1. Weh Jeezas mi seh bowt richiz eena hevn?

DA NOH aala di gif dehn da tingz weh yu ku si. Az a mata a fak, di moas preshos gif da di wan dehn weh yu kyaahn si. Eena di Sermon pahn di Mongt, Jeezas mi taak bowt richiz weh deh da hevn weh faar beta dan moni ahn mateeryal tingz. Hihn mi aalso seh: “Eniway wehpaa unu richiz deh, da rait deh unu haat wahn deh tu.” (Mach. 6:19-21) Wen wi luk pahn tingz ahn geh fi apreeshiayt dehn, fi shoar wi wahn waahn chrai get dehn. Wi wahn sayv op “richiz eena hevn” wen wi ga wahn gud repyutayshan ahn wi noa Gaad pleez wid wi. Jeezas mi eksplayn dat dehnya richiz ku neva geh dischrai ahn nobadi kyaahn teef dehn.

2. (a) Akaadn tu 2 Korintyanz 4:17, 18, weh Paal inkorij wi fi foakos pan? (b) Weh wi wahn diskos eena dis aatikl?

² Di apasl Paal inkorij wi fi “set wi haat pahn dehn ting weh wi kyaahn si.” (Reed 2 Korintyanz 4:17, 18.) Di tingz weh wi kyaahn si da chrezhaz weh inklood di blesinz weh wi wahn injai eena Gaad nyoo werl. Eena dis aatikl wi wahn laan bowt foa gif weh wi kyaahn si ahn weh wi ku ga rait now—frenship wid Gaad, pryaa, di help a Gaad hoali spirit, ahn di sopoat weh Jehoava, Jeezas ahn di aynjelz gi wi eena di minischri. Wi wahn aalso laan bowt weh wi haftu du fi shoa Jehoava dat wi tankful fi di chrezhaz weh wi kyaahn si.

3. Wat da di graytis chrezha weh wi kyaahn si, ahn how wi ku get da chrezha?

³ Di graytis chrezha weh wi kyaahn si da wi frenship wid  Jehoava Gaad. (Ps. 25:14) Weh mek it pasabl fi mek Gaad bee frenz wid hyoomanz weh noh perfek eevn doa hihn stay kompleetli hoali? Dis pasabl bikaaz a di ransom sakrifais a Jeezas, weh “tek weh di powa weh sin ga oava di peepl dehn a di hoal werl.” (Jan 1:29) Jehoava mi noa heda taim dat ih perpos fi sen Jeezas az wahn ransom sakrifais mi wahn ga sokses. Dat da wai Gaad ku bee frenz wid hyoomanz hoo mi liv bifoa Jeezas ded.—Roam. 3:25.

4. Gi sohn egzampl a peepl weh mi liv bifoa Jeezas ahn weh mi geh fi bee Gaad fren.

⁴ Kansida di egzampl a sohn peepl weh mi liv bifoa Jeezas, hoo mi geh fi bee Gaad fren. Aybraham da-mi wahn man weh mi ga reeli schrang fayt. Oava 1,000 yaaz afta Aybraham mi ded, Jehoava mi stil kaal ahn ih fren. (Isa. 41:8) Soh dis meenz dat eevn afta peepl ded, Jehoava stil kansida dehn fi bee ih kloas frenz. Aybraham stil alaiv eena Jehoava memri. (Look 20:37, 38) Wahn nada egzampl da Joab. Fronta aala di aynjelz, Jehoava mi ga kanfidens fi kaal Joab “wahn raichos ahn laayal man weh fyaa Gaad ahn ton weh fahn weh bad.” (Job 1:6-8) Danyel mi faytful wail ih mi-di serv Jehoava fi bowt 80 yaaz eena wahn lan wehpaat peepl neva wership Jehoava. How Jehoava mi feel bowt hihn? Chree taimz di aynjel dehn mi rimain ahn dat hihn mi “veri preshos” tu Gaad. (Dan. 9:23; 10:11, 19) Wi ku bee shoar Jehoava wahn rezorek ih frenz weh ih lov.—Job 14:15.

5. Weh yu need fi du fi injai wahn kloas frenship wid Jehoava?

⁵ Humoch peepl weh noh perfek injai wahn kloas frenship wid Jehoava? Tudeh day, milyanz a peepl ga wahn kloas frenship wid Jehoava. Wahn lata man, uman, ahn pikni aal oava di werl shoa dat dehn da reeli Gaad fren bai di tingz weh dehn du. Jehoava “da kloas fren wid di raichos persn.” (Prov. 3:32) Dehn ku bee Gaad frenz bikaaz dehn ga fayt eena Jeezas ransom sakrifais. Bikaaz a dis ransom sakrifais, wi ku bee Jehoava fren ahn wi ku dedikayt wi laif tu ahn, an geh baptaiz. Wen wi du dehnya impoatant tingz, wi geh fi injai wahn “kloas frenship” wid di moas preshos Persn eena di yoonivers, jos laik milyanz a dedikaytid, baptaiz Kristyanz!

6. How wi ku shoa dat wi apreeshiayt Gaad frenship?

⁶ How wi ku shoa dat wi apreeshiayt Gaad frenship? Jos laik Aybraham ahn Joab weh mi stay faytful tu Gaad, wee need fi stay faytful tu. Noh mata how lang wi di serv Jehoava eena dis oal sistem wi need fi stay faytful tu di en. Jos laik Danyel, wi frenship wid Jehoava haftu bee moa impoatant dan wi laif. (Dan. 6:7, 10, 16, 22) Wid Jehoava help, wee ku bayr op anda eni chraiyal soh dat wi ku kip wahn kloas frenship wid ahn.—Fil. 4:13.

7. (a) Akaadn tu Proverbs 15:8, how Jehoava feel bowt wi pryaaz? (b) How Jehoava ansa wi pryaaz?

⁷ Wahn nada chrezha weh wi kyaahn si da pryaa. Peepl hoo da kloas frenz laik taak tu wan anada bowt weh dehn di tink ahn how dehn di feel. Da rait soh ih fi bee wid wi frenship wid Jehoava! Jehoava taak tu wi chroo ih Werd di Baibl, an ih tel wi weh hihn tink ahn how hihn feel. Wee taak tu ahn wen wi pray, ahn wi tel ahn weh wi tink bowt ahn how wi  feel. Jehoava injai fi lisn tu wi pryaaz. (Reed Proverbs 15:8.) * Az wahn lovin Fren, Jehoava noh onli lisn tu wi pryaaz bot ih aalso ansa dehn. Som a wi pryaaz Jehoava ansa rait away. Bot sohn ada taimz wi mait haftu kip di pray bowt di mata. Stil, wi ku bee shoar dat di ansa wahn kohn da di karek taim an eena di bes way. Af koars, di way how Gaad ansa wi pryaaz mait bee difrent fahn how wi mi ekspek. Fi egzampl, rada dan get rid a wi prablemz, ih mait gi wi di wizdom ahn di schrent ahn ‘shoa wi wahn way owta it.’—1 Kor. 10:13.

8. How wi ku shoa dat wi apreeshiayt pryaa?

⁸ How wi ku shoa dat wi apreeshiayt pryaa? Wi shoa dat wi apreeshiayt pryaa wen wi “neva stap pray.” (1 Tes. 5:17) Jehoava noh foas wi fi pray. Insted, hihn rispek dat wi ga free wil ahn hihn inkorij wi fi “pray aal di taim.” (Roam. 12:12) Soh wi ku shoa wi apreeshiayshan wen wi pray aal chroo di day. Af koars, wi noh fi ferget fi tank ahn prayz Jehoava wen wi di pray.—Ps. 145:2, 3.

9. How wahn brada feel bowt pryaa, ahn how yoo feel bowt it?

⁹ Di langa wi serv Jehoava ahn wi si how hihn ansa wi pryaaz, di moa wi wahn geh fi apreeshiayt dis gif weh Jehoava gi wi. Fi egzampl, wahn brada weh naym Chris deh eena ful-taim servis fi bowt 47 yaaz now. Ih seh, “Ah reeli injai fi wayk op erli da maanin fi pray tu Jehoava. Da wahn wandaful ekspeeryens fi taak tu Jehoava az di son kom op wen evriting reeli byootiful! Dis mek Ah tank Jehoava fi aal di gif weh ih gi mi, inkloodin di privilij a pryaa. Den da di en a di day Ah pray an Ah ku goh sleep wid wahn kleen kanshans.”

10. Wai wi fi apreeshiayt Gaad hoali spirit?

¹⁰ Gaad hoali spirit da wahn nada gif weh wi kyaahn si ahn weh wi shuda chrezha. Jeezas inkorij wi fi kip aan di pray fi  hoali spirit. (Look 11:9, 13) Jehoava yooz ih hoali spirit fi gi wi di “reel grayt powa.” (2 Kor. 4:7; Aks 1:8) Wid di help a Gaad hoali spirit, wi ku bayr op anda eni chraiyal weh wi fays.

11. How hoali spirit ku help wi?

¹¹ Hoali spirit ku help wi handl wi asainment eena Gaad servis. Gaad hoali spirit ku mek wi ga eevn beta skilz. Wi noa dat di gud rizolts weh wi ga eena Gaad servis onli pasabl bikaaz ih hoali spirit help wi.

12. Akaadn tu Psalm 139:23, 24, weh wi ku pray fa fi mek hoali spirit help wi wid?

¹² Wahn nada way how wi ku shoa dat Gaad hoali spirit preshos tu wi da wen wi aks Jehoava fi mek ih help wi fain owt if wi ga rang tinkin er rang dizaiyaz eena wi haat. (Reed Psalm 139:23, 24.) * If wi pray fi dis, Jehoava ku yooz ih hoali spirit fi help wi noa if wi ga eni rang dizaiyaz. An if wi fain owt dat wi ga eni rang tinkin er rang dizaiya, wi haftu pray fi Gaad hoali spirit fi mek ih gi wi ih schrent fi noh giv een tu dehndeh tinkin ahn dizaiyaz. If wi du dis, Jehoava wahn si dat wi noh waahn du eniting weh ku kaaz ahn fi stap help wi wid ih hoali spirit.—Ifee. 4:30.

13. How wi ku schrentn wi apreeshiayshan fi hoali spirit?

¹³ Wi ku schrentn wi apreeshiayshan fi hoali spirit wen wi tink bowt weh ih du eena fi wee taimz. Bifoa Jeezas mi gaahn da hevn, hihn tel ih disaipl dehn: “Wen di Hoali Spirit kohn pahn unu, unu wahn geh lata powa, ahn unu wahn ku goh aal bowt di plays di tel peepl bowt mee . . . aal oava di werl.” (Aks 1:8) Dis da egzakli weh di hapm tudeh day. Eena fi wee taimz, bowt ayt an a haaf milyan peepl fahn rong di werl di serv Jehoava wid di help a ih hoali spirit. Wi aalso injai wahn spirichwal paradais bikaaz Gaad hoali spirit help wi fi divelop wandaful kwalitiz laik lov, jai, pees, payshens, kainis, gudnis, fayt, wahn jentl haat, ahn  self-kanchroal; dehnya kwalitiz mek op di froot a Gaad hoali spirit. (Gal. 5:22, 23) Hoali spirit da wahn preshos gif fi chroo!

14. Weh sopoat wi get eena di minischri?

¹⁴ Wi ga di preshos gif fi “werk tugeda” wid Jehoava, Jeezas ahn di aynjelz. (2 Kor. 6:1) Wi du dis wen wi tek paat eena di preechin werk. Paal mi seh dat hihn an adaz weh help owt eena di preechin werk da “paadna weh di werk tugeda fi Gaad.” (1 Kor. 3:9) Wen wi deh owt eena di minischri, wi geh fi werk lang wid Jeezas. Memba dat afta Jeezas mi koman ih falowaz fi ‘chrayn peepl fahn owta aala di nayshan dehn fi bee fi hihn disaipl dehn,’ hihn mi seh: “Ah wahn aalwayz deh wid unu.” (Mach. 28:19, 20) Ahn how bowt di aynjelz? Wi veri tankful dat di aynjelz gaid wi wen wi “tel di peepl weh liv eena di werl di Gud Nyooz weh wahn laas fareva ahn eva”!—Rev. 14:6.

15. Yooz wahn Baibl egzampl weh shoa di impoatant roal weh Jehoava play eena wi minischri.

¹⁵ How di sopoat weh wi geh fahn Jehoava, Jeezas ahn di aynjelz help wi fi finish di werk weh wi ga fi du? Wen wi soa di Kingdom mesij, som a di seed dehn geh plaant eena haat weh gud ahn dehn staat groa. (Mach. 13:18, 23) Hoo mek dehnya seed a chroot groa ahn projoos lata froot? Jeezas mi seh: “Nobadi kyaahn kohn tu mee, eksep di Faada weh sen mi jraa dehn mek dehn kohn.” (Jan 6:44) Di Baibl gi wi spesifik egzampl a dis. Memba wen Paal mi preech tu wahn groop a uman owtsaida di siti a Filipai. Noatis weh di Baibl seh bowt wahn uman weh naym Lidya. Jehoava mi “oapm fi shee haat waid fi mek shee pay atenshan tu di tingz weh Paal preech.” (Aks 16:13-15) Jehoava jraa milyanz a peepl laik Lidya fi bee fi hihn fren.

16. Hoo shuda geh di prayz fi eni sokses weh wi gat eena di minischri?

¹⁶ Hoo shuda geh di prayz fi eni sokses weh wi gat eena di minischri? Paal mi ansa da kweschan wen ih mi rait dehnya werdz bowt di kangrigayshan da Korint: “Ai mi plaant di seed eena unu haat ahn Apolos waata it, bot Gaad da di Wan weh mek di plaant groa. Soh den, di wan weh plaant di seed ahn di wan weh waata it, dehn da noh notn. Gaad da di oanli wan weh konk, kaa da hihn mek di plaant dehn groa.” (1 Kor. 3:6, 7) Jos laik Paal, wi shuda aalwayz gi di aana tu Jehoava fi eni sokses weh wi gat eena di minischri.

17. How wi ku shoa dat wi apreeshiayt di privilij fi “werk tugeda” wid Gaad, Krais, ahn di aynjelz?

¹⁷ How wi ku shoa dat wi apreeshiayt di privilij weh wi ga fi “werk tugeda” wid Gaad, Krais, ahn di aynjelz? Wi ku du dis wen wi du evriting weh wi kud fi tel adaz bowt di gud nyooz. Dehn ga wahn lata wayz how wi ku du dis, laik fi preech ‘eena poblik er fahn hows tu hows.’ (Aks 20:20) Wahn lata peepl aalso injai infaamal witnisin. Wen dehn wuda meet wahn schraynja, dehn wuda hayl dehn ahn chrai staat op wahn kanvasayshan wid dehn. If di persn wilin fi taak, dehn chrai dehn bes fi inklood di gud nyooz a di Kingdom eena dehn kanvasayshan.

18-19. (a) How wi waata di seed a chroot? (b) Yooz di egzampl eena di paragraaf fi shoa how Jehoava mi help wahn Baibl styoodent.

¹⁸ Az peepl weh di “werk tugeda wid Gaad,” wi noh onli soa seed a chroot bot wi fi waata dehn tu. Wen sombadi shoa  inchres, wi waahn du wi bes fi goh bak ahn taak tu di persn er fain sombadi els fi goh bak ahn taak tu dehn ahn chrai staat wahn Baibl stodi. Wi hapi wen wi si how Jehoava help di Baibl styoodent fi chaynj di way ih tink ahn feel.

¹⁹ Kansida Raphalalani egzampl, wahn wich dakta fahn South Africa. Hihn lov weh hihn mi-di laan fan ih Baibl stodi. Bot ih mi haad fi mek hihn aksep weh di Baibl seh bowt kamyoonikayshan wid ded peepl. (Deut. 18:10-12) Az taim paas, hihn mi alow Gaad fi chaynj ih tinkin. Afta wahn wail, hihn mi stap werk az wahn wich dakta, eevn doa dis da-mi di onli way how ih mi-di mek wahn livin. Raphalalani, hoo 60 yaaz oal, seh: “Ah reeli tank Jehoava Witnisiz bikaaz dehn help mi eena wahn lata wayz, laik fi help mi fain wahn jab. Moas impoatant, Ah reeli tank Jehoava fi help mi mek chaynjiz eena mi laif, soh dat now Ah ku help eena di preechin werk az wahn baptaiz Witnis.”

20. Weh yoo mek op yu main fi du?

²⁰ Eena dis aatikl, wi diskos foa chrezhaz weh wi kyaahn si. Di moas impoatant wan da di privilij fi ga Jehoava az wi kloasis fren. Wen wi geh fi bee kloas fren wid Jehoava, wi ku benifit fahn di ada chrezhaz weh wi kyaahn si, laik pryaa, hoali spirit, ahn di privilij fi ga Jehoava, Jeezas ahn di aynjelz di sopoat wi minischri. Mek wi mek op wi main fi ga moa apreeshiayshan fi dehnya chrezhaz weh wi kyaahn si. Ahn mek wi neva stap tank Jehoava fi bee wahn wandaful fren.