1. Kai si ikataken Jesus kerna erta si lit i surga?

LABO kerina erta banci siidah. Situhuna, erta si mehergana e la teridah. Bas Khotbah i Gunung, ikataken Jesus maka erta i surga ndauh ergan asangken kebayaken ntah pe sen. Sipepulung erta i surga adi siban gelar si mehuli i lebe-lebe Dibata janah rembak kita ras Ia. Ijelasken Jesus maka erta si bage la banci ceda ntah pe itangko kalak. Nina Jesus ka, “Sebap i ja ertandu, i je ka me ukurndu.” (Mat. 6:19-21) Emaka, pasti siusahaken ndatken kai si meherga kel siakap.

2. (a) Menurut 2 Korinti 4:17, 18, kai si isuruh Paulus silakoken? (b) Kai kari sibahas bas artikel enda?

² Isuruh Rasul Paulus kita gelah “siperdiateken kai si la teridah.” (Baca 2 Korinti 4:17, 18.) Kai si la teridah enda termasuk pasu-pasu si banci sinanami pagi bas doni si mbaru. I bas artikel enda sibahas kari empat erta si la teridah e, eme (1) hubungenta ras Dibata, (2) toto, (3) penampat kesah si badia, bage pe (4) penampat arah Jahwe, Jesus, ras malekat-malekat sanga kita erberita. Sibahas ka kari uga carata ngergai erta-erta si la teridah e.

3. Kai nge erta si la teridah si mehergana kel? Janah ngkai maka banci sidat erta e?

³ Erta si la teridah janah si mehergana kel eme hubungenta ras Dibata Jahwe. (Msm. 25:14) Engkai maka Dibata tetap badia aminna pe erteman ras manusia si la sempurna? Perban lit korban tebusen Jesus “si nasapken dosa doni.” (Joh. 1:29) Ope lenga ikorbanken Jesus pe dirina, nggo iteh Jahwe maka Jesus pasti setia seh asa mate, alu bage banci iselamatkenna manusia. E me sebapna maka  manusia si nggeluh ope Kristus mate banci erteman ras Dibata.​—Rom. 3:25.

4. Bereken piga-piga contoh kalak si erteman ras Dibata ope Jesus reh ku doni.

⁴ Ope Jesus reh ku doni, lit piga-piga kalak si jadi teman Dibata. Salah sada contohna eme Abraham, sekalak dilaki si paguh kel kinitekenna. Lebih 1.000 tahun kenca Abraham mate, igelari Jahwe ia “temanKu.” (Jes. 41:8) Enda ertina, adi erteman kita ras Jahwe, tetap nge ianggap Jahwe kita temanNa aminna pe kita nggo mate. Labo pernah ilupaken Jahwe Abraham. (Luk. 20:37, 38) Contoh si deban eme Jop. Sanga pulung kerina malekat i surga, meriah ukur Jahwe ncakapken kerna Jop. Nina Jahwe kerna Jop, “La lit sekalak pe i babo doni si bagi ia patuhna ras ulina. Isembahna Aku janah la lit si jahat ilakokenna.” (Jop 1:6-8) Daniel pe erteman ras Dibata. Kira-kira 80 tahun dekahna, setia ia ngelayani Dibata bas negri kalak si la nembah Dibata. Uga nge perasan Dibata kerna Daniel? Lit telu kali ikataken malekat man Daniel si nggo metua maka “keleng kal ate Dibata” ia. (Dan. 9:23; 10:11, 19) Tek kita maka merhat kel Jahwe mpekeke kerina teman si ikelengiNa si nggo mate.​—Jop 14:15.

5. Kai si arus silakoken gelah banci kita erteman ras Jahwe?

⁵ Asa kai nge buena manusia si la sempurna si erteman ras Jahwe? Lit jutan kalak. Ja nari siteh? Enterem dilaki, diberu, ras anak-anak i belang-belang doni si mbuktiken arah perbahanenna maka kalak e nggit jadi teman Dibata. “Kalak si patuh teman [Jahwe] kap.” (Msm. 25:14) Kalak e kerina banci erteman ras Jahwe perban tek man korban tebusen Jesus. Perban korban tebusen e me maka banci sibaktiken dirita man Jahwe ras iperidiken. Adi silakoken dua keputusen penting e, ersada me kita ras jutan kalak Kristen si nggo iperidiken janah ‘erteman’ ras Dibata si hebatna bas alam semesta enda!

6. Kai buktina siergai hubungenta ras Dibata?

⁶ Kai buktina maka siergai hubungenta ras Dibata? Bali bagi Abraham ras Jop si terus setia man Dibata lebih seratus tahun dekahna, kita pe arus terus setia la soal asa dekahna kita nggo ngelayani Jahwe. Janah bagi Daniel, arus siergai kel hubungenta ras Dibata lebihen asangken geluhta. (Dan. 6:7, 10, 16, 22) Alu penampat Jahwe, banci kita ngasup ngadapi melala tentangen janah terus jadi teman Jahwe.​—Pil. 4:13.

7. (a) Menurut Kuan-kuanen 15:8, uga perasan Jahwe sanga ibegiNa totota? (b) Uga cara Jahwe jawap totota?

⁷ Erta si deban si la teridah eme toto. Kalak si kompak biasana meriah iakapna ncakapken kai si lit bas ukurna bage pe bas pusuhna. Hubungenta ras Jahwe pe bage ka nge. Ngerana Jahwe man banta arah Pustaka, i je iturikenNa kai si lit bas ukurNa bage pe bas pusuhNa. Ngerana kita man Jahwe arah toto, situriken kerina si lit bas ukurta bage pe bas pusuhta. Meriah ukur Jahwe megi totota. (Baca Kuan-kuanen 15:8.) Perban Jahwe e Temanta si perkeleng, labo ngenca ibegikenNa totota tapi ijawapNa ka. Mon-mon, totota mis ijawapNa. Tapi mon-mon, la ka mis ijawapNa, arus terus lebe sitotoken. Amin gia bage, tek kita maka totota e pasti ijawap bas waktu si tepat janah alu cara si mehulina. Tapi  banci saja, jawapen totota e la bagi siarapken. Misalna, sitotoken gelah dung min masalahta, tapi banci saja la mis idungi Jahwe masalahta e. Si iberekenNa eme kepentaren ras gegeh ngenca gelah banci ‘megenggeng kita ngadapisa.’​—1 Kor. 10:13.

8. Kai buktina siergai kel hadiah si meherga eme toto?

⁸ Kai buktina siergai kel hadiah si meherga eme toto? Salah sada carana eme matuhi pedah Pustaka guna ‘terus ertoto.’ (1 Tes. 5:17) Labo ipaksa Jahwe kita ertoto. IergaiNa kebebasenta erban pilihen, janah isuruhNa kita gelah ‘ertoto alu la erngadi-ngadi.’ (Rom. 12:12) Emaka, perlu kita rusur ertoto tiap wari. Alu bage, e bukti maka siergai kel hadiah e. Janah sanga ertoto, ula kita lupa ngata bujur man Jahwe ras muji Ia.​—Msm. 145:2, 3.

9. Uga perasan sekalak turang seninata kerna toto? Janah uga perasanndu kerna si e?

⁹ Reh dekahna kita ngelayani Jahwe janah siidah uga Ia njawap totota, pasti reh bagesna me pengerganta nandangi toto. E me si igejapken turang seninata si gelarna Chris. Ia nggo ngelayani sepenuh waktu sedekah 47 tahun. Nina, “Meriah kel kuakap lampas medak erpagi-pagi gelah banci aku ertoto man Jahwe. Luar biasa kel kuakap ngerana man Jahwe sanga terbit matawari janah embun erpagi-pagi pe mulai teridah. Malem kel ateku. Enda erban tersuruh ukurku ngata bujur man Jahwe kerna kerina hadiah si iberekenNa, termasuk toto. Sada kehamaten kel banci ertoto man baNa. Bas berngi wari, kenca dung ertoto, meriah kel ukurku perban banci aku medem alu tenang janah bersih pusuh peratenku.”

10. Engkai maka arus siergai kesah si badia?

¹⁰ Kesah si badia eme hadiah si debanna si la teridah si arus siergai. Isuruh Jesus kita gelah terus kita ertoto mindo kesah  si badia. (Luk. 11:9, 13) Igunaken Jahwe kesah si badia guna mereken ‘kengasupen si luar biasa’ man banta. (2 Kor. 4:7; Perb. 1:8) Alu penampat kesah si badia, banci kita ngasup ngadapi masalahta.

11. Uga kesah si badia nampati kita?

¹¹ Kesah si badia banci nampati kita ngelakoken tugasta i bas ngelayani Dibata. Kesah si badia pe banci erban kita reh beluhna janah ngasup ndalanken tanggung jawapta selaku kalak Kristen. Emaka, adi sidat hasil si mehuli bas tugas pelayanenta, siteh maka e banci terjadi perban penampat kesah si badia.

12. Menurut Masmur 139:23, 24, kai si banci sitotoken?

¹² Kai buktina siergai kesah si badia? Salah sada carana eme alu mindo man Jahwe gelah isampatiNa kita meteh lit nge perukuren si salah ntah pe sura-sura si salah bas dirita. (Baca Masmur 139:23, 24.) Adi bage sitotoken, isampati Jahwe kita alu kesah si badia gelah siteh lit nge ntah lang perukuren si salah bage pe sura-sura si salah bas dirita. Adi lit, arus kita ertoto mindo kesah si badia gelah ngasup kita ngelawanca. Adi bage silakoken, enda buktina siusahaken kel gelah la silakoken kai pe si banci erban Jahwe Ianai nampati kita alu kesah si badia.​—Ep. 4:30.

13. Kai si banci silakoken gelah reh bagesna pengerganta nandangi kesah si badia?

¹³ Reh bagesna pengerganta nandangi kesah si badia adi siukuri kai saja si nggo ihasilken gundari perban penampat kesah si badia. Ope Jesus nangkih ku surga, ikatakenna man murid-muridna, “Ialoken kena pagi kuasa sanga nusur kesah si badia ku kena, janah kena pagi jadi saksiku . . . seh ku ujung doni.” (Perb. 1:8) Kata-kata e sangana terjadi gundari. Alu penampat kesah si badia, kira-kira waluh setengah juta kalak arah belang-belang doni nggo nembah Jahwe. Selain si e, banci kita erdame janah ersada ras turang seninata perban kesah si badia nampati kita mpebelin sipat-sipat si mehuli bagi  kekelengen, keriahen ukur, kedamen, kesabaren, lias ate, mehuli, kiniteken, lemah lembut, ras ngasup ngkuasai diri. Enda kerina “sipat-sipat si ihasilken kesah si badia.” (Gal. 5:22, 23) Tuhu-tuhu hadiah si meherga kel kesah si badia e!

14. Ise saja si ndukung kita sanga erberita?

¹⁴ Hadiah si meherga si la teridah si debanna eme banci kita “erdahin radu ras” Jahwe, Jesus, ras malekat-malekat. (2 Kor. 6:1) Erdahin kita ras Jahwe sanga kita erberita. Nina Paulus kerna dirina bage pe kerna kalak si ngelakoken pendahin erberita, “Kami kap teman erdahin Dibata.” (1 Kor. 3:9) Sanga kita erberita, kita pe erdahin ras Jesus. Kenca iperentahkenna pengikutna ‘erban kalak i bas kerina bangsa jadi murid-muridna,’ erjanji ia, “Aku tetap ras kena.” (Mat. 28:19, 20) Uga ka kerna malekat-malekat? Ngata bujur kel kita sanga isampati malekat-malekat kita mpeseh “berita si meriah si la ermasap-masap . . . man kerina si tading i doni enda.”​—Ket. 14:6.

15. Ceritaken sada contoh bas Pustaka si mbuktiken maka penting kel penampat Jahwe sanga kita erberita.

¹⁵ Perban sidat penampat bas surga nari, kai nge hasilna? Sanga siamburken benih kebenaren, lit benih e ndabuh bas pusuh si mehuli janah turah. (Mat. 13:18, 23) Ise si erbanca benih e turah janah ngasilken buah? Ijelasken Jesus maka ise pe la banci jadi pengikutna adi la kin “itarik Bapak.” (Joh. 6:44) Bas Pustaka, lit sada contoh kerna si e. Bas sada wari, erberita Paulus man piga-piga diberu i darat kota Pilipi. Perdiateken kai nina Pustaka kerna salah sada arah diberu e si gelarna Lidia, “Ibuka Jahwe ukurna, e maka tutus kel atena megiken kai si ikataken Paulus.” (Perb. 16:13-15) Bagi Lidia, jutan kalak nggo itarik Jahwe.

16. Ise situhuna si erban kita berhasil bas pelayanen?

¹⁶ Ise situhuna si erban kita berhasil bas pelayanen? Ijawap Paulus penungkunen e sanga itulisna surat man runggun i Korinti. Nina, “Aku si nuansa, Apolos si niramsa, tapi Dibata si erbanca turah. Jadi, si nuansa ntah pe si niramsa labo penting, tapi si penting eme Dibata si erbanca turah.” (1 Kor. 3:6, 7) Bagi Paulus, arus lalap siinget maka Jahwe me si erban kita berhasil bas pelayanen.

17. Kai buktina siergai kel kehamaten erdahin ras Dibata, Kristus, ras malekat-malekat?

¹⁷ Sada kehamaten kel banta banci erdahin ras Dibata, Kristus, ras malekat-malekat. Kai buktina maka siergai kel e? Siusahaken asa ngasupta erberita man kerina kalak. Lit melala cara erberita, misalna erberita bas ingan si nterem jelma bage pe arah rumah ku rumah. (Perb. 20:20) Enterem ka turang seninata meriah akapna erberita alu la resmi. Sanga jumpa ras kalak, iperkuankenna kalak e janah iusahakenna ercakap-cakap. Adi lit idahna minat kalak e, ipesehna me berita si meriah kerna Kerajan Dibata.

18-19. (a) Uga carata niram benih kebenaren? (b) Ceritaken sada pengalamen si mbuktiken isampati Jahwe kalak si erlajar Pustaka.

¹⁸ Selaku “teman erdahin Dibata,” tugasta labo ngenca nuan benih kebenaren, tapi arus ka sisiram. Emaka, adi lit kalak si ncidahken minat, arus siusahaken ndahi ia mulihi. Ntah pe, banci siaturken gelah perberita si deban si ndahi ia. Tujunta ndahi mulihi eme gelah simulai pelajaren Pustaka. Kenca kalak e mulai erlajar,  banci siidah uga Jahwe nampati ia ngubah pusuh ras perukurenna. Enda pasti erban meriah kel ukurta.

¹⁹ Perdiateken pengalamen sekalak turang seninata si gelarna Raphalalani i Afrika Selatan. Mbarenda ia sekalak dukun. Kenca ia erlajar Pustaka, meriah akapna nandangi kai si ipelajarina e. Tapi kenca itehna kai nina Pustaka kerna ngerana ras kalak si nggo mate, mesera iakapna ngaloken ajaren e. (Ul. 18:10-12) Bas pudi wari, mulai iubahna carana rukur, isesuaikenna ras kai si ngena ate Dibata. Dungna, ngadi ia jadi dukun aminna pe e ngenca pendahinna. Gundari umurna nggo 60 tahun. Nina, “Ngata bujur kel aku perban nggo melala kel aku isampati Saksi-Saksi Jahwe. Misalna isampatina aku ndarami dahin. Tapi khususna, ngata bujur kel aku man Jahwe perban nggo isampatiNa aku ngubah geluhku. Alu penampatNa, banci aku iperidiken janah gundari banci aku ikut erberita.”

20. Kai atendu si terus iusahakenndu?

²⁰ Bas artikel enda, nggo sibahas empat erta si la teridah. Erta si mehergana eme rembak ras Jahwe. Sada kehamaten kel e banta! Perban rembak ras Jahwe, banci sidat erta si debanna eme banci ertoto man Jahwe, dat penampat kesah si badia, janah kerja sama ras Dibata, Jesus, bage pe malekat-malekat. Pasti siusahaken kel gelah reh bagesna pengerganta nandangi kerina erta si la teridah e. Pasti terus ateta ngata bujur man Jahwe perban Ia kap Temanta si mehulina.