1. Unsay giingon ni Jesus bahin sa langitnong mga bahandi?

DILI tanang bahandi makita. Gani, ang labing bililhong mga bahandi dili makita. Sa Wali sa Bukid, gihisgotan ni Jesus ang langitnong mga bahandi nga mas bililhon kay sa materyal nga mga butang. Dayon, siya midugang: “Kon asa ang imong bahandi, atua usab ang imong kasingkasing.” (Mat. 6:19-21) Kon giisip nato nga bililhon kaayo ang usa ka butang, maningkamot gyod ta nga mabatonan kana. Kita magtigom ug “mga bahandi sa langit” pinaagi sa pagpaningkamot nga makabaton ug maayong ngalan, o baroganan, atubangan sa Diyos. Matod ni Jesus, kini nga mga bahandi dili gyod madaot o makawat.

2. (a) Sumala sa 2 Corinto 4:17, 18, unsay giawhag kanato ni Pablo? (b) Unsay atong hisgotan niining artikuloha?

² Si apostol Pablo nag-awhag kanato nga ‘itutok ang atong mga mata sa mga butang nga dili makita.’ (Basaha ang 2 Corinto 4:17, 18.) Apil niining mga butang o bahandi nga dili makita ang mga panalangin nga atong matagamtam sa bag-ong kalibotan sa Diyos. Niining artikuloha, atong susihon ang upat ka dili makitang bahandi nga atong mabatonan karon​—ang pagpakighigala sa Diyos, pag-ampo, tabang sa balaang espiritu, ug tabang gikan sa langit diha sa atong ministeryo. Hisgotan sab nato kon sa unsang paagi ikapakita nato ang atong apresasyon niining dili makitang mga bahandi.

3. Unsa ang labing bililhong bahandi nga dili makita, ug sa unsang paagi naposible kana?

³ Ang labing bililhong bahandi nga dili makita mao ang atong pagpakighigala kang Jehova nga Diyos. (Sal. 25:14) Sa unsang paagi nahimong posible nga ang Diyos makapakighigala sa dili hingpit  nga mga tawo ug makapabilin gihapong balaan? Mahimo niya kana tungod kay ang halad lukat ni Jesus ‘nagpapas sa sala sa kalibotan.’ (Juan 1:29) Nahibalo nang daan si Jehova nga ang iyang katuyoan sa pagtaganag Manluluwas sa katawhan molampos gyod. Tungod niana, ang Diyos puwedeng makighigala sa mga tawo nga nabuhi sa wala pa mamatay ang Kristo.​—Roma 3:25.

4. Paghatag ug pipila ka pananglitan sa mga lalaki nga nahimong higala sa Diyos sa wala pa ang Kristohanong panahon.

⁴ Konsideraha ang pipila ka lalaki nga nahimong higala sa Diyos sa wala pa ang Kristohanong panahon. Ang usa ka pananglitan mao si Abraham. Siya nagpakitag lig-on kaayong pagtuo. Kapig 1,000 ka tuig human mamatay si Abraham, si Jehova nagtawag niya nga “akong higala.” (Isa. 41:8) Nagpasabot ni nga bisag patay na ang usa ka tawo, isipon gihapon siya ni Jehova ingong suod nga higala. Si Abraham buhi gihapon sa panumdoman ni Jehova. (Luc. 20:37, 38) Ang laing pananglitan mao si Job. Atubangan sa nagtigom nga mga anghel didto sa langit, si Jehova mapasigarbohon kang Job. Gitawag niya si Job ingong “tawong matarong ug may integridad, mahinadlokon sa Diyos ug nagsalikway sa pagkadaotan.” (Job 1:6-8) Ug unsay gibati ni Jehova kang Daniel, kinsa matinumanong nag-alagad kaniya sa mga 80 ka tuig diha sa nasod diin ang mga tawo wala magsimba kang Jehova? Tulo ka beses nga gipasaligan sa mga anghel ang maong tigulang nga tawo nga siya “gimahal pag-ayo” sa Diyos. (Dan. 9:23; 10:11, 19) Makaseguro ta nga gusto gyod ni Jehova nga banhawon ang iyang minahal nga mga higala nga patay na.​—Job 14:15.

5. Unsay kinahanglang buhaton aron matagamtam ang suod nga panaghigalaay kang Jehova?

⁵ Karon, unsa ka daghang dili hingpit nga mga tawo ang nahimong suod nga higala ni Jehova? Milyonmilyon. Nahibalo ta niini kay daghang lalaki, babaye, ug bata sa tibuok yuta ang nagpamatuod pinaagi sa ilang panggawi nga gusto nilang mahimong higala sa Diyos. Si Jehova “makigsuod . . . sa matul-id.” (Prov. 3:32) Kining suod nga relasyon nahimong posible tungod sa ilang pagtuo sa halad lukat ni Jesus. Tungod sa halad lukat, puwede tang mahimong higala ni Jehova, magpahinungod sa atong kinabuhi kaniya, ug magpabawtismo. Dihang himoon nato kining importanteng mga lakang, maapil ta sa milyonmilyong dedikado ug bawtismadong mga Kristohanon nga nakatagamtam ug suod nga panaghigalaay sa kinalabwang Persona sa uniberso!

6. Sa unsang paagi ikapakita nato ang atong apresasyon sa atong suod nga relasyon sa Diyos?

⁶ Sa unsang paagi ikapakita nato ang atong apresasyon sa atong suod nga relasyon sa Diyos? Sama kang Abraham ug Job, kinsa nagpabiling matinumanon sa Diyos sa kapig 100 ka tuig, kita kinahanglang magpabiling matinumanon bisag unsa na ta ka dugay nga nag-alagad kang Jehova niining daang sistema. Sama kang Daniel, kinahanglan nga mas pabilhan nato ang atong suod nga relasyon sa Diyos kay sa atong kinabuhi. (Dan. 6:7, 10, 16, 22) Sa tabang ni Jehova, makalahutay ta sa bisan unsang pagsulay ug makapabiling suod kaniya.​—Filip. 4:13.

7. (a) Sumala sa Proverbio 15:8, unsay pagbati ni Jehova sa atong mga pag-ampo? (b) Sa unsang paagi tubagon ni Jehova ang atong mga pag-ampo?

⁷ Ang laing bahandi nga dili makita mao ang pag-ampo. Ang suod nga managhigala ganahang mag-estoryahay bahin sa ilang hunahuna ug pagbati. Ingon ba sab niana ang atong relasyon kang Jehova? Oo! Si Jehova makigsulti kanato pinaagi sa iyang Pulong, ug diha niana iyang gipadayag kanato ang iyang hunahuna ug pagbati. Kita makig-estorya kaniya pinaagi sa pag-ampo, ug ikasulti nato kaniya kon unsa gyoy atong gihunahuna ug gibati. Si  Jehova malipayng maminaw sa atong mga pag-ampo. (Basaha ang Proverbio 15:8.) Ingong mahigugmaong Higala, si Jehova dili lang basta maminaw sa atong mga pag-ampo, kondili tubagon sab niya kana. Usahay ang tubag moabot dayon. Sa ubang higayon, tingali kinahanglan tang magpadayon sa pag-ampo. Bisan pa niana, makasalig ta nga tubagon niya kana sa hustong panahon ug sa kinamaayohang paagi. Siyempre ang tubag sa Diyos basig lahi sa atong gidahom. Pananglitan, imbes kuhaon ang pagsulay, tingali hatagan ta niyag kaalam ug kusog aron ‘malahutay kini.’​—1 Cor. 10:13.

8. Sa unsang paagi ikapakita nato ang atong apresasyon sa regalo nga pag-ampo?

⁸ Sa unsang paagi ikapakita nato ang atong apresasyon niining bililhon kaayong regalo, ang pag-ampo? Ang usa ka paagi mao ang pagsunod sa tambag ni Jehova nga ‘mag-ampo kanunay.’ (1 Tes. 5:17) Dili ta pugson ni Jehova sa pag-ampo. Hinunoa, gitahod niya ang atong kagawasan sa pagpili ug giawhag ta niya nga ‘dili mohunong sa pag-ampo.’ (Roma 12:12) Busa ikapakita nato ang atong apresasyon pinaagi sa pag-ampo kanunay sa tibuok adlaw. Siyempre, angay natong iapil sa atong mga pag-ampo ang pagpasalamat ug pagdayeg kang Jehova.​—Sal. 145:2, 3.

9. Unsay pagbati sa usa ka brader bahin sa pag-ampo, ug unsa poy imong pagbati niana?

⁹ Samtang magkadugay ta sa pag-alagad kang Jehova ug maeksperyensiyahan nato kon giunsa niya pagtubag ang atong mga hangyo, angay nga mas molawom ang atong apresasyon sa pag-ampo. Tagda pananglitan si Chris, nga 47 ka tuig nang naa sa bug-os panahong pag-alagad. Siya miingon: “Malipay kong momata sayo sa buntag aron makaampo kang Jehova. Nindot kaayo ang bation nga makig-estorya kang Jehova inigsubang sa adlaw ug maggilakgilak ang mga yamog. Kini magpalihok nako sa pagpasalamat kaniya sa tanan niyang regalo, apil ang pribilehiyo sa pag-ampo. Dayon, human nakog ampo inigkagabii, nindot kaayong matulog nga hinlog konsensiya.”

10. Nganong angay natong apresyahon ang balaang espiritu sa Diyos?

¹⁰ Ang balaang espiritu sa Diyos maoy laing  dili makitang regalo nga angay natong apresyahon. Si Jesus nag-awhag kanato nga padayong pangayoon ang balaang espiritu. (Luc. 11:9, 13) Si Jehova naggamit sa iyang balaang espiritu sa paghatag kanatog “gahom nga labaw sa kasarangan.” (2 Cor. 4:7; Buh. 1:8) Sa tabang sa espiritu sa Diyos, makalahutay ta sa bisan unsang pagsulay nga ato tingaling giatubang.

11. Sa unsang paagi makatabang nato ang balaang espiritu?

¹¹ Ang balaang espiritu makatabang nato sa paghimo sa atong mga asaynment diha sa pag-alagad sa Diyos. Kini makapauswag sa atong mga katakos. Kini makatabang sab nato sa pagtuman sa atong Kristohanong mga responsibilidad. Nahibalo ta nga ang maayong resulta sa atong mga paningkamot nahimo lang posible tungod sa tabang sa espiritu sa Diyos.

12. Sumala sa Salmo 139:23, 24, makapangayo ta sa Diyos ug balaang espiritu sa pagtabang nato sa pagbuhat sa unsa?

¹² Ang laing paagi nga ikapakita nato ang atong apresasyon sa balaang espiritu sa Diyos mao ang pag-ampo nga tabangan ta niini sa pagsusi kon duna ba tay sayop nga mga hunahuna o tinguha. (Basaha ang Salmo 139:23, 24.) Kon moampo ta niana, tabangan ta ni Jehova pinaagi sa iyang espiritu nga mahibalo sa sayop nga mga hunahuna o tinguha. Ug kon mamatikdan nato nga duna tay sayop nga mga hunahuna o tinguha, angay nga pangayoon nato sa Diyos ang iyang espiritu aron hatagan tag kusog sa pagsukol niana. Sa ingon, ikapakita nato nga determinado ta nga likayan ang bisan unsa nga mahimong hinungdan nga dili na ta tabangan ni Jehova pinaagi sa iyang balaang espiritu.​—Efe. 4:30.

13. Sa unsang paagi mas molawom ang atong apresasyon sa balaang espiritu?

¹³ Mas molawom ang atong apresasyon sa balaang espiritu kon hunahunaon nato kon unsay ginahimo niini sa atong panahon. Sa wala pa mosaka si Jesus sa langit, iyang giingnan ang iyang mga tinun-an: “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi . . . hangtod sa kinalay-ang bahin sa yuta.” (Buh. 1:8) Mao gyod nay nagakahitabo karon! Sa tabang sa balaang espiritu, mga walo ka milyon ug tunga nga mga magsisimba ni Jehova  ang natigom gikan sa tanang dapit sa yuta. Dugang pa, kita nagtagamtam ug espirituwal nga paraiso tungod kay ang espiritu sa Diyos nagtabang nato nga maugmad ang nindot nga mga hiyas sama sa gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon. Kini nga mga hiyas maoy naglangkob sa “bunga sa espiritu.” (Gal. 5:22, 23) Bililhon gyod nga regalo ang balaang espiritu!

14. Sa atong ministeryo, kinsay nagatabang nato nga dili nato makita?

¹⁴ Duna tay dili makitang regalo nga mahimong “isigkamagbubuhat” ni Jehova ug sa langitnong bahin sa iyang organisasyon. (2 Cor. 6:1) Mahimo nato kana matag higayon nga makigbahin ta sa ministeryo. Si Pablo miingon bahin kaniya ug niadtong nakigbahin niini nga buluhaton: “Kami mga isigkamagbubuhat sa Diyos.” (1 Cor. 3:9) Dihang makigbahin ta sa ministeryo, kita mga isigkamagbubuhat usab ni Jesus. Hinumdomi nga human sugoa ni Jesus ang iyang mga sumusunod nga tudloan ‘ang mga tawo sa tanang kanasoran aron mahimong mga tinun-an,’ siya miingon: “Ako magauban kaninyo.” (Mat. 28:19, 20) Ug komosta ang bahin sa mga anghel? Mapasalamaton gyod ta nga ang mga anghel naggiya kanato samtang atong ginasangyaw ang “walay kataposang maayong balita ngadto sa mga nagpuyo sa yuta.”​—Pin. 14:6.

15. Paghatag ug pananglitan sa Bibliya nga nagpakita sa importanteng papel ni Jehova sa atong ministeryo.

¹⁵ Tungod sa tabang gikan sa langit, unsay atong nalampos? Samtang nagpugas ta sa mensahe sa Gingharian, ang pipila ka binhi mahulog sa madinawatong kasingkasing ug motubo. (Mat. 13:18, 23) Kinsay nagpahinabo nga ang maong mga binhi sa kamatuoran motubo ug mamunga? Gipatin-aw ni Jesus nga ang usa dili mahimong iyang sumusunod gawas kon kini “gikabig sa Amahan.” (Juan 6:44) Ang Bibliya naghatag ug espesipikong pananglitan niini. Hinumdomi ang higayon dihang si Pablo nagsangyaw sa usa ka grupo sa mga babaye sa gawas sa siyudad sa Filipos. Matikdi ang giingon sa Bibliya bahin kang Lydia, nga usa sa maong mga babaye: “Gibuksan pag-ayo ni Jehova ang iyang kasingkasing aron maminaw sa mga gisulti ni Pablo.” (Buh. 16:13-15) Sama kang Lydia, milyonmilyon pa ang gikabig ni Jehova.

16. Kinsay angayng pasidunggan sa bisan unsa nga nalampos nato sa ministeryo?

¹⁶ Kinsay angayng pasidunggan sa bisan unsa nga nalampos nato sa ministeryo? Gitubag kana ni Pablo dihang gisulatan niya ang kongregasyon sa Corinto. Siya miingon: “Ako ang nagtanom, si Apolos ang nagbisbis, apan ang Diyos ang nagpadayon sa pagpatubo niini, busa ang nagtanom dili mao ang pasidunggan o ang nagbisbis, kondili ang Diyos nga maoy nagpatubo niini.” (1 Cor. 3:6, 7) Sama kang Pablo, kinahanglan nga ihatag nato kanunay kang Jehova ang pasidungog sa bisan unsa nga nalampos nato sa ministeryo.

17. Sa unsang paagi ikapakita nato ang atong apresasyon sa pribilehiyo nga mahimong “isigkamagbubuhat” sa Diyos, sa Kristo, ug sa mga anghel?

¹⁷ Sa unsang paagi ikapakita nato ang atong apresasyon sa pribilehiyo nga mahimong “isigkamagbubuhat” sa Diyos, sa Kristo, ug sa mga anghel? Mahimo nato kana pinaagi sa pagpaningkamot nga makakitag kahigayonan sa pagsangyaw sa maayong balita. Dunay daghang paagi sa paghimo niini, sama sa pagsangyaw sa “publiko ug sa balay ug balay.” (Buh. 20:20) Daghan sab ang ganahang mosangyaw sa impormal nga paagi. Dihang sila makahimamat ug dili nila kaila, ila kining timbayaon ug maningkamot sila nga makasugod ug panag-estoryahay. Kon ang tawo ganahang makig-estorya, maningkamot sila nga mahisgotan ang mensahe sa Gingharian.

18-19. (a) Sa unsang paagi nato bisbisan ang mga binhi sa kamatuoran? (b) Iasoy ang usa ka eksperyensiya nga nagpakita kon giunsa pagtabang ni Jehova ang usa ka Bible study.

 ¹⁸ Ingong “mga isigkamagbubuhat sa Diyos,” dili lang ta basta magpugas ug mga binhi sa kamatuoran kondili bisbisan sab nato kana. Kon dunay magpakitag interes, maningkamot ta nga balikan siya o hangyoon nato ang laing igsoon nga moduaw niya sa tuyo nga makasugod ug pagtuon sa Bibliya. Samtang magpadayon ang pagtuon, malipay ta dihang makita nato nga ginatabangan ni Jehova ang Bible study nga mabag-o ang iyang kasingkasing ug hunahuna.

¹⁹ Konsideraha ang eksperyensiya ni Raphalalani, nga usa ka tambalan sa South Africa. Ganahan siya sa iyang nakat-onan sa pag-Bible study. Pero naglisod siya pagdawat sa giingon sa Pulong sa Diyos bahin sa pagpakig-estorya sa patay na nga mga katigulangan. (Deut. 18:10-12) Pero anam-anam nga gitugotan niya ang Diyos sa pag-usab sa iyang hunahuna. Unya, mibiya siya sa iyang pagkatambalan bisag mao ra toy iyang panginabuhian. Si Raphalalani, nga karon 60 anyos na, miingon: “Mapasalamaton kaayo ko sa mga Saksi ni Jehova sa pagtabang nako sa daghang paagi, sama sa pagpangitag trabaho. Labaw sa tanan, mapasalamaton ko kang Jehova sa pagtabang nako sa paghinlo sa akong kinabuhi, mao nga karon makapakigbahin na ko sa ministeryo ingong usa sa iyang bawtismadong mga Saksi.”

20. Unsay determinado nimong buhaton?

²⁰ Niining artikuloha, atong nahisgotan ang upat ka regalo nga dili makita. Ang kinalabwan niana mao ang pribilehiyo nga mahimo natong pinakasuod nga Higala si Jehova. Tungod niana, makabenepisyo ta sa uban pang dili makita nga mga regalo​—kita makaduol niya sa pag-ampo, makasinati sa tabang sa iyang balaang espiritu, ug makadawat ug tabang gikan sa langit diha sa atong ministeryo. Hinaot nga magmadeterminado ta nga palalomon ang atong apresasyon niining dili makita nga mga regalo. Ug hinaot nga dili ta moundang sa pagpasalamat kang Jehova kay siya maayo kaayo nga Higala.