1. Cosa ya habla si Jesus acerca con el maga riqueza na cielo?

GENDEH todo riqueza ta puede kita mira. Gane, gendeh puede mira con el de con todo precioso riqueza. Na Sermon de Jesus na Monte, ya menciona le acerca el maga riqueza na cielo que mas valoroso contra na maga material cosas. Despues, ele ya habla: “Si donde el de ustedes maga riqueza, talli tamen el de ustedes maga corazon.” (Mat. 6:19-21) El diaton corazon hay manda move kanaton para pricura saca con el maga cosa que importante kanaton. Ta ajunta kita “maga riqueza na cielo” si ta pricura kita tiene buen reputacion con Dios. Si Jesus ya habla que gendeh puede destroza o ruba con ese maga riqueza.

2. (a) Asegun na 2 Corinto 4:17, 18, cosa si Pablo ta anima kanaton que hace? (b) Cosa kita considera na este articulo?

² Si apostol Pablo ya anima kanaton que man “lingasa . . . con el maga cosa-cosa que gendeh ta puede mira.” (Le con el 2 Corinto 4:17, 18.) Incluido na maga riqueza que gendeh kita ta puede mira amo el maga bendicion que hay ricibi kita na nuevo mundo del Dios. Hay examina kita na este articulo con el cuatro riqueza que ta beneficia ya kita ahora pa lang​—el buen amistad con Dios, el regalo de rezo, el ayuda del sagrao espiritu del Dios y el suporta na ministerio que estaba na cielo. Hay considera tambien kita si paquemodo kita dale mira apresacion con este maga riqueza que gendeh kita ta puede mira.

3. Cosa el de con todo precioso riqueza que gendeh kita ta puede mira y cosa el ya hace posible para tiene kita este?

³ El de con todo precioso riqueza que gendeh kita ta puede mira amo el diaton buen amistad con Dios Jehova. (Sal. 25:14) Paquemodo ya queda posible con Dios que man amigo na maga imperfecto gente y esta siempre sagrao? Ya queda se posible por causa del rescate de Jesus que “ta quita el pecado del mundo.” (Juan 1:29) Sabe si Jehova adelantao que gendeh gayot falla el de suyu proposito que salva con el maga gente. Amo se el razon si porque el Dios ya puede queda amigo del maga gente quien ya vivi antes ya muri el Cristo.​—Roma 3:25.

4. Dale cuanto ejemplo del maga gente quien ya vivi antes llega si Jesus y ya queda amigo del Dios.

⁴ Considera con el cuanto gente quien ya queda amigo del Dios. Si Abraham amo un gente quien ya dale mira bien grande fe. Mas de 1,000 año despues muri si Abraham, si Jehova ya llama con ele “el de mio amigo.” (Isa. 41:8) Poreso, maskin el muerte gendeh puede separta con Jehova na de suyu maga amigo. Vivo siempre si Abraham na memoria de Jehova. (Luc. 20:37, 38) El otro ejemplo amo si Job. Cuando el maga angel yan junto-junto na cielo, si Jehova con confianza ya habla que si Job, “un gente de integridad quien tiene miedo con Dios y ta desaleja na cosas malo.” (Job 1:6-8) Y cosa el mirada de Jehova con Daniel, quien fiel ya sirvi con Dios maga 80 año na un pagano nacion? El maga angel tres beses ya asigura con Daniel que ele “bien precioso” con Dios. (Dan. 9:23; 10:11, 19) Puede kita asigura que si Jehova bien quierre resucita con el de suyu maga amigo quien ya muri.​—Job 14:15.

5. Cosa kita debe hace para tiene buen amistad con Jehova?

⁵ Ahora, millones de gente el tiene buen amistad con Jehova. Sabe se kita cay bien manada hombre, mujer y bata na entero mundo el ta dale prueba por medio del diila conducta que quierre sila queda amigo del Dios. Si Jehova tiene “buen amistad con el maga recto.” (Prov. 3:32) Ya queda este posible por causa na diila fe na rescate de Jesus. Por causa tambien con ese, puede kita dedica diaton vida con Jehova y bautiza. Si hace kita con ese importante maga cosas, puede kita man junto con el millones maga dedicao y bautizao Cristiano quien tiene “buen amistad” con el de con todo importante Persona na universo.

6. Paquemodo kita dale mira que valoroso kanaton el diaton buen amistad con Dios?

⁶ Paquemodo kita dale mira que valoroso kanaton el diaton buen amistad con Dios? Igual con Abraham y Job quien ya esta fiel con Dios por mas de cien año, debe tambien kita esta fiel maskin paquemodo de tarda ya kita ta sirvi con Jehova na este daan sistema. Igual con Daniel, debe mas valoroso kanaton el diaton buen amistad con Dios contra con el diaton vida. (Dan. 6:7, 10, 16, 22) Na ayuda de Jehova, puede kita aguanta con el maskin cosa probanza kita enfrenta y mentena el diaton buen amistad con ele.​—Fil. 4:13, NWT.

7. (a) Asegun na Proverbio 15:8, cosa ta sinti si Jehova acerca na diaton maga rezo? (b) Paquemodo si Jehova ta contesta con el diaton maga rezo?

⁷ El otro riqueza que gendeh kita ta puede mira amo el rezo. El maga man amigo alegre man cuento na uno y otro acerca si cosa sila ta pensa y ta sinti. Ansina ba tambien el diaton amistad con Jehova? Si! Si Jehova ta  converza kanaton por medio na de suyu Palabra y ta revela le kanaton si cosa le ta pensa y ta sinti. Tan cuento kita con ele na rezo y ta habla kita con ele si cosa gayot kita ta pensa y ta sinti. Alegre oi si Jehova con el diaton maga rezo. (Le con el Proverbio 15:8.) Como un amable Amigo, si Jehova gendeh lang basta ta oi con el diaton maga rezo, sino ta contesta tambien le con ese. Tiene vez, ta llega dayun el contestacion. Pero tiene vez, necesita kita continua reza acerca con ese. Maskin pa ansina, puede kita confia que hay contesta le na justo tiempo y na de con todo buen manera. Posible, otro el contestacion del Dios na cosa kita ta expecta. Por ejemplo, en vez de quita con el diaton problema, posible le dale kanaton el sabeduria y “fuerza para aguanta.”​—1 Cor. 10:13.

8. Paquemodo kita dale mira que ta aprecia kita con el regalo de rezo?

⁸ Paquemodo kita dale mira con el diaton apresacion con este precioso regalo de rezo? El un manera amo si sigui kita con el consejo de Jehova que “reza firmi.” (1 Tes. 5:17) Si Jehova gendeh kanaton ta forza reza. Sino, ta respeta le con el diaton libertad y ta anima kanaton que continua reza. (Roma 12:12) Poreso, puede kita dale mira con el diaton apresacion si manada beses kita ta reza cada dia. Siempre, debe tambien kita rindi gracias y alaba con Jehova na diaton maga rezo.​—Sal. 145:2, 3.

9. Cosa ta sinti el un hermano acerca na rezo y cosa tambien tu ta sinti acerca con ese?

⁹ Si ya dura ya kita ta sirvi con Jehova y ya experiencia si paquemodo le ta contesta con el diaton maga rezo, mas hondo debe queda el diaton apresacion na rezo. Nota por ejemplo con Chris, un hermano quien 47 año ya ta sirvi full-time. “Alegre yo dispierta temprano cada aga para reza con Jehova,” ele ya habla. “Bien bale gayot converza con Jehova mientras silencio pa y mira ta subi el sol. Ese ta manda move conmigo para rindi gracias con ele con el todo regalo que ya dale le, incluido ya el privilegio de rezo. Y despues yo reza cada denoche, puede yo durmi que tiene limpio conciencia.”

10. Porque kita debe aprecia con el sagrao espiritu del Dios?

¹⁰ El activo fuerza del Dios amo el otro regalo que debe kita aprecia. Ya anima kanaton si Jesus que continua reza para na sagrao espiritu. (Luc. 11:9, 13) Por medio na sagrao espiritu de Jehova, ta dale le kanaton el “grande poder.” (2 Cor. 4:7; Act. 1:8) Na ayuda del espiritu del Dios, puede kita enfrenta maskin cosa probanza.

11. Na cosa manera ta ayuda kanaton el sagrao espiritu?

¹¹ El sagrao espiritu puede ayuda kanaton para hace con el diaton assignment na servicio con Dios. Puede progresa el diaton talento y abilidad por causa na espiritu del Dios. Sabe kita que ta tiene lang kita buen resulta na servicio con Dios cay ta ayuda kanaton el de suyu espiritu.

12. Asegun na Salmo 139:23, 24, cosa kita puede pidi na rezo?

¹² El otro manera que puede kita dale mira que ta aprecia kita con el sagrao espiritu del Dios amo si reza kita que ayuda kanaton examina si tiene ba kita mal pensamiento o deseo na diaton corazon. (Le con el Salmo 139:23, 24.) Si hace kita se, puede kanaton manda sabe si Jehova por medio na de suyu espiritu con el maga mal pensamiento o deseo que tiene kita. Y si ya puede kita realiza que tiene kita mal pensamiento o deseo, debe kita reza con Jehova para na sagrao espiritu que ayuda kanaton resisti con ese mal inclinacion. Si hace kita se, ta dale kita mira que determinao kita evita hace maskin cosa que causa con Jehova para gendeh mas dale kanaton sagrao espiritu.​—Ef. 4:30.

13. Paquemodo kita hace mas hondo con el diaton apresacion na sagrao espiritu?

¹³ Puede kita hace mas hondo con el diaton apresacion na sagrao espiritu si medita kita si cosa este ya puede cumpli na diaton tiempo ahora. Antes si Jesus subi na cielo, ele ya habla con el de suyu maga dicipulo: “Cuando el Espiritu Santo [“sagrao espiritu,” NWT] ay anda con ustedes, ay recivi ustedes el disuyo poder y ay queda ustedes dimio maga testigo . . . hasta na fin del Mundo.” (Act. 1:8) Amo  se el cosa ta sucede ahora. Na ayuda del sagrao espiritu, mas de 8.6 millon gente na entero mundo el ya queda siervo de Jehova. Unido tambien kita cay el espiritu del Dios ta ayuda kanaton para cultiva maga bonito calidad, igual na amor, alegria, paz, paciencia, hacida de bueno con otro, pagka-bueno, fe, pagka-calmao y control na cuerpo. Este maga calidad amo el “maga fruta del Espiritu.” (Gal. 5:22, 23) Un bien precioso regalo gayot el sagrao espiritu!

14. Quien el ta ayuda kanaton si ta participa kita na ministerio?

¹⁴ El otro riqueza que gendeh kita ta puede mira amo el diaton privilegio que “trabaja junto” con Jehova y con aquellos parte del de suyu organizacion na cielo. (2 Cor. 6:1) Ta trabaja kita junto kanila si talli kita na ministerio. Si Pablo ya habla acerca con el de suyu mismo cuerpo y con aquellos quien ta participa na este trabajo: “Came ta trabaja junto con Dios.” (1 Cor. 3:9, El Nuevo Testamento) Si ta participa kita na ministerio, ta trabaja tambien kita junto con Jesus. Acorda que despues si Jesus manda con el de suyu maga siguidores que “hace maga dicipulo con todo el maga gente,” ele ya habla: “Esta yo junto con ustedes.” (Mat. 28:19, 20) Y quetal el maga angel? Un bendicion gayot que ta guia kanaton el maga angel mientras ta predica kita con el “buen noticia . . . con todo el maga viviente na mundo.”​—Rev. 14:6.

15. Dale un ejemplo estaba na Biblia que ta dale mira si cosa ta hace si Jehova na diaton ministerio.

¹⁵ Cosa kita ta puede cumpli por causa na ayuda que ta ricibi kita estaba na cielo? Mientras ta siembra kita con el mensaje del Reino, el cuanto del maga similla ta guinda con aquellos quien tiene justo condicion de corazon y este ta crici. (Mat. 13:18, 23) Quien el ta hace crici con el similla de verdad y ta causa con este para progresa? Si Jesus ya habla que nuay ni uno el quien puede queda de suyu siguidores si gendeh ‘hala con ele el Tata.’ (Juan 6:44) El Biblia ya dale un especifico ejemplo de este. Acorda con el tiempo cuando si Pablo ya predica na un grupo de maga mujer apuera na ciudad del Filipo. Nota si cosa ya habla el Biblia acerca con el un mujer que si Lidia: “El Señor ya abri su corazon para acepta el cosa si Pablo ta habla.” (Act. 16:13-15) Igual con Lidia, millones tambien ahora el quien ya guia si Jehova na de suyu organizacion.

16. Quien debe ricibi con el alabanza na buen resulta que ya tiene kita na ministerio?

¹⁶ Quien debe ricibi con el alabanza na maga buen resulta que ya tiene kita na ministerio? Si Pablo ya contesta con ese pregunta cuando ya escribi le con este maga palabra acerca na congregacion na Corinto: “Yo ya siembra el similla y si Apolo ya rega el siembra, pero el Dios amo el quien ya hace crici con ese. Por eso, . . . el Dios lang el importante gayot, cay Ele amo el ta hace con el siembra crici.” (1 Cor. 3:6, 7) Igual con Pablo, debe kita dale pirmi con Jehova el alabanza na todo buen resulta que ya tiene kita na ministerio.

17. Paquemodo kita dale mira con el diaton apresacion na diaton privilegio que “trabaja junto” con Dios, con el Cristo y con el maga angel?

¹⁷ Paquemodo kita dale mira con el diaton apresacion na diaton privilegio que “trabaja junto” con Dios, con el Cristo y con el maga angel? Puede se kita hace si hace kita el todo lo que puede para predica con el buen noticia con otro. Tiene manada manera para hace con ese, igual na predicacion “na publico  y na maga casa.” (Act. 20:20) Manada tambien el alegre man informal witnessing. Si ta puede sila conoce otro persona, tan greet sila con ele y ta pricura principia man cuento. Si quierre man cuento el persona, con respeto sila ta introduci con el mensaje del Reino.

18-19. (a) Paquemodo kita ta rega con el similla de verdad? (b) Relata un experiencia que ta dale mira si paquemodo si Jehova ya ayuda con el un Bible study.

¹⁸ Como maga quien “ta trabaja junto con Dios,” gendeh lang kita debe siembra maga similla de verdad sino rega tambien con ese. Si interesao el un persona, ta pricura kita hace el todo para bira con ele otravez o hace manera para tiene quien puede visita con ele y principia Bible study. Alegre kita mira que ta ayuda si Jehova con el Bible study para cambia con el manera le ta pensa y ta sinti.

¹⁹ Considera con el ejemplo de Raphalalani que un surujano na South Africa. Ya gusta gayot le con el cosa le ya aprende na Biblia. Pero yan dificil le acepta con el cosa ta habla el Palabra del Dios acerca na comunicacion na maga familia que ya muri ya. (Deut. 18:10-12) Hinay-hinay, ya permiti le con Dios que cambia con el de suyu pensamiento. Ya llega el tiempo, ya descanza le na de suyu trabajo como un surujano maskin pa amo lang este el de suyu lavida. Si Raphalalani, quien 60 año ya ahora, ya habla: “Ta rindi gayot yo gracias na maga Testigo de Jehova na diila maga ayuda. Ya ayuda sila conmigo busca trabajo. Y mas pa, ta rindi gayot yo gracias con Jehova cay ya ayuda le conmigo hace maga cambio na de mio vida para puede yo participa na ministerio como un bautizao Witness.”

20. Cosa tu determinao hace?

²⁰ Na este articulo, ya considera kita con el cuatro riqueza que gendeh kita ta puede mira. El de con todo precioso amo el diaton buen amistad con Jehova. Por causa con ese, ta beneficia tambien kita con el otro riqueza​—el rezo, el sagrao espiritu y el suporta na diaton ministerio estaba na cielo. Ojala queda kita determinao que mas hace hondo con el diaton apresacion na este maga riqueza. Y ojala gendeh kita descanza rindi gracias con el diaton bien bueno Amigo, si Jehova.