ni Jahowa?

⁵ Piga halak ma sonari on na domma gabe hasoman ni Jahowa? Dong marjuta halak. Dong dalahi, naboru, ampa dakdanak na patuduhkon humbani parlahouni anggo sidea ai sihol gabe hasoman ni Jahowa. Bani “halak parpintor” do Jahowa marhasoman. (Pod. 3:32) Halak sisonai boi gabe hasoman ni Naibata halani porsaya sidea bani tobusan ni Jesus. Marhitei tobusan, gabe boi ma hita mangondoskon diri bani Naibata anjaha ididi. Anggo ra hita ididi, dos do artini ai dihut homa hita pakon marjuta halak na legan na domma homa ididi gabe halak Kristen. Orot do homa parhasomanan ni sidea pakon Jahowa.

6. Sonaha hita patuduhkon anggo hita mangkargai parhasomananta pakon Naibata?

⁶ Sonaha hita patuduhkon anggo hita mangkargai parhasomanan pakon Naibata? Songon si Abraham pakon si Job na totap setia bani Jahowa sadokah goluhni, hita pe maningon totap ma setia hubani Jahowa lang soal domma sadiha dokah hita mangidangi-Si. Songon si Daniel ma homa hita. Maningon parhasomanan pakon Naibata ma na sipontingan marimbangkon hosahta. (Dan. 6:8, 11, 17, 23) Marhitei pangurupion ni Jahowa, boi do hita totap martahan anjaha marhasoman pakon-Si lang soal sitaronon aha pe na masa hubanta.​—Pil. 4:13.

7. (a) Domu bani Podah 15:8, sonaha pangahap ni Jahowa manangar tonggonta? (b) Sonaha Jahowa mambalosi tonggonta?

⁷ Sibere-bere na legan ai ma tonggo. Somalni, sasahalak boi marhasoman pakon na legan halani gati sidea marbuali janah patugahkon aha na ibagas uhurni bei. Ai boi do homa ibahen hita sonai pakon Jahowa? Boi! Marhitei Bibel ipatugah Jahowa do hubanta aha na ipingkirhon Ia ampa sonaha pangahap-Ni. Hita pe boi do marsahap hubani Naibata marhitei tonggo. Boi ipatugah hita naha pangahapta ampa aha na ibagas uhurta. Malas tumang do uhur ni Jahowa manangihon tonggonta. (Basa Podah 15:8.) Songon hasoman na parholong lang pitah itangihon Jahowa tonggonta, tapi ibalosi do homa. Sipata mintor podas do ibalosi Jahowa tonggonta. Tapi  sipata, maningon marulak-ulak do ipindo hita ai hu Bani. Hassi pe sonai, pos do uhurta ibalosi Jahowa do tonggonta bani panorang na topat, janah ibere do na sidearan hubanta. Tongon ra do balosni ai lang songon na ipingkirhon hita. Umpamani, ra do totap ope dong parsoalan ai, tapi ibere Jahowa do hapentaran ampa hagogohon ase boi “tartaron” hita ai.​—1 Kor. 10:13.

8. Sonaha hita boi patuduhkon tarima kasih halani boi martonggo?

⁸ Sonaha hita boi patuduhkon tarima kasih halani boi martonggo? Dalankon hita ma parentah ni Naibata na mangkatahon ase “totap martonggo”. (1 Tes. 5:17) Lang ongga ipaksa Jahowa hita martonggo. Hassi pe sonai, marosuh do Ia ase ulang malang hita martonggo. Janah iojur do hita ase “golgol bani tonggo”. (Rom 12:12) Jadi anggo gati hita martonggo bai ganup ari, on patuduhkon ihargai hita do sibere-bere ai. Sanggah martonggo ulang ma lupa mangkatahon tarima kasih ampa puji-pujian hu Bani.​—Ps. 145:2, 3.

9. (a) Sonaha pangahap ni sada sanina halani boi martonggo? (b) Sonaha do pangahapmu halani boi martonggo?

⁹ Sadokah hita mangidangi Jahowa, tontu gati do iahapkon hita sonaha Ia mambalosi tonggonta. On ma na mambahen lambin ihargai hita tonggo ai. Pardiateihon hita ma pangalaman ni Sanina Chris na domma mangidangi sadokah 47 tahun ibagas dinas sepenuh waktu. Nini do, “Marosuh do ahu puho girah sogod ase boi martonggo bani Jahowa. Sanggah hudidah sondang ni mata ni ari, martarima kasih do ahu bani Jahowa. Martarima kasih do ahu bani ganup na ibere Ia hubangku. Anjaha martarima kasih do homa ahu halani boi martonggo. Bani borngin ni ari martonggo do homa ahu bani Jahowa. Dobkonsi ai gabe damei ma huahap.”

10. Mase martarima kasih hita halani ibere tonduy na pansing?

¹⁰ Sibere-bere na legan na lang boi ididah hita ai ma tonduy na pansing. Iojur Jesus  do hita ase martonggo mangindo tonduy na pansing. (Luk. 11:9, 13) Igunahon Jahowa do tonduy-Ni laho mambere “hagogohon na sumurung”. (2 Kor. 4:7; Lah. 1:8) Marhitei pangurupion ni Naibata, ipargogohi do hita ase boi totap martahan hassi pe dong sitaronon.

11. Sonaha tonduy na pansing boi mangurupi hita?

¹¹ Ase boi idalankon hita pangidangionta, maningon iurupi tonduy na pansing do hita. Marhitei tonduy na pansing boi do hita lambin pandei mandalankon tugasta ibagas organisasi. Sasintongni, ganup hasil na dear na idapot hita ibagas pangidangion halani pangurupion tonduy ni Naibata do ai, sedo halani gogohta sandiri.

12. Domu bani Psalmen 139:23, 24, mase hita mangindo tonduy na pansing?

¹² Cara na legan hita mangkargai tonduy na pansing ai ma marhitei martonggo mangindo tonduy na pansing ase iurupi hita mananda pingkiran ampa uhur na lepak ibagas dirinta. (Basa Psalmen 139:23, 24.) Anggo ibahen hita sonai, ibere Jahowa do holi tonduy-Ni laho mangurupi hita. Anjaha anggo dong do pingkiran ampa uhur na lepak, martonggo ma mangindo tonduy na pansing ase ipargogohi hita mangambukkon ai. Anggo ibahen hita sonai, ididah Jahowa ma anggo hita sihol ase tongtong iurupi tonduy-Ni.​—Ep. 4:30.

13. Sonaha carani ase lambin ihargai hita tonduy na pansing?

¹³ Lambin ihargai hita do tonduy na pansing anggo irimangi hita aha na domma ihorjahon juakjuak ni Naibata ronsi sonari. Paima naik hu surga ihatahon Jesus do bani susianni, “Jaloonnima ma hagogohon ni tonduy na pansing na sogop bennima, anjaha gabe saksingku ma hanima . . . das hu ujung ni tanoh on.” (Lah. 1:8) Saud do ai bani panorangta sonari on. Marhitei pangurupion ni tonduy ni Naibata, dong hira-hira ualuh satongah juta halak humbani sab dunia on na ipatumpu gabe sisombah Naibata. Marsada do homa hita halani iurupi tonduy-Ni hita patuduhkon paruhuran na jenges, songon holong, malas ni uhur, damei, hasabaron, habujuran,  halayakon, haporsayaon, halamlamon, ampa panrajaion diri. “Buah ni tonduy” do ganupan ai. (Gal. 5:22, 23) Jadi sibere-bere ni Naibata na maharga tumang do tonduy na pansing ai!

14. Ise do na mangurupi hita sanggah mangidangi?

¹⁴ Sibere-bere na maharga do homa halani boi hita rap marhorja pakon Jahowa, Jesus, ampa malekatni. (2 Kor. 6:1) Ihatahon do hita rap marhorja pakon sidea sanggah hita mangidangi. Ihatahon si Paulus do bani halak na mangkorjahon ai, ‘Hasoman sahorja ni Naibata do hita.’ (1 Kor. 3:9) Sanggah hita mangidangi, gabe hasoman sahorja ni Jesus do homa hita. Dingat ma na ihatahon Jesus bani susianni dob iparentahkon ia sidea ase mambahen ‘sagala bangsa gabe susianni’. Nini do, “Hasomananku do hanima.” (Mat. 28:19, 20) Anjaha, sonaha hita boi rap marhorja pakon malekat? Itogu-togu malekat do hita sanggah hita mambaritahon “ambilan na madear sisadokah ni dokahni . . . bani na mangiankon tanoh in”. Tontu ihargai hita do homa ai!​—Pangk. 14:6.

15. Patugah ma sada contoh hun Bibel na patuduhkon Jahowa mangurupi hita ibagas pangidangion.

¹⁵ Marhitei pangurupion ai, hasil aha ma na idapot hita ibagas pangidangion? Sanggah isaburhon hita barita Harajaon, dong do na tubuh ibagas uhur ni halak na ra manjalo. (Mat. 13:18, 23) Ise ma na mambahen bonih ai tubuh janah marbuah? Jesus mangkatahon lang adong halak na gabe susianni anggo seng “Bapa in na . . . manogusi”. (Joh. 6:44) Bani Bibel, boi ididah hita contohni. Dingat ma aha na masa sanggah si Paulus marbarita hubani piga-piga naboru na dong i darat ni kota Pilippi. Sada humbani naboru ai margoran si Lidia. Bibel mangkatahon, “Ibuka Naibata ma uhurni gabe iparimbagaskon ma na hinatahon ni si Paulus.” (Lah. 16:13-15) Songon si Lidia, dong marjuta halak sonari on na dob itogu-togu Jahowa hu Bani.

16. Ise ma na talup ipuji anggo dapot hita hasil na madear ibagas pangidangion?

¹⁶ Ise ma na talup ipuji anggo dapot hita hasil na madear ibagas pangidangion? Ibotoh hita do balosni humbani hata ni si Paulus hubani halak i kuria Korint. Nini do, “Ahu do manuan, si Apollos mangarbahi, tapi Naibata do patubuhkon. Sedo sipanuan atap sipangarbahi na penting, tapi Naibata, na patubuhkon ai do.” (1 Kor. 3:6, 7) Songon si Paulus, anggo dapot hita hasil na madear ibagas pangidangion, maningon Jahowa do na ipuji hita.

17. Halani hita boi rap marhorja pakon Naibata, Jesus, ampa malekat, sonaha hita mangkargai ai?

¹⁷ Sada hasangapon do banta halani boi rap marhorja pakon Jahowa, Jesus, ampa malekat. Sonaha ma hita mangkargai ai? Marusaha ma hita marbarita bani buei halak. Bahat do carani hita boi mangkorjahon ai. Umpamani, boi do hita marbarita ‘i lobei ni halak na mabuei atap hun rumah hu rumah’. (Lah. 20:20) Bahat do homa na rosuh mambere hasaksian na lang resmi. Sanggah jumpah pakon halak na lape itanda, basar do sidea hubani halak ai, janah marusaha mamparsahapkonsi. Anggo ra halak ai mambalosi, ibotoh sidea ma naha carani padaskon barita Harajaon hu bani.

18-19. (a) Sonaha hita boi mangarbahi bonih Harajaon? (b)  Patugah ma sada contoh na patuduhkon sonaha Jahowa mangurupi sada halak na marlajar Bibel.

¹⁸ Halani hita hasoman ‘sahorja ni Naibata’, lang sungkup pitah isaburhon hita bonih Harajaon, tapi porlu do homa iarbahi hita ai. Jadi anggo jumpah hita pakon halak na rosuh manangar, marusaha ma laho manrohi use. Atap, atur ma ase hasomanta na legan manrohi use halak ai janah mamungkah parlajaran  Bibel pakonsi. Tontu malas tumang uhurta sanggah ididah hita sonaha Jahowa mangurupi halak ai mambahen hamubahon ibagas uhur ampa pingkiran.

¹⁹ Pardiateihon ma pangalaman ni si Raphalalani, sahalak datu hinan i Afrika Selatan. Marosuh tumang do ia bani aha na iparlajarisi ibagas Bibel. Tapi sunsah do pangahapni mandalankon sipasingat hun Bibel na mangkatahon anggo hita lang boi manungkun hubani ompung ni ompung. (5 Mus. 18:10-12) Tapi ujungni, ra ma ia iurupi Naibata ase mubah. Lang be gabe datu ia hassi pe pitah ai dassa pansarianni. Sonari domma marumur 60 tahun ia, janah nini do, “Martarima kasih do ahu bani Saksi Jahowa halani domma bahat iurupi sidea ahu. Iurupi do ahu mangindahi horja. Na sipontingan, martarima kasih tumang do ahu bani Jahowa halani iurupi ahu mambahen hamubahon. Sonari domma dihut ahu marbarita janah ididi gabe Saksi Jahowa.”

20. Aha do na sihol bahenonta?

²⁰ Bani artikel on, domma iulas hita ompat sibere-bere na lang boi ididah hita. Na sibanggalan humbani ganupan ai, ai ma parhasomananta pakon Jahowa. Anggo hita marhasoman pakon Jahowa, boi ma hita martonggo hu Bani, anjaha iurupi tonduy na pansing ma hita. Leganni ai, iurupi Jahowa, Jesus, ampa malekat do hita sanggah mangidangi. Tontu sihol do hita lambin mangkargai ganup sibere-bere ai. Anjaha tongtong ma martarima kasih bani Jahowa halani ra Ia gabe hasomanta.